Ka Rauka ia Koe te Ano Atu ki Makedonia?

I KO i te uapu o te oire o Teroa i Asia Minora, kua orongaia tetai orama ki te apotetoro ko Paulo. Kua pati atu tetai tangata Makedonia kiaia e: “Ka ano mai ki Makedonia nei.” Te kite vave anga a Paulo i te orama, kua marama ratou ko tona au oa e teretere ra e “te tuatua maira te Atu kia [ratou] e aere e ako atu i te evangelia” ki te au tangata Makedonia. Eaa tei tupu? I roto i te oire maata o Makedonia ko Philipi, kua riro mai a Ludia e tona ngutuare tangata ei aronga irinaki. Kua ariu katoa mai tetai ke i roto i taua oire Roma ra o Makedonia.​—Anga. 16:​9-15.

Te kite katoaia ra taua tu maroiroi i roto i te Au Kite o Iehova i teia tuatau. Manganui kua neke puareinga ua, te tutakianga i to ratou uaorai patete ki te au ngai te anoano maataia ra te aronga tutu aere i te Patireia. Ei akaraanga, kua inangaro a Lisa te akanoo i te angaanga orometua ei mea maata i roto i tona oraanga. Kua neke aia mei ia Kanata ki Kenia. Kua aere atu a Trevor raua ko Emily, nga tangata Kanata katoa ki Maraui, te akakoroanga kia akamaata atu i ta raua angaanga orometua. Kua kite mai a Paul raua ko Maggie no Engarani mai, ko te ritaea mai anga mei ta raua angaanga, e atianga meitakiia no te akamaata atu i ta raua ka rave i roto i ta Iehova angaanga, e kua aere atu raua ki Aperika Itinga. E tu akaatinga ainei toou? Ka rauka ainei ia koe te akamanako i te neke atu? Me koia ia, eaa te au kaveinga Pipiria e te au manako tau te ka tauturu ia koe kia puapingaia?

Akara Meitaki ia Koe Uaorai

E tai mea kia akamanako koe, toou akakoroanga. Kua karanga a Iesu e ko te akauenga maata rava, koia oki: “E anoano atu koe i to  Atua ia Iehova ma to ngakau katoa, e ma to vaerua katoa, e ma to manako katoa.” Te au tumu no te tavini anga i tetai ngai tutuanga ke, koia oki, ko te aroa i te Atua e te inangaro i te akatupu i te akaue anga kia akariro i te au tangata ei pipi. Kua tuatua katoa a Iesu e: “E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’” Kua akaariia mai te aroa tangata tupu na te inangaro tikai anga i te tauturu atu. (Mata. 22:​36-39; 28:​19, 20) Te tavini anga i tetai enua ke e maata te angaanga e te akaatinga anga uaorai ka o mai. Kare te reira i te tere orote ua. Kia akakeuia koe e te aroa. Ko Remco raua ko Suzanne, no Neterani mai, te tavini ra i teianei i Namipia, teia ta raua i tuatua, “No te aroa i akamou ei ia maua ki konei.”

Kua akakite mai a Willie, e akaaere kotinga i Namipia, e: “Te aronga tei noo mai ki te ngai tutuanga ke, kare i aere mai i te manako anga e ka akono atu te au taeake o te reira ngai ia ratou. Kua aere mai ra ma te manako anga kia tavini kapiti atu ki te au taeake, te tauturu anga ia ratou i roto i te angaanga tutuanga.”

Muri ake te akara meitaki anga i toou akakoroanga, ui kia koe uaorai: ‘Eaa taku i kite mai te ka tauturu atu i te ngai tutuanga ke? E orometua tukatau ainei au? Eaa te au reo taku e tuatua ana? Te inangaro puareinga ra ainei au i te apii i tetai reo ou?’ E uriuri meitaki i te reira ki toou ngutuare tangata. E uriuri i te reira ki te aronga pakari i roto i toou putuputuanga. E kia pure kia Iehova no runga i te reira. Ka rauka te akara meitaki anga i toou turanga e tauturu ia koe kia kite e me ka rauka ia koe e te inangaro tikai ra i te tavini i tetai ngai tutuanga ke.​—Akara i te pia  “Akara Meitaki i Toou Tu.”

 Ka Tavini Kiea

Kua kapikiia mai a Paulo ki Makedonia na roto i tetai orama. I teia tuatau, kare a Iehova e taangaanga ana i te au ravenga temeio ei arataki ia tatou. Inara, na roto i teia makatini e tetai atu au puka, te kite nei te au tangata o te Atua i te anoano maata i te au ngai tutuanga e manganui. No reira e akamata i te tata i tetai papaanga no taua au ngai ra. Me kare koe i papa i te apii i tetai reo ou me kore kare e noo tinamou ana i tetai enua ke, e akamanako i te tavini atu i te ngai kua kite ke ana koe i te reo e tuatua maataia ra i taua enua ra. E akara i te au mea e umuumuia ra te visa, te apinga akaoro, te ngai paruruia, te moni ka pou no te oraanga, e te reva. Penei e meitaki i te tuatua ki te aronga tei neke takere ki reira. E pure no runga i teia au mea. Kia maara e kua “tāpuia iora [a Paulo e tona au oa] e te Vaerua Tapu, auraka e tuatua aere i te tuatua i Asia.” Noatu e kua tauta ratou i te aere ki Bitunia, “kare ra ratou i tukuia e te Vaerua” kia rave i te reira. Pera katoa, ka pou rai tetai taime no te akapapu e teiea tikai te ngai ka anoanoia koe i te tauturu atu.​—Anga. 16:​6-10.

I teianei kua kitea mai e koe tetai au ikianga papu tikai. Me te manako ra koe i te tavini i tetai enua ke, tata atu ki te au opati manga o te Au Kite o Iehova i te au enua taau e manako ra. E akakite atu i toou au turanga teokaratiki, pera katoa tetai au uianga taka meitaki e manako ra koe, no runga i te moni ka pou no te oraanga, te tu o te au ngai nooanga ka rauka mai ia koe, te au ngai o te pae turanga rapakauanga, e te au angaanga moni ka rauka ia koe. Oronga i reira taau (au) reta ki te kumiti tavinianga i roto i toou putuputuanga. Ka kapiti mai ratou i ta ratou reta akameitakianga e ka tuku tika atu i te reira ki te au opati manga taau e manako ra. Ka tauturu mai ta ratou pauanga ia koe i te iki ko teea te ngai meitaki tikai kia aere koe.

Kua kite mai a Willie tei taikuia i mua akenei e: “Te aronga tei meitaki atu, kua atoro na mua i te enua e kua akara meitaki i te au ngai ka mataora tikai ratou. Kua kite mai tetai tokorua e ka ngata ia raua i te noo i tetai ngai mamao ki vao. No reira kua noo raua ki roto i tetai taoni meangiti te anoanoia ra te tauturu, e kia rauka ia raua tetai turanga oraanga mataora.”

Aro Atu Anga i te Au Akaaoanga Ou

Te neke anga mei tetai ngai matau tikaiia e te tomo atu anga ki tetai ngai ou takiri, kare ekoko e ka tupu mai te au akaaoanga kia koe. “E pakari tikai te au manako maromaroa,” i karanga ai a Lisa tei taikuia i mua ake ana. Eaa tei tauturu iaia? Na te noo vaitata anga ki te putuputuanga i tona ngai ou. Kua akanoo aia i tetai akakoroanga kia kite aia i te ingoa o te au tangata katoatoa. E rauka ai teia, e tae vave ana aia ki te au uipaanga e kua noo roa atu i muri ake i te reira, i te tuatua ki te au taeake e te au tuaine. Kua angaanga kapiti a Lisa ki tetai ke i roto i te angaanga orometua, kua pati i te manganui ki tona kainga, e kua maata tona au  oa. Kua karanga aia e: “Kare au i tataraara i te au akaatinga taku i rave. Kua akameitaki mai a Iehova iaku.”

Muri ake te utuutu anga i te ngutuare tangata, kua akaruke a Paul raua ko Maggie i to raua kainga i noo ana e 30 mataiti. Kua akakite aia e: “Mama ua i te akaruke i te au apinga. Ngata tikai ra i te akaruke i te ngutuare tangata, tei kare rava i manakoia atu ana. Kua aue ua maua i runga i te pairere. Mama ua i te manako e, ‘Kare rava e rauka ia maua i te rave i teia.’ Inara kua irinaki maua ki runga ia Iehova. Na te akatupu anga i tetai au oa ou, ka tauturu maata ia koe kia rave atu rai i taau i akakoro.”

Kua iki a Greg raua ko Crystal i te neke mei ia Kanata ki Namipia, no te mea e tuatua Papaa ana raua, te reo tikai o taua enua ra. Inara i muri mai, kua kite mai raua i te puapinga i te apii i te reo o taua ngai ra. “I tetai au taime, e manako taitaia ana maua. Inara, i muri ua ake to maua apiianga i te reo o te reira ngai i marama ai maua te au peu. Kua tauturu te pirianga vaitata ki te au taeake o te reira ngai ia maua kia akatanotano ki to maua au turanga ou.”

Ka riro taua tu akaaka ra e te inangaro puareinga ua i te akakeu tikai i te au taeake o te reira ngai. Te maara akaperepere ra ia Jenny te au ngutuare tangata tei neke ki Airerani, te ngai i mamaata mai ei aia. “E aronga takinga meitaki ratou,” i tuatua ai aia. “Kua aere mai ratou i te tavini, kare e kia taviniia atu. No to ratou maroiroi e te mataora i tauta ei au te tavini i te ngai anoano maataia ra te tauturu.” Teianei te tavini ra a Jenny raua ko tana tane ei nga mitinari i Kamapia.

Na Iehova te Meitaki “i Apingaʼi te Apinga”

Maata tikai te puapinga tei rauka ia Paulo i Makedonia! Mei tetai tai ngauru mataiti i muri mai, kua tata aia ki te au taeake i Philipi e: “Te akameitaki nei au i taku Atua kia maara ua atu au ia kotou kare e tivata.”​—Phili. 1:3.

Aiteite katoa to Trevor raua ko Emily manako, tei tavini ana i Maraui i mua ake ka patiia ai raua ki te Apii Pipiria Punanga Tiaki o Gileada. “Tetai au taime kua manako maua e me te tano nei ta maua e rave nei, inara kua mataora tikai maua. Vaitata atu to maua pirianga e kua kite mai maua i ta Iehova akameitakianga.” Kua akakite mai a Greg raua ko Crystal, tei taikuia i mua ake ana e, “Kare a maua apinga ke atu e inangaro ra i te rave.”

E tika rai, kare e rauka i te katoatoa i te tavini i tetai enua ke. Penei, ka meitaki atu tetai pae me neke ki tetai ngai o to ratou uaorai enua te anoano maataia ra te tauturu. Ka rauka i tetai pae te itae i te au akakoroanga no te tavini anga i roto i tetai atu au putuputuanga i te pae mai. Te mea puapinga ra te rave anga i taau ka rauka i te tavini ia Iehova. (Kolo. 3:23) Tika rai te au tuatua akauruia kia koe: “Na Iehova te meitaki i apingaʼi te apinga, kare oki e kapiti katoaia mai te kino i te reira.”​—Mase. 10:22.

[Pia/​Tutu i te kapi 5]

 Akara Meitaki i Toou Tu

Akara meitaki kia kite e me ka rauka ia koe i te tavini i tetai ngai tutuanga ke, akamanako i te au uianga ka aru mai, e iki meitaki ma te pure me te tau ra te reira neke anga noou. Ka rauka te au manako i roto i te au itiu o Te Punanga Tiaki tei topa akenei i te tauturu ia koe.

• E tangata pae vaerua ainei au?​—“Te Au Takainga no te Mataora” (Okotopa 15, 1997, kapi 6)

• E orometua tukatau ainei au?​—“Akapeea e Meitaki ei te Angaanga Orometua Painia” (Tiurai 1, 1989, kapi 10)

• Ka rauka ainei iaku te noo mamao mei toku ngutuare tangata e toku au oa?​—“Autuanga i te Mii no te Kainga i Roto i ta te Atua Angaanga” (Me 15, 1994, kapi 28)

• Ka rauka ainei iaku te apii i tetai reo ou?​—“Tavini Anga ma Tetai Putuputuanga Reo Ke” (Mati 15, 2006, kapi 17)

• Rava ainei taku moni no te neke anga?​—“Ka Rauka Ainei ia Koe i te Tavini i te Ngai Ke?” (Okotopa 15, 1999, kapi 23)

[Tutu i te kapi 6]

Ka akakeu te tu akaaka e te inangaro puareinga ua i te au taeake o te reira ngai

[Tutu i te kapi 7]

Puapingaia te aronga tei aere mai i te tavini