Taangaanga i te Au Ra o Toou Oraanga ei Akakaka i te Atua

“E AKAKITE mai koe iaku i to aroa i te popongi,” i pure ei te tata taramo ko Davida kia Iehova. “E akakite mai koe kiaku i toku arataa kia aere.” (Sala. 143:⁠8) Me ara mai koe e kua akameitaki ia Iehova no te ra ou o toou oraanga, te aite ra ainei koe kia Davida, te pati akatenga kia arataki a Iehova ia koe kia rave i te au ikianga e kia aru i te arataa meitaki? Kare ekoko te rave ra koe i te reira.

Ei tavini akatapuia kia Iehova, me “te kai ra [tatou] e te inu ra oki, e te au mea ravarai,” e tauta tatou i te “rave anake ïa ma te akakakā i te Atua.” (1 Kori. 10:31) Kua kite tatou e ko te mataara e aru ra tatou i te au ra o to tatou oraanga ka akangateitei me kore ka akangateitei kore ia Iehova. E akamaara katoa tatou e te akakite ra te Tuatua a te Atua e te akaapa ra a Satani i te au taeake o Karaiti​—koia oki, te au tavini pouroa o te Atua i te enua​—“i te po e te ao.” (Apo. 12:10) No reira, to tatou akakoroanga koia oki kia pau atu i te akaapaanga tarevake a Satani, kia akarekareka i te ngakau o Iehova na te oronga anga i te akamorianga tapu ki to tatou Metua i te rangi “i te po e te ao.”​—Apo. 7:15; Mase. 27:⁠11.

Akamanako poto ua ana tatou e rua mataara puapinga kia taangaanga tatou i te au ra o to tatou oraanga ei akakaka i te Atua. Te mea mua, akanoo anga i te au mea puapinga, te rua, akamanakoanga i tetai ke.

Akono Anga i ta Tatou i Taputou

Te akatapuanga ia tatou uaorai kia Iehova, kua akaari tatou i to tatou inangaro ngakau tae i te tavini iaia. Kua taputou katoa tatou kia Iehova e ka aaere tatou i tona au arataa “i tera rā i tera rā”​—ae, e tuatau ua atu. (Sala. 61:5, 8) Ka akapeea ra tatou me akono i taua taputou? Akapeea tatou me akaari i to tatou inangaro ngakau katoa no Iehova i te au ra?

Te akataka maira te Tuatua a te Atua i te au apainga ta Iehova e tapapa maira ia tatou kia akatupu. (Deu. 10:​12, 13) E maata tei papaia i roto i te pia,  “Au Apainga Tei Orongaia Mai e te Atua,” i te kapi 22. Pouroa teia au apainga e au mea puapinga tei orongaia mai e te Atua. Akapeea tatou me iki e ko teea te mea puapinga, me umuumuia e rua me kore e maata atu te ka rave i te taime okotai?

E tuku tatou i te akamorianga tapu ko te mea mua, kapiti mai te apii Pipiria, te pure, te au uipaanga Kerititiano, e te angaanga orometua. (Mata. 6:33; Ioa. 4:34; 1 Pete. 2:⁠9) Inara, eiaa e akapou i te katoaanga o to tatou ra ki te au angaanga pae vaerua. Kia kapitiia mai te angaanga moni, te apii, e te au angaanga o te ngutuare ki roto i ta tatou papaanga. Noatu ra, e tauta pakari tatou i te akanoo i te angaanga moni e tetai atu au angaanga kia kore e tamanamanata i ta tatou akamorianga tapu, mei te aere anga ki te au uipaanga Kerititiano. Ei akaraanga, me parani no te orote, e akapapu e kia piri atu tatou ki te atoroanga a te akaaere kotinga, te ra akaputuputuanga takake, te akaputuputuanga kotinga, me kore te uruoaanga tapere. Tetai taime, penei ka rauka ia tatou i te kapiti mai i tetai au apainga a tatou. Akatauanga, e akariro te tamaanga i te Are Uipaanga Patireia ei angaanga na te ngutuare, me kore e taangaanga i te tuatau kaikai tuaero i te ngai angaanga, i te apii, kia akakitekite ki te au oa angaanga me kore ki te au oa apii. E tika, me anoanoia tetai ikianga i roto i to tatou oraanga​—mei te kimianga i tetai ngai angaanga, ikianga i tetai apii, e te ikianga i te au oa​—ka inangaro tatou kia akakeuia ta tatou au ikianga e te mea puapinga roa atu i roto i te oraanga​—te akamorianga ia Iehova, to tatou Metua aroa.​—Kohe. 12:⁠13.

 Akamanako Atu i Tetai Ke

Te inangaro maira a Iehova ia tatou kia akamanako atu i tetai ke e kia rave i te mea meitaki no ratou. Ko Satani ra, te akamaroiroi ra aia i te tu noinoi. Kua ki tona ao i te au tangata e ‘akaperepere ra ia ratou uaorai’ e te ‘anoano ra i te au mea e navenave ei ra’ pera katoa i te aronga “tei ruru i ta [te] kopapa.” (2 Timo. 3:​1-5; Gala. 6:⁠8) Kare te manganui e manako roa ana i ta ratou e akatupu ra ki runga i tetai ke. “Te au angaanga a te kopapa” te kiteaia nei i te au ngai ravarai.​—Gala. 5:​19-21.

Tuke rai te tu o te aronga tei akamaroiroiia e te vaerua tapu o Iehova, te akaari ra i te aroa, te takinga meitaki, e te tu meitaki i roto i ta ratou akonoanga i tetai ke! (Gala. 5:22) Te akakite maira te Tuatua a te Atua kia tatou e kia akamanako i te au anoano o etai ke i mua ake i to tatou uaorai. No reira, e akaari tatou i te inangaro no tetai e tetai, kia matakite ra eiaa kia o atu ki roto i te au manamanata o tetai ke. (1 Kori. 10:​24, 33; Phili. 2:3, 4; 1 Pete. 4:15) E akamanako tikai ra tatou i te au taeake irinaki. E kia tauta katoa rai tatou i te tauturu i te aronga irinaki kore. (Gala. 6:10) Ka rauka ainei ia koe te atianga i teia ra, kia akaari i te takinga meitaki ki tetai tangata taau ka aravei atu?​—Akara i te pia  “Akamanako Atu ia Ratou,” i te kapi 23.

 Eiaa e tiaki kia tano te taime me kore kia meitaki mai te turanga ka akamanako ei i tetai ke. (Gala. 6:2; Ephe. 5:2; 1 Tesa. 4:9, 10) Tera ra, i te au ra, ka tauta tatou kia kite i te au turanga o tetai ke e kia papa i te tauturu atu ia ratou, noatu kare e tau ana kia tatou. Inangaro tatou kia oronga i ta tatou i rauka​—to tatou taime, te au apinga materia, te kite, e te pakari. Te akapapu maira a Iehova kia tatou e me oronga tatou ki tetai ke, ka oronga ua mai aia kia tatou.​—Mase. 11:25; Luka 6:⁠38.

Akamorianga Tapu “i te Po e te Ao”

Ka rauka ainei i te oronga i te akamorianga tapu kia Iehova “i te po e te ao”? Ae, na te rave tamou anga e te maroiroi i te au tuanga ravarai o ta tatou akamorianga. (Anga. 20:31) Ka rauka ia tatou i te akapou to tatou oraanga ki te akamorianga tapu, na te tatau anga e te akamanako oonu anga i te Tuatua a te Atua i te au ra, pure putuputu, tauta kia tae ki te au uipaanga ravarai, e te akakitekite aere i te au atianga ravarai.​—Sala. 1:2; Luka 2:37; Anga. 4:20; 1 Tesa. 3:10; 5:⁠17.

Te oronga uaorai nei tatou i taua akamorianga tapu kia Iehova? Me koia ia, to tatou inangaro i te akamareka iaia e kia pau i ta Satani au akaapaanga ka akaataia i roto i te au tuanga ravarai o to tatou oraanga i te au ra. Ka tauta tatou i te akakaka ia Iehova i roto i te au mea ta tatou ka rave e i roto i tetai ua atu turanga ta tatou e kite ra. E tuku tatou i tana au kaveinga kia akaaere i ta tatou tuatua e to tatou tu e kia arataki i ta tatou ka iki. E akaari i to tatou tu ariki rekareka no tana akonoanga e te turuturuanga aroa, na te irinaki pu tikai anga iaia e te taangaanga i to tatou maroiroi i roto i tana angaanga. E te ariki nei tatou i tana akoanga e te apii no te mea e tu apa ua to tatou e kare e rauka ana ia tatou i te aru i tona au turanga.​—Sala. 32:5; 119:97; Mase. 3:​25, 26; Kolo. 3:17; Ebe. 6:​11, 12.

Kia akariro ua rai tatou i te au ra ei akakaka i te Atua. Na te rave anga i te reira, ka rauka ia tatou te maroiroi e te rekareka i te akono anga aroa a to tatou Metua i te rangi e tuatau ua atu.​—Mata. 11:29; Apo. 7:​16, 17.

[Pia/​Au Tutu i te kapi 22]

 Au Apainga Tei Orongaia Mai e te Atua

• Pure putuputu.​—Roma 12:⁠12.

• Tatau e te apii i te Pipiria, taangaanga kia tatou uaorai.​—Sala. 1:2; 1 Timo. 4:⁠15.

• Akamori ia Iehova i roto i te putuputuanga.​—Sala. 35:18; Ebe. 10:​24, 25.

• Oronga i te au mea pae materia, pae vaerua, e te pae manako ngakau no te au mema o to tatou ngutuare.​—1 Timo. 5:⁠8.

• Tutu aere i te tuatua meitaki o te Patireia, e te akariroanga i te tangata ei pipi.​—Mata. 24:14; 28: 19, 20.

• Akono i to tatou oraanga pae kopapa, pae vaerua, e te pae manako ngakau, kapiti mai tetai akanoonooanga no te tamataora anga tau.​—Mare. 6:31; 2 Kori. 7:1; 1 Timo. 4:8, 16.

• Akono i te au apainga a te putuputuanga.​—Anga. 20:28; 1 Timo. 3:⁠1.

• Akono i to tatou kainga e te Are Uipaanga Patireia.​—1 Kori. 10:⁠32.

[Pia/​Tutu i te kapi 23]

 Akamanako Atu ia Ratou

• Tetai taeake me kore tuaine pakarikari.​—Levi. 19:⁠32.

• Tetai tangata tei makiia i te pae kopapa me kore i te pae manako ngakau.​—Mase. 14:⁠21.

• Tetai mema o te putuputuanga te anoano rapurapu ra i tetai apinga ka rauka ia koe i te oronga atu.​—Roma 12:⁠13.

• Tetai mema o toou uaorai ngutuare.​—1 Timo. 5:4, 8.

• Tetai taeake irinaki kua mate tona tokorua.​—1 Timo. 5:⁠9.

• Tetai o te aronga pakari e angaanga maata ra i roto i taau putuputuanga.​—1 Tesa. 5:​12, 13; 1 Timo. 5:17.