Te Akonoanga​—Naku Ainei te Ikianga me na Toku Nga Metua?

I ROTO ia Porani e maata te tangata e karanga ana ki te Au Kite o Iehova e, “Kua anauia au ki roto i taku akonoanga, e ka mate rai au ki roto i te reira.” Te akakite maira tera e, i roto i to ratou manako, ko te akonoanga, e mea tukuia mai mei tetai uki ki tetai. Te kite ra ainei koe i tera tu manako aiteite no runga i te akonoanga i te ngai e noo ra koe? Eaa te au mea e tupu putuputu mai ana no taua tu manako ra? E riro ana te akonoanga ei peu matauia i te rave, e ei peu tupuna na te pamiri. Ka tupu ainei teia ki te aronga e Au Kite no Iehova tei apii mai i te tuatua mou mei to ratou au metua me kore to ratou au tupuna?

Kare teia i tupu ana kia Timoteo, tei apiiia e tona metua vaine pera tona tupuna vaine akarongo mou tikai, kia irinaki e kia inangaro i te Atua mou. Kua kite a Timoteo i te au tataanga tapu “mei te pepe varevare anga.” I muri mai, ma tona metua vaine e tona tupuna vaine, kua papu meitaki ia Timoteo e ko te akonoanga Kerititiano te tuatua mou. Kua ‘akakeuia aia kia irinaki’ i tana i akarongo mei te au Tuatua Tapu no runga ia Iesu Karaiti. (2 Timo. 1:5; 3:​14, 15; NW) No reira, noatu e te tauturu maroiroi ra te au metua Kerititiano i teia tuatau i ta ratou tamariki kia riro mai ei au tavini no Iehova, ka anoanoia rai te tamariki uaorai kia akatupu i te inangaro kia tavini ia Iehova.​—Mare. 8:34.

Ka anoanoia ratou tataki tai kia akakeuia kia irinaki na roto i te tumuanga papu tikai, me ka tavini aia ia Iehova no tona inangaro, e ka vai tiratiratu ua rai noatu e eaa te ka tupu. Ka riro i reira tona akarongo kia ngaueue kore e kia tinamou.​—Ephe. 3:17; Kolo. 2:​6, 7.

Te Tuanga a te Tamariki

“I manako ua ana rai au e na te Au Kite o Iehova te akonoanga tika,” i akamarama mai ei a Albert, * tei utuutuia i roto i tetai pamiri o te Au Kite, “inara e ngata tikai iaku te ariki i ta ratou e tuatua ra no runga i toku tu oraanga.” Me e mapu koe, penei ko toou manako rai ia. Eaa ra kore ei e tauta kia kite e, eaa te o maira ki roto i te tu oraanga ta te Atua e inangaro maira kia aru tatou, e i reira kia kite mai i te mataora i te rave i tona anoano? (Sala. 40:8) “Kua akamata au na te pure anga,” i karanga ai a Albert. “I te akamataanga, kua kite mai au i te tu ngata. Kua maro au iaku uaorai kia rave ua atu rai i te pure. Kare ra i roa ana, kua kite mai au e ka riro au ei tangata akaperepereia i roto i te mata o te Atua me tauta au i te rave i te mea tika. Na teia i akamaroiroi iaku kia rave i te au tauianga tei anoanoia.” Na te tatanu anga i tetai pirianga noou uaorai kia Iehova, ka rauka ia koe kia akatupu i te inangaro i te rave i tana e umuumu maira ia tatou.​—Sala. 25:14; Iako. 4:8.

 E akamanako ana i tetai tarekareka taau i kanga ana, mei te pa poro teniti rai te tu. Me kare koe i kite i te au ture me kore kare koe e kite roa ana i te pa poro, penei ka maromaroa koe. Inara, me apii koe i te au ture e ka tukatau meitaki i te pa poro, kare ainei koe e inangaro kia rave ua atu i te reira, e kia kimi i te au atianga no te reira? Aiteite rai te reira ki te au angaanga Kerititiano. No reira e tauta i te akapapa no te au uipaanga Kerititiano. E piri ki roto i te uriurianga tuatua. Ae, noatu eaa toou mataiti, penei ka riro taau akaraanga ei akamaroiroi i etai ke!​—Ebe. 10:​24, 25.

Aiteite te reira ki te akakite anga i toou akarongo ki etai ke. Kia rave katoaia teia na roto i te tu aroa, kare no te mea e te raurauia maira koe. E ui kia koe uaorai e: ‘Eaa ra au ka inangaro ei i te akakite ki etai ke no runga ia Iehova? Eaa taku au tumu i inangaro ei iaia?’ Ka anoanoia koe kia kite ia Iehova ei Metua aroa. Kua akakite aia na roto ia Ieremia e: “E kimi mai oki kotou iaku, e kitea au e kotou, kia kimi mai kotou iaku ma te ngakau katoa ra.” (Iere. 29:​13, 14) Eaa ra i reira ta teia e umuumu maira mei ia koe? “Kua anoanoia au kia taui i toku aerenga manako,” i karanga ai a Jakub. “E aere ua ana au ki te au uipaanga e kua aere ana ki te angaanga orometua mei toku tamariki anga mai, inara kua riro ua teia au angaanga ei mea matauia i te rave. I te kite meitaki anga rai au ia Iehova, e te akatupu anga i tetai pirianga vaitata kiaia, i riro ei te tuatua mou ei mea puapinga tikai kiaku.”

Na te piri anga atu ki te au taeake meitaki te ka akamaroiroi ia koe, e kite mai ei koe i te mataora i roto i taau angaanga orometua. “Ko tei kapiti katoa i tona aerenga ki to te aronga pakari ra, ka pakari katoa ïa,” i karanga ai te materi akauruia. (Mase. 13:20) No reira, e kapiti atu ki te au oa e aruaru ra i te au akakoroanga pae vaerua e te aronga e mataora ra i te tavini ia Iehova. Kua karanga a Jola e: “Kua akamaroiroiia au i te piri atu anga ki te au mapu e manganui, e tamou ra i te manako ki runga i te tavini anga ia Iehova. Kua akamata au i te rave putuputu i te angaanga orometua ma te rekareka maata.”

Te Tuanga a te Metua

“Kua akameitaki tikai au i toku nga metua no tei apii mai iaku no runga ia Iehova,” i karanga ai a Jola. Ae, e akakeuanga maata ta te au metua i runga i te ikianga a ta ratou tamariki. Kua tata te apotetoro ko Paulo e: “E kotou, e te au metua tane, . . . e rave atu i te utuutu [i ta kotou tamariki] i te ako anga e te akatikatikaanga manako a Iehova.” (Ephe. 6:4, NW) Te akaari taka meitaki maira teia akoanga akauruia e, ko te tuanga a te au metua koia oki ko te apii i ta ratou tamariki i te au arataa o Iehova, kare i to ratou uaorai manako. Eiaa e tuku ki roto i te manako o te tamariki penei i taau e inangaro ra i te akatupu, mei teaa atura te meitaki me ka rauka ia koe i te tauturu ia ratou kia akarotai i to ratou oraanga ki te au akakoroanga o Iehova!

Ka rauka ia koe te apii tamou i te tuatua a Iehova e “kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” (Deu. 6:​6, 7) “E tuatua maata ana matou no runga i te au tu tavinianga tamou tukeke,” i akamaara ai a Ewa raua ko Ryszard, te nga metua o tetai au tamariki tamaroa e toru. Tei tupu mai? “Kua inangaro ta maua anau tamaroa kia o atu ki roto i te Apii Orometua Teokaratiki, ia ratou rai e rikiriki ua ra, kua riro mai ei au papuritia,  e i te openga kua inangaro tataki tai kia papetitoia. I muri mai, kua tavini ki Betela me kore ei au painia.”

E puapinga tikai te akaraanga meitaki a te au metua. Kua karanga a Ryszard e, “Kua tauta tikai maua auraka kia aru e rua tu oraanga, tetai tu no te kainga e tetai mai tu, no roto i te putuputuanga.” No reira, e ui kia koe uaorai e: ‘Eaa ta te tamariki e kite maira i roto i toku oraanga? Te kite maira ainei i te inangaro tikai ia Iehova? Te kite maira ainei ratou i teia inangaro i roto i taku au pure e te angaanga matau o te apii naku uaorai? Te kite maira ainei ratou i te reira i roto i toku tu no te angaanga tutu aere, te tamataora, e te au apinga materia e i roto i taku e tuatua ra no runga i tetai au mema o te putuputuanga?’ (Luka 6:40) Ka akara mai te tamariki i toou oraanga i te au ra ravarai, e ka kite mai i tetai ua atu tukeanga i rotopu i taau ka tuatua e taau ka rave.

E ako, tetai tuanga puapinga rava atu i roto i te utuutu anga i te tamariki. Inara, te akakite maira te Tuatua akauruia a te Atua kia tatou kia “apii i te tamaiti i te arataa e tikaʼi iaia kia aere.” (Mase. 22:6) Kua tuatua a Ewa raua ko Ryszard e, “E rave takake ana maua i te apii Pipiria na te tamaiti takitai.” E tika, na te nga metua rai e iki me ka anoanoia te apii takake na te tamaiti takitai. Noatu e eaa te tu, ka tau te tamaiti kia apiiia ei tangata tataki tai. I roto i teia ka umuumuia te tu taui ngoie ua e te manako meitaki. Ei akaraanga, eiaa e akakite ua ki taau tamariki e e kino tetai au akatangi anga imene, eaa koe ka kore ei e akaari kia ratou e akapeea i te rave i te au ikianga pakari, akapeea te au kaveinga Pipiria i te o anga mai?

Penei kua kite meitaki tikai taau tamariki e eaa taau e tapapa atura mei ia ratou, e penei i te akaraanga, te rave ra i taau e inangaro ra ia ratou kia rave. Noatu ra, ka anoanoia rai koe kia itae i to ratou ngakau. E akamaara e, “te manako i roto i te ngakau tangata, mei te moana ïa; e rauka maira taua manako ra i te tangata kite.” (Mase. 20:5) E tamanako meitaki, akara i te au akairo o tetai ua atu manamanata penei te aro atura taau tamariki, e e taviviki i te akatikatika i te reira. Ma te akakore anga i tetai ua atu akaapaanga, e akaari e te manako atura koe ia ratou, e e ui i te au uianga tau. Noatu rai ra, kia matakite auraka e uiui kia maata rava te uianga. Ka riro taau manako meitaki anga atu i te itae i te ngakau, e ka tauturu te reira ia koe i te turu atu ia ratou.

 Te Tuanga a te Putuputuanga

Ka rauka ainei ia koe, tetai o te au tavini o te Atua i te tauturu i te au mapu i roto i te putuputuanga, kia akaperepere i te apiianga i te pae vaerua tei rauka ia ratou? Noatu e na te au metua te apainga i te tereni i ta ratou tamariki, ka tau rai tetai au mema o te putuputuanga, te aronga pakari tikai i te turuturu i te au tautaanga a te au metua. E mea puapinga maata tikai kia tauturu atu i te aronga i roto i te au pamiri, okotai ua i te nga metua e Kite no Iehova.

Eaa ta te aronga pakari ka rave i te tauturu i te au tamariki kia inangaro ia Iehova e kia kite e te anoanoia ra ratou e te akaperepereia maira? Ko Mariusz, e tavini ra ei akaaere i roto i tetai putuputuanga i Porani, kua karanga e: “Ka tau te aronga pakari kia komunikeiti, kia komunikeiti, e kia komunikeiti ki te au tamariki. Kare i te taime ua me tupu te manamanata, inara i tetai atu au atianga katoa​—i roto i te angaanga orometua, i muri ake i te au uipaanga, me kore i te au tuatau va no te pukapuka ua anga.” Eaa koe kore ei e ui atu ki te tamariki e eaa to ratou manako no te putuputuanga? Na taua au tu komunikeitianga e akavaitata mai i te tamariki ki te putuputuanga e ka akariro teia ia ratou kia kite e e tuanga ratou no te reira.

Me e tangata pakari koe, te kite maira ainei koe i te au mapu i roto i te putuputuanga? Noatu e te tavini nei aia i teianei ei tangata pakari, kua kite a Albert, tei taikuia i mua akenei, i te au timataanga tukeke i tona mapu mai anga. Kua karanga aia e, “I toku mapuanga, kua anoanoia kia atoroia mai au e te aronga pakari.” Ka tau katoa te aronga pakari kia akaari i te inangaro uaorai no te au mapu, na te pure anga kia puapingaia ratou i te tavini i te Atua e kia rauka tetai pirianga vaitata no ratou kiaia.​—2 Timo. 1:3.

E meitaki tikai kia o atu te tamariki ki roto i te au angaanga a te putuputuanga. Me kare teia e tupu, penei ka tamou ratou i te manako ki runga i te aruaru anga i te au akakoroanga o teianei ao. Ka rauka ainei ia kotou e te aronga pakarikari i te angaanga kia ratou i roto i te angaanga orometua e te akariro anga ia ratou ei au oa noou? E akapou i toou taime tamataora ki te au tamariki i te akatupu anga i te manako irinaki e te oaoa. Kua maara ia Jola e: “Kua akaari mai tetai tuaine painia i tona manako aroa uaorai noku. E koia taku i iki kia aere au i te rave i te angaanga orometua no te taime mua no te mea ko taku tikai te reira i inangaro.”

Taau Uaorai Ikianga

E te au tamariki e ui kia kotou uaorai e: ‘Eaa taku au akakoroanga? Me kare au i papetitoia ake, te riro ainei te papetitoanga ei akakoroanga noku?’ Ko te ikianga kia papetitoia ka tau kia akatumuia ki runga i te inangaro oonu no Iehova, kare no te mea e e peu matauia te reira e te pamiri.

Ae, kia riro ua rai a Iehova ei Oa mou noou, e te tuatua mou ei apinga oko maata naau. Kua akakite a Iehova na roto i te peroveta ko Isaia e: “Auraka e taitaia, ko au oki toou Atua.” Ka noo ua rai a Iehova ki toou pae me akariro koe iaia ei oa noou. Nana tikai koe e akamatutu e e mou aia “ia koe i [tona] rima katau tuatua tika ra.”​—Isa. 41:10.

[Tataanga Rikiriki i Raro]

[Tutu i te kapi 4]

Tauta i te akamanako e eaa to roto i te ngakau o taau tamaiti

[Tutu i te kapi 6]

Te ikianga kia papetitoia na te inangaro oonu no Iehova i akakeu