Akono Tamou i te Rekareka i te Au Tuatau Manamanata
Akono Tamou i te Rekareka i te Au Tuatau Manamanata
“Ko te aronga katoa ra e irinaki ia [Iehova] ra, kia rekareka ïa, kia akateitei i te reo i te rekareka auraka kia mutu.”—SALA. 5:11.
1, 2. (a) Eaa tetai au mea te akatupu ra i te taitaia maata i teia tuatau? (e) Kapiti mai te au tumatetenga e tupu ra ki te katoatoa, eaa ta te au Kerititiano mou ka akakoromaki atu?
TE AU tumatetenga e tupu ra ki te au tangata ravarai te tupu katoa ra ki te Au Kite o Iehova. E manganui te au tangata o te Atua te na roto ra i te kino, te tamaki e tetai atu au mea kino. Te akatupu ra te tumatetenga natura, te putaua, te maki e te mate i te taitaia maata. Kua tata taka meitaki mai te apotetoro ko Paulo e: “Kua kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā.” (Roma 8:22) E aronga apa katoa oki tatou. Mei te Ariki ko Davida i taito, penei ka tuatua tatou e: “Kua na runga taku nei au ara i toku mimiti: mei te apainga teimaa kare e maranga iaku nei.”—Sala. 38:4.
2 Kapiti mai te au tumatetenga e tupu ra ki te au tangata ravarai, ka apai te au Kerititiano mou i ta ratou rakau tamamae akatutu ua. (Luka 14:27, NW) Ae, mei ia Iesu rai, kua makitakitaia e kua takinokinoia tana au pipi. (Mata. 10:22, 23; Ioa. 5:20; 16:2) No reira, te aru anga i te Karaiti te anoanoia ra te tauta anga pakari e te akakoromaki, ia tatou e tapapa atura i te au akameitakianga o te ao ou.—Mata. 7:13, 14; Luka 13:24.
3. Akapeea tatou e kite ei e kare te au Kerititiano e anoanoia kia na roto i tetai oraanga mamae i te akamareka anga i te Atua?
3 Ko te aiteanga ainei e ka aruaru ua atu rai te au Kerititiano mou i tetai oraanga kare e rekareka e te mataora? Ka maromaroa e ka mii ua ainei to tatou oraanga e tae ua atu ki te openga? Te taka ua ra e, te inangaro maira a Iehova kia mataora tatou ia tatou e tapapa atura i te akatupu anga o tana au taputou. I te au taime ravarai, e akataka mai ana te Pipiria i te aronga akamori mou ei au tangata mataora. (E tatau ia Isaia 65:13, 14.) “Ko te aronga katoa ra e irinaki ia [Iehova] ra, kia rekareka ïa, kia akateitei i te reo i te rekareka auraka kia mutu,” i karanga ai a Salamo 5:11. Ae, ka rauka katoa te rekareka maata, te manako au, e te tu mareka ua me tupu mai te au tumatetenga. Ka akara akaou tatou e akapeea te Pipiria i te tauturu anga ia tatou kia autu atu i to tatou au manamanata e kia rekareka ua rai.
Iehova—“Te Atua Mataora”
4. Eaa to te Atua manako te kopaeia anga tona anoano?
4 Ei akaraanga, e akamanako ana ra ia Iehova. Ei Atua Mana Katoatoa, tei iaia te mana akaaere o te ao katoa e pini ua ake. Kare aia e ngere ana i tetai apinga e kare e anoano ana i tetai ua atu tangata. Inara, noatu tona mana aite koreia, kua maromaroa a Iehova te meameaau anga tetai o tana tamaiti vaerua e kua riro mai ko Satani. Papu e kua maromaroa katoa te Atua i muri mai te piri atu anga tetai au angera ki roto i te meameaau. E akamanako katoa ana te mamae tei tupu ki te Atua te kopaeia anga aia e Adamu raua ko Eva, te tuanga meitaki rava o tana au mea angaia i te enua nei. Mei reira mai, kua kopae ta raua uanga e pirioni ua atu i to Iehova mana akaaere.—Roma 3:23.
5. Eaa tei akataitaia tikai ia Iehova?
5 Te pakari nei rai ta Satani orureau anga. No tetai 6,000 mataiti, te kite katoa ra a Iehova i te au angaanga akamorianga itoro, te kino, te ta tangata, e te au peu ainga tau kore. (Gene. 6:5, 6, 11, 12) Pera katoa, kua akarongo aia i te au pikikaa kino rava e te au akakino anga Atua. I tetai au taime kua tamamae tona aronga akamori i tona ngakau. Te akataka maira te Pipiria i tetai o taua turanga ra ma teia au tuatua e: “Te putuputu o ta ratou meameaau anga atu iaia i te medebara e! ta ratou akaongoongo anga atu iaia i te ngai motutaa e! Koia ïa, kua na rungao na rungao ratou i te akakoko i te Atua, e kua akaongoongo atu i Tei Tapu i Iseraela nei.” (Sala. 78:40, 41) E maata tikai te mamae ta Iehova i kite mai te kopae anga tona iti tangata iaia. (Iere. 3:1-10) Te taka ua ra e, e tupu ana te au mea kino, e e taitaia maata ana a Iehova me tupu te reira.—E tatau ia Isaia 63:9, 10.
6. Akapeea te Atua i te aro atu anga i te au turanga taitaia?
6 Inara, kare te mamae e te maromaroa e tapu ana ia Iehova i te akakore i te reira au mea. Me tupu mai te au manamanata, viviki ua a Iehova i te rave i te au takainga i te akaiti mai i te au mea kino e tupu ra. Kua akapapu katoa mai aia e ka akatupuia tona akakoroanga i te openga ra. Te akamanako anga i teia au angaanga papu, te akara rekareka nei a Iehova ki mua no te akatikaanga i tona turanga ngateitei e te akatupu anga i te au akameitakianga no tona aronga akamori tiratiratu. (Sala. 104:31) Ae, noatu te akakino anga tei tukunaia ki runga iaia, ka vai ua rai a Iehova ei “Atua mataora.”—1 Timo. 1:11, NW; Sala. 16:11.
7, 8. Me tupu te au tarevake, akapeea tatou te aru anga ia Iehova?
7 E tika rai, kare e rauka ia tatou i te akaaite ia tatou uaorai kia Iehova me akatikatika tatou i te au manamanata. Noatu rai, ka rauka ia tatou i te aru ia Iehova ia tatou e aro atura i to tatou au turanga ngata. E mea natura ua i te manako maromaroa me kua tupu te tarevake, inara kare tatou e anoanoia kia noo ua i roto i taua turanga ra. No te mea kua angaia tatou i to Iehova tu, tei ia tatou te manako karape e te pakari tau, i te akamanako meitaki i to tatou au manamanata e te rave papu anga i te ka rauka ia tatou.
8 E tai tumu puapinga te ka tauturu ia tatou kia akakoromaki i te au manamanata o te oraanga koia oki, kia kite e kare e rauka ia tatou i te akatere i tetai au apinga. Te manamanata anga no runga i taua tumu ra ka akamaata atu i te taitaia e ka ngere tatou i te rekareka e manganui te kapiti atura ki te akamorianga mou. I muri ake i te akatikatika tau anga i tetai manamanata, e meitaki atu kia kore e akamanako ua i te au manamanata, kia akara mou ua ra ki runga i te au mea puapinga maata atu. Te akatutu maira te au papaanga Pipiria e aru mai nei i teia tumu manako.
Puapinga Tikai te Manako Tau
9. Akapeea a Hana i te akaari anga i te tu manako tau?
9 E akamanako ana i te akaraanga o Hana, tei riro mai ei metua vaine no te peroveta ko Samuela. Kua taitaia tikai aia no te kare e rauka iaia i te anau tamariki. Kua aviriia e kua tatiaeaeia aia no tona turanga pa. I tetai au taime, kua manako akaparuparu a Hana, kua aue e kare e kaikai ana. (1 Samu. 1:2-7) I tetai o tona atoro anga i te ngai tapu o Iehova, ‘kua tumatetenga rava te ngakau o Hana, e kua pure atura kia Iehova, aue rava atura.’ (1 Samu. 1:10) I muri ake i te akakite anga a Hana i tona manako ngakau kia Iehova, kua aravei mai te taunga maata ko Eli iaia e kua tuatua mai e: “Kia ora koe i to aerenga: e kia akatika mai oki te Atua no Iseraela i taau i pati atu iaia ra.” (1 Samu. 1:17) I teia taime, kua kite tikai mai a Hana e kua rave aia i te au mea ravarai tei rauka iaia. Kare e rauka iaia i te akaaere i tona turanga pa. Kua akaari mai a Hana i te manako tau. “Kua aere iora [aia] i tona aerenga, e kua kaikai iora, e kare atura tona mata i kinokino ra.”—1 Samu. 1:18.
10. Eaa te manako tika tikai ta Paulo i akaari mai i te aro atu anga i tetai manamanata kare e rauka iaia i te akatikatika?
10 Kua akaari mai te apotetoro ko Paulo i taua tu ra i te aro atu anga i te turanga manamanata. E maki tona te akatupu ra i te taitaia maata. Kua kapiki aia i te reira e e ‘tara i roto i te kopapa.’ (2 Kori. 12:7) Noatu eaa te reira tu, kua rave a Paulo i te ka rauka iaia i te akakore atu i te manamanata, na te pure anga kia Iehova no te akamaru anga. Eia taime te pati anga a Paulo kia Iehova no runga i teia tu? E toru taime. I muri ake i te toru taime, kua akaari mai te Atua kia Paulo e kare aia e akaatea temeio i te ‘tara i roto i tona kopapa.’ Kua ariki a Paulo i teia manako e kua akapou i tona taime i te tavini pu tikai anga ia Iehova.—E tatau ia 2 Korinetia 12:8-10.
11. Eaa te tuanga a te pure e te akakite anga e rave ra i te tauturu anga ia tatou kia akakoromaki i te au tumatetenga?
11 Kare te aiteanga o teia au akaraanga e kia akamutu ua tatou i te pure kia Iehova no runga i te au mea taitaia. (Sala. 86:7) Ei tuke anga, te pati maira te Tuatua a te Atua kia tatou e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” Akapeea a Iehova i te ariu mai anga ki taua au akakite anga e te au pati anga ra? Kua tuatua katoa te Pipiria e: “E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Phili. 4:6, 7) Ae, penei kare a Iehova i akakore atu i to tatou manamanata, inara ka akarongo mai aia ki ta tatou pure na te paruru anga i to tatou manako. I muri ake i te pure anga no runga i tetai manamanata, ka kite mai tatou i te kino no te manako maataanga i te au mea apiapi.
Rekareka ua te Rave Anga i to te Atua Anoano
12. Eaa ra ka kino ei i te noo ua ki roto i taua turanga manako akaparuparu ra?
12 Te akakite maira a Maseli 24:10 e: “Te akaparuparu ra ainei koe i te ra taitaia? Ka iti rava toou maroiroi.” (NW) Te tuatua katoa ra tetai materi e: “Kia aue ra te ngakau ra e kinokino ei te vaerua.” (Mase. 15:13) Kua taitaia tikai tetai au Kerititiano e kare e rave akaou ana i ta ratou uaorai tatau anga Pipiria e te akamanako oonu anga i te Tuatua a te Atua. Kare ratou e pure putuputu ana, e penei kua akatakake ia ratou uaorai mei te au taeake akamori. Te taka ua ra e, e kino i te noo ua ki roto i taua turanga ra.—Mase. 18:1, 14.
13. Eaa tetai au angaanga te ka tauturu i te akakore atu i te manako akaparuparu e te oronga mai i te rekareka maata kia tatou?
13 I tetai tua ra, ka tauturu te manako papu ia tatou kia akara mou ki runga i te au tu o to tatou oraanga e rauka ai ia tatou te rekareka. Kua tata a Davida e: “Te rave i toou anoano, e taku Atua, e mea rekareka roa naku.” (Sala. 40:8, NW) Me tarevake te au mea i roto i to tatou oraanga, auraka tatou e akamutu i ta tatou papaanga meitaki no te akamorianga. Ko tetai mataara meitaki i te akakore atu i te tu maromaroa koia oki, kia piri maroiroi atu ki roto i te au angaanga te oronga maira i te mataora. Te akakite maira a Iehova kia tatou e ka rauka ia tatou te rekareka e te mataora i te tatau anga i tana Tuatua e te akara putuputu anga ki roto i reira. (Sala. 1:1, 2; Iako. 1:25) I roto i te au Tuatua Tapu e te au uipaanga Kerititiano, te orongaia maira kia tatou “te tuatua meitaki” te ka akamaroiroi ia tatou e te akarekareka i to tatou ngakau.—Mase. 12:25; 16:24.
14. Eaa te akapapu anga no ko mai ia Iehova te ka oronga mai i te rekareka kia tatou i teianei?
14 E manganui te au tumu ta te Atua i oronga mai kia rekareka tatou. Tana taputou no te ora e tumuanga maata tikai no te mataora. (Sala. 13:5) Kua kite tatou e noatu e eaa te tupu ra kia tatou i teianei, i te openga ra ka tutaki mai te Atua i te aronga te kimi maroiroi tikai ra iaia. (E tatau ia Koheleta 8:12.) Kua akakite mai te peroveta ko Habakuka i taua akapapu anga manea ra i tana tataanga e: “Kore ua atu rai te pua anga o te suke; kore ua atu te manga i runga i te au vine, kore ua atu rai te olive i te ua mai, e kore ua atu e kai ki runga i te au kainga; pou ua atu rai te au anana i roto i te au koro ra, e kore ua atu te au puakatoro i roto i te vairanga ra: E rekareka ra au ia Iehova e rere ua au i te rekareka i te Atua o toku nei ora.”—Haba. 3:17, 18.
“Mataora te Iti Tangata ko Iehova to Ratou Atua!”
15, 16. Akakite mai i tetai au apinga aroa a te Atua ka rekareka tatou ia tatou e tapapa atura i te au akameitakianga i te tuatau ki mua.
15 Ia tatou e tapapa atura i te tuatau umere ki mua tei akanooia no tatou, ko to Iehova anoano koia oki, kia rekareka tatou i te au mea meitaki tana i oronga mai kia tatou. Te karanga ra te Pipiria e: “Kite akera au e, kare atu e meitaki [no te au tangata] ra, mari ra kia rekareka te tangata e kia takinga-meitaki i te ora anga nei. Kareka ra kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.” (Kohe. 3:12, 13) “Kia takinga-meitaki” te kapiti maira i te rave anga i te au angaanga meitaki no tetai ke. Te karanga ra a Iesu e e mea mataora i te oronga atu i te rave mai. Te au angaanga takinga meitaki ki to tatou tokorua, te tamariki, te metua, e tetai kopu tangata te oronga maata maira i te merengoanga. (Mase. 3:27) Te akaari anga i te maru, te akono anga i te tangata ke ke, e te akakore anga i te ara a to tatou au taeake e te au tuaine i te pae vaerua, ka tupu katoa mai te rekareka maata e te akamareka ra te reira ia Iehova. (Gala. 6:10; Kolo. 3:12-14; 1 Pete. 4:8, 9) E puapinga maata te akatupu anga i ta tatou angaanga orometua ma te tu akaatinga uaorai.
16 Te akakite maira te au tuatua tei taikuia mai i runga akenei i roto ia Koheleta i te oraanga mareka ua, mei te kaikai anga e te inu anga. Ae, me te na roto ra i te au timataanga, ka rekareka tatou noatu eaa ua atu te apinga pae materia ka rauka mai ia tatou mei ko mai ia Iehova. Pera katoa, te akatupu ra te opunga ra manea tikai, te enua mamaata ruperupe, te tu kangakanga a te au punua manu, e tetai atu au mea umere natura tutaki koreia, i te tu umere e te rekareka kia tatou. Ia tatou e akamanako ra i taua au mea ra, ka maata atu to tatou inangaro ia Iehova, no te mea koia Tei Oronga mai i te au mea meitaki ravarai.
17. Eaa te ka akamaru tikai mai ia tatou mei te au turanga ngata, e i taua taime rai, eaa te akapumaana maira ia tatou?
17 Tei maata atu, to tatou inangaro i te Atua, te akarongo anga ki tana au akauenga, e te irinaki anga ki runga i te atinga oko ra ka riro ei akamaru anga tikai ia tatou mei te au turanga ngata o te oraanga apa ua e ka taki atu ki te rekareka mutu kore. (1 Ioa. 5:3) I taua taime rai, ka akapumaanaia tatou i te kite anga e te kite meitaki maira a Iehova i te au mea ravarai te akakino ra ia tatou. Kua tata a Davida e: “Ka pereperekavana au e ka rekareka au i toou ra aroa: i akara ana oki koe i toku tumatetenga anga; kua kite mai koe i toku vaerua i te au mate noku nei.” (Sala. 31:7) Kua akakeuia e tona aroa ia tatou, ka akaora mai a Iehova ia tatou mei to tatou tumatetenga.—Sala. 34:19.
18. Eaa te rekareka i riro ei ei mea maata i roto i te iti tangata o te Atua?
18 Ia tatou e tapapa atura i te akatupu anga i tana au taputou, e aru tatou ia Iehova, te Atua mataora. Auraka tatou e tuku i te manako papu kore kia akaparuparu ia tatou i te pae vaerua. Me tupu mai te au manamanata, e tuku i te manako karape e te pakari tau kia arataki ia tatou. Ka tauturu mai a Iehova ia tatou kia akaaere i to tatou au manako ngakau e te rave anga i te au takainga te ka akaiti mai i te au akakeu anga kino no te au tupuanga tumatetenga. Kia rekareka ua rai tatou no te au mea meitaki no ko mai iaia, i te pae kopapa e te pae vaerua. Na te noo vaitata anga ki te Atua, ka rekareka tatou no te mea ka “mataora te iti tangata ko Iehova to ratou Atua!”—Sala. 144:15, NW.
Eaa Taau i Kite?
• Te akakoromaki anga i te au turanga ngata, akapeea tatou me aru ia Iehova?
• Akapeea te manako tau te tauturu anga ia tatou kia akakoromaki i te au turanga ngata?
• I te au tuatau taitaia, akapeea tatou e rekareka ai i te rave anga i to te Atua anoano?
[Au Uianga Apii]
[Au Tutu i te kapi 16]
Te taitaia ra a Iehova i te au mea kino e tupu nei
[Akameitakianga]
© G.M.B. Akash/Panos Pictures
[Au Tutu i te kapi 18]
Kua oronga mai a Iehova i tetai ravenga kia akono tamou tatou i te rekareka