Te Tu e Tutara ra a Satani ka Puapinga Kore

“Kare ra o te aronga kino e meitaki.”​—KOHE. 8:⁠13.

1. Eaa ra te akavaanga e aere maira no te aronga kino, ka riro ei ei nuti akapumaana?

A TETAI tuatau ki mua ka akavaia te aronga kino. Ka akautungaia ratou no ta ratou i rave. (Mase. 5:22; Kohe. 8:​12, 13) E au nuti akapumaana te reira ki te aronga tikai te inangaro ra i te tuatua tika e tei rokoia e te tu kino e te takinokinoanga a te aronga kino. Ko te tumu maata rava atu te ka akavaia i roto i te aronga kino, te metua o te au mea kino, ko Satani te Tiaporo.​—Ioa. 8:⁠44.

2. Eaa ra i anoanoia ai tetai tuatau kia akatikatikaia te maroanga tei tupu mai i roto ia Edene?

² I roto i te kainga Edene, no tona manako maata anga i tona uaorai puapinga, na Satani i akakeu i te au tangata kia kopae i te tu e akaaere ra a Iehova. Tei tupu mai, kua piri to tatou nga metua mua kia Satani i te patoi anga i te mana akaaere tau o Iehova e kua riro mai raua ei nga tangata ara i mua i Tona aroaro. (Roma 5:​12-14) E tika rai, kua kite a Iehova e eaa te ka tupu mai no to raua tu akangateitei kore e te tu meameaau. Inara, e mea tau kia akaariia taua tupuanga kino ra ki te au mea ora kite katoatoa. No reira, te anoanoia ra tetai tuatau kia akatikatikaia te maroanga e kia akaari papu tikai mai e kua tarevake tikai te aronga meameaau.

3. Eaa to tatou turanga no runga i te au kavamani a te tangata?

³ I te mea e kua kopae te au tangata i ta Iehova akaaere anga, kua anoanoia ratou kia akanoo i ta ratou uaorai au tu kavamani. I te tataanga ki te au taeake irinaki i Roma, kua tuatua te apotetoro ko Paulo no runga i taua au kavamani a te tangata ra ei “aronga mana taoonga.” I to Paulo tuatau, ko te mana taoonga teitei ko te kavamani tikai o Roma i raro ake i te Emepera ko Nero, tei tutara mei te mataiti 54-68 T.N. Te karanga ra a Paulo e ko taua au mana taoonga ra “kua akonoia ïa e te Atua.” (E tatau ia Roma 13:1, 2.) Ko te aiteanga ainei e te karanga ra a Paulo e e teitei rava atu te tutaraanga a te tangata i te tu e akaaere ra te Atua? Kare. Inara, te tuatua ra aia e me akatika ua a Iehova kia vai ua te tutaraanga a te tangata, e mea tau kia akangateitei te au Kerititiano i “tei akonoia e te Atua ra” e kia ariki i taua au tu tutara ra.

E Mataara te Taki Atura ki te Kino

4. Akamarama mai e eaa te tumu ka puapinga kore ei te tutaraanga a te tangata.

⁴ Noatu ra, kare e puapinga ana te tutaraanga a te tangata i raro ake i ta Satani akakeu anga. No teaa ra? No te mea kare te reira i akatumuia ki runga i te pakari o te Atua. Tei ia Iehova anake ua te pakari apa kore. No reira, koia anake ua rai te arataki ka tau kia irinakiia no te tutaraanga te ka puapingaia. (Iere. 8:9; Roma 16:27) Kare mei te au tangata rai, tei kite na roto i to ratou au manamanata e te tarevake, e e kite ua ana rai a Iehova i te mataara meitaki roa atu no te rave i tetai angaanga. Ko tetai ua atu tutaraanga kare e aru ana i tana aratakianga ka puapinga kore ua. No taua tumu ra​—e te akakoroanga kino katoa e o maira​—papu e ka puapinga kore ua ta Satani mataara e tutara ra na roto i te tangata mei te akamataanga mai.

5, 6. Eaa ra tei arataki atu ia Satani kia patoi ia Iehova?

⁵ Ko te tangata manako tau, kare roa aia e akamata i te rave i tetai angaanga e taka ua ra e ka puapinga kore. Me maro aia i te rave ua atu i taua angaanga ra, ka kite ia aia i tona tarevake. E maata te taime tei akapapuia mai e te tuatua enua e e puapinga kore ua i te patoi atu i te  mana katoatoa, ko Tei Anga mai. (E tatau ia Maseli 21:30. *) Inara, no tei akapoiriia e te manako maata iaia uaorai e te akaparau, kua uri ke a Satani mei ia Iehova. No reira kua iki te Tiaporo ma te akakoro tikai, kia aru i tetai mataara te ka taopenga atu rai ki te kino.

⁶ Kua akaariia mai to Satani tu ngakau parau i muri mai, e tetai tutara o Babulonia tei akakiteia mai e tuatua akatietie ra e: “E kake atu au ki runga roa i te rangi ra, ki runga ake i te au etu o te Atua e akateitei ei au i toku terono; e noo au ki runga i te maunga uipa anga ra, ki te au ngai mamao ki te pae ki apatokerau: E kake atu au ki runga ake i te au tumurangi; kia aite au i Tei Teitei ra.” (Isa. 14:​13-15) Kua puapinga kore ua ta taua tutara neneva ra i akakoro, e kua takoreia te tutaraanga a Babulonia ma te akama. Mei te reira rai a Satani e tona ao, kare e roa atu ana ka takore takiriia.

Eaa i Akatikaia Ai?

7, 8. Eaa tetai au puapinga i rauka no te akatika anga a Iehova i te au angaanga kino kia tupu no tetai tuatau?

⁷ Penei te manako ra tetai pae e eaa ra a Iehova i kore ei i arai i te au tangata i te turu anga ia Satani e te aru anga i tetai parani ke no te tutaraanga te ka puapinga kore ua. No te mea e koia te Atua Mana Katoatoa, papu roa e ka rauka ua iaia i te rave i te reira. (Exo. 6:⁠3) Inara, kare aia i akapera ana. No tona pakari kua kite aia e ka riro te tuku anga i te tu meameaau o te tangata kia tupu no tetai tuatau poto ua, ei mea puapinga mutu kore. I te openga iora, ka akangateiteiia a Iehova ei Tutara tuatua tika e te aroa, e ka puapingaia te au tangata akarongo mou mei te ikianga ta te Atua i rave.

⁸ Naringa te tangata ravarai nei i kopae i te au akakeu anga a Satani e i patoi atu i te anoano kia akatakake mai ia ratou mei te tutara a te Atua, e kore ana te taitaia e tupu ki te tangata nei! Noatu ra, kua riro ta Iehova ikianga i te akatika i te au tangata kia tutara ia ratou uaorai no tetai tuatau, kua rauka te puapinga. Kua riro te pakari o te akarongo anga ki te Atua e kia irinaki iaia ei akakeuanga oonu ki runga i te aronga ngakau tika. No te au anere mataiti tuma, kua tamatamata ana te au tangata i te au kavamani tukeke e manganui, inara kare okotai ia ratou i tau. Kua riro taua tupuanga ra ei akaketaketa i te aronga akamori o te Atua i roto i to ratou irinakianga e ko te tu e tutara ra a Iehova, ko te mea meitaki rava atu ia. E tika rai e, kua taopenga mai ta Iehova akatika anga i te tutaraanga kino a Satani ei tumatetenga no te tangata nei, e no te aronga e akamori ra i te Atua ma te akarongo mou. Noatu ra, kua riro te akatika anga i te angaanga kino no tetai  tuatau poto, ei akatupu katoa mai i te au puapinga no teia aronga akamori mou.

Meameaau Tei Riro ei Akakaka ia Iehova

9, 10. Akamarama mai e i akapeea ta Satani tutaraanga i riro ei ei akakaka ia Iehova.

⁹ Kare te akatika anga i te tangata kia akakeuia e Satani e kia akatere ia ratou uaorai i akangateitei kore ana i te tu e tutara ra a Iehova. Kare rava ia! Te akapapu maira te tuatua enua e kua tano rai ta Ieremia tuatua, tei akauruia, no te mea kare e rauka i te tangata i te tutara ia ratou uaorai. (E tatau ia Ieremia 10:23.) Kapiti mai, kua riro ta Satani meameaau ei atianga no Iehova kia akaari i Tona au tu memeitaki na roto i te tu taka meitaki atu. Akapeea ra?

¹⁰ I te mea e te kite nei tatou i te kino o ta Satani tutaraanga, taka meitaki roa atu i reira to Iehova au tu apa kore, tei kore roa i kiteaia ana i mua ana. Na roto i teia tu, kua akateitei maataia aia i roto i te mata o te aronga te inangaro ra iaia. Ae, noatu te akaraanga umere o teia, ko te tika anga tikai ra, kua riro te tu e tutara ra a Satani ei akakaka i te Atua. Kua akaari mai te reira i te tu teitei rava o ta Iehova i rave i te akono anga i teia akaaoanga i tona turanga ngateitei. Ei akatutu mai i taua tuatua mou ra, ka akamanako poto ua ana tatou i tetai au tu o Iehova, e te akara e, akapeea te tutara kino a Satani i te akakeu anga ia Iehova kia akaari mai i teia au tu na roto i tetai au mataara ke mai.

11. Akapeea to Iehova aroa i te akaariia mai anga?

¹¹ Aroa. Te akakite maira te au Tuatua Tapu kia tatou e “ko te Atua oki te aroa.” (1 Ioa. 4:⁠8) Kua riro te anga mai anga i te tangata i te akamataanga, ei akakiteanga i to te Atua aroa. Tetai katoa, te akakite maira te tu vavaria e te tu umere i angaia mai ei tatou, i to te Atua aroa. Kua oronga aroa katoa mai a Iehova i tetai kainga manea no te tangata, tei ki i te au mea ravarai i anoanoia, kia mataora ratou. (Gene. 1:​29-31; 2:8, 9; Sala. 139:​14-16) Tera ra i te o mai anga rai te au tu kino ki roto i te tangata ravarai, kua akakite mai i reira a Iehova i tona aroa na roto i te au mataara ou. Akapeea ra? Te taiku ra te apotetoro ko Ioane ia Iesu e tuatua ra e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioa. 3:16) Kare atu ei e mataara meitaki atu no te Atua kia akaari mai i tona aroa no te tangata ravarai, i to te tono mai i tana Tamaiti anau tai ki te enua nei ei oko i te aronga ara? (Ioa. 15:13) Kua riro katoa teia akaari anga maata rava no te aroa ei akaraanga no te tangata, i te oronga anga i te atianga no ratou kia akamanako i to te Atua uaorai aroa akaatinga i roto i te oraanga i te au ra ravarai, mei ta Iesu rai i rave.​—Ioa. 17:​25, 26.

12. I roto i teea tu i akaariia mai ei to Iehova mana?

¹² Mana. Ko “te Atua mana maata” anake ua te ka rauka i te anga mai i te oraanga. (Apo. 11:17; Sala. 36:⁠9) I te anauanga mai, e akamata ana tetai tangata mei tetai aenga pepa rai kare e tataanga i runga. Me mate aia, kua akaki aia i taua aenga pepa ra ki te au ikianga, te au angaanga, e te au tupuanga o tona oraanga tei akakite mai i tona uaorai tu ei tangata.  Tei roto te reira au akakiteanga i to Iehova manako. Kare e roa atu, ka akatu akaou mai a Iehova i taua tangata ra, ma tona uaorai tu oraanga aite koreia. (Ioa. 5:​28, 29) No reira, noatu e kare e ko to te Atua akakoroanga mua ia no te tangata, kua riro ra te mate ei atianga no Iehova i te akaari e e mana tona i te akatuakaou mai i tei mate. E tika rai e, ko Iehova “te Atua mana maata.”

13. Akapeea te atinga o Iesu i te akaari mai anga i to Iehova tu tuatua tau apa kore?

¹³ Tuatua Tau. Kare a Iehova e pikikaa ana; kare katoa aia e rave ana i te angaanga tika kore. (Deu. 32:4; Tito 1:⁠2) E aru ua ana aia i te au turanga teitei o te tuatua mou e te tuatua tau, noatu e i te akaraanga kare aia e puapingaia. (Roma 8:32) Kare e kore e, kua mamae tikai a Iehova i te kite i tana Tamaiti akaperepere i te mate anga i runga i te rakau tamamae, mei te mea ra e e tangata akakino a Iesu e te akarongo kore! Inara, no tona inangaro i te au tangata apa nei, kua akatika puareinga ua a Iehova i teia tupuanga mamae kia ngaueue kore tona uaorai turanga apa kore no te tuatua tau. (E tatau ia Roma 5:​18-21.) Kua oronga mai tetai ao tei ki i te tuatua tau kore i tetai atianga no Iehova, kia akaari mai e koia uaorai te tumu teitei rava atu o te tuatau tau.

14, 15. Eaa tetai au mataara te akaariia maira to Iehova tu pakari teitei rava e te akakoromaki?

¹⁴ Pakari. I muri ua ake i te ara anga a Adamu raua ko Eva, kua akakite mai a Iehova i te mataara ka akakore ei aia i te au tu kino pouroa tei tupu no to raua meameaau. (Gene. 3:15) Kua riro te ravenga tei akanoo vivikiia, pera katoa te akakite marie anga mai aia i te au mea no teia akakoroanga ki tona au tavini, ei akakite pu ua mai i to Iehova tu pakari. (Roma 11:33) Kare e apinga e rauka i te arai i to te Atua kite i te rave meitaki i te au mea ravarai. I roto i tetai ao tei kiteaia no te tu akono tau kore, te tamaki, te tu manako kore, te akarongo kore, te tu tangi kore, te tu papakitai, e te tu pikikaa, e maata to Iehova tuatau i te akaari mai ki tana au mea ora e eaa tikai te pakari. Kua tuatua te pipi ko Iakobo e: “Te pakari no runga maira, e mea iro koreia ïa, e mea au ïa, e te maru, e te akarongo ngoie, kua ki ïa i te aroa, e te takinga-meitaki, kare oki e akatu ke i te tangata, kare oki e pikikaa.”​—Iako. 3:⁠17.

¹⁵ Akakoromaki e te Akakoromakianga Roa. Naringa kare aia i akamanako mai i te tu apa, te au ara, e te au tarevake a te tangata, kare i reira to Iehova au tu no te akakoromaki e te akakoromakianga roa e akaari maataia mai. To Iehova inangaro puareinga anga i te rave i te reira no tetai au tauatini mataiti te akaari maira e kua rauka iaia teia au tu umere teitei rava ma te apa kore e kia ariki rekareka maata tatou i te reira. Kua tika rai te tuatua a te apotetoro ko Petero e kia ‘akamanako tatou i te akakoromaki o to tatou Atu ra ei ora.’​—2 Pete. 3:9, 15, NW.

16. Eaa ra i riro ei to Iehova tu puareinga ua i te akakore i te ara, ei rekareka anga maata?

 ¹⁶ Akakore Puareinga Anga i te Ara. E aronga ara tatou katoatoa, e e maata te taime e apa ana tatou katoatoa. (Iako. 3:2; 1 Ioa. 1:8, 9) Mei teaa ra to tatou rekareka, i “te maata” o ta Iehova akakore puareinga ua mai anga i ta tatou ara! (Isa. 55:⁠7) E akamanako katoa ana i teia tika: Te anauia mai anga ei aronga ara e te apa ua, ka rauka ia tatou te rekareka maata me akakore mai te Atua i ta tatou ara. (Sala. 51:​5, 9, 17) Ka riro te kite uaorai anga i to Iehova tu ngakau pumaana ei akaketaketa i to tatou aroa nona e te akamaroiroi ia tatou kia aru i tona akaraanga i te akono anga atu i etai ke.​—E tatau ia Kolosa 3:⁠13.

Te Tumu i Kino ei Teianei Ao

17, 18. I roto i teea au tu i puapinga kore ei te tu e tutara ra a Satani?

¹⁷ Te katoaanga o to Satani akatereanga​—te ua tei tupu mai no tana tutaraanga​—kua puapinga kore ua rai, kare rava i taui ana i te au anere mataiti i aereia mai. I te mataiti 1991, kua akakite te nuti pepa The European e: “Kua makiia ainei teianei ao? Ae, papu tikai, inara . . . kare na [te] Atua i akatupu​—na te tangata uaorai i akatupu i te maki o teianei ao.” E tika rava te reira! No te akakeuanga a Satani, kua iki to tatou nga metua mua i te tutaraanga a te tangata kare i iki i ta Iehova. Kua akanoo iora raua i tetai tu tutaraanga tei papu roa e ka puapinga kore. Ko te mamae e te taitaia ta te tangata i te ao katoa nei e kite ra, e au akairo te reira e kua puapinga kore tikai te tutaraanga a te tangata.

¹⁸ Ko te tu e tutara ra a Satani te akatupu ra i te tu noinoi. Inara, kare rava te tu noinoi e autu ki rungao i te aroa, te tango no ta Iehova tutaraanga. Ko te tu o ta Satani tutaraanga kare i rauka i te reira i te akatupu i te tu ngaueue kore, te mataora e te turanga ponuiaau. Kua akapapuia te tika no te tu e tutara ra a Iehova! E akapapuanga ainei ta tatou no te reira i teia tuatau? Ae, mei ta tatou ka kite i roto i te atikara e aru maira.

Eaa ta Tatou i Apii Mai no Runga i te Tutara Anga mei te Tatau Anga ia . . .

• Roma 13:1, 2?

• Maseli 21:30, NW?

• Ieremia 10:⁠23?

• Kolosa 3:⁠13?

[Au Uianga Apii]

[Tataanga Rikiriki i Raro]

[Au Tutu i te kapi 25]

Kare rava te tangata i puapinga ana i ta Satani tutaraanga

[Akameitakianga]

U.S. Army photo

WHO photo by P. Almasy

[Tutu i te kapi 26]

E mana to Iehova i te akatuakaou mai i tei mate

[Tutu i te kapi 27]

Kua akaariia mai to Iehova aroa e te tuatua tau na roto i te atinga o tana Tamaiti