E Puapinga Maata Ainei kia Koe ta Iehova i Rave ei Akaora ia Koe?

“Kia akameitakiia te Atu, te Atua no Iseraela; kua akono mai oki aia, e kua akaora i tona tangata.”​—LUKA 1:68.

1, 2. I akapeea ra te kino pakari o to tatou turanga i teianei i te akatutuia mai anga, e eaa te au uianga ta tatou ka uriuri?

E AKAMANAKO ua ana e te takoto ra koe ki runga i tetai roi i roto i te aremaki. Tei roto koe i tetai pia, aiteite ua te maki o te aronga i reira ki toou, e maki mate kare e rapakau. I toou kite anga e te kimi ra tetai taote i tetai rapakau, kua rauka toou manakonakoanga. Kua inangaro koe kia kite i te au mea katoatoa no runga i te au kimikimianga a taua taote ra. I tetai ra, kua kitea mai ia koe e kua kiteaia tetai rapakau! Ko te taote nana i kite mai i te rapakau, e aka akaatingaanga tikai tana i rave kia rauka mai te reira. Mei teaa ra i reira toou manako? Papu roa e ka ki ua toou ngakau i te akangateitei e te akameitaki no te tangata tei akatuera mai i tetai mataara noou e no te manganui kia akaoraia mai mei te mate.

² Penei me akaraia atu e mea akarava ua taua turanga ra, kareka ra tei roto tikai tatou i tetai turanga mei te reira rai. Tei roto tatou tataki tai pouroa i tetai turanga kino pakari roa atu i te mea tei akatakaia akenei. Te anoano pakariia nei tetai akaora no tatou. (E tatau ia Roma 7:24.) Kia rauka i te akaora ia tatou, e maata tikai ta Iehova akaatingaanga i rave. E au akaatingaanga puapinga katoa ta tana Tamaiti i rave. Ka akamanako ana tatou i reira e a uianga puapinga. Eaa te tumu  i anoanoia ai te akaoraanga no tatou? Eaa ra ta Iesu i rave, ei akaora ia tatou? Eaa ra ta Iehova i rave, ei akaora ia tatou? Ka akapeea tatou me akaari e e puapinga maata te akaoraanga kia tatou?

Tumu i Anoanoia ai te Akaoraanga no Tatou

3. Akapeea ra te ara i aite ei ki te maki totoa?

³ Kia tau ki tetai tamanakoanga i oti akenei, ko tetai o te maki totoa kino roa atu i roto i te tuatua enua o te tangata, koia oki ko te maki puru Paniora i te mataiti 1918-1919, tei riro ei akapou i te raungauru ua atu au mirioni tangata. E au maki ke atu rai tetai tei maata roa atu te pou tana ka akatupu. Noatu e iti mai te tangata tei turia e te reira, e maata roa atu te tangata ta te reira i akapou. * Inara, peea i reira me ka akaaite tatou i te ara ki taua tu maki totoa ra? Ka akamaara ana i te au tuatua a Roma 5:12: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” Ko te maata o tei turia e te ara koia oki e 100 patene, no reira kua ara katoatoa te tangata. (E tatau ia Roma 3:23.) Eaa ra te maata o te tangata e mate ana? Kua tata a Paulo e kua apai mai te ara i te mate ki “te tangata ravarai.”

4. Eaa ra to Iehova aerenga manako no runga i te roaanga o to tatou oraanga, e i akapeea ra tona aerenga manako i tuke ei mei to te manganui i teia tuatau?

⁴ Kare te manganui i teia tuatau e manako ana e mei te reira roa te kino i te ara e te mate. Te manamanata ra ratou no runga i ta ratou e karanga ra e e mate viviki ua, kareka ra te akakore ra ratou e e mea “natura” ua te mate e tupu marie ua ana ki te tangata. E mea ngoie ua ra i te tangata kia akangaropoina i to Iehova aerenga manako no runga i te reira. E poto kino rava atu to tatou oraanga i tana tikai i akakoro. Ko te tika ra, kare rava e tangata i ora ana no tetai “rā okotai” me akaraia atu mei to Iehova turanga. (2 Pete. 3:8) No reira te Tuatua a te Atua i karanga ai e e poto ua to tatou oraanga mei te ngangaere e tupu i tona tuatau me kore mei te pupuianga ao. (Sala. 39:5; 1 Pete. 1:24) Ka anoanoia tatou kia akamaara i taua aerenga manako ra. No teaa ra? Me marama tatou i te tu kino pakari tikai o te “maki” tei tupu kia tatou, ka ariki meitaki atu tatou i reira i te puapinga o te “rapakau”​—to tatou akaora.

5. Eaa te mea ta te ara i akatupu tei kore rava tatou i kite ana?

⁵ Kia marama tikai no runga i te kino pakari o te ara e tona au tu kino, ka anoanoia tatou kia kite tikai e eaa ta te ara i akatupu kia tatou. Penei ka ngata te reira i te akamataanga no te mea kua akatupu te ara i tetai mea kare rava tatou i kite ake. I te akamataanga kua rauka ia Adamu raua ko Eva te oraanga tangata ara kore. No te tu ara kore o te manako e te kopapa ka rauka ua ia raua i te iki kia akaaere i to raua au manako, manako ngakau, e ta raua ka rave. No reira e tikaanga rangatira to raua kia tupu ua atu rai ei nga tavini no te Atua ko Iehova, kia akatupu i te au tu memeitaki i roto ia raua. Kareka ra, kua kopae takiri raua i taua apinga aroa puapinga maata ra koia oki te oraanga tangata ara kore. No te mea kua iki raua kia aati i te ture a Iehova, kare atura i rauka ia raua te tu oraanga ta Iehova i akakoro no raua e ta raua uanga. (Gene. 3:​16-19) I taua taime rai, kua apai mai raua ki runga ia raua uaorai e ki runga ia tatou te “maki” rikarika ta tatou i uriuri mai ana. Kua tau rai i reira a Iehova kia akaapa ia raua. Kareka no tatou, te oronga maira aia i te manakonakoanga kia akaoraia.​—Sala. 103:10.

Ta Iesu i Rave ei Akaora ia Tatou

6, 7. (a) Akapeea te Atua i te akaari mua mai anga e ka umuumuia tetai atinga maata e rauka ai tetai akaoraanga no tatou? (e) Eaa ta tatou ka mou mai mei te au atinga tei orongaia e Abela, e e te au pateriareka tei ora ana i mua ake i te Ture?

⁶ Kua kite a Iehova e ka anoanoia tetai atinga meitaki tikai ei akaora mai i te uanga o Adamu raua ko Eva. I roto i te totou tei rekotiia i roto ia Genese 3:15, ka kite tatou i tetai mea tei anoanoia no te akaora. Ka oronga mai a Iehova i tetai “uanga,” i tetai akaora, te ka takore ia Satani a tetai ra, i te akapou takiri anga iaia. Inara, ka rokoia taua akaora ra e te kino i te tuatau ka aereia, e na roto i te tu akatutu ua, ka akaparuparuia aia i runga i te poo avae. Tangianga mamae tikai  tera e ka riro ei akaparuparu i tetai tangata, inara, eaa te aiteanga o te reira? Eaa ra ta Tei Ikiia e Iehova ka anoanoia kia akakoromaki?

⁷ E rauka ai kia akaora mai i te tangata mei te ara, ka anoanoia taua akaora ra kia oronga mai i tetai ravenga ei tapokiangaara, e mataara no te akaongi akaou i te tangata ki te Atua na roto i te takore anga i te au tu kino o te ara. Eaa ra te o maira? Kua akaariia mai ana i mua ana e ka umuumuia tetai atinga. I te oronga anga te tangata akarongo mou mua ko Abela, i te au atinga manu kia Iehova, kua ariki mai te Atua i te reira. I muri mai, kua oronga katoa taua au pateriareka mataku Atua ra mei ia Noa, Aberahama, Iakoba, e Iobu, i te au atinga mei te reira te tu, tei arikiia mai e te Atua. (Gene. 4:4; 8:​20, 21; 22:13; 31:54; Iobu 1:5) I te au anere mataiti i muri mai, kua riro te Ture a Mose ei tauturu i te tangata kia marama maata atu i teia mea e atinga.

8. Eaa ta te taunga maata e rave ana i te Ra Tapokiangaara?

⁸ I roto i te au atinga puapinga maata roa atu tei umuumuia e te Ture koia oki ko te au mea tei orongaia i te Ra Tapokiangaara i te au mataiti. I taua ra ra, e rave ana te taunga maata i tetai au angaanga akatutu ua. E oronga ana aia i te au atinga kia Iehova no te tapokiangaara​—te mea mua no te pupu o te kau taunga, aru mai no te au kopu kare i te kau taunga. E tomo ana te taunga maata ki roto i te ngai Tapu Rava o te tapenakara me kore o te iero, te ngai koia anake ua te ka tikaia kia aere, e no taua ra anake ua i te mataiti. I reira, ka pipi aia i te toto o te au atinga ki runga i te aruna o te koreromotu. I runga ake i taua aruna tapu ra, e ata mai ana tetai tumu rangi kaka i tetai au taime, e akatutu maira e te reira te Atua ko Iehova.​—Exo. 25:22; Levi. 16:​1-30.

9. (a) I te Ra Tapokiangaara, koai ta te taunga maata i akatutu mai, e eaa ta te au atinga tana i oronga e akatutu maira? (e) Te tomo anga te taunga maata ki roto i te ngai Tapu Rava, eaa ta te reira i akatutu mai?

⁹ Kua akauruia te apotetoro ko Paulo kia akakite mai i te aiteanga o taua au angaanga akatutu ra. Kua akaari mai aia e te akatutu ra te taunga maata i te Mesia, ia Iesu Karaiti, e te akatutu maira te au atinga i to Karaiti mate akaatinga. (Ebe. 9:​11-14) Ka riro taua atinga ara kore ra ei oronga mai i te tapokiangaara tika tikai no e rua pupu tangata​—te pupu kau taunga o te 144,000 au taeake akatainuia o Karaiti e te “mamoe ke atu.” (Apo. 7:​9, 14; Ioa. 10:16) I te tomo anga te taunga maata ki roto i te ngai Tapu Rava, kua akatutu mai aia i to Iesu uaorai tomo anga ki te rangi i te oronga i te puapinga o tana atinga oko ki te Atua ko Iehova.​—Ebe. 9:​24, 25.

10. Eaa ta te totou Pipiria i akaari mai e ka tupu kia Iesu?

¹⁰ Te taka meitaki ua ra e, ko te akaoraanga i te uanga o Adamu raua ko Eva, te umuumuia ra tetai aka akaatingaanga maata. Ka anoanoia te Mesia kia akaatinga i tona oraanga! E maata atu ta te au peroveta o te au Tuatua Tapu Epera i akakite mai no runga i teia. Ei akaraanga, kua akakite tika mai te peroveta ko Daniela e ka ‘tipu keia’ me kore ka tamateia te “Mesia te Ariki,” ei “tapoki anga atu i te kino.” (Dan. 9:​24-26) Kua totou mai a Isaia e ka kopaeia te Mesia, ka takinokinoia, e ka tamateia, me kore ka koputaia, ei apai i te ara a te au tangata ara nei.​—Isa. 53:​4, 5, 7.

11. Na roto i teea au mataara i akaari ei te Tamaiti a Iehova i te tu puareinga ua kia akaatinga iaia uaorai ei akaora ia tatou?

¹¹ I mua ake ka aere mai ei aia ki te enua nei, kua kite te Tamaiti anau tai a te Atua e eaa te ka anoanoia aia kia rave ei akaora ia tatou. Ka na roto aia i te au tu kino rikarika e oti ka tamateia. I te apii anga tona Metua i taua au tuatua mou ra kiaia, kua unui ainei aia ki muri e kua meameaau  atu? Kare, mari ra kua kauraro puareinga ua aia ki te au ikuikuanga a tona Metua. (Isa. 50:​4-6) Mei te reira rai iaia i runga nei i te enua, kua akarongo a Iesu e kua rave i te anoano o tona Metua. Eaa te tumu? Kua oronga mai aia e tai pauanga na roto i teia au tuatua nei e: “Te anoano nei au i te Metua.” Kua oronga katoa mai aia i tetai pauanga ke mai na roto i teia au tuatua e: “Kia oronga te tangata i tona uaorai ora no tona au taunga, kare rava e tangata aroa maata atu i te reira.” (Ioa. 14:31; 15:13) No reira, ko te tumu maata i rauka mai ei to tatou akaora, koia oki no te aroa o te Tamaiti a Iehova. Noatu e kua oronga ua aia i tona oraanga tangata ara kore, kua mareka rava aia i te rave i te reira ei akaora ia tatou.

Ta Iehova i Rave ei Akaora ia Tatou

12. E akaarianga te oko no to ai anoano, e eaa te tumu i oronga mai ei aia i te reira?

¹² Kare na Iesu i iki e kia raveia te atinga oko e ka akapeea i te rave anga i te reira. Mari ra, ko teia ravenga no te akaoraanga e tuanga maata rava atu te reira no to Iehova anoano. Kua akakite mai te apotetoro ko Paulo e ko te aruna i ko i te iero, koia oki te ngai e orongaia ana te au atinga, te akatutu ra te reira i to Iehova anoano. (Ebe. 10:10) No reira ko te akaoraanga e rauka maira ia tatou na roto i te atinga o Karaiti, ko tetai apinga ia tei kaiou maata tikai tatou kia Iehova. Luka 1:68) E akaarianga te reira i tona anoano ara kore e i tona aroa maata no te tangata nei.​—E tatau ia Ioane 3:16.

13, 14. Akapeea ra te akaraanga o Aberahama i te tauturu anga ia tatou kia marama i te puapinga maata o ta Iehova i rave no tatou?

¹³ Eaa ra te akaatingaanga ta Iehova i rave i te akakite anga i tona aroa no tatou na roto i teia mataara? E mea ngata tikai ia tatou kia marama i te reira. Inara e papaanga Pipiria tetai te ka tauturu ia tatou kia marama meitaki atu no runga i taua mea ra. Kua pati a Iehova ki te tangata akarongo mou ko Aberahama kia rave i tetai apinga ngata maata tikai​—koia oki kia oronga i tana tamaiti ko Isaaka. Ina oki e e metua aroa a Aberahama. Kua tuatua atu a Iehova kiaia no Isaaka e ko ‘taau tamaiti okotai ra, taau e akaperepere na.’ (Gene. 22:2) Noatu ra, kua kite a Aberahama e ko te rave anga i to Iehova anoano tei puapinga maata roa atu i tona inangaro ia Isaaka. Kua akapera rai a Aberahama e kua akarongo. Inara, kare a Iehova i akatika ana ia Aberahama kia rave i Tana uaorai ka rave a tetai ra. Kua tono mai te Atua i tetai angera kia tapu ia Aberahama, i mua ua ake ka akaatinga ai aia i tana tamaiti. Kua ngaueue kore rai to Aberahama manako i te akarongo ki tona Atua i roto i teia timataanga ngata, tei papu tikai iaia e ko tona manakonakoanga anake ua rai kia kite ora akaou i taua mapu tane ra, koia oki na roto i te tuakaouanga. Inara e akarongo pu tikai tona e ka rave rai te Atua i taua tuakaouanga ra. E tika rai, kua akakite a Paulo e kua rauka akaou mai ia Aberahama a Isaaka na roto i te tuakaouanga “ei aiteanga” koia oki na roto i te tu akatutu ua.​—Ebe. 11:19.

¹⁴ Ka rauka ainei ia koe kia akamanako i te mamae o Aberahama iaia e akapapa ra i te akaatinga i tana tamaiti? I roto i tetai tu, te riro ra ta Aberahama i rave ei akatutu mai i ta Iehova i rave, i tona akaatinga anga i tana i karanga e ko “taku Tamaiti akaperepere.” (Mata. 3:17) E akamaara ra oki e, kare e kore e i pakari maata rava atu to Iehova mamae. Kua mataora ua ana raua ko tana Tamaiti i te noo kapiti anga no te au mirioni ua atu, e penei katoa e no te au pirioni ua atu au mataiti. Kua mataora ua te Tamaiti i te angaanga kapiti anga e tona Metua, ei “pu rave angaanga” akaperepere nana, e ei Vaa Tuatua, ko te  “Logo.” (Mase. 8:​22, 30, 31, NW; Ioa. 1:1) Ko te au mea ta Iehova i akakoromaki, i tana Tamaiti e tamamaeia ra, e aviriia ra, e oti kua tamateia ei tangata apa i te ture, kare roa e rauka ia tatou kia akamanako atu. Kare e aiteia te aka akaatingaanga ta Iehova i rave i te oronga anga mai i te akaoraanga no tatou. Ka akapeea i reira tatou i te akaari anga e e mea puapinga maata tikai te akaoraanga?

Akapeea Koe me Akaari e e Puapinga Maata te Akaoraanga kia Koe?

15. I akapeea a Iesu i te akaoti anga i tana angaanga puapinga no te tapokiangaara, e eaa ta teia i akatuera mai?

¹⁵ Kua akaoti a Iesu i tana angaanga puapinga no te tapokiangaara i muri ake i tona akatuakaouia anga ki te rangi. I te aravei akaou anga raua ko tona Metua akaperepere, kua oronga atu aia ki Iaia i te puapinga o tana atinga. E maata ua atu te au akameitakianga tei aru mai. Kua rauka te akakore takiri anga i te ara, na mua no te ara a te au taeake akatainuia o Karaiti e oti no “te ao katoa.” No taua atinga ra, i teianei ka rauka i te au pipi pouroa a Karaiti tei tataraara ma te ngakau tae no ta ratou ara, e kua riro mai ei au pipi tika tikai na Karaiti, tetai pirianga vaitata ki te Atua, ko Iehova. (1 Ioa. 2:2) Peea koe i te o atu anga ki teia?

16. Peea tatou me akatutu mai i te tumu ka tau ei tatou kia rekareka i te akaoraanga ta Iehova i akatuera mai no tatou?

¹⁶ Ka oki akaou ana tatou ki te akatutuanga tei orongaia i te akamataanga. Mei teaa ra te tu me ka aere te taote nana i kite mai i te rapakau ka aravei i te aronga maki i roto i taua pia ra e ka oronga atu i teia manako: Tetai ua atu tangata maki ka ariki i te vairakau e ka aru i te porokaramu tei akatakaia, ka ora aia e kare roa e ekoko. Peea i reira me ka patoi te maataanga o toou au taeake maki i te aru i te tuatua a te taote, i te taumaro anga e e ngata roa i te akono me kore i te aru i te porokaramu tei akatakaia? Ka akapera ainei koe, noatu e kua rauka ia koe te akapapuanga ekoko kore e ka meitaki tikai te maki i taua vairakau ra? Papu roa e kare! Kare e ekoko e ka akaari mai koe i taau akameitakianga e ka aru meitaki i te au akakiteanga a te taote, penei e ka akakite katoa atu koe ki etai ke i taau i iki. Na roto i tetai tu maata roa atu, e mea tau kia inangaro tikai tatou i te akaari kia Iehova e mei teaa tikai te maata o to tatou rekareka i te akaoraanga tana i akatuera mai, na roto i te atinga oko o tana Tamaiti.​—E tatau ia Roma 6:​17, 18.

17. Na roto i teea au mataara e rauka ai ia koe kia akaari i toou rekareka no ta Iehova i rave, ei akaora ia koe?

¹⁷ Mei te mea e e rekareka tikai to tatou i ta Iehova raua ko tana Tamaiti i rave kia rauka i te akaora ia tatou mei te ara e te mate, ka akaari mai tatou i te reira. (1 Ioa. 5:3) Ka tamaki ua rai tatou i to tatou tu paruparu i te rave i te ara. Auraka rava tatou e tuku ua atu ki te rave akakoro anga i te ara e te noo anga i tetai oraanga pikikaa ua e o mai ana ki te reira. Ka aiteite rai taua tu arataa ra ki te karanga anga e kare tatou e manako ana e e puapinga te oko me kore kare tatou e rekareka ana i te reira. Mari ra, ka akaari tatou i to tatou rekareka na te angaanga pakari anga kia vai ua rai i roto i tetai pirianga meitaki kia Iehova. (2 Pete. 3:14) Ka akaari tatou i te reira na te akakite anga atu ki etai ke i to tatou manakonakoanga manea kia akaoraia, kia rauka katoa ia ratou tetai turanga ma i mua ia Iehova e te manakonakoanga no te tuatau mutu kore ki mua. (1 Timo. 4:16) Papu roa e kua tau rai kia akapouia to tatou taime e to tatou maroiroi ki te akapaapaa anga ia Iehova raua ko tana Tamaiti! (Mare. 12:​28-30) Ka akamanako ua ana ra i te reira! Ka rauka ia tatou kia tapapa atu i te tuatau e rapakau takiriia ai ta tatou ara. Ka rauka ia tatou kia noo i tetai oraanga mei ta te Atua rai i akakoro, ma te ara kore, e mutu kore ua atu​—no ta Iehova i rave ei akaora ia tatou!​—Roma 8:21.

[Tataanga Rikiriki i Raro]

Akapeea Koe me Pau?

• Eaa te tumu i anoano rapurapuia ai te akaora noou?

• Akapeea ra ta Iesu akaatinga anga iaia uaorai i te akakeu anga ia koe?

• Mei teaa ra toou manako no runga i ta Iehova apinga aroa o te oko?

• Eaa tei akakeuia koe kia rave, i te ariu atu anga ki ta Iehova au ravenga ei akaora ia koe?

[Au Uianga Apii]

[Tutu i te kapi 27]

I te Ra Tapokiangaara, kua riro te taunga maata o Iseraela ei akatutuanga ora no te Mesia

[Tutu i te kapi 28]

To Aberahama tu puareinga i te oronga i tana tamaiti e apiianga maata kia tatou no ta Iehova akaatingaanga maata atu