Tavini Ana Koe i Mua Ana? Ka Rauka Ainei ia Koe te Tavini Akaou?

I TAVINI ana koe i tetai taime i roto i tetai taoonga irinakiia i roto i te putuputuanga Kerititiano? Penei e tavini tauturu me kore e tangata pakari koe. Penei i tavini tamou ana koe. Kare e ekoko e kua kite mai koe i te tu mataora e te merengo oonu i roto i taau au tukuanga angaanga, inara no tetai au tumu, kua anoanoia koe kia akaruke i te reira.

Penei e kua akaruke koe i toou tikaanga, kia akono i te au mema o toou pamiri. Penei i tetai tua, ko te tumu kua pakari me kore kua apikepike te kopapa. Kare te reira au ikianga i te akairo e kua puapinga kore koe. (1 Timo. 5:8) I te anere mataiti mua, kua tavini a Philipa ei mitinari, inara i muri mai, kua noo aia ki Kaisarea, te ngai i akono ei aia i tona pamiri. (Anga. 21:​8, 9) I te ruaine anga te Ariki ko Davida o Iseraela i taito, kua tuku aia i tana tamaiti ko Solomona ei kauono iaia i runga i tona terono. (1 Ari. 1:​1, 32-35) E oti akera, kua inangaro e kua akaperepere rai a Iehova ia Philipa raua ko Davida, e te akangateiteiia nei rai raua e te tangata o teia tuatau.

Penei ra oki e, kua akangaroiia mai koe mei taau tukuanga angaanga. Penei kua apai keia te au tukuanga angaanga no te mea kua o koe ki roto tetai angaanga kamakura, me kore no te au manamanata o toou pamiri? (1 Timo. 3:​2, 4, 10, 12) Penei e kua manako koe e kare i tau kia apai keia te tikaanga kia tavini mei ia koe, e te akamoupuku nei rai koe e tae mai ki teia ra.

Ka Rauka ia Koe te Tauta kia Tavini Akaou

Me ngaro toou tikaanga kia tavini ka rauka akaou mai ainei te reira? I te maataanga o te taime, kare. E rauka ai ia koe kia tavini akaou, ka anoanoia koe kia tauta atu rai. (1 Timo. 3:1) Inara, eaa ka inangaroia ai teia? No taua tumu rai i akatapu ei koe ia koe uaorai ki te Atua​—no te aroa ia Iehova e te aronga e tavini ra iaia. Me puareinga ua koe i te akaari i taua aroa ra na te tavini akaou anga, ka oronga teia i tetai atianga no Iehova kia taangaanga i tei tupu kia koe, i mua ake e i muri ake i ngere ei koe i toou tikaanga kia tavini.

E akamaara ana i te akapapuanga ta Iehova i oronga ki te ngati Iseraela, i muri ake ka apai ke ei aia i to ratou tikaanga takake i mua i tona aroaro. Kua karanga tana Tuatua e: “Ko Iehova au, kare au e tu ke ke, no reira kotou, e te au tamariki a Iakoba, i kore ei i pou.” (Mala. 3:6) Kua inangaro tikai a Iehova i to Iseraela, e kua inangaro i te taangaanga maata atu ia ratou. Mei te reira rai tona inangaro i te taangaanga ia koe i te tuatau ki mua. Eaa taau ka rave i roto i toou au turanga i teianei? Ko te tavini anga i te au anoano teokaratiki, ka irinaki maataia ki runga i tetai pirianga meitaki kia Iehova, kare e ki runga i te tu kite karape natura. No reira, i te mea e kare aau apainga akaou i roto i te putuputuanga, akamatutuia toou pirianga kia Iehova.

Kia “akamaroiroi” i roto i te akarongo, ka anoanoia koe kia “kimi ia Iehova e tona ra ririnui.” (1 Kori. 16:13; Sala. 105:4) Tetai mataara e rauka ai teia ia koe koia oki na roto i te pure ngakau tae. Me akataka koe i toou turanga kia Iehova, e akakite i toou au manako kiaia e e pati i tona vaerua. Na te rave anga i teia, ka akavaitata atu koe kia Iehova, e na teia e akatinamou ia koe. (Sala. 62:8; Phili. 4:​6, 13) Ko tetai mataara i te akamatutu ia koe i te pae vaerua, koia oki ko te akameitaki atu i taau apii i te Tuatua a te Atua. Ia koe kare i maata ake taau au apainga i teianei, penei e maata atu te ka rauka ia koe i te rave no runga i te apii naau uaorai e te apii a te pamiri, penei i te akamata akaou anga i te porokaramu apii kare e rave akaouia ana.

 E tika, te komono nei rai koe ia Iehova ei Kite nona. (Isa. 43:​10-12) Ko te turanga ngateitei rava atu ta tetai ua atu o tatou ka rauka, koia oki ko te riro anga mai ei ‘oa rave angaanga no te Atua.’ (1 Kori. 3:9) Ko te akamaata atu i ta tatou ka rave i roto i te angaanga tutuanga, tetai mataara manea i te akamatutu i to tatou pirianga kia Iehova, e to tatou au taeake i roto i te angaanga orometua.

Autu Anga i Toou Au Manako Ngakau

Te ngere anga i te tikaanga kia tavini, penei ka akatupu i te manako akama me kore i te tataraara ki roto ia koe. Penei ka tauta koe i te akapapu e kua tano rai taau au raveanga. Inara, ka akapeea i reira me ka akarongo mai te au taeake irinakiia ki taau paruruanga ia koe, e ka manako rai e kia apai keia tetai o toou tikaanga? Penei ka vai ua toou manako kino no te au taeake, e ka arai ia koe kia tauta atu me kore kia akatupu i te tu ngata noou i te tamou mai i te apiianga mei teia tupuanga. Ka akara ana tatou e i akapeea te au tupuanga kia Iobu, Manase, e Iosepha i te tauturu anga i tetai tangata kia autu i te au manako kino.

Kua komono ana a Iobu i etai ke ki mua i te aroaro o Iehova, e kua riro ana ei tangata pakari e ei akava i roto i te taiate pateriareka. (Iobu 1:5; 29:​7-17, 21-25) I reira, i tetai tuatau puapinga maata tikai i roto i tona oraanga, kua ngere a Iobu i tana apinga nui, tana tamariki, e tona oraanga kopapa maroiroi. Kapiti mai ki teia, kua ngere katoa aia i tona tu rongo meitaki i roto i te mata o etai ke. “Tei kata aviri mai iaku,” i tuatua ai a Iobu, “ko tei iti to ratou puke rā i toku.”​—Iobu 30:1.

Kua irinaki tikai a Iobu e kua tiama aia, e kua inangaro i te akapapu i tona tu tika ki mua i te Atua. (Iobu 13:15) Noatu ra, kua puareinga ua a Iobu i te tiaki ia Iehova, e kua akameitakiia mai aia no te reira. Kua kite mai aia e te anoanoia ra aia kia akatikatikaia, kia tau meitaki tikai ki tona ariu anga atu ki te timataanga tei tupu kiaia. (Iobu 40:​6-8; 42:​3, 6) I te openga, ko tei tupu mai no to Iobu tu akaaka kua akameitaki maataia aia e te Atua.​—Iobu 42:​10-13.

Me kua ngere koe i te tikaanga no te tarevake taau i rave, penei ka manako koe e me ka akakore tikaiia mai taau ara e ka akangaropoinaia e Iehova e e toou au taeake Kerititiano. Ina, e akara ana i tei tupu ki te Ariki ko Manase o Iuda. “E ravenga kino maata tana i mua i te aroaro o Iehova, ei akakoko iaia kia riri.” (2 Ari. 21:6) Inara, e tangata akarongo mou a Manase i tona mate anga, e te tutara ra rai ei ariki. Akapeea ra teia i tupu ei?

I te openga kua ariki a Manase i te ako. I muri ake i tona kopae anga i te au akamatakiteanga, kua apai mai a Iehova i to Asura e tamaki mai iaia, e na ratou i tapeka iaia e i akataa ki te enua mamao o Babulonia. I reira, “kua taakaaka rava [a Manase] iaia uaorai ki mua i te aroaro o te Atua o tona ra ai metua, e kua pure oki aia iaia.” Ko te tataraaraanga mei roto i te ngakau, e oronga mai ana i te angaanga tei tau ki te akatikatika anga i te tarevake, e kua akakoreia te ara a Manase.​—2 Para. 33:​12, 13.

Kare e akaoki pouroaia mai ana te au tikaanga tei apai keia, i te taime okotai. Inara, i muri ake i tetai au taime, penei ka orongaia mai tetai au apainga kia koe. Na te ariki anga i teia e te rave anga i te reira ma toou maroiroi katoa, ka taki putuputu atu ki te au tukuanga angaanga maata  atu. Penei kare teia turanga e meitaki viviki me kore e ngoie ua mei taau e tapapa atura. Penei ka tupu mai te maromaroa. Tera ra, na te tu puareinga ua e te akakoromakianga e apai mai i te au ua meitaki.

Ka akamanako ana i te akaraanga o te tamaiti a Iakoba, ko Iosepha. E 17 ona mataiti, i te oko tika koreia anga a Iosepha ei tuikaa e tona au tuakana. (Gene. 37:​2, 26-28) Kare rava teia i te akonoanga tana e tapapa atura mei te au tamariki a tona metua tane. Inara, kua puareinga ua aia i te angaanga ma teia au turanga, e ma te akameitakianga a Iehova kua riro mai aia ei akaaere i “te are o tona pu.” (Gene. 39:2) I muri mai, kua tiria a Iosepha ki roto i te are auri. Inara kua akapapu aia i tona tu akarongo mou e tei iaia a Iehova, no reira i te openga, kua riro mai aia ei akaaere i te au mea ravarai o te are auri.​—Gene. 39:​21-23.

Kare rava a Iosepha i kite ana e e akakoroanga to te au mataiti ravarai, iaia i roto i te are auri. Kua rave ua atu rai aia i tei rauka iaia. No reira i rauka ai ia Iehova i te taangaanga iaia, kia ora te au tangata e taki atura ki te Uanga taputouia. (Gene. 3:15; 45:​5-8) Noatu e kare okotai ia tatou e rauka i te tapapa atu kia rave i tetai tuanga puapinga tei raveia e Iosepha, te akaari maira te tataanga akauruia e te o maira te rima o Iehova ki roto i te au tikaanga e rauka ra i Tona au tavini. E akatuera ua i te mataara na te aru anga i te akaraanga o Iosepha.

Apiianga Mei te Au Tupuanga Ngata

Kua kite mai a Iobu, a Manase, e Iosepha i tetai au tupuanga taitaia tikai. Kua ariki ratou pouroa i ta Iehova i akatika kia tupu, e kua tamou mai ratou tataki tai i te au apiianga puapinga. Eaa i reira taau ka tamou mai?

E akara e eaa ta Iehova e tauta ra i te apii atu kia koe. I roto i tana tauta anga ma te tu taitaia, kua riro mai a Iobu i te manako iaia uaorai, e kua akangaropoina i te au maroanga mamaata atu. Inara, ma te akatikatikaanga aroa a Iehova, kua rauka iaia te manako tau i te akakite anga e: “Kua tuatua au i tei kore i kitea e au ra.” (Iobu 42:3) Me te mamae ra koe no tei apai keia te au tikaanga, ‘eiaa e maata te manako ia koe uaorai, i tei tau ia koe kia manako; ka akono tikai ra te manako kia arite i te tu o te akarongo.’ (Roma 12:3) Penei te akatikatika ra a Iehova ia koe i roto i tetai tu kare koe i marama pu tikai ake.

Ariki i te ako. Penei kua manako a Manase i te akamataanga e kare i tau te akaapaanga pakari tei orongaia nona. Inara kua ariki aia i te reira, e kua akaruke i tona arataa tarevake. Noatu e eaa toou manako i te ako tei rauka ia koe, ‘ka taakaaka na ia koe ki mua i te aroaro o Iehova, e nana koe e akateitei.’​—1 Pete. 5:6; Iako. 4:10.

E akakoromaki e kia puareinga ua. Ka rauka ngoie ua i te au mea tei tupu kia Iosepha kia taki atu iaia kia akamoupuku e kia manako i te tupau atu i te kino. Ei tuke ra, kua akatupu aia i te tu kite pakari e te tu akaaroa. (Gene. 50:​15-21) Me i maromaroa ana koe, e akakoromaki. Kia puareinga ua i te terenianga a Iehova.

I tavini ana koe i tetai taime i roto i tetai turanga irinakiia i roto i te putuputuanga Kerititiano? E oronga i te atianga kia Iehova kia akataka i te au tikaanga noou i te tuatau ki mua. E akamatutu ia koe i te pae vaerua. Akatanoia toou au manako ki te tu akakoromaki e te tu akaaka. E ariki puareinga ua i tetai ua atu tukuanga angaanga penei ka orongaia mai kia koe. Kia papu e “kare rava o [Iehova] meitaki e tāpu i te aronga aerenga tiratiratu.”​—Sala. 84:11.

[Tataanga i te kapi 30]

Akamaroiroi i te akarongo na roto i te pure ngakau tae

[Tutu i te kapi 31]

Te akamaata atu i te angaanga tutuanga tetai arataa manea i te akamatutu i toou pirianga kia Iehova

[Tutu i te kapi 32]

Oronga i te atianga kia Iehova kia oronga mai i te au tikaanga noou i te tuatau ki mua