Akapapu e e Pipi Tika Tikai na Karaiti

“E ua mai te au rakau meitaki katoa i te ua meitaki; e te au rakau kikino ra, e ua mai ïa i te ua kino.”​—MATA. 7:⁠17.

1, 2. Akapeea te au pipi mou a Karaiti i tuke ei mei te au pipi pikikaa, i teia tuatau openga tikai?

KUA akakite a Iesu e ko te aronga e tavini pikikaa ua ra iaia ka kiteaia te tuke ia ratou e tana au pipi mou na roto i ta ratou e uua maira​—ta ratou au apiianga e to ratou tu. (Mata. 7:​15-17, 20) Papu roa e te akakeuia ra te tangata e te au mea ta ratou e tuku ra ki roto i to ratou manako e to ratou ngakau. (Mata. 15:​18, 19) Te aronga te apiiia ra i te au mea pikikaa ka akatupu mai i te “ua kino,” ko te aronga ra tei apiiia i te au tuatua mou pae vaerua ka akatupu mai i te “ua meitaki.”

² Te kite uaia ra te nga tu ua e rua i teia tuatau openga. (E tatau ia Daniela 12:3, 10.) E manako tarevake to te au Kerititiano pikikaa no runga i te Atua e i te maataanga i te taime, e tutu akono atua ua to ratou, kareka te aronga tei marama i te pae vaerua te akamori ra i te Atua “ma te vaerua e te tuatua-mou.” (Ioa. 4:24; 2 Timo. 3:​1-5) E tauta ua ana ratou i te akaari i te au tu mei to Karaiti rai. Akapeea ra tatou? Ia koe e akamanako ra no runga i te au akairo e rima e akataka maira i te akonoanga Kerititiano mou, e ui kia koe uaorai e: ‘Te au meitaki ra ainei toku tu e taku au apiianga ki te Tuatua a te Atua? Te akariro ra ainei au i te tuatua mou ei mea manea i roto i te mata o te aronga e kimi ra i te reira?’

Oraanga Tei Tau ki te Tuatua a te Atua

3. Eaa te mea e akamareka ra ia Iehova, e eaa te o maira no te au Kerititiano mou?

³ “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao,” i karanga ai a Iesu, “ko tei akono ra i te anoano o taku Metua i te ao ra.” (Mata. 7:21) Ae, kare ko te tuatua anga e e Kerititiano aia te ka akamareka ia Iehova, mari ra ko te rave anga i te reira. No te au pipi mou a Karaiti, te o maira to ratou oraanga katoa, kapiti mai i to ratou tu no runga i te moni, te ngai e angaanga ra ratou, te tamataoraanga, te au peu o teianei ao, te au ra akamaaraanga, te oraanga akaipoipo e tetai au pirianga ke atu ki te tangata. Ko te au Kerititiano pikikaa ra, e aru ana ratou i te aerenga manako e te au tu o teianei ao, tei maata ua atu te tu akono kore i te Atua i teia tuatau openga.​—Sala. 92:⁠7.

4, 5. Ka akapeea tatou me taangaanga i roto i to tatou oraanga te au tuatua a Iehova i roto ia Malaki 3:⁠18?

⁴ Kua tau rai ki ta te peroveta ko Malaki i tata e: “Ei reira kotou e kite akaou ei i te tu ke anga i te tangata tuatua-tika e te tangata kino, i te tangata i akamori i te Atua, e i tei kore i akamori iaia.” (Mala. 3:18) Ia koe e akamanako ra no runga i taua au tuatua, e ui kia koe uaorai e: ‘Kua aite ainei au ki te tangata o teianei ao, me e tuke rai au? E umuumu ua ana ainei au kia arikiia mai e toku au oa i te apii me kore i te ngai angaanga, me te turu ngaueue kore nei rai au i te au kaveinga Pipiria, i te akakite tika anga i toku manako i te tuatau tau?’ (E tatau ia 1 Petero 3:16.) E tika, kare tatou e inangaro kia akara anga e ko tatou ua tei tika, mari ra kia tuke takiri tatou mei te aronga kare o ratou aroa e kare e tavini ana ia Iehova.

⁵ Me kite koe e te anoanoia ra koe kia taui i toou tu kia meitaki mai, kore ei koe e pure no runga i te reira e te kimi i te maroiroi na roto i te rave putuputu anga i te apii Pipiria, te pure, e te aere ki te uipaanga? Te maata atu i taau taangaanga anga i te Tuatua a te Atua, ko te maata atu ia taau akatupu anga i te “ua meitaki,” kapiti mai i “ta te vaa nei, i te akapaatu anga i [to te Atua] ingoa.”​—Ebe. 13:⁠15.

Tutu Aere i te Patireia o te Atua

6, 7. No runga i te karere o te Patireia, eaa te tuke e kite uaia ra i rotopu i te au Kerititiano mou e te au Kerititiano pikikaa?

⁶ Kua akakite a Iesu e: “E tutu aere rai au i te  evangelia o te basileia o te Atua i te au oire ke atu e tikaʼi; i tonokia mai ei oki au.” (Luka 4:43) Eaa ra a Iesu i akariro ei i te Patireia o te Atua e ko te tumu manako maata i roto i tana angaanga orometua? Kua kite ke ana aia e koia uaorai te Ariki o taua Patireia ra, kapiti mai i tona au taeake akatainuia ki te vaerua tei akatuia mai, te ka takore i te au tumu i rokoia ai te tangata nei e te kino​—ko te ara e te Tiaporo. (Roma 5:12; Apo. 20:10) No reira, kua akaue aia i tana au pipi kia tuatua no runga i taua Patireia ra e tae ua atu ki te openga o teia akatereanga o te au mea nei. (Mata. 24:14) Te au tangata e akatutu ua ra e e pipi ratou na Karaiti kare ratou e piri ana ki roto i teia angaanga​—ko te tika kare rai e rauka ia ratou. No teaa ra? E toru tumu: Te mea mua, kare e rauka ia ratou i te tutu aere i tetai mea kare ratou e marama ana. Te rua, te maataanga ia ratou te ngere ra i te tu akaaka e te ngakau toa e anoanoia ra i te aro atu anga i te aviri e te patoianga te ka tupu mai no tei tutu aere i te karere o te Patireia ki to ratou au tangata tupu. (Mata. 24:9; 1 Pete. 2:23) E te toru, kare te vaerua o te Atua i runga i te au Kerititiano pikikaa.​—Ioa. 14:​16, 17.

⁷ Tetai tua ra, ko te au pipi mou a Karaiti te marama ra ratou e eaa te Patireia o te Atua, e eaa ta te reira ka akatupu. Tei maata atu ra, ko te au anoano o taua Patireia ra te mea mua i roto i to ratou oraanga, te akakite aere anga i te reira i te ao katoa nei, ma te tauturu a te vaerua o Iehova. (Zeka. 4:⁠6) Te piri putuputu ra koe ki roto i teia angaanga? Te tauta ra ainei koe kia meitaki atu ei tangata akakite aere i te Patireia, penei na te akapou maata atu anga i te taime i roto i te angaanga orometua, me kore na te angaanga pakari anga kia tukatau roa atu koe? Tetai pae kua tamata ana i te akameitaki atu i te tu o ta ratou angaanga orometua na te taangaanga meitaki atu anga i te Pipiria. “E mea ora oki te tuatua a te Atua, e te ririnui,” i tata ei te apotetoro ko Paulo, tei akariro ei peu matau nana i te uriuri i te au Tuatua Tapu.​—Ebe. 4:12; Anga. 17:2, 3.

8, 9. (a) Eaa tetai au tupuanga e akaari maira i te puapinga o te taangaanga anga i te Pipiria i roto i ta tatou angaanga orometua? (e) Akapeea tatou e karape roa atu ei i te taangaanga anga i te Tuatua a te Atua?

⁸ Iaia e angaanga ra mei tetai ngutupa ki tetai, kua tatau atu te taeake ia Daniela 2:44 ki tetai tangata akonoanga Katorika e kua akamarama atu e ka akapeea te Patireia o te Atua i te apai mai anga i te au e te tinamou tikai. Kua tuatua mai taua tangata ra e: “Reka tikai au i te eeu mai anga koe i te Pipiria e te akaari mai anga kiaku i ta te irava e tuatua ra, e kare koe i akakite ua mai i te reira kiaku.” I te tatau anga tetai taeake i te irava ki tetai vaine akonoanga Otototi Ereni, e maata tana au uianga meitaki i ui mai. I roto katoa i teia, kua pau atu te taeake e tana vaine mei roto i te Pipiria. I muri mai, kua karanga taua vaine ra e: “Kua kite koe eaa au i inangaro ei te tuatua kia korua? Kua aere mai korua ki toku ngutupa e ta korua Pipiria, e kua tatau mai korua mei roto i reira.”

⁹ E tika, e puapinga ta tatou au puka e ka tau kia orongaia atu i roto i te ngai tutuanga. Tera ra, ko te Pipiria te apinga maata ta tatou ka taangaanga. No reira me kare i te peu matau naau kia taangaanga putuputu i te reira i roto i taau angaanga orometua, kore ei koe e akariro i te reira ei akakoroanga naau? Penei e iki koe i tetai au irava e akamarama maira e eaa te Patireia o te Atua, e ka akapeea te reira i te rapakau anga i te au manamanata ta te tangata i toou ngai e kite ra. E oti, kia papa ua i te tatau i te reira ia koe e tutu aere ra mei tetai ngutupa ki tetai.

 Apai i te Ingoa o te Atua ma te Ngakau Parau

10, 11. No runga i te taangaanga anga i te ingoa o te Atua, eaa te tuke i rotopu ia Iesu e te maataanga e karanga ra e te aru ra ratou iaia?

¹⁰ “Ko kotou toku kite e, ko au te Atua, te tuatua mairā Iehova.” (Isa. 43:12) Kua manako a Iesu Karaiti, te Kite maata roa atu no Iehova, e e turanga ngateitei tikai i te apai i te ingoa o te Atua e te akakite aere i te reira. (E tatau ia Exodo 3:15; Ioane 17:6; Ebera 2:12.) Tetai katoa, no te mea kua akakite aere a Iesu i te ingoa o tona Metua, kua kapikiia aia e ko “te kite tuatua-mou.”​—Apo. 1:5; Mata. 6:⁠9.

¹¹ I tetai tua, ko te maataanga e karanga ra e te komono ra ratou i te Atua e tana Tamaiti, e mea akama tikai to ratou tu ki te ingoa o te Atua, e kua kiriti katoa i te reira mei roto i ta ratou urianga o te Pipiria. I te akaari anga i taua tu ra, i roto i tetai akaueanga ki te au epitikopo o te akonoanga Katorika te karanga ra te reira e “eiaa te ingoa o te Atua i roto i te tu o te tetragrammaton YHWH e taangaangaia me kore eiaa e tuatuaia” i te tuatau akamorianga. * E aerenga manako tarevake tikai te reira!

12. Akapeea te au tavini o Iehova i akataka meitakiia ai kia Iehova i te mataiti 1931?

¹² I te aru anga i te akaraanga o Karaiti e to te “urupu maata i kite” i mua ake iaia, te taangaanga ra te au Kerititiano mou i te ingoa o te Atua ma te ngakau parau. (Ebe. 12:⁠1) Mei tera te tu, i te mataiti 1931, kua akataka meitakiia te au tavini o te Atua kia Iehova i to ratou ariki anga i te ingoa Au Kite o Iehova. (E tatau ia Isaia 43:​10-12.) No reira na roto i te tu takake rava, kua riro te au pipi mou a Karaiti ei iti tangata tei “tapaia i [to te Atua] ingoa.”​—Anga. 15:​14, 17.

13. Akapeea tatou i te akapapu anga e te rave ra tatou i tei umuumuia no te ingoa o te Atua tei orongaia mai no tatou?

¹³ Akapeea tatou i te akapapu anga e te rave ra tatou i tei umuumuia no te iti tangata e kapiki ra i te ingoa o te Atua? Tetai, kia riro tatou ei kite akarongo mou ki te Atua. “Ko te kapiki i te ingoa o te Atu ra, e ora ïa,” i tata ei a Paulo. “Eaa ua ra te tangata e tikaʼi kia kapiki atu kiaia i tei kore i akarongoia e ratou ra? e eaa oki ratou e tikaʼi kia akarongo iaia i tei kore i kitea e ratou ra? e eaa oki ratou e kite ei i te akakite kore? Eaa oki ratou e tikaʼi kia akakite kia kore ratou e ungaia?” (Roma 10:​13-15) Tetai katoa, e akakite pu ua tatou ma te matakite i te au pikikaa a te akonoanga e akakino ra i Tei Anga mai ia tatou, mei te apiianga o te ai o era, tei akaapa i te Atua o te aroa, no te au tu kino o te Tiaporo.​—Iere. 7:31; 1 Ioa. 4:8; akaaite ia Mareko 9:​17-27.

14. I te kite anga no runga i to te Atua uaorai ingoa, i akapeea tetai pae i te ariu mai anga?

¹⁴ Te ngakau parau ra ainei koe i te apai i te ingoa o toou Metua i te rangi? Te tauturu ra ainei koe i etai atu kia kite i taua ingoa tapu ra? Kua akarongo tetai vaine i Paris, i Varani, e kua kite te Au Kite o Iehova i te ingoa o te Atua, no reira kua ui atu aia ki te Kite tana i aravei i muri mai kia akaari kiaia i taua ingoa ra i roto i tana Pipiria. Te tatau anga aia ia Salamo 83:18, e pakari tikai te akakeuanga ta te reira i akatupu. Kua akamata aia i te apii i te Pipiria e teianei, e tuaine akarongo mou aia e tavini ra i roto i tetai enua ke. Te kite anga tetai vaine akonoanga Katorika e noo ra i Autireria i te ingoa o te Atua i roto i te Pipiria no te taime mua, kua aue aia no tona rekareka. No tetai au mataiti i teianei, tona tavini anga ei painia tamou. Kare i roa akenei, i te akaari anga te Au Kite i Tiamaika ki tetai vaine i te ingoa o te Atua i roto i tana uaorai Pipiria, kua aue katoa aia no tona rekareka. No reira e ngakau parau kotou i te apai anga i te ingoa o te Atua, e i te aru anga i te akaraanga o Iesu, kia akakite i taua ingoa akaperepere ra ki te katoatoa.

“Auraka e Anoano i Teianei Ao”

15, 16. Eaa te manako o te au Kerititiano mou no runga i teianei ao, e eaa te au uianga ka tau tatou kia ui kia tatou uaorai?

¹⁵ “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra.” (1 Ioa. 2:15) Te patoi ra teianei ao e tona aerenga manako i te pae kopapa ia Iehova e tona vaerua tapu. No reira, kare te au pipi mou a Karaiti e kopae ua i te riro anga ei tuanga no teianei ao. Te patoi pakari ra ratou i te anoano atu i teianei ao, no te mea kua kite ratou i ta te pipi ko Iakobo i tata e, “ko te anoano i teianei ao, e enemi ïa i te Atua ra.”​—Iako. 4:⁠4.

 ¹⁶ E akaaoanga tikai i te akono i te au tuatua a Iakobo i roto i tetai ao e oronga maira i te au timataanga e manganui. (2 Timo. 4:10) No reira kua pure a Iesu no tana au pipi e: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.” (Ioa. 17:​15, 16) E ui kia koe uaorai e: ‘Te tauta ra ainei au kia kore e riro ei tuanga no teianei ao? Kua kite ainei etai atu i toku turanga no runga i te au ra akamaaraanga e te au peu kare e tau ana ki te tuatua tapu e te au mea kare i akatumuia ki roto i te irinakianga peikani, kareka ra te akaata maira i te vaerua o teianei ao?’​—2 Kori. 6:17; 1 Pete. 4:3, 4.

17. Eaa ra te mea penei te ka akakeu i te aronga ngakau tika kia turu ia Iehova?

¹⁷ Te tika ua ra e, kare to tatou turanga tei akatumuia ki runga i te Pipiria e riro ei akamareka mai i to teianei ao kia tatou, tera ra penei ka akakeu te reira i te inangaro o te aronga ngakau tika. Kare e ekoko, me akara mai taua aronga ra e kua akatumu ngaueue koreia to tatou akarongo ki roto i te au Tuatua Tapu e te o maira to tatou oraanga katoa, penei ka ariu mai ratou, na te akakite anga ki te aronga akatainuia e: “Ka aere katoa tatou: kite akenei oki matou e tei ia kotou te Atua.”​—Zeka. 8:⁠23.

Akaari i te Aroa Kerititiano Mou

18. Eaa te o maira i roto i te akaari anga i te aroa no Iehova e no to tatou tangata tupu?

¹⁸ Kua na ko mai a Iesu e: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa” e “e aroa atu koe i toou tangata tupu mei te aroa ia koe uaorai.” (Mata. 22:​37, 39) Ko taua aroa ra (a·gaʹpe i roto i te reo Ereni) e aroa akangateitei, e akamanako ana te reira i teia mea ei apainga, ei kaveinga, e te tu tau, inara e kapiti putuputuia mai ana te manako ngakau oonu. E mea pumaana katoa te reira e te ririnui. (1 Pete. 1:22) Ko tetai tua takiri te reira o te tu manako ia koe uaorai, no te mea te akaataia maira te reira i roto i te au tuatua e te au angaanga akaatinga uaorai.​—E tatau ia 1 Korinetia 13:​4-7.

19, 20. Akakite mai i tetai au tupuanga tei akaari mai i te mana o te aroa Kerititiano.

¹⁹ No te mea e, e ua te aroa no te vaerua tapu o te Atua, ka tauturu te reira i te au Kerititiano mou kia rave i ta etai ke atu kare e rauka i te rave, mei te akakore atu anga i te au manamanata o te iti tangata, te au peu, e te poritiki. (Tatau ia Ioane 13:​34, 35; Gala. 5:22) Te akakeu  oonuia ra te aronga mei te mamoe te tu, me kite ratou i taua tu aroa ra. Ei akaraanga, i te aere anga tetai mapu tane ngati Iuda o Iseraela ki tetai uipaanga Kerititiano no te taime mua, kua umere aia i te kite anga i te au taeake ngati Iuda e te Arapia e akamori kapiti ra ia Iehova. Tei tupu mai, kua akamata aia i te aere putuputu ki te au uipaanga e kua ariki i tetai apii Pipiria. Te akaari ra ainei koe i taua tu aroa ngakau tae ra ki toou au taeake? E te tauta ra ainei koe i te ariki atu i te aronga ou e aere maira ki to kotou Are Uipaanga Patireia, noatu no teea enua ratou, te kara o te pakiri me kore to ratou turanga i mua i te tangata?

²⁰ Ei au Kerititiano mou, kia tauta tatou i te akaari i te aroa ki te katoatoa. I roto i te enua o Ere Taravatoa, te apii ra tetai papuritia mapu i te Pipiria ki tetai vaine akonoanga Katorika e 87 ona mataiti tei turu pakari i tana akonoanga. Tetai ra, kua rokoia taua vaine ra e te maki kino e kua apaiia ki roto i te are maki. I te oki mai anga aia ki te kainga, kua atoro mai te Au Kite iaia i te akapapu e e kai tana. Kua akapera ua rai teia mei tetai marama. Kare rava tetai tangata mei te akonoanga a taua vaine ra i aere mai ana i te atoro iaia. Tei tupu mai? Kua titiri aia i tana au tiki, kua akaruke i tana akonoanga, e kua akamata akaou i tana apii Pipiria. Ae, e mana to te aroa Kerititiano! Te akaari anga i te aroa e maata atu ta te reira akakeuanga i ta te tuatua ua anga.

21. Akapeea tatou i te noo ponuiaau ua anga i te tuatau ki mua?

²¹ Kare e roaia atu ana, ka akakite a Iesu ki te aronga pouroa e tavini pikikaa ra iaia e: “Kare takiri au i kite ia kotou: ka aere ke atu kotou, te aronga rave tuatua kino.” (Mata. 7:23) No reira, kia akaua mai tatou i te au ua e akangateitei ra i te Metua e te Tamaiti. “Ko tei akarongo mai i taku nei tuatua, e akono atura,” i karanga ai a Iesu, “e arite au iaia i tetai tangata pakari, ko tei akatu i tona are ki runga i te papa.” (Mata. 7:24) Ae, me akapapu tatou e e au pipi tika tikai tatou na Karaiti, ka rauka ia tatou te akaperepereanga a te Atua, e ka noo ponuiaau ua tatou i te tuatau ki mua, mei te mea rai e kua akatumuia ki runga i te papa!

[Tataanga Rikiriki i Raro]

Maara Ainei ia Koe?

• Akapeea te au pipi mou a Karaiti i tuke ei mei te au pipi pikikaa?

• Akakite mai i te au “ua” e akataka maira i te au Kerititiano mou.

• I te akatupu mai anga i te au ua Kerititiano, eaa te au akakoroanga taau ka akanoo?

[Au Uianga Apii]

[Tutu i te kapi 13]

E peu matau ainei naau kia taangaanga putuputu i te Pipiria i roto i taau angaanga orometua?

[Tutu i te kapi 15]

Kua kite ainei etai atu i toou turanga no runga i te au ra akamaaraanga kare e tau ana ki te tuatua tapu?