Maata te Angaanga e te Rekareka i Roto i te Angaanga a te Atua

TE INANGARO maira a Iehova kia rekareka ua rai koe. (Sala. 100:2) Ei tavini nona, papu e maata katoa taau angaanga. Penei kare i maata ana taau angaanga i te akatapuanga koe i toou oraanga ki te Atua, inara te akateiaa nei te au apainga a teianei ao e te au apainga pae vaerua ia koe. Penei te kinokino ra toou ngakau kare e rauka ana ia koe te akatupu i taau e inangaro ra i te rave. Akapeea koe e kite ei te tu parani e te akono tamou anga i ‘te rekareka no ko mai ia Iehova’?​—Nehe. 8:10.

Te noo nei koe i te tuatau kino e manganui te au taomianga, e ka anoanoia koe kia akapapa meitaki. I roto i teia turanga, tau tikai tetai akoanga akauruia a te apotetoro ko Paulo: “E tenana, kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia.”​—Ephe. 5:​15, 16.

No runga i taua akoanga meitaki ra, akapeea koe me akanoo i te au akakoroanga tika tikai naau uaorai e kia parani taau uaorai apii, te akonoanga i te ngutuare, angaanga tutuanga, angaanga moni, e tetai atu au angaanga tau?

Te maara ra ainei ia koe te rekareka taau i kite mai te akatapuanga koe toou oraanga ki te Atua e te papetitoanga? Kua rauka mai te rekareka mei te kite anga ia Iehova e tona au akakoroanga. Penei kua pou te au marama te apii meitaki anga koe kia rauka mai taua kite ra e te rekareka. Inara kua puapinga tikai taua tautaanga. Kua taui taua apiianga ra i toou oraanga kia meitaki atu.

E akono tamou i toou rekareka, e angai ua rai ia koe i te pae vaerua. Me e ngata ia koe te kimi i tetai tuatau i te tatau e te apii i te Pipiria, e akara meitaki i taau papaanga. Noatu e manga miniti ua te apiianga e te akamanako oonu anga i te ra okotai, ka akavaitata atu ra ia koe kia Iehova, papu e ka akamaata atu te reira i toou rekareka.

Ka rauka i te maataanga o te tavini o te Atua te taporoporo i tetai tuatau no te au angaanga puapinga mei te taime e akapouia ra ki te au mea kare e puapinga ana. Ui kia koe uaorai, ‘Eia taime e pou ana iaku te tatau i te makatini me kore te nutipepa o teianei ao, te akarakara tivi, te akarongorongo imene, me kore te aruaru anga i taku e reka ana?’ E reka taua au angaanga ra inara kia parani ua rai. (1 Timo. 4:8) Me te kite ra koe te manamanata i te  taangaanga i toou taime, e rave i te au takainga i te akatanotano i taau papaanga.

Te akamarama maira a Adam, e tane, e metua tane e toru ana tamariki, e e tangata pakari, e eaa tei tauturu iaia: “E tauta ana au te akono i tetai oraanga mama ua. E kopae ana au te au angaanga kaimoumou taime e te au apinga te umuumu maata ra i toku taime. Kare au e akangere nei i te au mea o te oraanga​—e rekareka ana au te tamataoraanga mama ua.”

Te akamanako oonu anga i te au tupuanga meitaki no taau au ikianga, ka rekareka akaou mai koe e ka tauturuia koe kia akono tamou i te au manako papu. Ei akaraanga, te karanga ra a Mariusz, e tangata pakari e toru ana tamariki e: “Te akamata anga au i te apii i te Pipiria, kua akamanako papu au i te tuatau ki mua. Maata nei rai toku manamanata i tetai au taime, e ko Iehova anake ua tei kite i te reira. Te akameitaki nei au i tana turuturu anga, e te akara rekareka nei au ki te tuatau ki mua.”

Mei to Mariusz turanga rai, kare te manako papu tikai e akakore katoatoa i te au manako taitaia. Inara ka tauturu te reira ia koe kia meitaki mai e kia autu meitaki i te au akaaoanga o te oraanga. Ka tatau tatou: “E rā kino anake to te tangata tumatetenga ra: kareka tei mataora te ngakau ra, e pokai tamou ïa tana.” (Mase. 15:15) E akamanako katoa i te aroa ta te Atua i akaari takere mai kia koe. Ka akamaroiroi taua akamanako oonu ra i toou aroa e toou rekareka no te Atua.​—Mata. 22:37.

Te tuku anga ia Iehova e tona au anoano ei mea mua i roto i toou oraanga, ka maata atu te rekareka o te ngutuare tangata. Te akaari anga i te au tu Kerititiano, ka akaiti mai te manamanata e ka piri vaitata atu e ka mataora atu te pukapukaanga ngutuare tangata. No reira, ka riro toou ngutuare ei akapuanga mou no te au e ei taokotaianga no te ngutuare tangata pouroa.​—Sala. 133:1.

Te pirianga ki te au angaanga pae vaerua ei ngutuare tangata, ka maata atu te rekareka tika tikai. Te akamarama maira a Mariusz e: “Kua akaperepere au i te tuatau e taokotai ana matou ei ngutuare tangata. E turuturu meitaki mai ana taku vaine. Me ka rauka, ka aru aia iaku ki te angaanga tutuanga me kore te tama i te ngai tarekareka i mua ake te au uruoaanga, e ka aru aia iaku me aere au me oronga i taku akoanga ki tetai atu putuputuanga. Kua riro teia ei akamaroiroianga iaku.”

Te akaue maira te au Tuatua Tapu i te au Kerititiano kia akono i te au anoano pae materia o to ratou ngutuare tangata. (1 Timo. 5:8) Me te pou maata ra te taime e te maroiroi i te angaanga moni, ka kore toou rekareka no te angaanga a te Atua. E pure kia Iehova no runga i te reira manamanata. (Sala. 55:22) Te manako ra tetai pae e te tuku anga i te Patireia o te Atua na mua, ka kimi ratou i tetai angaanga moni ke atu. Auraka tetai Kerititiano e akatika i tetai angaanga te umuumu maata ra i tona taime e te maroiroi, kia arai iaia mei te au mea puapinga maata i te pae vaerua.​—Mase. 22:3.

Meitaki kia tata koe i te mea meitaki e te mea kino no runga i te angaanga ka rauka mai me kore te raveia nei. Ae, e reka rai te angaanga tutaki meitaki e te merengoanga. Inara, te tauturu ra ainei taau angaanga moni i teianei i te akamaroiroi i te turanga pae vaerua o toou ngutuare tangata? E akamanako meitaki i te au tumu ravarai, e rave i te au ikianga kia riro toou pirianga kia Iehova ei mea puapinga rava atu.

Me kare taau angaanga i teianei e tauturu ia koe kia tere ki mua i te pae vaerua, ka anoanoia koe kia akatanotano i toou turanga. Manganui te au Kerititiano kua taui maata kia rauka tetai tuatau no te au mea pae vaerua. Kua akakite tetai taeake i Porani: “E tai rai aku ikianga, kia akaruke i te kamupani e angaanga ra au, no te mea e aere putuputu ana au ki te au tere pitiniti. Kare e rava ana toku taime i te akono meitaki i te au mea pae vaerua me kore i toku ngutuare tangata.” Te angaanga nei aia i teia taime i tetai angaanga kare e akapou ana i tona taime e tona maroiroi.

Rekareka i te Tauturu Anga i Tetai Ke

Kua tuatua a Iesu e “e mea meitaki i te oronga atu i te rave mai.” (Anga. 20:35) Manganui te au atianga no te au Kerititiano kia rave i taua tu oronga anga. Tetai au taime, ko te mata katakata pumaana, te ruru rima anga, te akameitaki tikai anga i tetai tangata no tana angaanga pakari teokaratiki, penei ko tera ua rai te ka anoanoia kia rekareka korua roa ai.

Kua akamaroiroi te apotetoro ko Paulo i te au taeake Kerititiano e: “E akapumaana atu i te ngakau taitaia, e tauturu atu i tei apikepike.” (1 Tesa. 5:14) Ka manako te aronga taitaia e kare e rauka ia ratou te akakoromaki i te au  manamanata ma to ratou uaorai maroiroi. Ka rauka ainei ia koe te tauturu i taua aronga ra? Me kite atu koe e kare tetai o toou au taeake e rekareka ana i roto i te angaanga a Iehova, e akamaroiroi atu iaia. Ka akamaroiroi katoaia koe me rave koe i te reira. Tetai au manamanata ra kare e rauka i te tangata te akatikatika. Inara, ka rauka ia koe i te akaari ngakau tae i te tangi aroa e te akamaroiroi atu i toou taeake kia irinaki ki ta Iehova turuturu anga ope kore. Te aronga ka rave i te reira kare rava ratou e mareka kore.​—Sala. 27:10; Isa. 59:1.

Tetai takainga tau, e pati atu i te tangata kare e rekareka ana, kia aru ia koe ki roto i te angaanga orometua. Te tono anga a Iesu te 70 pipi, kua tono “toko rua” aia ia ratou. (Luka 10:1) Kare ainei koe e irinaki e ka oronga ua mai aia i te ravenga akamaroiroi anga i tetai e tetai? Ka rauka ainei ia koe te taangaanga i taua akaraanga ra i te tauturu i tetai pae kia rekareka akaou i teia tuatau?

E tumuanga tau to tatou kia manamanata. Noatu rai, te akamaroiroi maira a Paulo ia tatou: “E rekareka i te Atu ra, aua e tivata, e te tuatua akaou atu nei au, Kia rekareka rai kotou.” (Phili. 4:4) No te mea te inangaro ra koe i te Atua, te akarongo ra kiaia, e te akakoromaki pakari ra i roto i te angaanga tana i oronga mai kia rave koe, e akakoroanga to roto i toou oraanga. Te oronga maira te reira i te rekareka kia koe. Tei maata atu, te tauturu maira a Iehova ia koe kia autu atu i te au taomianga e te au manamanata taau ka aro atu.​—Roma 2:​6, 7.

Ma te nga mata akarongo, te irinaki nei tatou e te vaitata nei tatou ki te ao ou ta Iehova i taputou mai. Maata atu te akameitakianga e te au tumu ta te rekareka ka oronga mai! (Sala. 37:34) Kia rekareka ua rai tatou e kia kore e akangaropoina te akameitaki maata maira a Iehova ia tatou i teianei. No reira ka rauka ia tatou te “akamori ia Iehova ma te pereperekavana.”​—Sala. 100:2.

[Tutu i te kapi 8]

(No runga i teia, akara i te puka)

Kia akatanotano koe i te akatuanga i toou taime kia rekareka koe

TAREKAREKA e te TAMATAORA

KAINGA e te AKONO I TE NGUTUARE

ANGAANGA

AU UIPAANGA KERITITIANO

APII NAAU UAORAI

ANGAANGA OROMETUA

[Au Tutu i te kapi 10]

Ka rauka ia koe te tauturu i tetai ke kia rekareka akaou mai?