Eaa ta Taau Pure e Akakite Maira no Runga ia Koe?

“E tei akarongo i te pure ra e, ka tae te tangata ravarai kia koe na.”​—SALA. 65:2.

1, 2. Eaa te au tavini o Iehova ka pure ei kiaia ma te irinaki papu?

E AKARONGO ua ana a Iehova i te au pati anga a tona au tavini akarongo mou. Papu ia tatou e te akarongo maira aia ia tatou. Noatu e te pure ra te Au Kite o Iehova e mirioni ua atu ki te Atua i taua taime rai, ka akarongo ua mai rai a Iehova ia ratou.

² Te irinaki anga e kua akarongo mai te Atua i tana au pati anga, kua imene te tata taramo ko Davida e: “E tei akarongo i te pure ra e, ka tae te tangata ravarai kia koe na.” (Sala. 65:2) Kua pauia mai ta Davida pure no te mea e tangata akamori tiratiratu aia no Iehova. E ui tatou kia tatou uaorai: ‘Te akaari maira ainei taku pure e te irinaki ra au ia Iehova, e ko te akamorianga ma ko te manako puapingaia kiaku? Eaa ta taku pure e akakite maira no runga iaku?’

Pure kia Iehova ma te Tu Akaaka

3, 4. (a) Eaa to tatou tu me pure tatou ki te Atua? (e) Eaa ta tatou ka rave me e ‘manako taitaia’ to tatou no runga i tetai ara kino?

³ Me inangaro tatou kia pauia mai ta tatou pure, e pure tatou ki te Atua ma te tu akaaka. (Sala. 138:6) E pati kia Iehova kia timata mai ia tatou, mei ta Davida rai i rave, te tuatua anga e: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako: E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.” (Sala. 139:​23, 24) Kare tatou e pure ua mari ra kia kauraro katoa ra tatou ki ta te Atua timataanga e te akoanga a tana Tuatua. Ka arataki a Iehova ia tatou na ‘te arataa tika vai marie,’ te tauturu anga ia tatou kia aruaru i tetai mataara te taki atura ki te ora mutu kore.

⁴ Akapeea me te tupu ra tetai ‘manako taitaia’ kia tatou no runga i tetai ara kino? (E tatau ia Salamo 32:​1-5.) Ka pou to tatou maroiroi me tauta tatou i te akakore atu i te akava ngakau kino, mei tetai pu rakau kare e mauu ana i te tuatau vera pakari. No tana ara, kare a Davida e rekareka akaou ana, e kua makiia aia. Inara kua pumaana tikai aia i te aaki anga ki te Atua! Akamanako ana i to Davida rekareka tona kite anga e kua “akakoreia tana ara” e Iehova. Ka akapumaanaia tetai me aaki i te ara ki te Atua, e ka riro katoa te tauturu a te aronga pakari Kerititiano i te akatupu akaou i tetai pirianga pae vaerua o tetai tangata tei tatipake.​—Mase. 28:13; Ioa. 5:​13-16.

Akakite ki te Atua e e Akameitaki Iaia

5. Eaa te aiteanga e kia akakite kia Iehova?

⁵ Me apiapi tatou no tetai au tumu, e aru tatou i ta Paulo akoanga: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” (Phili. 4:6) Te aiteanga o te “akakite” koia oki “kia pati akatenga akaaka.” E pure tatou kia Iehova no te tauturu e te aratakianga i te tuatau kino tikai me kore takinokino anga.

6, 7. Eaa te au tumu ka kapiti mai ei tatou i te akameitaki anga i roto i ta tatou pure?

⁶ Inara, me pure ua tatou no tetai apinga te inangaro ra tatou, eaa ta te reira e akakite maira no runga i to tatou akakoroanga? Te karanga ra a Paulo e e akakite tatou i ta tatou pati anga ki te Atua ‘ma te akameitaki anga.’ E tumuanga tikai to tatou kia akameitaki mei ia Davida rai, tei tuatua e: “Tei ia koe, e Iehova, te maata, e te mana, e te kakā, e te autu, e te tapunui: to runga i te rangi ra, e to runga i te enua, noou anake ïa; tei ia koe te au, e Iehova, e ko  koe tei teitei ei upoko i te au mea katoa nei . . . e to matou Atua, te akameitaki nei matou ia koe, e te akapaapaa nei i toou ingoa kakâ.”​—1 Para. 29:​11-13.

⁷ Kua akameitaki a Iesu i te Atua no te kai, te varaoa e te uaina tei taangaangaia i ko i te Kaikai Anga Aiai a te Atu. (Mata. 15:36; Mare. 14:​22, 23) I te pae mai i te akakite anga i taua tu akameitaki anga ra, e mea tau kia “akameitaki [tatou] ia Iehova” no tana ‘au angaanga taka ke ki te tamariki a te tangata nei,’ no tana “au akatauanga tuatua-tika,” e no tana tuatua, me kore te karere, e vai ra i roto i te Pipiria i teianei.​—Sala. 107:15; 119:​62, 105.

Pure no Tetai Ke

8, 9. Eaa tatou ka pure ei no te au taeake Kerititiano?

⁸ Kare ekoko e e pure ana tatou no tatou uaorai, inara e pure tatou no tetai ke—​pera katoa no te au Kerititiano kare tatou i kite i to ratou ingoa. Noatu e kare te apotetoro ko Paulo i kite i te aronga irinaki katoatoa i roto ia Kolosa, kua tata ra aia e: “Te akameitaki nei oki matou i te Atua, i te Metua o to tatou Atu ra o Iesu Mesia, e kare e tivata i te pure ia kotou, Mei to matou kite anga mairai i to kotou akarongo i te Mesia ra ia Iesu, e to kotou aroa i te aronga tapu katoa ra.” (Kolo. 1:​3, 4) Kua pure katoa a Paulo no te au Kerititiano i Tesalonia. (2 Tesa. 1:​11, 12) Me pure tatou no te au taeake e te au tuaine Kerititiano, te akaari tikai ra tatou i to tatou tu e to tatou manako ia ratou.

⁹ Te akapapu maira ta tatou pure no te au Kerititiano akatainuia e to ratou au oa te “mamoe ke atu” i to tatou manako no ta te Atua akaaerenga. (Ioa. 10:16) Kua pati a Paulo ki te au taeake akamori kia pure e ‘kia orongaia mai te tuatua kiaia, kia akakite ua atu aia i te tuatua ngaro o te evangelia.’ (Ephe. 6:​17-20) E pure ana tatou no tetai au Kerititiano na roto i taua tu rai?

10. Eaa te ka tupu kia tatou me pure tatou no tetai ke?

¹⁰ Te pure anga no tetai ke, penei ka taui mai to tatou tu no runga ia ratou. Me kare tatou e mareka tikai ana i tetai tangata inara te pure ra tatou nona, eaa ra tatou kare i aroa atu i taua tangata ra? (1 Ioa. 4:​20, 21) Te akamaroiroi ra e te taokotai maira teia tu pure ia tatou ki to tatou au taeake. Tei maata atu, te akaari maira taua pure ra e e tu aroa to tatou mei to Karaiti rai. (Ioa. 13:​34, 35) E tuanga taua tu ra no te ua o te vaerua o te Atua. E pure tataki tai ana ainei tatou no te vaerua tapu, te pati anga kia Iehova kia tauturu mai ia tatou kia akaari i taua au ua o te aroa, te rekareka, te au, te akakoromakianga roa, te takinga meitaki, te meitaki, te akarongo, te maru, e te akatere uaorai? (Luka 11:13; Gala. 5:​22, 23, NW) Me koia ia, ka akaari mai ta tatou au tuatua e te au angaanga e te aru nei tatou i te vaerua e te ora nei tatou i te vaerua.​—E tatau ia Galatia 5:​16, 25.

11. Eaa koe ka karanga ai e e mea tau kia pati i tetai ke kia pure no tatou?

¹¹ Me kite tatou e te timataia ra ta tatou tamariki kia pikikaa i ta ratou au tarere i te apii, e pure tatou no ratou e e tauturu katoa ia ratou na roto i te Tuatua Tapu kia rave ratou i te mea  tika e kia kore e rave i te mea tarevake. Kua akakite a Paulo ki te au Kerititiano i Korinetia e: “Te pure nei au ki te Atua kia kore rava kotou e rave i te kino.” (2 Kori. 13:7) E mareka ana a Iehova i taua tu pure akaaka ra e te akameitaki maira ia tatou. (E tatau ia Maseli 15:8.) Ka rauka ia tatou i te pati i tetai ke kia pure no tatou, mei ta te apotetoro rai ko Paulo i rave. “E pure ia matou,” i tata ei aia, “kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.”​—Ebe. 13:18.

Ta Tatou Pure, Maata Atu te Akakite Maira no Runga ia Tatou

12. Eaa te au mea puapinga i roto i ta tatou pure?

¹² Te akakite maira ainei ta tatou pure e te mataora ra tatou e e Au Kite maroiroi tatou no Iehova? Te akamou maata ra ainei ta tatou pure ki runga i te akono anga i te anoano o te Atua, te tutu aere anga i te karere o te Patireia, te akatikaanga i to Iehova turanga ngateitei, e te akatapuanga i tona ingoa? Ko teia tikai te au mea puapinga i roto i ta tatou pure, tei akatakaia mai i roto i ta Iesu pure akaraanga, tei akamata mai ki teia au tuatua e: “E to matou Metua i te au rangi ra, kia akatapuia toou ingoa. Kia tae mai toou patireia. Kia tupu toou anoano mei to te rangi ra, ki runga katoa i te enua nei.”​—Mata. 6:​9, 10, NW.

13, 14. Eaa ta tatou pure e akaari maira no runga ia tatou?

¹³ Te akaari maira ta tatou pure ki te Atua i to tatou akakoroanga, te inangaro, e te anoano. Kua kite a Iehova eaa tikai to tatou tu. Te karanga ra a Maseli 17:3 e: “Ko te pani timata to te ario, e te umu to te auro: ko Iehova ra tei timata i te ngakau.” Te akara ra te Atua e eaa to roto i to tatou ngakau. (1 Samu. 16:7) Kua kite aia e eaa to tatou manako no runga i ta tatou au uipaanga, ta tatou angaanga orometua, e to tatou au taeake e te au tuaine i te pae vaerua. Te kite ra a Iehova e eaa to tatou manako no runga i te ‘au taeake’ o Karaiti. (Mata. 25:40) Te kite maira aia me te inangaro tikai ra tatou i ta tatou e pure ra me kore te ripiti ua ra i ta tatou e tuatua ra. “E kia pure kotou,” i karanga ai a Iesu, “auraka e maata te tuatua rikiriki puapinga kore, mei ta te au etene ra: ko tei manako [tarevake ua] e, tei te rai o te tuatua e kiteia mai ei ratou.”​—Mata. 6:7.

¹⁴ Te akaari katoa maira ta tatou au tuatua i roto i te pure e me te irinaki tikai ra tatou i te Atua. “Kua mātauia oki koe [Iehova] ei akapuanga noku,” i karanga ai a Davida, e “ei punanga etaeta i te enemi. Ka noo au i to puakapa e tuatau ua atu; ka ora au i raro ake i te tapoki o nga peau oou ra.” (Sala. 61:​3, 4) Me ‘akatotoa akatutu mai te Atua i tona puakapa ki rungao ia tatou,’ ka rekareka tatou i te tu tinamou e tana paruruanga meitaki. (Apo. 7:15, NW) Mei teaa atura te pumaana tikai i te akavaitata atu anga kia Iehova na roto i te pure i te irinakianga e ‘tei ia tatou’ aia i te tuatau o tetai ua atu timataanga o to tatou akarongo!​—E tatau ia Salamo 118:​5-9.

15, 16. Eaa ta te pure e tauturu maira ia tatou kia marama i to tatou au anoano no te itae anga i tetai atu au apainga?

¹⁵ I te pure tika tikai anga kia Iehova no runga i to tatou akakoroanga, ka tauturu mai ia tatou kia marama i te tikaanga tikai no runga i te reira. Ei akatauanga, te inangaro tikai anga i te tavini i runga i tetai taoonga akaaere i roto i te iti tangata o te Atua, e inangaro akaaka tikai ainei te reira no te tauturu atu e te rave anga i te ka rauka ia tatou i roto i te angaanga tutuanga e te putuputuanga? Me kore te inangaro ra ainei tatou i te ‘akateitei ia tatou uaorai’ me kore kia na “rungao” i tetai ke? Kare e raveia ana te reira au tu i roto i te iti tangata o Iehova. (E tatau ia 3 Ioane 9, 10; Luka 22:​24-27.) Me e au anoano tarevake to tatou, te pure tika tikai anga ki te  Atua ko Iehova, ka akaari puia mai te reira e ka tauturu mai ia tatou kia taui i mua ake ka pakari mai ei te reira.

¹⁶ Penei te inangaro tikai ra te au vaine Kerititiano kia riro mai ta ratou au tane ei au tavini orometua e i muri mai ei au akaaere, me kore ei aronga pakari. Penei te aru ra teia au tuaine i te au manako ta ratou i akakite i roto i ta ratou pure na te aruaru anga i te akaari i tetai akaraanga meitaki. E mea puapinga teia, no te mea ka riro te tuatua e te tu o te ngutuare o tetai tangata ei akakeu anga e akapeea te putuputuanga i te manako anga iaia.

Pure no Etai Ke i te Ngai Tangata

17. Eaa ra ka anoanoia ai tetai ngai ko tatou anake ua me pure tatou?

¹⁷ E akatakake putuputu mai ana a Iesu koia anake ua mei te urupu tangata, i te pure ki tona Metua. (Mata. 14:13; Luka 5:16; 6:12) Te anoano katoa ra rai tatou i tetai ngai ko tatou anake ua. Na roto i te pure maru anga i raro ake i te au turanga au, penei ka rave tatou i te au ikianga te akamareka ra ia Iehova e te tauturu ra ia tatou kia vai maroiroi ua i te akamori iaia. Inara, kua pure katoa a Iesu i te ngai tangata, e e meitaki i te akamanako e e akapeea teia me raveia na roto i tetai tu tau.

18. Eaa tetai au manako ta te au taeake ka akamanako me pure ratou no te katoatoa i roto i te putuputuanga?

¹⁸ I ko i ta tatou au uipaanga, e pure ana te au tangata tiratiratu no te katoatoa i roto i te putuputuanga. (1 Timo. 2:8) Ka rauka te au taeake irinaki i te tuatua e “amene,” te aiteanga “e tika ïa” me kore “koia ia” i te openga o taua pure ra. Inara, e rave ei i te reira, kia ariki ratou i tei tuatuaia. Kare ta Iesu pure akaraanga i te mea poitirere e i te mea tau kore. (Luka 11:​2-4) Tei maata atu, kare aia i taiku taka meitaki pouroa mai ana i te au anoano me kore i te au manamanata o te tangata tataki tai e akarongo maira kiaia. Te au manamanata uaorai e au manako ka tau ua ei pure anga naau uaorai, kare e kia pure i te ngai tangata. E me te pure ra i roto i tetai pupu, eiaa tatou e kapiti mai i te au mea muna.

19. Eaa to tatou tu i te tuatau pure anga a te katoatoa?

¹⁹ Me te pure ra tetai no tatou katoatoa, te anoanoia ra tatou kia akaari i te “mataku [tau] i te Atua.” (1 Pete. 2:17) E taime tau me kore e ngai tau tetai no tetai au peu kare e tau ana i ko i te uipaanga Kerititiano. (Kohe. 3:1) Ei akatauanga, ka inangaro paa tetai i te katoatoa i roto i te pupu kia takave rima me kore kia mou rima i te tuatau o taua pure anga ra. Penei kare tetai e mareka mai me kore ka tamanamanata atu i tetai, kapiti mai te au manuiri kare e ariki mai ana i to tatou irinakianga. Ka mou rima matakite ua tetai au tokorua akaipoipo, inara me ka takavekave raua i tetai e tetai i te tuatau e pure ra tetai no te katoatoa, penei ka akaturoriia tetai aronga te akara maira i taua tu ra. Penei ka manako ratou e te akamanako ua ra nga tokorua i to raua pirianga inangaro, kare e akamori ana ia Iehova.  I te akangateitei oonu anga iaia, e mea tau kia ‘rave tatou i te au mea ravarai ma te akakakā i te Atua’ e e kopae i te tu akavare, akapoitirere, me kore akaturori i tetai tangata.​—1 Kori. 10:​31, 32; 2 Kori. 6:3.

Pure no Teaa?

20. Akapeea koe me akamarama mai ia Roma 8:​26, 27?

²⁰ I tetai au taime, kare tatou e kite e eaa ta tatou ka tuatua i roto i ta tatou uaorai au pure. “Kare oki tatou i kite meitaki i te mea e tau kia pure tatou,” i tata mai ei a Paulo, ‘na te vaerua [tapu] uaorai e pati i ta tatou ma te ngunguru e kore e tika kia tuatua ra. Kua kite ra aia [te Atua], ko tei kimi matatio i te ngakau ra, i to te vaerua anoano.’ (Roma 8:​26, 27) Kua tuku a Iehova kia tataia te au pure e manganui ki roto i te au Tuatua Tapu. Kua ariki aia i teia au pati anga akauruia, mei te mea rai e na tatou uaorai ia au pati anga, e no reira kua akatupu aia i te reira. Kua kite te Atua ia tatou e te aiteanga o te au mea tana i akatupu kia tuatua mai tona vaerua na roto i te aronga tei tata i te Pipiria. Te pau maira a Iehova i ta tatou pure me “pati” te vaerua no tatou. Ia tatou e matau meitaki ra i te kite i te Tuatua a te Atua, ko ta tatou e pure ra ka maaraara ua rai ia tatou te reira.

21. Eaa ta tatou ka akara meitaki i roto i te atikara ka aru mai?

²¹ Mei ta tatou rai i kite, e maata atu ta tatou pure e akakite maira no runga ia tatou. Ei akatauanga, penei te akaari maira te reira i to tatou pirianga vaitata kia Iehova e to tatou kite meitaki anga i tana Tuatua. (Iako. 4:8) I roto i te atikara ka aru mai, ka akara meitaki tatou i tetai au pure e te au tuatua no te au pure tei rekotiia i roto i te Pipiria. Eaa te tupuanga ta taua akara meitaki anga i te au Tuatua Tapu ka akatupu mai no runga i ta tatou pure ki te Atua?

Akapeea Koe me Pau?

• Eaa to tatou tu me pure tatou kia Iehova?

• Eaa ra tatou ka pure ei no te au taeake irinaki?

• Eaa ta tatou pure e akaari maira no runga ia tatou e to tatou akakoroanga?

• Eaa to tatou tu i te tuatau pure anga a te katoatoa?

[Au Uianga Apii]

[Tutu i te kapi 4]

Te akapaapaa e te akameitaki putuputu ra ainei koe ia Iehova?

[Tutu i te kapi 6]

Kia akangateitei ua rai to tatou tu ia Iehova i te tuatau pure anga a te katoatoa