Au Uianga a te Aronga Tatau

E mea tau ainei kia tapoki tetai tuaine i tona upoko me uri aia i te au akoanga Pipiria ki roto i te reo akairo i ko i te au uipaanga, te au akaputuputuanga, me kore te au uruoaanga Kerititiano?

Tei matauia, e mea tau kia tapoki tetai vaine Kerititiano i tona upoko me akono aia i te au mea te tau ra ei apainga na tana tane me kore na tetai taeake i roto i te putuputuanga. Te rotai ra teia ki te au kaveinga tei akakiteia mai e te apotetoro ko Paulo e “ko te vaine katoa ra e pure, e e ako oki, ma te upoko tapoki koreia ra, kua taakaaka ïa i tona upoko” no te mea “to te vaine ra upoko, ko te tane ïa.” (1 Kori. 11:​3-10) Me aao tetai tuaine i tetai tapoki mako ua e te tau ua i roto i taua au turanga ra, e akairo ia no te kauraro anga ki te akanoonooanga teokaratiki i roto i te putuputuanga Kerititiano.​—1 Timo. 2:​11, 12. *

Akapeea ra te au turanga te uri ra tetai tuaine i te akoanga a tetai taeake ki roto i te reo akairo? E tika rai, te oronga ua ra te tuaine i te manako mei te vaa tuatua ki te katoatoa. Kare e nana uaorai te apiianga, inara na te taeake te reira apiianga e uri ra aia. Inara, e tuke tikai te urianga i rotopu i te reo akairo e te reo tuatua. Te reo tuatua, e akara ua ana te katoatoa ki te vaa tuatua e te akarongo ra rai ki te tangata uri reo. Kare i aite ki te urianga reo akairo, ko te au tuaine e uri ra i te reo tuatua, kare ratou i akanooia ki te ngai ka akara tika atu te katoatoa kia ratou. I tetai au taime, penei ka iki ratou i te noo ua ki raro ia ratou e uri reo ra me kore e tu ra, i te anga atu anga ki te vaa tuatua kare ki te katoatoa. No reira kare e anoanoia te tuaine e rave ra i te urianga ki roto i te reo tuatua kia tapoki i tona upoko.

Kapiti mai ki teia, no te au tauianga e taangaangaia ra i roto i te au apinga tekenoroti me uriia te au akoanga ki roto i te reo  akairo, ka riro mai te tuanga a te tangata uri ei mea puapinga tikai. E akaariia mai ana te tutu o te tangata uri reo akairo ki runga i te tivi maatamaata, kare te katoatoa e kite atu ana i te vaa tuatua. Ma te akamanako anga i teia au tumu nei, e mea tau i reira no te tuaine te uri ra ki roto i te reo akairo kia akaari mai i tana tuanga rua ei vaine uri reo na te tapoki anga i tona upoko.

Akapeea ra te akatanotano anga no teia akauenga i te taui anga i te urianga ki roto i te reo akairo no te au tuanga i runga i te Apii Orometua Teokaratiki, te au akatutuanga, te paupau anga i te tuatau Apii Pipiria a te Putuputuanga, te Uipaanga Tavini Anga, e te Apii Punanga Tiaki? Ka tapoki katoa ainei tetai tuaine uri reo akariro i tona upoko i taua au atianga ra? I roto i tetai au turanga kare e anoanoia kia tapoki te tuaine i tona upoko, no te mea te marama ra te katoatoa e kare koia tikai te akaaere ra i te uipaanga. Ei akaraanga, ko te turanga teia me te uri ra aia i te au paupau anga a te katoatoa, te au tuatua a te au tuaine, me kore te au akatutuanga. Inara, ka tapoki aia i tona upoko me uri aia i te au akoanga a te au taeake i te tuatau o teia au uipaanga, me uri no te tangata akaaere Apii Punanga Tiaki me kore no te tangata akaaere Apii Pipiria a te Putuputuanga, me kore te arataki anga i roto i te au imene akairo. I te tuatau o tetai uipaanga, penei ka uri tetai tuaine no te au taeake, te au tuaine, te au tamariki, e te aronga pakari. I te akamanako anga i teia, penei e mea tau tikai kia tapokiia te upoko i te tuatau o te uipaanga katoa.

[Tataanga Rikiriki i Raro]