Akakeu te Aroa o Karaiti ia Tatou kia Aroa

“I aroa aia i tona tangata i te ao nei, aroa ua atura aia ia ratou e tae ua atura ki te openga ra.”​—IOA. 13:1.

1, 2. (a) Eaa ra te mea umere no runga i te aroa ta Iesu i akaari? (e) Eaa ua ai te au tuanga o te aroa ta tatou ka uriuri i roto i teia atikara?

KUA akanoo a Iesu i te akaraanga apa kore o te aroa. Te au mea pouroa no runga iaia​—tana tuatua, tona tu, tana apiianga, e tona mate akaatinga—​kua akaari mai te reira i tona aroa. E tae ua atu ki te openga o tona oraanga i te enua nei, kua akaari a Iesu i te aroa ki te aronga tana i aravei atu e ki tana au pipi tikai.

² Te akanoo ra to Iesu akaraanga umere no te aroa i te turanga teitei no tana au pipi kia aru. Te akakeu katoa ra te reira ia tatou kia akaari i taua aroa rai ki to tatou au taeake e te au tuaine i roto i te putuputuanga, e pera katoa ki etai ke atu. I roto i teia atikara, ka akamanako tatou e eaa ta te aronga pakari o te putuputuanga ka tamou mai mei ia Iesu no runga i te akaari anga i te aroa ki te aronga tei rave i te tarevake, e pera katoa te au tarevake kino tikai. Ka uriuri katoa tatou e ka akapeea to Iesu aroa i te akakeu anga i te au Kerititiano, kia tauturu i to ratou au taeake e etai ke atu i te pae o te moni, i te tuatau tumatetenga, e me rokoia e te maki.

3. Noatu ta Petero au tarevake kino tikai i rave, i akapeea ra a Iesu i te akono atu anga iaia?

³ I te po i mua ake i to Iesu mate anga, kua uuna tana uaorai apotetoro ko Petero iaia e toru taime. (Mare. 14:​66-72) E oti akera, i te oki mai anga a Petero, mei ta Iesu rai i totou, kua akakore a Iesu i tana ara. Kua tuku a Iesu i tetai au apainga puapinga tikai kia akono a Petero. (Luka 22:32; Anga. 2:14; 8:​14-17; 10:​44, 45) Eaa ta tatou ka mou mai mei to Iesu tu ki te aronga tei rave i te au tarevake kino tikai?

Akaari i te Tu Manako o Karaiti ki Tei Rave i te Tarevake

4. Eaa ra te turanga te ka inangaroia tikai kia akaari i te tu manako o Karaiti?

⁴ I rotopu i te au turanga e manganui te ka inangaroia kia akaari i to Karaiti tu manako, ko tetai mea okotai te ka riro ei mamae ngakau, koia oki ko te tarevake kino tikai tei raveia e etai ke atu, i roto i te pamiri me kore i roto i te putuputuanga. Te mea taitaia ra, no te mea e te vaitata roa nei ki te take o te au ra openga o to Satani akatereanga, te riro nei te vaerua o teianei ao ei takino rava atu i te turanga akono tau. Te tu manako kore me kore te manako kino o teianei ao no te mea tika e te mea tarevake ka riro ei akatuke i tetai ua atu ia tatou, i te akaparuparu anga i to tatou akakoroanga kia rave i te mea tika. I te anere mataiti mua, kua anoanoia kia akaateaia tetai pae mei te putuputuanga Kerititiano, e kua akoia atu etai ke atu. Mei te reira katoa i teia tuatau. (1 Kori. 5:​11-13; 1 Timo. 5:20) Noatu ra, me akaari te aronga pakari e akono ra i teia au mea nei i te aroa mei to Karaiti rai, ka riro teia ei akakeuanga ririnui ki runga i tei rave i te tarevake.

5. Akapeea te aronga pakari i te aru anga i to Karaiti tu ki tei rave i te tarevake?

⁵ Mei ia Iesu rai, ka anoanoia te aronga pakari kia aru i to Iehova turanga tika i te au taime pouroa. I te rave anga i teia, te akaata ra ratou i to Iehova tu maru, te takinga meitaki e te aroa. Me tataraara tikai tetai tangata, “ngakau paruparu” e te “ngakau taitaia” no tona tarevake, penei kare te reira e riro ei mea ngata no te aronga pakari kia ‘akaora i tei akono i ta te vaerua ra, ma te ngakau maru.’ (Sala. 34:18; Gala. 6:1) Inara ka akapeea ratou i te akono atu anga i tetai tei akarongo kore e kare rai e akaari ana i te tu tataraara?

6. Eaa te ka anoanoia te aronga pakari kia kopae, me akono atu i te aronga tei rave i te tarevake, e no teaa ra?

⁶ Me kopae te tangata rave tarevake i te akoanga Tuatua Tapu, me kore ka akaapa atu i tetai ke no tana tarevake, penei ka riri te aronga pakari e etai atu. I te kite anga i te kino ta taua tangata i rave, penei ka taki atu ia ratou kia akaari i to ratou uaorai au manako no runga i te au angaanga e te tu o taua tangata ra. Inara, ka riro te riri ei akatupu i te  mamae e kare te reira e akaata ana i “te ngakau o te Mesia.” (1 Kori. 2:16; tatau ia Iakobo 1:​19, 20.) Kua akamatakite a Iesu i tetai pae i tona tuatau na roto i te tuatua taka meitaki tikai, inara kare rava aia i tuatua kino ana me kore i akakoro ana kia akatupu i te mamae. (1 Pete. 2:23) Mari ra, na roto i tana tuatua e tana angaanga kua akataka meitaki aia ki te aronga tei rave i te tarevake e ka rauka ia ratou kia tataraara e kia rauka ta Iehova akaperepereanga. Tika rava e, ko tetai tumu maata i aere mai ei a Iesu ki te ao nei koia oki kia “akaora i te aronga ara.”​—1 Timo. 1:15.

7, 8. Eaa te mea te ka tau ei arataki i te aronga pakari i roto i ta ratou au tukuanga tika?

⁷ Akapeea to Iesu akaraanga i roto i teia tu i te akatuke anga i te mataara ka manako atu tatou i te aronga ka anoanoia kia akoia e te putuputuanga? E akamaara e ko te aratakianga a te Pipiria no tetai tukuanga tika no runga i tei rave i te tarevake i roto i te putuputuanga, ka riro ei paruru i te anana e penei ei akakeu i tei rave i te tarevake, e tei akoia kia tataraara. (2 Kori. 2:​6-8) Ko te mea taitaia ra, kare tetai pae e tataraara ana e ka anoanoia kia akaateaia, inara e akamaroiroianga tikai i te kite e e maata ua atu to taua aronga ra, te oki maira kia Iehova e ki tana putuputuanga i muri mai. Me akaari te aronga pakari i te tu mei to Karaiti rai, ka mama i reira no te tangata kia akamanako akaou i tana angaanga i rave ana e kia oki mai. Penei a te tuatau ki mua, kare tetai o teia aronga tei rave ana i te tarevake e maara i te akoanga Pipiria pouroa ta te aronga pakari i oronga kia ratou, inara ka maara tikai ia ratou e kua akaari ana te aronga pakari i te tu akangateitei kia ratou e kua akono atu ia ratou ma te aroa.

⁸ No reira, te anoanoia ra te aronga pakari kia akaari i ‘ta te vaerua,’ te mea maata roa atu koia oki te aroa mei to Karaiti rai, me kare tei rave i te tarevake e ariki i te akoanga Tuatua Tapu. (Gala. 5:​22, 23) Eiaa ratou e rapurapu i te akaatea i tei rave i te tarevake. Ka anoanoia ratou kia akaari e te inangaro ra ratou i te aronga tei rave i te tarevake kia oki mai kia Iehova. No reira, me tataraara tetai tangata rave ara i muri mai, mei ta te maata e rave ana, penei ka rekareka maata atu tona ngakau ia Iehova e i te tu “meitaki i te tangata nei” tei akangoie i te mataara nona kia oki mai ki te putuputuanga.​—Ephe. 4:​8, 11, 12.

Akaari i te Aroa Mei to Karaiti i te Tuatau Openga

9. Oronga mai i tetai akaraanga ia Iesu e akaari ra i te aroa no tana au pipi.

⁹ Kua rekoti a Luka i tetai atianga umere tikai i te taangaanga anga a Iesu i te aroa. Na te kite anga e, i  te tuatau ka aereia, ka koropini te au vaeau Roma i te oire ko Ierusalema te ka takoreia, i te arai anga i te tangata kia kore e oro mai ki vao, kua akamatakite atu a Iesu i tana au pipi e: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou.” Eaa ra ta ratou ka tau kia rave? Kua oronga atu a Iesu i te au ikuikuanga taka meitaki tikai na mua. “Te aronga e noo i Iudea ra, ka oro ratou ki te maunga i reira; e to roto i te oire ra, ka aere ïa ki vao; e auraka to te au ngai katoa ra e tomo akaou ki roto i te oire. E tuatau akaoko anga oki te reira, e ope ei te au tuatua i tataia ra i te akatupuia.” (Luka 21:​20-22) I muri ake i te koropini anga te au vaeau Roma ia Ierusalema i te mataiti 66 T.N., kua aru te aronga akarongo i teia au ikuikuanga.

10, 11. Ka akapeea te akamanako anga no runga i te oro anga te au Kerititiano mua mei Ierusalema, i te tauturu anga ia tatou kia akateateamamao no te “mate maata”?

¹⁰ I to ratou oro anga mei ia Ierusalema, kua anoanoia te au Kerititiano kia akaari i te aroa mei to Karaiti rai no tetai e tetai, mei ta Karaiti i akaari ana no ratou. E mea papu e te umuumuia ra kia oronga atu ratou i ta ratou i rauka no tetai e tetai. Inara, e tupuanga maata roa atu ta Iesu i totou i to te akapou ua anga o taua oire taito ra. Kua totou aia e: “E mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.” (Mata. 24:​17, 18, 21) I mua ake e i te tuatau o taua “mate maata” ra e a te tuatau ka aereia, penei ka aro atu tatou i te au turanga ngata e te ngere i te pae o te au apinga materia. Ka tauturu te tu manako o Karaiti ia tatou kia akakoromaki i te reira.

¹¹ I taua taime ra, ka anoanoia tatou kia aru i to Iesu akaraanga, te akaari anga i te aroa karapii kore. Tei piri atu ki teia, kua ako atu a Paulo e: “E akarekareka tatou katoa nei i tetai ke, kia meitaki aia, kia maroiroi. Kare katoa oki te Mesia i akarekareka iaia uaorai . . . E teianei, kia akaarite mai te Atua nona te akakoromaki e te pumaana, i to kotou ngakau, tetai ki tetai kia tau i te anoano o te Mesia ra o Iesu.”​—Roma 15:​2, 3, 5.

12. Eaa ra te tu o te aroa ka anoanoia tatou kia akatupu i teianei, e no teaa ra?

¹² Kua raurau atu rai a Petero, tetai tei rauka te aroa o Iesu, i te au Kerititiano kia akatupu i “te aroa taeake pikikaa kore” e kia akaari i te “akarongo anga i te tuatua-mou.” Ka anoanoia ratou ‘kia aroa maata ratou ia ratou uaorai ma te ngakau kinokino kore.’ (1 Pete. 1:22) I teia tuatau, ka anoano maata roaia tatou kia akatupu i taua au tu mei to Karaiti rai. Kua tupu takere te  au taomianga ki runga i te iti tangata pouroa o te Atua ki te maata. Eiaa roa tetai e tuku i tona irinaki ki roto i tetai ua atu tuanga o teianei ao, mei ta te turanga taitaia i tupu ua akenei i roto i te akatereanga o te pae moni o teia ao e akaari taka meitaki maira. (E tatau ia 1 Ioane 2:​15-17.) Mari ra, i te mea e te vaitata roa mai nei te openga o teia akatereanga, te anoanoia ra tatou kia akapiri vaitata atu kia Iehova e ki tetai e tetai, te akatupu anga i te pirianga vaitata i roto i te putuputuanga. Kua ako atu a Paulo e: “Ma te aroa taeake ra e aroa takinga meitaki atu i tetai e tetai. I te akaari anga i te akangateitei i tetai e tetai e oronga i te akaraanga.” (Roma 12:10, NW) E kua akateimaa atu a Petero i te puapinga o te reira, i te na ko anga e: “Ko te aroa rai, kia maata tikaia ïa ia kotou uaorai: ka ngaro oki te apa e manganui i te aroa.”​—1 Pete. 4:8.

13-15. Akapeea tetai au taeake i te akaari anga i te aroa mei to Karaiti rai i muri ake i te kino ta te tumatetenga i akatupu?

¹³ Takapini i teianei ao, ka kite uaia te Au Kite o Iehova no te akaari anga i te aroa tika tikai. Ka akamanako ana i te Au Kite tei inangaro i te tauturu i muri ake i te takore anga te matangi ririnui e te au uriia i tetai ngai maata i te tua tonga o Marike i te mataiti 2005. Akakeuia e te akaraanga o Iesu no te aroa, kua tere atu i te 20,000 tei inangaro i te tauturu, te maataanga kua akaruke i to ratou au kainga manea e ta ratou au ngai angaanga tinamou, ei tauturu i to ratou au taeake tei rokoia e te tumatetenga.

¹⁴ I tetai ngai, kua tae rava te tai e 80 kiromita te mamao ki uta i te enua, i te akaki anga mai e 10 mita te teitei. I te oki anga te tai, kua takore takiriia e tai toru o te au kainga e tetai au ngutuare ke mai o reira. Kua aere mai te au Kite tu karape mei te au enua mai, e ta ratou au apinga angaanga, e te au apinga no te akatu are ki te reira ngai, e kua inangaro puareinga ua i te rave i te angaanga te ka inangaroia i te rave. Kua akaki mai tetai nga tuaine takaua, e teina tuakana, i to raua toroka meangiti ki ta raua uaorai apinga, e kua akaoro atu e 3,000 tuma kiro mita te mamao kia rauka ia raua i te tauturu. Kua noo rai te teina ki reira, e te tauturu ra rai i te kumiti tauturu o te reira ngai e te tavini ra ei painia tamou.

¹⁵ Kua tere atu i te 5,600 au kainga o te Au Kite e etai aronga ke mai i taua ngai ra tei patu akaouia me kore tei ripeaia. Eaa ra te manako o te Au Kite o te reira ngai no runga i te akaariia anga teia tu aroa umere? Kua neke atu tetai tuaine tei takoreia tona kainga, ki roto i tetai terera meangiti kua putaputa te tauu e kua kino tana umu. Kua patu akaou te au taeake i tetai are manea e te tau tikai nona. Te tu anga aia ki mua i tona are ou e te manea, kua aue aia no tona aka rekareka no Iehova e no tona au taeake. I roto i tetai au turanga ke atu, kua noo atu rai te Au Kite no tetai mataiti me kore tere atu, ki roto i te au ngai nooanga tei akatakaia no te tuatau poto ua, i muri ake i te patu akaouia anga to ratou kainga. No teaa ra? Kia rauka ia ratou i te oronga atu i to ratou au kainga ou no te aronga angaanga tauturu. Kare e aiteia teia akaraanga no te akaari anga i te tu manako o Karaiti!

 Akaari i te Tu Manako o Karaiti ki te Maki

16, 17. Na roto i teea au mataara ka rauka ai ia tatou i te akaata i te tu manako o Karaiti ki te aronga maki?

¹⁶ Tokoiti ua ia tatou tei kite ana i tetai tumatetenga maata tikai. Inara vaitata rai e ka aro atu te katoatoa i te au manamanata i te pae o te oraanga kopapa, i tona uaorai me kore i to te au mema o te pamiri. Ka riro to Iesu tu manako ki te aronga maki ei akaraanga no tatou. Kua akakeu tona aroa iaia kia tangi atu ia ratou. I te apai mai anga te urupu tangata i to ratou aronga maki kiaia, kua “akaora atura [aia] i te aronga katoa i mate i te maki.”​—Mata. 8:16; 14:14.

¹⁷ I teia tuatau, kare o te au Kerititiano mana temeio mei to Iesu rai kia akaora, mari ra, mei a Iesu rai e tu tangi aroa to ratou ki te aronga maki. Akapeea ra te reira i te akaariia anga? Tetai akapapuanga, ka akaari te aronga pakari e tei ia ratou te tu manako o Karaiti na te akaaere anga i te angaanga no te tauturu anga i te aronga maki i roto i te putuputuanga e kia papu e te orongaia ra teia tauturu, i te aru anga i te kaveinga tei taikuia i roto ia Mataio 25:​39, 40. * (Tatau.)

18. Akapeea tetai nga tuaine i te akaari anga i te aroa tika tikai ki tetai tuaine ke mai, e eaa tei tupu?

¹⁸ E tika e, kare tetai e anoanoia kia riro mai ei tangata pakari kia rauka i te rave i te meitaki no etai ke atu. Akamanako ana i te turanga o Charlene e 44 ona mataiti, tei tuia e te maki cancer e kua akakiteia kiaia e e taingauru rai ona ra toe. I te kite anga a Sharon raua ko Nicolette, e nga tuaine i roto i te putuputuanga, e ka anoanoia tetai tauturu nona, e mei teaa katoa te ngata no tana tane i te pae kopapa e i te pae manako kia akono iaia, kua rave raua e na raua e akono iaia i tona au ra openga. Kua tere atu taua au ra ra ki te ono epetoma, inara kua akaari rai te nga tuaine i to raua aroa e tae ua atu ki te openga. “E mea ngata tikai me kua kite koe e kare tetai tangata e meitaki,” i karanga ai a Sharon. “Inara, kua akamatutu mai a Iehova ia maua. Kua riro te reira tupuanga ei akapiri vaitata ia maua kiaia e ki tetai e tetai.” Te akakite ra te tane a Charlene e: “Ka maara ua rai iaku te tu takinga meitaki o teia nga tuaine i te tauturu anga ia maua. Kua riro to raua tu ngakau tae e te tu papu ei akamama mai i te tuanga openga o teia tumatetenga no taku akaperepere akarongo mou ko Charlene e kua oronga mai kiaku i te maroiroi i te pae kopapa e i te pae manako. Ka akaperepere ua rai au ia raua e tuatau ua atu. Kua akamatutu to raua tu akaatinga uaorai i toku akarongo i roto ia Iehova e toku inangaro no to tatou taokotaianga taeake i te ao katoa nei.”

19, 20. (a) Eaa te au tuanga e rima o to Karaiti tu manako ta tatou i akamanako? (e) Eaa taau ikianga e akakoro ra i te rave?

¹⁹ I roto i teia au atikara e toru, kua akamanako ana tatou e rima tuanga o to Iesu tu manako e ka akapeea tatou i te aru anga i te tu o tona aerenga manako e tana au angaanga. Kia ‘maru tatou, e te ngakau akaaka,’ mei ia Iesu rai. (Mata. 11:29) Kia tauta pakari katoa tatou i te takinga meitaki atu i etai ke noatu e te kite uaia ra to ratou au tu apa ua e to ratou au tu paruparu. Kia akarongo tatou ma te ngakau toa i te au umuumuanga pouroa a Iehova, noatu ka na roto tatou i te au turanga ngata.

²⁰ Te mea openga, e akaari tatou i te aroa mei to Karaiti rai ki to tatou au taeake pouroa, mei ta Karaiti uaorai i rave e tae ua atu “ki te openga ra.” Te akataka ra taua aroa ia tatou ei au pipi mou tikai na Iesu. (Ioa. 13:​1, 34, 35) Ae, “kia vai marie mairai te aroa taeake.” (Ebe. 13:1) Auraka e unui ki muri! E akakoro tikai kia taangaanga i toou oraanga kia akapaapaa ia Iehova e kia tauturu atu i etai ke! Ka akameitaki a Iehova i taau au tautaanga ngakau tae.

[Tataanga Rikiriki i Raro]

Ka Rauka Ainei ia Koe i te Akataka?

• Akapeea te aronga pakari i te akaari anga i te tu manako o Karaiti ki tei rave i te tarevake?

• Eaa ra te puapinga tikai kia aru i to Karaiti aroa i teia tuatau openga?

• Akapeea tatou i te akaata anga i te tu manako o Karaiti ki te aronga maki?

[Au Uianga Apii]

[Tutu i te kapi 17]

Inangaro te aronga pakari i tei rave i te tarevake kia oki mai kia Iehova

[Tutu i te kapi 18]

Akapeea te au Kerititiano e akaruke ra ia Ierusalema i te akaata anga i te tu manako o Karaiti?

[Tutu i te kapi 19]

Kua kite uaia te Au Kite o Iehova no te akaari anga i te aroa tika tikai