Tatanu i te Aroa Kare ua e Kore
Tatanu i te Aroa Kare ua e Kore
‘E akakoromaki to te aroa i te au mea katoa. Kare ua te aroa e kore.’—1 KORI. 13:7, 8.
1. (a) Akapeea te aroa i te akakite putuputuia mai anga? (e) I runga iaia e i teaa ta te manganui e akamou maata ra i to ratou aroa?
E MAATA te akakite anga no runga i te tumu tuatua o te aroa. Kua akapaapaaia e kua atuia ei au imene akainangaro anga. Te anoano maata ra te tangata i te aroa. E akaari putuputu mai ana te au puka e te au teata i te reira i roto i te au tua akainangaro maani ua, e e maata te au apinga e okoia ra no runga i te reira. Inara, te ngere maata nei te aroa tika tikai no te Atua e no te tangata tupu. Te kite nei tatou i ta te Pipiria i totou mai no runga i teia tuatau openga. Ka riro te tangata “ei akaperepere ia ratou uaorai, ei noinoi, . . . ei anoano i te au mea e navenave ei ra, kare i anoano i te Atua.”—2 Timo. 3:1-5.
2. Eaa te akamatakite anga ta te Pipiria e oronga maira no runga i te aroa akavare ua?
2 Ka rauka i te au tangata i te akaari i te aroa, inara te akamatakite maira te Tuatua a te Atua ia tatou no runga i te aroa akavare. E te akataka maira te Pipiria eaa te ka tupu me akaia taua aroa ra ki roto i to tetai ngakau. (1 Timo. 6:9, 10) Maara ainei ia koe eaa ta te apotetoro ko Paulo i tata no runga ia Dema? Noatu kua piri ana aia kia Paulo, kua inangaro a Dema i ta teianei ao e oronga maira. (2 Timo. 4:10) Kua akamatakite te apotetoro ko Ioane i te au Kerititiano no runga i teia kino tikai. (E tatau ia 1 Ioane 2:15, 16.) Te anoano anga i to teianei ao, e tana au apinga tuatau poto ua, kare e rotai ana ki te anoano i te Atua e te au mea no ko mai iaia.
3. Eaa te akaaoanga ta tatou e aro atu nei, i te akatupu anga i teea au uianga?
3 Kare tatou no teianei ao, noatu e te noo nei tatou i roto i reira. No reira, te tupu nei te akaaoanga kia tatou no te kopae anga i te manako taitoito o teianei ao no runga i te aroa. E puapinga tikai e eiaa tatou e tuku ia tatou uaorai kia akaereereia e te aroa akavare me kore aroa tau kore. Ka tatanu e ka akaari i reira tatou i te aroa tei tau ki te kaveinga kiaai? Eaa te au akanoonoo anga te ka tauturu ia tatou kia tatanu i te aroa te akakoromaki ra i te au mea katoa e kare ua e kore? Akapeea teia mataara i te akapuapinga anga ia tatou i teianei e te akakeu anga i to tatou tuatau ki mua? Ka inangaro tatou i te au pauanga mei to te Atua manako, kia rauka ia tatou te arataki anga tau.
Tatanu Anga i te Aroa no Iehova
4. Akapeea te aroa no te Atua e tupu ei?
4 Te aiteanga o te tatanu anga ko te akapapa anga e te akamaroiroi anga i te akatupu i tetai apinga. E akamanako ana i tetai tangata tanutanu tei angaanga pakari ana i te akapapa i te one e te tanu anga i te au ua. Te tapapa ra aia kia tupu mai te au ua. (Ebe. 6:7) Mei te reira rai, kia tupu katoa to tatou aroa no te Atua. Eaa te umuumuia maira kia tupu teia? Kia taangaanga tatou i te one meitaki o to tatou ngakau, te ngai i ruruia ai te ua o te tuatua mou o te Patireia. Ka rauka ia tatou i te rave i teia na roto i te apii maroiroi anga i te Tuatua a te Atua kia akamaata mai i to tatou kite no runga iaia. (Kolo. 1:10) Te aere putuputu anga e te paupau anga i roto i te au uipaanga a te putuputuanga ka tauturu katoa ia tatou kia akamaata mai i te kite. Te tauta pakari ra ainei tatou tataki tai kia rauka mai te kite oonu?—Mase. 2:1-7.
5. (a) Akapeea tatou e kite ei i te au tu maata o Iehova? (e) Eaa taau ka karanga no runga i te tuatua tau, te pakari, e te mana o te Atua?
5 Na roto i tana Tuatua, kua akakite mai a Iehova i tona tu. Na te apii anga i te au Tuatua Tapu e te tere anga ki mua i te kite ia Iehova, ka tupu ua atu to tatou ariki rekareka anga i tona au tu—tona tuatua tau, te mana, te pakari, tei runga rava atu, te aroa maata rava. Te akaari maira a Iehova i te tuatua tau i roto i tona au aerenga e i roto i tana ture apa kore. (Deu. 32:4; Sala. 19:7) Ka rauka ia tatou i te akamanako i ta Iehova au angaanga i anga pouroa mai e te umere anga no runga i tona pakari teitei rava. (Sala. 104:24) Te akapapu katoa maira te ao e pini ua ake e ko Iehova te Tumu o te ririnui e te mana ope kore.—Isa. 40:26.
6. Akapeea te aroa o te Atua i te akaariia mai anga kia tatou, e akapeea te reira i te akakeu anga ia koe?
6 Eaa te tuatuaia ra no runga i te tu maata o te Atua, tona aroa? Te akakeu maata ra te reira ia tatou katoatoa. Kua akaari mai aia i taua aroa ra na te oronga anga mai i te oko no te akaora anga i te au tangata ravarai. (E tatau ia Roma 5:8.) Ka rauka i te au tangata o teianei ao teia apinga aroa, inara ko te aronga anake ua tei ariki i te aroa o te Atua e tei akarongo ki tana Tamaiti te ka puapingaia. (Ioa. 3:16, 36) To te Atua oronga mai anga ia Iesu ei atinga tarangaara no ta tatou au ara, e mea tau kia akakeu ia tatou kia aroa atu i te Atua.
7, 8. (a) Eaa te umuumuia ra kia akaari tatou i te aroa no te Atua? (e) Eaa ta te iti tangata o te Atua e aro atura ia ratou e akono ra i tana au akauenga?
7 Akapeea tatou i te akaari anga i to tatou aroa no te Atua, te ariu atu anga ki te au mea pouroa tana i rave ana no tatou? E puapinga tikai te pau anga tei akauruia mai: “Ko teia oki te aiteanga o te aroa i te Atua, kia akono tatou i tana au akauenga, e inara kare tana au akauenga i te mea teiaa.” (1 Ioa. 5:3, NW) Ae, te akakeu ra te aroa o te Atua ko Iehova ia tatou kia akono i tana au akauenga. Ko tetai tumu te reira i akakite ei tatou i tona ingoa e te Patireia, te akapuapinga ra i tetai ke. Te rave ngakau katoaanga tatou i te reira, e akapapu anga ia e te akono ra tatou i ta te Atua au akauenga ma te akakoroanga tau tikai.—Mata. 12:34.
8 Te akakoromaki ra to tatou au taeake i te ao katoa i te akono anga i ta te Atua au akauenga, noatu e te aro atura ratou i te tu inangaro kore e te patoianga pakari i te karere o te Patireia. Kare ratou e tukutuku ua atu ki ta ratou au tauta anga i te akatupu tikai anga i ta ratou angaanga orometua. (2 Timo. 4:5) Pera katoa, te akakeuia ra tatou kia akakite atu i te kite o te Atua ki tetai ke, e kia akono pouroa i tana au akauenga.
Te Tumu i Aroa ai Tatou i to Tatou Atu ko Iesu Karaiti
9. Eaa ta Karaiti i akakoromaki, e eaa tei akakeu iaia?
9 Kapiti atu ki te aroa anga i te Atua, e manganui te au tumu ka akatupu ei tatou i te aroa no tana Tamaiti. Noatu e kare rava tatou i kite ana ia Iesu, ka oonu roa atu to tatou aroa nona ia tatou e apii maata ra no runga iaia. (1 Pete. 1:8) Eaa tetai au mea ta Iesu i akakoromaki ana? Iaia e rave ra i te anoano o tona Metua, kua ririia a Iesu kare e tumu, kua takinokinoia, kua akaapa tarevakeia, e kua akakinoia. E kua mamae katoa aia mei tetai atu au akakino anga. (E tatau ia Ioane 15:25.) No to Iesu aroa i tona Metua i te rangi i akakeu ei iaia kia akakoromaki ua i taua au timataanga ra. E kua akakeuia e te aroa, kua oronga mai tona mate akaatinga i tetai oko no te manganui.—Mata. 20:28.
10, 11. I te akamanako anga i ta Karaiti i rave no tatou, eaa ra to tatou akakoroanga?
10 Te akakeu ra to Iesu oraanga i tetai pauanga mei ia tatou. Ia tatou e manako ra no ta Karaiti i rave no tatou, ka oonu roa atu to tatou aroa nona. Ei au pipi nana, e tauta tatou i te tatanu e te akaari i te aroa mei to Karaiti rai e kia akakoromaki ua tatou i te akono anga i tana akauenga i te akakitekite anga i te Patireia e te akariro anga i te tangata ei pipi.—Mata. 28:19, 20.
11 Te ariu atu anga ki to Karaiti aroa no te au tangata ravarai, te akakeuia ra tatou kia akaoti i ta tatou tukuanga angaanga i mua ake ka tae mai ei te openga. (E tatau ia 2 Korinetia 5:14, 15.) E puapinga maata tikai te aroa ta Karaiti i akaari mai i tana akatupu anga i ta te Atua i akakoro mai no te au tangata. E te akaraanga ta Karaiti i akaruke mai kia aru vaitata tatou, te tauturu maira ia tatou tataki tai kia piri atu ki roto i taua akakoroanga ra a te Atua. Te umuumu maira teia kia tatanu meitaki tatou i te aroa no te Atua i te ka rauka maata tikai ia tatou. (Mata. 22:37) Na te akono anga i ta Iesu i apii mai e tana au akauenga, te akaari ra tatou i to tatou aroa nona e te tauta anga i te turu ngaueue kore i to te Atua turanga ngateitei noatu eaa te ka tupu mai, mei ta Iesu rai i rave.—Ioa. 14:23, 24; 15:10.
Aruaru Anga i te Mataara Meitaki Maata Rava no te Aroa
12. Eaa te aiteanga o ta Paulo tuatua “te mataara meitaki maata rava”?
12 E tangata aru te apotetoro ko Paulo ia Karaiti. No te aru vaitata anga i te au takainga o Karaiti, kua rauka ia Paulo i te tuatua ma te tapupu kore i te raurau anga i tona au taeake kia riro mai ei aronga aru iaia. (1 Kori. 11:1) Noatu e kua raurau aia i te au Kerititiano i Korinetia kia kimi maroiroi ua rai i tetai au apinga aroa o te vaerua tei akakiteia mai i te anere mataiti mua, mei te akaora anga e te tuatua anga i te tuatua ke, kua akaari a Paulo kia ratou e e apinga meitaki rava atu tetai te ka aruaruia. I roto ia 1 Korinetia 12:31, kua akamarama mai aia e: “E akakite atura au ia kotou i te mataara meitaki maata rava ra.” Te akaari maira te au manako i roto i te au irava e aru maira e ko teia te mataara meitaki maata rava no te aroa. Na roto i teea tu i meitaki maata rava ai te reira? Kua akamata a Paulo i te akatutu mai i te aiteanga o tana e tuatua ra. (E tatau ia 1 Korinetia 13:1-3.) Me e au tu karape meitaki tona e kua rauka i te akatupu i te au mea maata inara kare ona aroa, eaa te ka rauka mai iaia? Kare e apinga! Kua akakeuia e te vaerua o te Atua, kua akamarama meitaki mai aia i teia manako puapinga. E akakeuanga ririnui tikai tana i rave i te akamarama mai anga i te reira kia tatou!
13. (a) Eaa te irava mataiti no te 2010? (e) Na roto i teea tu kare ua te aroa e kore?
13 Aru mai, te akataka maira a Paulo kia tatou eaa te aroa e eaa kare ko te reira. (E tatau ia 1 Korinetia 13:4-8.) I teianei, e akapou i tetai taime i te akamanako e me te aru ra koe i ta te aroa e umuumu maira. E akamanako meitaki i te au tuatua openga i roto i te irava 7 e te au tuatua mua i roto i te irava 8: ‘E akakoromaki to te aroa i te au mea katoa. Kare ua te aroa e kore,’ ko ta tatou irava mataiti ia no te 2010. E akara ana i roto i te irava 8, te karanga ra a Paulo e ko teia au apinga aroa o te vaerua, kapiti mai te totou e te tuatua ke ke ra—tei taangaangaia i te akamata anga o te putuputuanga Kerititiano—ka akakoreia te reira. Ka ope te reira. Inara ka vai ua rai te aroa. Ko Iehova te tumu tikai o te aroa, e e mutu kore aia. No reira kare ua te aroa e kore. Ka vai ua rai te reira e tuatau ua atu ei tu no to tatou Atua mutu kore.—1 Ioa. 4:8.
Akakoromaki to te Aroa i te Au Mea Katoa
14, 15. (a) Akapeea te aroa i te tauturu anga ia tatou kia akakoromaki i te au timataanga? (e) Eaa tetai taeake mapu i kore ei i tuku i te au?
14 Eaa te tauturu ra i te au Kerititiano kia akakoromaki ua noatu eaa te au timataanga, te au turanga ngata, e te au manamanata ta ratou ka aro atu? Kua akatumu tikaiia te aroa ki runga i te kaveinga. E maata atu taua aroa ra i to te akaruke ua anga i ta tatou au apinga materia. Tae roa te reira i te akono puareinga anga tatou i to tatou tu tiratiratu e te akangere katoaanga i to tatou oraanga no te Karaiti. (Luka 9:24, 25) E akamanako ana i te oraanga o te Au Kite akarongo mou tei tamamaeia i roto i te au puakapa tamamae anga, te au puakapa angaanga, e te au are auri i te tuatau i te Tamaki II o te Ao e i muri ake i te reira.
15 Te akataka meitaki maira tetai mapu Kite no Tiamani ko Wilhelm tona ingoa no runga i teia. Kare i tuku ana i te au, kua tu tiratiratu ua aia ki mua i te pupu Nazi te ka pupui iaia. I roto i tetai reta porokiroki ki tona ngutuare tangata, kua tata aia e: “Tei maata atu e aroa tatou i te Atua, mei tei akaueia mai e to tatou Arataki ko Iesu Karaiti. Me turuturu tatou iaia, ka tutaki mai aia ia tatou.” I muri mai, i roto i tetai atikara o te Punanga Tiaki, kua tata tetai mema o tona ngutuare e: “I te au tuatau tumatetenga, kua akapapu matou ei ngutuare tangata kia tuku ua rai matou i to matou aroa i te Atua ko te mea mua ia.” Ko te tu katoa rai ia o te au taeake e manganui te akakoromaki ra i teianei i te tapekaanga i roto i te are auri i Amenia, Eritiria, Korea Apatonga, e tetai atu au enua. Te vai ngaueue kore nei teia au taeake no to ratou aroa ia Iehova.
16. Te akakoromaki ra to tatou au taeake i Maraui i teaa?
16 I te au ngai e manganui, e timata ana tetai au timataanga tukeke i te akarongo e te akakoromaki o to tatou au taeake. No tetai 26 mataiti kua akakoromaki te Au Kite o Iehova i Maraui i te au arai anga a te kavamani, te patoianga pakari, e te au turanga kino e manganui. Kua akameitakiia to ratou tu akakoromaki. Te tupu anga te takinokino, mei tetai 18,000 Au Kite i roto i taua enua ra. E 30 mataiti i muri mai, kua kake atu to ratou numero ki te 38,393. Kua kite katoaia mai taua tupuanga ra i roto i tetai atu au enua.
17. Eaa ta tetai pae i roto i te ngutuare kare e noo au ana e aro atura, e akapeea ratou i te akakoromaki anga i te takinokino anga?
17 I roto i tetai tu, e pakari te au akakino anga ki runga i te iti tangata o te Atua. Me no ko mai ra i te au mema o te ngutuare te patoianga i te au Kerititiano tataki tai, pakari atu te kino ka tupu mai. Penei na te au mema o te ngutuare me kore te au kopu tangata e akatupu ana i te taitaia. Kare ainei e kua totou mai ana a Iesu e ka tupu teia? Ae, e manganui tei kite i te tikaanga o tana au tuatua. (Mata. 10:35, 36) Kua akakoromaki ua te au mapu i te patoianga a to ratou au metua irinaki kore. Kua tuaruia tetai pae kia akaatea mei te kainga, inara kua ariki aroaia mai ratou e te Au Kite. Kua kopae takiriia tetai pae. Eaa tei tauturu i taua aronga ra kia akakoromaki i te takinokino anga? Kare e no to ratou aroa ua i te taokotaianga taeake, tei maata atu ra, no to ratou aroa tika tikai ia Iehova e tana Tamaiti.—1 Pete. 1:22; 1 Ioa. 4:21.
18. Akapeea te aroa te akakoromaki ra i te au mea katoa i te tauturu anga i te au Kerititiano akaipoipo?
18 E manganui tetai atu au turanga i roto i te oraanga te umuumu maira i te aroa te akakoromaki ra i te au mea katoa. I roto i te pirianga akaipoipo, te tauturu ra te aroa i nga tokorua kia akangateitei i te au tuatua a Iesu: “E ta te Atua i topiri ra, auraka te tangata e akataka ke atu.” (Mata. 19:6) Me e ‘pekapeka to ratou i te kopapa nei,’ kia akamaara ua rai te au Kerititiano akaipoipo kia ratou uaorai e ko Iehova tetai tuanga puapinga i roto i to ratou akaipoipo. (1 Kori. 7:28) Te karanga ra tana Tuatua e ‘e akakoromaki to te aroa i te au mea katoa,’ e ka akaketaketaia te tane e te vaine tei akakakauia ki teia tu kia piri vaitata ki tetai e tetai e kia akono tamou i to ratou akaipoipo.—Kolo. 3:14.
19. Eaa tei tupu mai i rotopu i te iti tangata o te Atua i muri ake i te au tumatetenga natura?
19 Te tauturu ra te aroa ia tatou kia akakoromaki i te au mea katoa i te tuatau o te au tumatetenga natura. Ko te turanga teia te tupu anga te ngaruerue enua i te tuanga tonga o Peru e te akakino anga te Uriia Katrina i tetai au tuanga o te Ava i Marike. E manganui to tatou au taeake kua takoreia to ratou au are me kore te au apinga materia i roto i taua tumatetenga ra. Na te aroa i akakeu i te putuputuanga i te ao katoa kia oronga i te au apinga, e kua akatu akaou te aronga tauturu i te au are e te au Are Uipaanga Patireia. Te akapapu maira taua tu ra e te aroa ra e te akono ra to tatou au taeake i tetai e tetai i te au taime ravarai e i raro ake i tetai ua atu au turanga.—Ioa. 13:34, 35; 1 Pete. 2:17.
Kare ua te Aroa e Kore
20, 21. (a) Eaa i puapinga maata ai te aroa? (e) Eaa koe ka tauta ei i te aruaru i te mataara o te aroa?
20 I roto i te iti tangata o Iehova i teia tuatau, te kite nei tatou i te pakari no te aruaru anga i te mataara meitaki rava atu no te aroa. E tika rai, e meitaki rava atu te reira i roto i te au turanga katoatoa. E akamanako ana e i akapeea te apotetoro ko Paulo i te akakite anga i taua tuatua mou ra. Mea mua, kua tou atu aia e ko te au apinga aroa o te vaerua ka ngaro ke atu e ka tupu te putuputuanga Keritiitano ki te tu pakari mei tona akamata anga mai. E oti kua taopenga aia e: “E teianei, te vai nei te akarongo, te manakonako, e te aroa, e toru ra; ko tei maata ra i taua toru nei, ko te aroa ïa.”—1 Kori. 13:13.
21 I te openga, ko te au mea te irinaki ra tatou ka riro ei mea tika tikai, e kare e ope te irinaki anga i te reira. Te manakonakoanga no te au taputou ta tatou e inangaro ra i te kite kia akatupuia, kare e akamanako akaouia me riro te au mea katoa a muri mai ei mea ou. Akapeea ra te aroa? Kare ua te reira e kore. Ka vai ua rai te reira. Ma te manako anga i te ora mutu kore, ka kite meitaki e ka marama atu tatou i te au tu o to te Atua aroa. Na te rave anga i to te Atua anoano i te aruaru anga i te mataara meitaki rava o te aroa kare ua e kore, penei ka ora ua atu koe e tuatau ua atu.—1 Ioa. 2:17.
Akapeea Koe me Pau?
• Eaa tatou ka matakite ei i te aroa akavare ua?
• Ka rauka i te aroa i te tauturu ia tatou kia akakoromaki i teaa?
• Na roto i teea tu kare te aroa e kore?
[Au Uianga Apii]
[Tataanga i te kapi 27]
Te irava mataiti no te 2010 koia oki: ‘E akakoromaki to te aroa i te au mea katoa. Kare ua te aroa e kore.’—1 Kori. 13:7, 8.
[Tutu i te kapi 25]
Te akakeu ra te aroa o te Atua ia tatou kia akakitekite aere
[Tutu i te kapi 26]
Tauturu te aroa ope kore i to tatou au taeake e te au tuaine i Maraui kia akakoromaki i te au timataanga