Kitea e Au te Aiteanga o te Oraanga

Akakiteia e Gaspar Martínez

I roto i tetai au tu, ko toku tua no tetai tamaiti putaua no tetai ngai i vao mai i te oire maata, tei riro ei tamaiti apinga nui i roto i te oire. Inara, ka kite mai koe e, ko te apinga nui taku i akaputuputu, kare e ko taku tikai i tapapa atu.

I MAATA mai au i roto i tetai ngai tanea ua i vao mai i te oire, i te au mataiti o te 1930, i roto i te tuanga o Rioja i te tua tokerau o Paniora. I te tae anga toku mataiti ki te tai ngauru, kua anoanoia au kia akaruke i te apii, inara i taua taime ra, kua kite au i te tatau e te tata. E akapou ana matou, e tamariki toko ono, e toru tamaroa e toru tamaine, i to matou au ra ki roto i te au koro i te tiaki i te mamoe me kore i te tatanu i to matou au tuanga enua rikiriki ua.

No te turanga putaua, kua manako matou e ko te moni e te au apinga te mea puapinga rava atu. Kua vareae tikai matou i te aronga e maata atu ta ratou apinga i ta matou. Noatu ra, kua karanga te epitikopo i tetai taime e, no matou te tapere “akono Atua roa atu i roto i tana ekaretia.” Kare ra aia i kite ana e, kare e roa atu ana ka akaruke te maataanga o te tangata i te akonoanga Katorika.

Kimi Anga i Tetai Mea Meitaki Atu

Kua akaipoipo au ia Mercedes, e tamaine no roto rai i taua oire ra. Kare i roaia ana kua anau mai ta maua pepe tamaroa. I te mataiti 1957, kua neke atu matou ki te oire maata i te pae ua mai, ko Logroño, e i te openga, kua neke pouroa mai toku kopu tangata ki reira noo ei. Kare i roa, kua kite mai au e, no te mea kare au i tereniia no tetai angaanga kimi moni, kare au e puapinga roa i te kimi angaanga ei utuutu i toku kopu tangata. Kua akamanako au e ka akapeea i te kimi ravenga anga. Kua akamata au i te kimi ki roto i te runanga puka o taua ngai ra, noatu e kare au i kite e eaa taku e kimi ra.

I muri mai, kua akarongo au i tetai porokaramu ratio e oronga ra i tetai apii Pipiria na roto i te mere. I muri poto ua mai i te oti anga iaku te reira apii, kua aravei mai tetai aronga Evangeria Porotetani iaku. I muri ake i te rua o toku aere anga ki ko i te ngai e akamori ra ratou, kua kite mai au i te tu tauetono i rotopu i te au mema ngateitei o taua pupu ra. Kare au i oki akaou ana ki reira, i te manako anga e, aiteite ua te au akonoanga pouroa.

Kua Kitea e Au te Au Mea Puapinga no te Oraanga

I te mataiti 1964, kua atoro mai tetai mapu tane ko Eugenio i to matou kainga. Koia tetai o te Au Kite o Iehova, e akonoanga kare rava au i akarongo ana i mua ana. Inara kua puareinga ua au i te inangaro i te tuatua no runga i te Pipiria. Manako au e e meitaki tikai toku kite i te au Tuatua Tapu. Kua paupau atu au iaia e kua taangaanga i te au irava Pipiria taku i tamou mai mei taku apii na roto i te mere. Noatu e kua tauta au i te paruru  i tetai au apiianga Porotetani, kare ra au i irinaki tikai ana i te reira.

I muri ake i tetai nga pukapukaanga roa, kua kite mai au e e taangaanga ana a Eugenio i te Tuatua a te Atua mei tetai taunga kite karape rai. Kua umere tikai au e i akapeea aia i te akara anga i te au tuatua tapu e oti, kua akamarama mai e akapeea i te taangaanga anga i te reira, noatu e e roa atu au iaia i te aere anga ki te apii. Kua akaari mai a Eugenio kiaku mei roto i te Pipiria e, te noo nei tatou i te au ra openga e kare e roa atu ana, ka apai mai te Patireia o te Atua i te enua parataito. Kua umeremere tikai au.​—Sala. 37:​11, 29; Isa. 9:​5, 6; Mata. 6:​9, 10.

Kua papa ua au i te ariki i tetai apii Pipiria. Vaitata rai e e au apinga ou pouroa taku i apii, e kua akakeu oonuia au. E turanga meitaki toku i mua iaku, te ka pauna meitakiia te taime i te akapou no te reira. Kua tae taku kimianga ki te openga. I teianei ko taku au tautaanga kia akameitaki i toku au turanga i te pae kopapa, kare i te mea puapinga roa iaku, e te kimi anga i tetai ngai angaanga meitaki, kua riro mai ei manamanata meangiti ua. Ina oki e, ka takoreia te maki e te mate.​—Isa. 33:24; 35:​5, 6; Apo. 21:4.

I taua taime rai, kua akamata au i te akakite ki toku kopu tangata i taku e apii ra, i te akataka oraora anga atu kia ratou e kua taputou mai te Atua i te apai mai i te enua parataito te ka nooia e te au tangata akarongo mou, e tuatau ua atu.

Ariki Toku Pamiri i te Tuatua Mou a te Pipiria

Kare i roa ana, kua akanoo matou mei te 12 te maata ia matou, kia uipa i te au avatea Tapati ravarai ki te kainga o te teina o papa, i te uriuri i te au taputou Pipiria. Kua rave matou i teia e rua me kore e toru ora i te au epetoma ravarai. I te kite anga a Eugenio e kua inangaro tetai pupu maata o toku kopu tangata i te manako o te Pipiria, kua akanoo aia kia oronga i tona uaorai taime i te akono tataki tai i te pamiri.

E kopu tangata ke atu rai toku i Durango, e taoni meangiti ua e 120 kiro mita te mamao, kare e Au Kite e noo ana ki reira. No reira, i tetai toru marama i muri mai kua orote au no tetai rua ra, e kua atoro atu ia ratou kia akakite atu i toku akarongo kitea ouia. I taua atianga ra, kua uipa mai matou mei tetai tai ngauru te maata ia matou, i te au aiai tataki tai e kua tuatua atu au kia ratou e tae ua atu ki te maiata. Kua mataora ratou pouroa i te akarongo mai. I te tae anga taku atoroanga poto ua ki te openga, kua akaruke atu au i tetai au Pipiria e tetai au puka Pipiria na ratou. Mei te reira taime mai, e komunikeiti ua ana matou.

I te tae anga mai te Au Kite ki Durango​—te ngai kare i tutuia ana e tetai ua atu tangata i mua ana—​kua kite mai ratou e 18 tangata e tiaki ua atura i tetai apii Pipiria. Kua rekareka te Au Kite i te akanoo i te apii Pipiria na te au pamiri tataki tai.

Tae mai ki taua taime ra, kare a Mercedes e inangaro ana i te apii i te tuatua mou, te tumu maata no te mataku i te tangata, kare e no te ariki i te apiianga a te Pipiria. Kua araiia te angaanga a te Au Kite o Iehova i Paniora i te reira taime, no reira kua manako aia e ka akarukeia mai ta maua nga tamariki mei te apii e te mana akaaere, e ka riro pouroa mai matou ei aronga akataaia. Inara, i tona kite anga e kua ariki te katoaanga o te pamiri i te tuatua mou o te Pipiria, kua inangaro katoa rai aia i te apii.

I raro ua ake i te rua mataiti, kua riro mai e 40 mema o toku pamiri ei Au Kite e kua papetitoia i te akatapu anga ia ratou kia tavini i te Atua. Ae, kua aiteite to matou akakoroanga no te oraanga, ko toku pamiri. Kua manako mai au e kua rauka iaku tetai apinga puapinga tika tikai. Kua akameitaki maataia matou e te Atua ki te apinga nui i te pae vaerua.

Merengo Tikai te Oraanga Iaku e Pakari Atura

No te 20 mataiti tei aru mai, kua akamou au i toku manako ki runga i te utuutu anga i ta maua nga tamariki tamaroa e rua, e te tauturu i te putuputuanga i taua ngai ra. I te neke anga maua ko Mercedes ki Logroño, e 20 rai Au Kite i roto i taua oire e 100,000 tuma tangata. Kare i roa ana, kua riro mai naku i rave i te au angaanga e manganui i roto i te putuputuanga.

I reira i te tae anga toku mataiti ki te 56, kua topiri poitirereia e te kamupani te ngai e angaanga ana au, e kare atura aku ngai angaanga. I inangaro ua ana au i te rave i te angaanga orometua tamou, no reira kua taangaanga au i toku turanga kare e angaanga moni kia riro mai ei painia. Taku moni ritaea e koi ana, kare e maata ana e e ngata tikai i te irinaki atu ki te reira no te oraanga. Kua tauturu  mai a Mercedes na te rave anga i te au angaanga tama. Kua rauka ia maua i te akono i to maua pamiri, e kare roa matou i ngere ana i te au apinga no te oraanga. Te painia nei rai au, e e tavini ana taku vaine ei painia tauturu i tetai au taime e te mataora maata nei rai aia i te angaanga tutu aere.

I tetai au mataiti i topa, e akaruke putuputu ana a Mercedes i ta tatou makatini ki ko i tetai vaine mapu ko Merche te ingoa, tei apii ana i te Pipiria i tona tamarikianga. Kua tatau a Merche i te au puka ma te mareka tikai, e kua kite mai a Mercedes e te kite ra rai a Merche i te puapinga o te tuatua mou o te Pipiria. I te openga, kua ariki a Merche i tetai apii Pipiria e kua tere meitaki tana apii ki mua. Inara, e tane kai kava maata tikai tana, ko Vicente, e kare e mou ana ki te ngai angaanga. Te openga, kare ana moni ei akono i tana vaine; e te akakino roa atura aia i to raua akaipoipo no tana kai kava.

Kua akakite atu taku vaine kia Merche kia tuatua a Vicente kiaku, e i te openga kua tupu teia. I muri ake i tetai au atoroanga, kua ariki aia i tetai apii Pipiria. Kua akamata a Vicente i te taui, na te akaruke anga i tana inu kava no tetai au ra, i te taime okotai. I reira kua taeria atu te epetoma e ara atu. I te openga, kua akaruke takiri aia i tana inu kava. Kua meitaki mai tona akaraanga, e kua taokotaiia mai tona pamiri. E oronga ana tona pamiri katoa, kapitiia mai tana vaine e tana tamaine i te turuturuanga meitaki tikai ki te putuputuanga meangiti ua, i roto i te Kaneri Airani, te ngai e noo ra ratou i teianei.

Te Oraanga Meitaki Taku i Kite Mai

Noatu e kua mate i teianei tetai o toku au kopu tangata tei apii i te Pipiria i te au mataiti i topa, te maata aere ua atura toku uanga, e kua akameitaki maataia matou e te Atua. (Mase. 10:22) E mea merengo tikai i te kite e ko te au tangata pouroa tei akamata i te apii i te Pipiria e 40 mataiti i topa akenei​—ma ta ratou au tamariki e te au utaro​—te tavini tiratiratu nei rai ia Iehova!

E maata ua atu toku kopu tangata e Au Kite i teianei, e e maata te tavini ra ei aronga pakari, ei au tavini tauturu, e ei au painia. Ko taku mataiapo tamaroa e tana vaine, te tavini ra i ko i te opati manga o te Au Kite o Iehova i Madrid, i Paniora. I toku riro anga mai ei Kite, e 3,000 rai matou i Paniora nei. I teianei kua tere atu i te 100,000 Au Kite. E mataora maata ana au i te angaanga orometua tamou, e te akameitaki nei au i te Atua no toku oraanga meitaki tikai i roto i te tavini anga iaia. Noatu te tu poto ua iaku i te aerenga ki te apii, kua rauka iaku i te tavini ei akaaere kotinga tauturu i tetai au taime.

I tetai au mataiti i topa akenei, kua kite mai au e, kare e maata akaou ana te tangata i roto i te oire i tupu mai ei au. Kua riro te turanga putaua i te openga i te maro i te tangata pouroa i reira, kia akaruke i ta ratou au aua kai e to ratou au kainga kia aere atu e kimi i te oraanga meitaki atu. Te mea mataora ra, e maata taua aronga ra​—ko au tetai—​tei kite mai i te apinga nui i te tavini anga i te Atua. Kua kite mai matou e e aiteanga to te oraanga e ko te tavini anga ia Iehova ka apai mai i te mataora maata roa atu, kare e rauka kia akamanakoia atu.

[Tutu i te kapi 32]

Vaitata rai ko te pamiri pouroa o te Taeake ko Martínez i roto i te tuatua mou