Akaperepere i Toou Tuanga Ngai i Roto i te Putuputuanga
Akaperepere i Toou Tuanga Ngai i Roto i te Putuputuanga
“Kua akamouia e te Atua te au melo katoatoa o te kopapa nei, ki tana ngai i inangaro ra.”—1 KORI. 12:18.
1, 2. (a) Eaa te akaari maira e e tuanga ngai to te katoatoa i roto i te putuputuanga te ka akaperepere aia? (e) Eaa te au uianga ka akamanakoia i roto i teia atikara?
MEI te au ra mai o Iseraela i taito ra, kua riro te putuputuanga ei akanoonooanga na Iehova no te utuutu anga i tona iti tangata i te pae vaerua e te oronga anga kia ratou te aratakianga. Ei akaraanga, i muri ake te autu anga te ngati Iseraela i te oire o Ai, “kua tatau iora [a Iosua] i te au tuatua katoa i roto i te ture ra, i te akaora e te akakino, mei tei tataia i roto i te buka ture ra . . . ki mua i te aroaro o te uipaanga Iseraela katoa ra.”—Iosu. 8:34, 35.
2 I te anere mataiti mua T.N., kua akakite te apotetoro ko Paulo ki te tangata pakari Kerititiano ko Timoteo e, ko “te ngutuare o te Atua” ko te putuputuanga Kerititiano ia e ko te “poupou e te turu o te tuatua mou.” (1 Timo. 3:15, NW) “Te ngutuare” o te Atua i teia tuatau ko te taokotaianga taeake i te ao katoa nei o te au Kerititiano mou. I roto i te pene 12 o tana reta akauru muaia ki to Korinetia, kua akaaite a Paulo i te putuputuanga ki tetai kopapa tangata. Kua karanga aia e noatu e tukeke te angaanga a te mema tataki tai, e mea puapinga te katoatoa. “Kua akamouia e te Atua te au melo katoatoa o te kopapa nei, ki tana ngai i inangaro ra,” i tata ei a Paulo. Kua tou katoa mai aia e ko “te au melo o te kopapa ta tatou e manako nei e e iti te meitaki ra, te akapini nei tatou i te reira i te meitaki maata.” (1 Kori. 12:18, 23) No reira, te tuanga angaanga a tetai tangata tuatua tika i roto i te ngutuare o te Atua kare e meitaki atu e kare e kino atu i to tetai Kerititiano akarongo mou. Tukeke ra ratou. Akapeea ra i reira e rauka ai ia tatou tetai tuanga ngai i roto i ta te Atua akanoonooanga e te akaperepere anga i te reira? Eaa te au tumu te ka taui i to tatou tuanga ngai i roto i te putuputuanga? Akapeea tatou me akaari i ‘to tatou tupu anga kia kitea mai e te tangata katoa’?—1 Timo. 4:15.
Akaperepere i to Tatou Tuanga Ngai—Akapeea Ra?
3. Eaa tetai mataara ka rauka tetai tuanga ngai no tatou i roto i te putuputuanga e te akaari anga e te akaperepere ra tatou i te reira?
3 E tai mataara e kiteaia ai to tatou tuanga ngai i roto i te putuputuanga e te akapapu anga e te akaperepere ra tatou i te reira, koia oki kia angaanga taokotai tikai ma “te tavini akono meitaki e te pakari” e tona komono te Pupu Akaaere. (E tatau ia Mataio 24:45-47.) Ka anoanoia tatou kia akara meitaki e me te akarongo ra tatou ki te aratakianga tei orongaia mai e te pupu tavini. Ei akaraanga, no tetai au mataiti, kua orongaia mai kia tatou te aratakianga puapinga no runga i te kakau e te akamanea, te tamataoraanga, e te taangaanga tau kore anga i te Internet. Te akarongo meitaki ra ainei tatou ki teia akoanga meitaki kia paruruia tatou i te pae vaerua? Akapeea ra te akoanga kia akanoo i tetai papaanga tinamou no te akamorianga a te ngutuare? Kua akarongo ainei tatou ki te akoanga e kua akanoo i tetai aiai no taua akakoroanga ra? Me kare tatou i akaipoipo, te akanoo ra ainei tatou i tetai taime no tatou uaorai i te apii anga i te au Tuatua Tapu? Ka akameitaki mai a Iehova ia tatou tataki tai ei ngutuare me aru tatou i te aratakianga a te pupu tavini.
4. Eaa ta tatou ka akamanako me rave tatou i ta tatou uaorai au ikianga?
4 Penei ka manako tetai pae e tei runga i te Kerititiano tataki tai te tikaanga kia iki i te au mea no runga i te tamataoraanga, te kakau e te akamanea anga. Ko te Kerititiano akatapuia te akaperepere ra i tona tuanga ngai i roto i te putuputuanga, kare aia e akono i tona uaorai inangaro me rave aia i te au ikianga. Ka akamanako tikai aia i to Iehova manako tei akaariia mai i roto i tana Tuatua, te Pipiria. Kia riro ta te reira karere ei ‘lamepa ki to tatou nei vaevae, e turama no to tatou nei arataa.’ (Sala. 119:105) E meitaki katoa no tatou i te akamanako e eaa ta teia au ikianga ka akatupu ki ta tatou angaanga orometua e ki tetai ke me rave tatou i ta tatou uaorai ikianga, i roto e i vao ake i te putuputuanga.—E tatau ia 2 Korinetia 6:3, 4.
5. Eaa ra tatou ka matakite ei i te vaerua akatakake anga?
5 Te totoa maata rava nei “te vaerua e angaanga ririnui nei i roto i te aronga akarongo kore” mei te reva rai e akaaea nei tatou. (Ephe. 2:2) Ka akatupu taua vaerua ra kia manako tatou e kare tatou e anoano atu ana i te aratakianga a te akaaerenga a Iehova. Kare rava tatou e inangaro kia aite mei ia Dioterepe, ‘kare i ariki akangateitei mai ana i tetai apinga a te apotetoro ko Ioane.’ (3 Ioa. 9, 10, NW) Ka anoanoia tatou kia matakite i te akatupu anga i tetai vaerua akatakake anga. Na roto i te tuatua me kore te angaanga, auraka rava tatou e akangateitei kore i te mataara no te komunikeiti anga ta Iehova e taangaanga nei i teia tuatau. (Nume. 16:1-3) I tetai tua ra, e akaperepere tatou i ta tatou apainga puapinga kia angaanga taokotai ma te pupu tavini. Kare ainei tatou e tauta ana i te akarongo e te kauraro atu ki te aronga te arataki ra ia tatou i roto i te putuputuanga?—E tatau ia Ebera 13:7, 17.
6. Eaa ra tatou ka akara meitaki ei i to tatou uaorai au turanga?
6 Ko tetai mataara i te akaari e te akaperepere ra tatou i to tatou tuanga ngai i roto i te putuputuanga koia oki, kia akara meitaki tikai i to tatou uaorai au turanga e te rave anga i te ka rauka ia tatou i te ‘akakaka anga i ta tatou angaanga orometua’ e te akangateitei anga ia Iehova. (Roma 11:13, NW) Kua rauka i tetai pae i te painia tamou. Te tavini ra tetai pae ei au mitinari, ei au akaaere tutaka, e ei au mema no te pamiri Betela i te ao katoa. E manganui te au taeake e te au tuaine te tauturu ra i te akatu i te au Are Uipaanga Patireia. Te maataanga o te au tangata o Iehova te rave maroiroi ra i te ka rauka ia ratou i te akono i te au anoano pae vaerua o to ratou ngutuare tangata, e te piri pu tikai anga ki roto i te angaanga orometua i te au epetoma tataki tai. (E tatau ia Kolosa 3:23, 24.) Papu ia tatou e me oronga puareinga ua tatou ia tatou uaorai i roto i te angaanga a te Atua e te rave i te ka rauka meitaki ia tatou i te tavini ngakau katoaanga iaia, e tuanga ngai to tatou e papa ua ra i roto i tana akanoonooanga.
Au Tumu te Akatupu ra i te Tuke Anga
7. Akamarama mai e akapeea to tatou au turanga i te akakeu anga i to tatou tuanga ngai i roto i te putuputuanga.
7 E mea puapinga i te akara tikai i to tatou au turanga no te mea, ka akakeu te reira i ta tatou ka rauka i te rave i roto i te putuputuanga. Ei akaraanga, e tuke te tuanga angaanga a tetai taeake i roto i te putuputuanga i ta tetai tuaine. Ka riro te mataiti, te oraanga kopapa, e tetai atu au tumu i te akakeu katoa i ta tatou ka rauka i te rave i roto i ta Iehova angaanga. “Ko te ririnui te inuinu o te tangata ou ra,” i akakite mai ei a Maseli 20:29, e “ko te inaina o te upoko ra, ko te akamanea ïa o te aronga pakari.” Penei e maata atu te ka rauka i te au mema mapu o te putuputuanga i te rave i te pae kopapa no to ratou maroiroi totomapu, e te puapinga katoaia ra te putuputuanga no te aronga pakarikari no to ratou pakari e te kite. Kia maara katoa tatou e ko te au mea te ka rauka ia tatou i te rave i roto i ta Iehova akaaerenga, tei runga te reira i to te Atua aroa takinga meitaki.—Anga. 14:26; Roma 12:6-8.
8. Akapeea ra te inangaro i te akakeu anga i ta tatou ka rave i roto i te putuputuanga?
8 Te akakite maira tetai akatutuanga o tetai nga tuaine mapu teina e te tuakana i tetai tumu te akapapu maira i to tatou tuanga ngai i roto i te putuputuanga. Kua karatuati mai raua mei te apii teitei. Aiteite ua to raua turanga. Kua rave maroiroi to raua nga metua i te akamaroiroi ia raua kia itae i te angaanga painia tamou i muri ake to raua karatuati mai anga. I muri ake i te karatuati anga, kua tomo atu tetai ki roto i te angaanga painia, ko tetai kua akamata i te angaanga moni. Eaa ra te tuke? Ko te inangaro. I te openga, kua rave raua i ta raua e inangaro ra i te rave. Kare ainei tera e tupu ana ki te maataanga ia tatou? Ka anoanoia tatou kia akamanako meitaki tikai eaa ta tatou ka inangaro i te rave i roto i ta te Atua angaanga. Ka rauka ainei ia tatou te piri maata atu ki roto i te reira, noatu e te anoanoia ra kia akatanotano tatou i to tatou au turanga?—2 Kori. 9:7.
9, 10. Eaa ta tatou ka rave me kare tatou e inangaro ana i te piri maata atu ki roto i ta Iehova angaanga?
9 Akapeea ra me kare tatou e inangaro ana i te piri maata atu ki roto i ta Iehova angaanga e te inangaro ua ra i te rave i tei umuumuia i roto i te putuputuanga? I roto i tana reta ki to Philipi, kua akakite a Paulo e: “Ko te Atua oki tei angaanga ki roto ia kotou, i te inangaro e te rave, mei tana i anoano ra.” Ae, ka rauka ia Iehova i te angaanga i roto ia tatou e te akakeu anga i to tatou anoano, me kore te au inangaro.—Phili. 2:13; 4:13.
10 Kare ainei e tau e kia pati atu tatou kia Iehova kia akakeu mai ia tatou kia inangaro i te rave i tona anoano? Kua rave te ariki o Iseraela i taito ko Davida i te reira. Kua pure aia e: “E akakite mai koe kiaku i to au arataa, e Iehova; e apii mai koe iaku i to au aerenga. E arataki koe iaku i te tuatua-mou naau ra, e apii mai oki iaku; ko koe oki te Atua o toku ora; te irinaki nei au ia koe e po ua atu te rā.” (Sala. 25:4, 5) Ka rauka katoa ia tatou i te rave i teia, na te pure anga e kia akakeu a Iehova ia tatou kia inangaro i te rave i tana e mareka ra. Me akamanako tatou e eaa to te Atua ko Iehova e ta tana Tamaiti e manako ra no runga i ta tatou e rave ra no to raua anoano, ka ariki ngakau rekareka tikai tatou ia raua. (Mata. 26:6-10; Luka 21:1-4) Ka akakeu taua manako ariki rekareka ra ia tatou kia pati atu kia Iehova kia akakeu mai ia tatou kia akamaata atu i ta tatou ka rave i roto i ta Iehova angaanga. Kua oronga mai te peroveta ko Isaia i tetai akaraanga no runga i te tu ta tatou ka akatupu. Te akarongo anga aia i te reo o Iehova i te ui anga e: “Koai taku e tono? koai te ka aere no tatou?” kua pau atu te peroveta e: “I na, teia au; ko au taau e tono.”—Isa. 6:8.
Akamaata Atu Anga—Akapeea Ra?
11. (a) Eaa te anoanoia ra no te au taeake kia itae atu i te au apainga i roto i te akaaerenga? (e) Akapeea tetai taeake i te itae anga i te au apainga puapinga i roto i te putuputuanga?
11 E 289,678 aronga tataki tai tei papetitoia i te ao katoa i te mataiti tavini anga 2008, te akaari meitaki maira teia e te anoano maataia ra te au taeake kia rave i te aratakianga. Akapeea ra tetai taeake i te ariu mai anga ki teia anoano? Na te tauta anga ki rauka te turanga tau tei akanooia no te au tavini orometua e te aronga pakari i roto i te au Tuatua Tapu. (1 Timo. 3:1-10, 12, 13; Tito 1:5-9) Akapeea tetai taeake i te aruaru anga i te akono i taua au umuumu anga Tuatua Tapu ra? Na te piri maroiroi anga ki roto i te angaanga orometua, te akono maroiroi anga i tana au angaanga i roto i te putuputuanga, te angaanga pakari anga kia meitaki mai te tu o tana au paupau anga i roto i te au uipaanga Kerititiano, e te akaari anga i te inangaro uaorai ki te au taeake irinaki. Te akaari maira aia i reira e te akaperepere ra aia i tona tuanga ngai i roto i te putuputuanga.
12. Akapeea te au mapu me akaari i to ratou inangaro maroiroi no te tuatua mou?
12 Eaa ta te au taeake mapu ka rave kia tupu maata atu i roto i te putuputuanga? Ka tauta pakari ratou kia tupu i roto i ‘te pakari e te marama i te pae vaerua’ na te apiianga i te kite no runga i te au Tuatua Tapu. (Kolo. 1:9, NW) Ei aronga apii maroiroi i te Tuatua a te Atua e te piri maroiroi anga ki roto i te au uipaanga a te putuputuanga, ka riro tikai ei tauturu anga. Ka rauka katoa i te au mapu tane i te itae atu i te reira na te angaanga anga kia tau ratou i te tomo atu ki roto i te “ngutupa maata te taki atura ki te angaanga” i roto i te au turanga tukeke o te angaanga orometua tamou. (1 Kori. 16:9, NW) Te aruaru anga i tetai angaanga i roto i ta Iehova angaanga, e oraanga merengo anga tikai e ko te mataara ia te akatupu ra i te au akameitakianga maata.—E tatau ia Koheleta 12:1.
13, 14. Na teea au mataara e akaari mai ei te au tuaine e te akaperepere ra ratou i ta ratou tuanga i roto i te putuputuanga?
13 Ka rauka katoa i te au tuaine i te akaari e te akaperepere ra ratou i ta ratou apainga puapinga no te piri anga ki roto i te akatupu anga ia Salamo 68:11. I roto i reira ka tatau tatou e: “Na Iehova uaorai i tuku mai te tuatuaanga; te au vaine te akakitekite ra i te tuatua meitaki e nuku maata ia.” (NW) Tetai au mataara tei kite meitakiia e te akaari maira te au tuaine i to ratou tu rekareka no to ratou tuanga ngai i roto i te putuputuanga, koia oki te piri anga ki roto i te angaanga akariro anga i te tangata ei pipi. (Mata. 28:19, 20) No reira, na te piri pu tikai anga ki roto i te angaanga orometua e na te rave puareinga anga i te au atinga no taua angaanga ra, te akapapu maira te au tuaine e te akaperepere ra ratou i ta ratou tuanga i roto i te putuputuanga.
14 Te tata anga kia Tito, kua akakite a Paulo e: “Te au vaine pakari, kia tau ta ratou tuatua . . . ei aronga apii atura i te tuatua memeitaki; Kia ako marie ratou i te au vaine ou ra kia aroa i ta ratou au tane, kia aroa oki i ta ratou au tamariki, Kia maru ua, kia meitaki, kia noo i te ngutuare, kia takinga-meitaki, kia kauraro marie i ta ratou uaorai au tane, kia kore e akakinoia te tuatua a te Atua.” (Tito 2:3-5) E akakeu anga meitaki tikai te au tuaine pakari i roto i te putuputuanga! Na te akangateitei anga i te au taeake te rave ra i te aratakianga e te rave ra i te au ikianga meitaki i roto i te au turanga o te oraanga, mei te kakau te akamanea anga e te tamataoraanga, te akanoo ra ratou i tetai akaraanga meitaki no tetai ke e te akangateitei ra i to ratou uaorai tuanga ngai i roto i te putuputuanga.
15. Eaa ta tetai tuaine kare i akaipoipo ka rave i te akakoromaki ua anga i te turanga koia anake ua?
15 I tetai au taime, e ngata no tetai tuaine kare i akaipoipo kia rauka mai tetai tuanga ngai nona i roto i te putuputuanga. Kua akakite mai tetai tuaine tei na roto ana i teia e: “Tetai au taime, maromaroa te oraanga kare i akaipoipo me ko koe anake ua.” Te uiia anga e akapeea aia i te akakoromaki anga i roto i te reira turanga, kua tuatua aia e: “Na te pure e te apii i tauturu mai iaku kia rauka akaou mai tetai tuanga ngai noku. Kua apii au no runga i to Iehova manako iaku. Kua tauta au i te tauturu atu i tetai ke i roto i te putuputuanga. Na teia i tauturu mai iaku kia kore au e akamanako ua rai iaku.” Tei tau ki ta Salamo 32:8, kua akakite a Iehova kia Davida e: “E ako atu au ia koe; ei runga ia koe toku mata vaoo ei.” Ae, te manako maira a Iehova i tona au tavini katoatoa, kapiti mai te au tuaine kare i akaipoipo, e ka tauturu aia i te katoatoa kia rauka mai to ratou tuanga ngai i roto i te putuputuanga.
Akono i Toou Tuanga Ngai!
16, 17. (a) Te ariki anga i ta Iehova patianga, eaa ra i riro ei ei ikianga meitaki no tatou kia riro ei tuanga no tana akaaerenga? (e) Akapeea tatou i te akono anga i to tatou tuanga ngai i roto i ta Iehova akaaerenga?
16 Kua akapiri aroa vaitata mai a Iehova i tona au tavini tataki tai kiaia. Kua tuatua a Iesu e: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioa. 6:44) I roto i te au tangata e pirioni ua atu i runga nei i te enua, kua oronga mai a Iehova i tetai patianga kia tatou kia riro mai ei tuanga no tana putuputuanga i teia tuatau. Na te ariki anga i teia patianga ko te ikianga meitaki rava atuia ta tatou i rave. Kua oronga mai te reira i te akakoroanga e te puapinga i roto i to tatou oraanga. E mei teaa atura te rekareka e te merengo anga ta tatou e kite nei no te mea e tuanga ngai to tatou i roto i te putuputuanga!
17 “Kua inangaro au, e Iehova, i te vairanga o to are,” i karanga ai te tata taramo. Kua imene katoa aia e: “Te takai nei toku vaevae i te ngai maniania; ka akameitaki rai au ia Iehova i roto i te au uipa anga ra.” (Sala. 26:8, 12) E tika rai kua akanoo te Atua mou i tetai tuanga ngai no tatou tataki tai i roto i tona akaaerenga. Na te aru ua anga i te aratakianga teokaratiki e te angaanga maroiroi anga i roto i te angaanga a te Atua, ka rauka ia tatou i te akono i tetai tuanga ngai akaperepereia no tatou i roto i ta Iehova akanoonooanga.
Maara Ainei ia Koe?
• Eaa ra i tau ei kia akamanako e e tuanga ngai to te au Kerititiano ravarai i roto i te putuputuanga?
• Akapeea tatou me akaari e te akaperepere ra tatou i to tatou tuanga ngai i roto i ta te Atua akaaerenga?
• Eaa te au tumu te ka akapapu mai i to tatou tuanga ngai i roto i te putuputuanga?
• Akapeea te au Kerititiano mapu e te aronga mamaata te akaari anga e te akaperepere ra ratou i to ratou tuanga ngai i roto i ta te Atua akanoonooanga?
[Au Uianga Apii]
[Au Tutu i te kapi 16]
Akapeea te au taeake i te itae anga i te au apainga puapinga i roto i te putuputuanga?
[Tutu i te kapi 17]
Akapeea te au tuaine me akaari e te akaperepere ra ratou i to ratou tuanga ngai i roto i te putuputuanga?