Maara Ainei ia Koe?

Kua rekareka ainei koe i te tatau anga i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

• Ka akatuakaouia mai ainei tetai pepe anau mateia mai?

E akamata ana te oraanga tangata i te to anga. Ka rauka ia Iehova i te akatuakaou mai i te au tangata i tetai ua atu taime o to ratou oraanga no te mea “kare rav[a] e mea e kore ei e tika i te Atua.” (Mare. 10:27) Inara kare te Pipiria e tuatua tika mai ana e ka akatuakaou mai aia i te au tamariki kare i anauia, tei mate i roto i te vairanga tamariki.​—4/15, kapi 12, 13.

• Eaa ta tatou ka mou mai mei te akara anga atu i te ro, te saphana, te tapaki, e te moko are?

Te akatutu maira teia au manu e a i te pakari maata. No reira, te akangateitei maira ratou i te pakari o te Atua. (Mase. 30:​24-28)​—4/15, kapi 16-19.

• Eaa ra te Pipiria i tuatua akameitaki ei i te tu muteki ua?

Te akaari maira te reira e ka tau te tu muteki ua ei akairo no te akangateitei anga, ei mea puapinga ki te manako oonu anga, e e akapapuanga no te tu kite e te manako meitaki. (Sala. 37:7; 63:6; Mase. 11:12)​—5/15, kapi 3-5.

• Eia au ariki ngati Iuda i akaari mai i te maroiroi takake rava no te are o te Atua?

E tai ngauru ma iva ariki i tutara ana ki rungao i te patireia tonga o Iuda, e e a ia ratou tei kitea meitakiia no taua maroiroi ra​—ko Asa, ko Iehosaphata, ko Hezekia, e Iosia.​—6/15, kapi 7-11.

• Te piri pouroa ainei te au Kerititiano akatainuia i runga nei i te enua ki te oronga anga i te kai pae vaerua?

Kare. Te katoatoa rava tei akatainuia ki te vaerua o te Atua e tuanga ratou no te tavini akono meitaki e te pakari, inara na te aronga i roto i te Pupu Akaaere, e akaaere ana i te oronga anga i te kai pae vaerua.​—6/15, kapi 22-24.

• I roto i teea au ngai e rauka ai i te au metua i te tereni i ta ratou au mapu i mua ake ka akaruke ei ratou i te kainga?

Ka tau ratou kia rave tamou putuputu i tetai porokaramu pae vaerua, kia rave i te au ikianga e te au tuku anga tika meitaki, kia komunikeiti meitaki ki etai ke, kia akono i tona oraanga kopapa, kia akaaere meitaki i tana moni, kia akono e te tama i te kainga me kore te apatimani, e kia manako ua i te rave i te angaanga.​—7/1, kapi 12.

• Eaa te mea i riro ei te mataiti 2009, e ko te anereanga mataiti no te Au Kite o Iehova?

I te mataiti 1909, kua nekeia te opati maata o te Watch Tower Bible and Tract Society, te akaaerenga akatikaia e te ture no te neneianga e taangaangaia ra e te Au Kite o Iehova, mei Pittsburgh, i Pennsylvania, ki Brooklyn, i New York, te ngai e angaanga mai nei rai te reira.​—7/1, kapi 14-16.

• No teaa ra i tuatuaia ai e ko te mea puapinga tei akatuke i ta Iesu akono anga i te tangata ki ta te au arataki akonoanga, koia oki ko te aroa?

Kare i aroa i te au tangata noa ua, kua akavaavaa taua au arataki ra ia ratou. Tetai katoa, kare ratou e inangaro ana i te Atua. Kua inangaro tikai a Iesu i tona Metua e kua tangi aia i te tangata. (Mata. 9:36) E tu pumaana tikai tona, e tu tangi, e te takinga meitaki no ratou.​—7/15, kapi 15.