Akangateiteiia te Tu e Tutara ra a Iehova!
Akangateiteiia te Tu e Tutara ra a Iehova!
“Ko Tei Teitei Rava Atu te Tutara i roto i te patireia o te tangata nei.”—DANI. 4:17, NW.
1, 2. Eaa tetai au tumu i puapinga kore ei te tutaraanga a te tangata?
KUA puapinga kore te tutaraanga a te tangata! Kare e ekoko no runga i te reira. Tetai tumu maata no taua tu puapinga kore ra, koia oki te ngere ra te tangata i te pakari kia rauka i te tutara meitaki. Te puapinga kore o te tutaraanga a te tangata te kitea uaia ra i teia tuatau, no te mea e maata te au tutara te akaari ra ia ratou uaorai ei aronga ‘akaperepere ia ratou uaorai, ei noinoi, ei akatietie, ei nengonengo, ei viivii, ei akaatikau koreromotu, ei tapepe pikikaa, ei mako kore, ei rotoriri, ei akavaavaa i te tangata memeitaki ra, ei pikikaa, ei māro, ei ngakau akateitei.’—2 Timo. 3:2-4.
2 I muatangana kua patoi to tatou nga metua mua i te tu e tutara ra te Atua. I te rave anga i teia, penei kua manako raua e te iki ra raua i te akatere ia raua uaorai. Te tikaanga ra, te kauraro ra raua ki te tutaraanga a Satani. E ono tauatini mataiti te tutaraanga kino a te tangata—tei akakeu pakariia e “te ariki o teianei ao,” ko Satani—kua apai mai te reira ia tatou ki tetai tuatau kino rava atu i roto i te tuatua enua o te tangata. (Ioa. 12:31) Te tuatua anga no runga i te turanga o te tangata i teia tuatau, te karanga ra The Oxford History of the Twentieth Century e ko “te kimi anga i tetai ao ara kore” e mea puapinga kore ua te reira. Te akamarama ra te reira e: “Kare anake ua te reira e kitea, tera ra ko te tauta anga i te akatupu i te reira, ka taki atu ki te kino, te kauraro takiri anga ki te mana akatere porotiki, e te mea kino roa atu, ki te tamaki.” Te akakite tika ua maira te reira e ko te tutaraanga a te tangata kua puapinga kore!
3. Eaa ta tatou ka tuatua no runga i te tu ka tutara te Atua, naringa kare a Adamu raua ko Eva i ara?
3 E mea tumatetenga tikai, e kua kopae to tatou nga metua mua i te tutaraanga anake ua te ka puapingaia—te tutara a te Atua! E tika, kare tatou i kite tikai e ka akapeea ra a Iehova me akanoo i te tu o tana akaaere anga i te enua, naringa a Adamu raua ko Eva i vai akarongo mou kiaia. Tera ra, papu ia tatou e ko te tutaraanga a te Atua tei arikiia e te tangata pouroa, ka akairoia ki te aroa e te tu papakitai kore. (Anga. 10:34; 1 Ioa. 4:8) No runga i to te Atua pakari aite koreia, papu katoa ia tatou e naringa te tangata i noo ua ki raro ake i te tutaraanga a Iehova, ka rauka i reira i te patoi atu i te au tarevake pouroa tei raveia e te aronga turuturu i te tutaraanga a te tangata. Ka puapingaia i reira te tutaraanga a te Atua, i raro i tana aratakianga, i ‘te akamerengo i te kaki o te au mea ora katoa.’ (Sala. 145:16) Naringa kare, kua riro te reira ei tutaraanga ara kore. (Deu. 32:4) E mea tumatetenga tikai e kua kopae te tangata i te reira!
4. Eaa te mamao tei akatikaia a Satani kia akaaere?
4 E meitaki rai kia akamaara e noatu e kua akatika a Iehova i te tangata kia tutara ia ratou uaorai, kare rava aia i akakore ana i tona tikaanga kia tutara ki rungao i tana au mea ora. Kua maro katoaia te ariki ririnui o Babulonia kia kite e ko “Tei Teitei Rava atu te Tutara i roto i te patireia o te tangata nei.” (Dani. 4:17, NW) I te tuatau ki mua, ka akatupu te Patireia o te Atua i tona anoano. (Mata. 6:10) E tika, no te tuatau poto ua, kua akatika a Iehova ia Satani kia riro ei “atua o teianei ao” kia rauka i te pau tikai i te au maroanga tei akatupuia e taua vaerua patoi ra. (2 Kori. 4:4; 1 Ioa. 5:19) Noatu rai, kare rava i rauka ana ia Satani i te akaaere ki vao ake i te kotinga ta Iehova i akatika. (2 Para. 20:6; akaaite ia Iobu 1:11, 12; 2:3-6.) E kua vai ua ana rai tetai aronga tei iki kia kauraro ki te Atua, noatu e te noo ra ratou i roto i te ao tei tutaraia e te Enemi maata o te Atua.
Ta te Atua Tutaraanga ia Iseraela
5. Eaa te koreromotu ta Iseraela i papau ki te Atua?
5 Mei te tuatau ia Abela ki te tuatau i akanooia ai te iti tangata o Iseraela, e maata te aronga akarongo mou tei akamori ia Iehova e tei akono i tana au akauenga. (Ebe. 11:4-22) I te tuatau ia Mose, kua papau a Iehova i tetai koreromotu ki te uanga o Iakoba, e kua riro teia aronga ko te iti tangata o Iseraela. I te mataiti 1513 M.T.N., kua papau te ngati Iseraela e ka ariki ratou uaorai e to ratou uanga ia Iehova ei Tutara, i te na ko anga e: “Te au tuatua ravarai ta Iehova i tuatua, ka rave ïa matou.”—Exo. 19:8.
6, 7. Eaa tei akataka mai i te tu o ta te Atua tutaraanga ia Iseraela?
6 E akakoroanga to Iehova i iki ei aia i te ngati Iseraela kia riro ei iti tangata nona. (E tatau ia Deuteronomi 7:7, 8.) Ko teia ikianga e maata atu tei o mai i to te turanga ua o te ngati Iseraela. Kua o katoa mai te ingoa o te Atua e tana tutaraanga ngateitei, e ko teia tei puapinga maata roa atu. Kua riro to Iseraela ei kite, e ko Iehova anake ua te Atua mou. (Isa. 43:10; 44:6-8) No reira, kua akakite a Iehova ki taua iti tangata ra e: “E aronga tapu oki koe no to Atua ra no Iehova, e kua iki a Iehova ia kotou no roto i te au iti-tangata ravarai o te ao nei, ei iti-tangata tikai nona uaorai.”—Deu. 14:2.
7 Te tu i akaaere ei te Atua i te ngati Iseraela kua akamanako rai te reira e e aronga apa ua ratou. I taua taime rai, kua riro tana au ture ei mea ara kore e kua akaata i te au tu o Tei Oronga mai no ratou. Te au akauenga a Iehova tei orongaia na roto ia Mose kua akataka meitaki i to te Atua tu tapu, tona inangaro i te tuatua tau, tona tu puareinga ua i te akakore i te ara, e tona akakoromaki. I muri mai, i te tuatau ia Iosua e tona uki, kua akarongo te iti tangata i te au akauenga a Iehova e kua mataora ratou i te au e te au akameitakianga pae vaerua. (Iosu. 24:21, 22, 31) Kua akaari mai te tuatau o te tuatua enua o Iseraela i te puapinga no te tu e tutara ra a Iehova.
Openga Kino ta te Tangata Tutaraanga
8, 9. Eaa te patianga kamakura ta Iseraela i rave, e eaa tei tupu mai?
8 I te au tuatau ra i aereia, kua putuputu te ngati Iseraela i te uri ke mei te tutaraanga a te Atua e kua ngere i tana paruruanga. I te openga, na roto i te peroveta ko Samuela, kua pati atu to Iseraela i tetai tangata ei ariki no ratou. Kua akakite a Iehova kia Samuela kia akatika i ta ratou patianga. Inara, kua na ko katoa a Iehova e: “Kare oki ko koe ta ratou i akaruke, kua akaruke ra ratou iaku, auraka au ei tutara ki rungao ia ratou.” (1 Samu. 8:7) Noatu e kua akatika a Iehova i tetai tangata ei ariki no Iseraela, kua akamatakite aia ia ratou e ko te tutaraanga a te tangata ka akatupu i te openga kino.—E tatau ia 1 Samuela 8:9-18.
9 Te akaari maira te tuatua enua i te tika tikai o ta Iehova akamatakiteanga. Kua riro te tutaraanga a te ariki tangata ua nei, ei akatupu i te au manamanata kino no Iseraela, i te kore anga tikai taua ariki ra i vai akarongo mou ua. Me akamanako tatou i taua akaraanga o Iseraela, kare i te mea poitirere e i roto i te au mataiti i aereia, ko te au kavamani e akaaereia ra e te tangata tei kore i kite ia Iehova, kua puapinga kore i te apai mai i te au tupuanga tinamou e te meitaki. E tika, kua pati tetai au tangata poritiki i te Atua kia akameitaki mai i ta ratou au tautaanga kia rauka te au e te tinamou, inara ka akapeea te Atua i te akameitaki anga i te aronga kare e kauraro ana ki te tu e tutara ra aia?—Sala. 2:10-12.
E Iti Tangata Ou i Raro Ake i ta te Atua Tutaraanga
10. Eaa ra a Iseraela i monoia ai, ei iti tangata ikiia e te Atua?
10 Kare te iti tangata o Iseraela i inangaro puareinga ua i te tavini ia Iehova ma te akarongo mou. I te openga, kua kopae ratou i te Mesia tei ikiia e te Atua, e kua kopae a Iehova ia ratou e kua akakoro i te mono ia ratou ki tetai pupu tangata tei akamata i tetai iti tangata ou. Tei tupu mai no te reira, i te mataiti 33 T.N. kua akamataia te putuputuanga Kerititiano o te aronga akamori akatainuia o Iehova. Kua riro te reira putuputuanga ei iti tangata ou i raro ake i to Iehova mana akaaere. Kua tuatua a Paulo no runga i te reira e ko “te Iseraela o te Atua.”—Gal. 6:16.
11, 12. Eaa te au tu aiteite o te akaaereanga i rotopu i to Iseraela e “te Iseraela o te Atua”?
11 Rotopu i te iti tangata mua o Iseraela e “te Iseraela [ou] o te Atua” e au tuke anga rai tetai e te au tu aiteite. Eiaa mei to Iseraela i taito, kare o te putuputuanga Kerititiano ariki, e kare e anoanoia kia oronga i te manu ei atinga no te aronga ara. Tetai tu aiteite i rotopu i te iti tangata o Iseraela e te putuputuanga Kerititiano, koia oki ko te akanoonoo anga o te aronga pakari. (Exo. 19:3-8) Kare taua aronga pakari Kerititiano e tutara ana ki rungao i te anana. Mari ra, te tiaki ra e te arataki ra ratou i te putuputuanga i roto i te au angaanga Kerititiano ma te ngakau tae. Te akono ra ratou i te katoatoa i roto i te putuputuanga ma te aroa, i te oronga anga i te akameitakianga e te akangateiteianga no ratou pouroa.—2 Kori. 1:24; 1 Pete. 5:2, 3.
12 Na te akamanako oonu anga ki runga i te mataara i akono ei te Atua i to Iseraela, ka maata atu te au mema o “te Iseraela o te Atua” e to ratou oa o te “mamoe ke atu” i te ariki rekareka ia Iehova e te tu o tana akaaere anga. (Ioa. 10:16) Ei akaraanga, te akaari maira te tuatua enua e kua riro te au tangata tutara o Iseraela ei akakeu anga maata ki runga i to ratou au tangata, no te meitaki me kore no te kino. Te akamaara maira taua tika ra ki te aronga e arataki ra i te au Kerititiano e, noatu kare ratou i te au tutara mei te au ariki i taito, kia tuku ua rai ratou i te akaraanga meitaki no te akarongo.—Ebe. 13:7.
Ta Iehova Tutaraanga i Teia Tuatau
13. Eaa te tupuanga puapinga tei tupu i te mataiti 1914?
13 Te akakitekite nei te au Kerititiano ki te ao o teia tuatau e te vaitata ra te tutara anga a te tangata ki tona openga. I te mataiti 1914, kua akanoo a Iehova i tona Patireia i te rangi i raro ake i tana Ariki ikiia, ko Iesu Karaiti. I taua taime, kua oronga aia i te mana kia Iesu kia aere “ma te upokotu atu e kia upokotu atu rai.” (Apo. 6:2) Kua akakiteia ki te Ariki tei akaterono ou ia e: “E ariki oki koe i rotopu i to au enemi ra.” (Sala. 110:2) Te mea mii ra, kua patoi ua atu rai te iti tangata i te kauraro ki ta Iehova tutaraanga. Kua rave ua atu rai ratou mei te mea e, “kare e Atua.”—Sala. 14:1.
14, 15. (a) Akapeea tatou i te tutaraia anga i teia tuatau e te Patireia o te Atua, e i te akamanako anga i teia, eaa te au uianga ka tau tatou kia ui kia tatou uaorai? (e) Akapeea te turanga ngateitei o ta te Atua tutaraanga i te kite katoaia anga i teia tuatau?
14 Te vai nei rai e tokoiti au mema akatainuia o “te Iseraela o te Atua,” e ko teia aronga, ei au taeake no Iesu, te rave nei rai ratou i te angaanga ei au ‘karere no te Mesia.’ (2 Kori. 5:20) Kua ikiia ratou ei pupu tavini akono meitaki e te pakari, ei akono e te oronga i te kai pae vaerua no te aronga akatainuia, e te urupu Kerititiano e tupu nei, e teianei e mirioni ua atu tei kapitiia mai ma te manakonakoanga no te oraanga i te enua e tuatau ua atu. (Mata. 24:45-47; Apo. 7:9-15) Ko ta Iehova akameitakianga ki runga i taua akanoonooanga ra, te kiteaia ra te reira i roto i te turanga puapinga pae vaerua e rekarekaia ra e te aronga akamori mou i teia tuatau.
15 Ka tau tatou tataki tai i te ui kia tatou uaorai e: ‘Te kite meitaki ra ainei au i te au apainga taku ka rave i roto i te putuputuanga Kerititiano? Te turuturu meitaki ra ainei au i te tu e akaaere ra Iehova? Te ngakau parau ra ainei au kia riro ei tangata i raro ake i te tutaraanga o te Patireia o Iehova? Te akakoro ngaueue kore ra ainei au i te akakite ua atu rai ki etai atu no runga i te Patireia o te Atua i te ka rauka iaku i te rave?’ Ei pupu, te kauraro puareinga ua ra tatou ki te aratakianga tei orongaia mai e te Pupu Akaaere, e te taokotai ki te aronga pakari tei ikiia i roto i te au putuputuanga. Na roto i taua au mataara, te akaari ra tatou e te ariki ra tatou i te tu e tutara ra te Atua. (E tatau ia Ebera 13:17.) Ka akatupu te kauraroanga puareinga ua i te tu rotai aite koreia i roto i teia ao taokotai kore. Ka akatupu katoa mai te reira i te au e te tuatua tika, e ka apai mai i te kaka kia Iehova, te akaari anga mai e ko tana tu e tutara ana, te mea meitaki rava atu.
Upokotu ta Iehova Tutaraanga
16. Eaa te ikianga ta te katoatoa e aro atura i teia tuatau?
16 Te vaitata maira te tuatau e akatikatikaia ai te au maroanga tei tupu i Edene. No reira, ko teia te tuatau no te tangata kia rave i tetai ikianga. Te anoanoia nei te tangata tataki tai kia iki me ka ariki aia i te tu e akaaere ra a Iehova, e me ka piri ua atu rai aia ki te tutaraanga a te tangata. E tikaanga ngateitei to tatou i te tauturu i te aronga maru kia rave i te ikianga tika. Kare e roa atu ana, i Aramakito, ka riro ta Iehova akaaereanga ei mono tinamou atu i te au kavamani a te tangata i raro ake i ta Satani akakeuanga. (Dani. 2:44; Apo. 16:16) Ka ope te tutaraanga a te tangata, e ka akamanaia te Patireia o te Atua ki rungao i te ao katoa. Tera tikai te aiteanga, ka akangateiteiia te tu e akaaere ra a Iehova.—E tatau ia Apokalupo 21:3-5.
17. Eaa te au mea te ka tauturu i te aronga maru kia rave i tetai ikianga meitaki no runga i te tutaraanga?
17 Te aronga kare i rave ake i tetai ikianga papu i te akamareka ia Iehova, ka tau ratou kia pure ma te akamanako i te au puapinga ta te tutaraanga a te Atua ka apai mai no te tangata ravarai. Kare te tutaraanga a te tangata i rauka ana i te akatikatika i te manamanata o te kino, e te tamatakutaku. Ka takore te tutara a te Atua i te au kino ravarai mei te enua nei. (Sala. 37:1, 2, 9) Kua taki atu te tutaraanga a te tangata ki te tamaki ope kore, inara ka riro te tutara a te Atua ei ‘akakore i te tamaki e tae rava ake ki te openga enua.’ (Sala. 46:9) Ka akatupu akaou te tutaraanga a te Atua i te au i rotopu i te tangata e te au manu! (Isa. 11:6-9) E riro ua ana rai te ngere e te onge ei tu matauia i raro ake i te tutaraanga a te tangata, inara ka takore atu te tutaraanga a te Atua i te reira. (Isa. 65:21) Te au tangata tutara katoa e au akakoroanga meitaki tikai to ratou, kare i rauka ana ia ratou i te akakore atu i te maki e te mate, inara i raro ake i ta te Atua tutaraanga, ka rekareka te aronga ruaine e te maki me oki akaou ki te tu maroiroi o to ratou ou anga. (Iobu 33:25; Isa. 35:5, 6) Mea papu tikai, ka riro te enua ei parataito, i reira e akatuakaouia mai ei tei mate.—Luka 23:43; Anga. 24:15.
18. Akapeea tatou me akaari e te irinaki ra tatou e ko te tu e tutara ra te Atua te mea meitaki rava atu?
18 Ae, ka takore te tutara a te Atua i te au kino pouroa ta Satani i akatupu i te akakeu anga aia i to tatou nga metua mua kia ariu ke mei Tei Anga mai ia raua. E e akamanako ana, kua akatupu ua ana rai a Satani i te kino no tetai 6,000 mataiti, inara na roto ia Karaiti, ka takore te Atua i taua au kino pouroa i roto i te 1,000 mataiti! E akapapuanga meitaki tikai no te turanga ngateitei o te tu e akaaere ra te Atua! Ei Au Kite no to tatou Atua, te ariki nei tatou iaia ei Tutara no tatou. No reira, e akaari tatou i te au ra, e i te au ora o to tatou oraanga e e aronga akamori tatou ia Iehova, e au tangata no tona Patireia, e te ngakau parau nei i te riro anga ei Au Kite nona. E kia taangaanga tatou i te au atianga ravarai i te akakite ki tetai ua atu te ka akarongo mai e ko te tutaraanga a Iehova te mea meitaki rava atu.
No Runga i ta te Atua Tutaraanga, Eaa ta Tatou i Apii Mai mei te Tatau Anga ia . . .
• Ebera 13:17?
[Au Uianga Apii]
[Tutu i te kapi 29]
Kua akono tamou ua atu rai a Iehova i tana tutaraanga
[Tutu i te kapi 31]
Te kauraro puareinga ki ta Iehova akaaereanga, ka akatupu i te tu rotai i te ao katoa
