Akaperepere i Toou Au Taeake e te Au Tuaine Turi!
Akaperepere i Toou Au Taeake e te Au Tuaine Turi!
KO TE au taeake e te au tuaine i te pae vaerua e ngutuare tangata maatamaata no te iti tangata o te Atua i teia tuatau, kua akamata mai ta ratou tuanga ra ki te au tane e te au vaine i te au tuatau taito. Te kapiti maira teia ia Samuela, Davida, Samasona, Rahaba, Mose, Aberahama, Sara, Noa, e Abela. I roto i te au tavini tiratiratu o Iehova e manganui te au tangata turi tataki tai. Ei akaraanga, te nga tangata mua tei riro mai ei nga Kite no Iehova i Mongoria, e nga tokorua turi raua. E no te tu tiratiratu o to tatou au taeake turi i Rutia, kua autu mai tatou i te pae ture i roto i te Akavaanga i Europa no te Au Tika Anga Tangata.
I teia tuatau, kua oronga mai “te tavini akono meitaki e te pakari” i te au puka reo akairo e kua akanoo katoa i te au putuputuanga, te au akaputuputuanga e te au uruoaanga i roto i te reo akairo. (Mata. 24:45) Na teia i tauturu maata i te aronga turi. * Inara e manako ana ainei koe mei teaa rai te turanga o te tangata turi, i te apii anga no runga i te Atua mou e te tere meitaki anga ki mua i roto i te tuatua mou me kare teia au tauturu anga? I manako ana ainei koe e eaa taau ka rave i te tauturu atu i te aronga turi te noo ra i toou ngai?
I Mua Ake i te Au Apinga Tauturu o Teia Tuatau
Peea ra me ui atu koe ki tetai aronga turi pakarikari e eaa ta ratou i kite mai te apiianga no runga i te Atua? Penei ka akakite mai ratou kia koe i to ratou manako te kite mua anga ratou e e ingoa to te Atua—e akapeea taua tuatua mou okotai ra i te taui anga i to ratou oraanga, e te tauturu anga ia ratou no tetai au mataiti i mua ake ka rauka mai ei te reo akairo i roto i te au porokaramu vitio me kore te au DVD, te tauturu anga ia ratou kia kite oonu atu i te au tuatua mou o te Tuatua Tapu. Penei ka akamarama mai ratou e mei teaa rai te tu me kare te au uipaanga Kerititiano e raveia me kore e uriia ki roto i te reo akairo. Ka noo ra tetai tangata i te pae ia ratou e ka tata i te au manako ki runga i te aenga pepa i te tauturu ia ratou kia marama e eaa te tuatuaia ra. E tai taeake turi tei apii i te tuatua mou o te Pipiria na roto i teia tu e itu mataiti, i mua ake ka rauka mai ei tetai tangata uri reo akairo.
E maara ana i te Au Kite turi pakarikari mei teaa rai te tu te piri atu anga ki roto i te ngai angaanga orometua ki te au tangata e “akarongo” ana. I tetai tua ra, e akaari ana ratou i tetai kati kua tataia tetai au tuatua mama ua i te aere anga mei tera ngutupa ki tera ngutupa. I roto i tetai rima ka mou ratou i te nga makatini ou o te Punanga Tiaki e te E Ara! E ngata tikai i te rave i tetai apii Pipiria ki tetai ke kua turi te taringa, i te taangaanga ua anga i te au puka tei neneiia kare ratou e marama meitaki ana. Penei te maara ra rai i te au papuritia turi pakarikari te tu taitaia ta ratou i kite mai me kare ratou e maramaia mai ana, e no reira kare e rauka ia ratou i te tuatua atu no runga i te tuatua mou i te pae vaerua. Kua kite katoa ratou mei teaa te tu e rauka ai te aroa oonu no Iehova, inara kare e rauka ia ratou i te taangaanga papu tikai i te reira. No teaa ra? No te mea kare e papu ana ia ratou e me te tano ra ta ratou e marama ra no runga i tetai tumu manako tikai.
Noatu teia au arairai anga ravarai, te mou ngaueue kore nei rai to tatou au taeake e te au tuaine turi i to ratou tu tiratiratu. (Iobu 2:3) Kua tiaki marie rai ratou ia Iehova. (Sala. 37:7) E te akameitaki maata nei aia ia ratou, tei kare te maataanga ia ratou i manako atu ana.
E akamanako ana i te au tauta anga a tetai taeake turi, e tane e e metua tane katoa aia. I mua ake ka rauka mai ei te au vitio reo akairo, kua rave tamou ua rai aia i te apii anga i te apii a te ngutuare. Te maara ra rai i tana tamaiti e: “E ngata ua ana rai i toku papa i te rave i te apii a te ngutuare, no te mea ko tana ua rai ka rauka i te apii mai ia matou no roto mai i te au puka neneiia. Te maataanga o te taime, kare aia e marama meitaki ana i te tuatua i tataia. Kare matou te au tamariki i tauturu atu ana iaia. E viviki ana matou i te akakite kiaia me kare e tano ana tana akamarama anga. Noatu rai teia tu, kua rave ua rai aia i te apii a te ngutuare. Kua manako aia e e puapinga maata atu kia kite matou i tetai apinga no runga ia Iehova, noatu kua taakamaia aia i tetai au taime no te mea kare aia e marama roa ana i te reo Papaa.”
Tetai akaraanga katoa, no Richard, e taeake turi e 70 tuma ona mataiti, kua matapoia e te noo ra i Brooklyn, New York, U.S.A. Kua kite matauia a Richard no tona aere putuputu anga ki te au uipaanga Kerititiano. Kia tae aia ki reira, e e aru ana aia i te rerue koia anake ua, i te tare anga i te au ngai tapu anga kia kite aia e aea aia e eke ei ki vao. I tetai tuatau anu, kua tupu mai tetai uriia kiona pakari, kare te uipaanga i raveia ana. Kua akakiteia atu ki te katoatoa i roto i te putuputuanga, kare ra i akakiteia ana kia Richard. Te kite anga te au taeake e eaa tei tupu, kua aere atu ratou i te kimi iaia, kite atu ratou ia Richard e tu ra i vao i te Are Uipaanga Patireia, te tiaki akakoromaki ua ra kia ngaa mai te ngutupa. Te uiia anga kiaia e eaa aia i aere ei ki vao i roto i te uriia, kua pau mai aia e, “No toku inangaro ia Iehova.”
Eaa Taau ka Rave?
E aronga turi ainei tetai e noo ra i toou ngai? Ka rauka ainei ia koe i te apii i tetai reo akairo kia rauka ia koe i te komunikeiti atu kia ratou? E aronga takinga meitaki e te akakoromaki te aronga turi me apii tetai ke i to ratou reo akairo. Penei ka aravei koe i tetai tangata turi i tetai ngai me kore i roto i te angaanga orometua. Eaa taau ka rave? E tauta i te komunikeiti. E taangaanga i te au tuatua akatutu, te tataanga, te toroa anga, te akaari anga i te au tutu, me kore i tetai o teia au tu nei. Noatu e kua akakite mai tetai tangata e kare aia e inangaro ana i te tuatua mou, e akakite atu ki tetai Kite tei turi me kore tei kite i te reo akairo no runga i taau atoro anga. Penei ka ariki meitaki mai tetai tangata turi i te karere me orongaia atu na roto i te reo akairo.
Penei te apii ra koe i te reo akairo e te aere ra ki te putuputuanga reo akairo. Akapeea koe e tukatau ei i roto i te reo akairo e te marama anga i te reira? Noatu e e au papuritia tetai i roto i toou putuputuanga e rongo ana, kare ainei e meitaki atu kia kore e tuatua? Na teia e tauturu ia koe kia akamanako na roto i te reo akairo. I tetai au taime, ka timataia koe kia tuatua e kare e taangaanga i te reo akairo. Inara, me apii i tetai ua atu reo, ka tauta ua rai koe kia riro mai ei tangata tukatau i roto i te reo akairo.
Na te tauta pakari anga i te taangaanga i te reo akairo, te akaari ra tatou i te aroa e te ngateitei ki to tatou au taeake e te au tuaine turi. E akamanako ana i te au manako taitaia ta tetai tangata turi i kite ana i te au ra, no te mea kare aia e marama ana i te au tangata i te ngai angaanga me kore i te apii. “I te au ra ravarai, e Ioa. 13:34, 35.
tuatua ana te au tangata takapini iaku,” i karanga ai tetai taeake turi. “E maata te taime kua tupu mai te manako maromaroa i roto iaku, no te kore e inangaroia mai ana, no reira kua riri tikai au. Kare e rauka i te au tuatua i te akamarama mai e mei teaa tikai toku manako i tetai au taime.” Kia riro ua rai ta tatou au uipaanga ei ngai akaoraora anga kia rauka i to tatou au taeake e te au tuaine turi te kai vaerua, e kia rekareka i te komunikeitianga e te taokotaianga pumaana.—Eiaa e akangaropoina i te au pupu rikiriki e manganui o te aronga turi tataki tai te uipa kapiti ra ki te au putuputuanga e akarongo ana. Kia uriia te au uipaanga no ratou. Kia marama pu tikai e eaa te akakiteia ra, e noo te au mema turi ki mua i te putuputuanga i roto i te Are Uipaanga Patireia. Na teia e tauturu ia ratou kia kite meitaki atu ratou i te tangata uri e te vaa tuatua ma te kore e arairai anga. Te akaari maira te au mea i tupu e kua viviki ua te toenga o te putuputuanga i te kite i teia, kare teia e riro ana ei tamanamanata anga. Te tau katoa ra rai teia au akanoonooanga i ko i te au akaputuputuanga e te au uruoaanga te raveia ra te urianga ki roto i te reo akairo. Ka tau kia akameitakiia te au mema maroiroi o te putuputuanga no te rave anga i te urianga mei tetai tangata turi rai i te akakite mai anga i te manako—puapinga tikai e te taka meitaki.
Penei tei roto koe i tetai putuputuanga te turuturu ra i tetai pupu reo akairo me kore kare e maata ana te aronga turi te uri ra i te au uipaanga. Eaa taau ka rave i te akaari e te manako atura koe i teia au taeake turi? E pati ia ratou kia aere mai ki toou kainga. Me ka rauka, e apii atu i tetai au tuatua akairo. Auraka e emiemi no te arairai anga i te komunikeiti. Ka kimi ra koe i tetai ravenga i te komunikeiti e te akaari i taua aroa ra, e ka maaraara ia koe te au mea mataora. (1 Ioa. 4:8) E maata tikai ta to tatou au taeake Kite tei turi te taringa ka oronga mai. E aronga meitaki tikai ratou no te komunikeiti, te kite karape, e te tu kangakanga. Kua karanga tetai taeake e nga metua turi tona e: “I roto i toku oraanga e noo ana au i rotopu i te aronga turi, e maata ta ratou i oronga mai kiaku te kare e rauka iaku i te tutaki atu. E maata ta tatou ka kite mai mei to tatou au taeake e te au tuaine turi.”
Te aroa maira a Iehova i tona aronga akamori akarongo mou, kapiti mai te aronga turi. Te riro ra to ratou akaraanga no te akarongo e te akakoromaki ei akamaata atu i te tu meitaki ki ta Iehova akaaerenga. No reira e akaperepere tatou i to tatou au taeake e te au tuaine turi!
[Tataanga Rikiriki i Raro]
^ para. 3 Akara i te atikara ‘Akakakā Mai a Iehova i Tona Mata ki Runga ia Ratou,’ i roto i te itiu o Te Punanga Tiaki o Aukute 15, 2009.
[Tutu i te kapi 31]
Ka reka mai te tangata turi i te karere Patireia me orongaia atu te reira na roto i te reo akairo
[Au Tutu i te kapi 32]
Kia riro ua rai ta tatou au uipaanga ei ngai akaoraora anga kia rauka i to tatou au taeake e te au tuaine turi te akamaroiroi anga pae vaerua