Au Uianga a te Aronga Tatau

I raro ake i teea au turanga e akamanakoia ai te papetito akaou anga?

I raro ake i tetai au turanga ka akamanako ei tetai tangata kua papetitoia i te tikaanga tau o tona papetitoanga e te manako ra kia papetito akaouia. Ei akatauanga, i te tuatau o te papetitoanga, penei te noo muna ra tetai i roto i tetai turanga oraanga me kore te rave ra i tetai angaanga tei tau kia akaateaia ki vao me kua papetito takereia aia. Ka rauka ainei iaia tetai tikaanga tau no te akatapuanga ki te Atua i roto i taua au turanga ra? Ka rauka i taua tangata ra i roto i taua turanga ra tetai tikaanga tau kia akatapu iaia kia Iehova me kua akamutu tikai aia i te rave i te angaanga kare e tau ana ki te tuatua tapu. No reira, ko tetai tangata kua papetitoia te ngata ra i te taui mei te rave i te au mea kino kia akamanako tau aia e me ka papetito akaouia aia.

Akapeea ra tetai tangata kare i rave ana i te ara i te taime o tona papetitoanga, inara kua rave i te tarevake i muri mai e ka anoanoia kia tukuia ki mua i te kumiti akavaanga? Akapeea me karanga mai aia e kare aia i marama tikai ana i tana e rave ra i te taime o tona papetitoanga e kua karanga mai e kare e tau tikai ana tona papetitoanga. Me uipaanga kapiti ki tetai tangata kua rave i te kino, kare te aronga pakari e uiui no runga i tona papetitoanga, e kare e ui katoa me te manako ra aia e kare e tau tikai ana tona akatapuanga e te papetitoanga. No te mea, kua akarongo ana aia i te akoanga Tuatua Tapu no runga i te puapinga maata o te papetitoanga. E kua pau taka meitaki mai aia i te au uianga no runga i te akatapuanga e te papetitoanga. E kua taui aia i tona kakau e kua taruku tikaiia aia ki roto i te vai. E mea tau i reira kia irinakiia e kua marama tikai aia i te puapinga maata o tana e rave ra. Ka akamanako te aronga pakari iaia ei tangata kua papetitoia.

Me ka ui mai tetai tangata i te manako no runga i te tikaanga tau o tona papetitoanga, kia arataki te aronga pakari iaia ki roto i te makatini The Watchtower o Mati 1, 1960, kapi 159 e te kapi 160, e Peperuare 15, 1964, kapi 123 ki te kapi 126, te ngai e uriuri taka meitakiia ra te au manako no runga i te papetito akaou anga. Ko te papetito akaou anga i roto i tetai au turanga (me kare i rava tikai te maramaanga o te Pipiria i te papetitoanga) e ikianga uaorai te reira na tetai tangata.

Eaa te au mea ka akamanako te au Kerititiano me noo kapiti e tai ngai?

Te anoano ra te au tangata ravarai i tetai ngai nooanga. Inara i teia tuatau, e manganui te tangata kare o ratou kainga. No te au turanga pae moni, te au manamanata o te oraanga kopapa, me kore tetai atu au tumu ke, kua riro te au ngutuare tangata i vao mai e tetai au kopu tangata i te noo kapiti e tai ngai. I roto i tetai atu au tuanga o teianei ao, e noo kapiti ana te kopu tangata ki roto i te rumu okotai kare e ngai muna.

Kare i te apainga na te akaaerenga o Iehova e akanoo i tetai papaanga ture e eaa te turanga tau no te ngai nooanga no te katoatoa i roto i te au putuputuanga i teianei ao. Te akamaroiroiia nei te au Kerititiano kia akamanako i te au kaveinga Tuatua Tapu kia rauka i te akapapu e me te tau ra to ratou ngai akanoonooanga ki te Atua me kare. Eaa tetai o teia au kaveinga?

Te manako maata e, eaa te ka tupu kia tatou e ki to tatou turanga pae vaerua me noo kapiti tatou ki tetai au tangata ke. Koai teia aronga? E aronga akamori ainei ratou no  Iehova? Te aru rotai ra ainei ratou i te au turanga o te Pipiria? “Auraka e akavareia,” i tata ei te apotetoro ko Paulo. “Te takino ra te au piri anga tau kore i te au tu memeitaki.”​—1 Kori. 15:33, NW.

Te akamarama maira te au Tuatua Tapu e e mea riri na Iehova te pirianga moeaana e te akaturi. (Ebe. 13:4) No reira ko tetai ua atu akanoonooanga no te moeanga te akatika ra i te nga tangata kare i akaipoipo kia noo kapiti mei tetai tane e te vaine akaipoipo rai, kare te Atua e ariki mai i te reira. Kare tetai Kerititiano e noo ki roto i tetai ngai e arikiia ra te tu akono tau kore.

Tei maata atu, te raurau maira te Pipiria e ko te aronga ravarai e inangaro ra i te akamareka i te Atua kia “rere ke mei te moeaana.” (1 Kori. 6:18, NW) No reira e meitaki atu no te au Kerititiano i te kopae i te ngai nooanga te ka timata ia ratou i te piri atu ki roto i tetai tu akono anga tau kore. Ei akaraanga, e akamanako ana no runga i tetai turanga e moe ana tetai au Kerititiano ki roto i te are okotai. Ka akariro ainei taua akanoonooanga ra i tetai tupuanga kino tapapa koreia? Akapeea me kite ake tetai nga tokorua kare i akaipoipo e ko raua anake ua no te mea kua aere te aronga tei tapapaia kia noo mai, ki tetai ngai no tetai taime poto ua? E kino katoa te tu akono tau kore no tetai nga tokorua kare i akaipoipo te inangaro ra i tetai e tetai, kia noo ki roto i te are okotai. Te akakiteia maira te tu pakari e kia kopaeia teia au tu akanoonooanga.

Kare i te mea tau no te aronga kua kopaeia i roto i te akaipoipo i te noo kapiti ki roto i te are okotai. Ka akatupu to raua turanga matau no te pirianga vaitata ki tetai e tetai i te taki atu ki te tu akono tau kore.​—Mase. 22:3.

Ko tetai mea puapinga maata katoa kia akamanakoia koia oki, no runga i te manako o te katoatoa no runga i taua au ikianga ra. Ta tetai Kerititiano e manako ra e te meitaki ua ra no runga i te akanoonooanga o te ngai nooanga, e mea tau kia akamanako no runga i te reira, no te mea te akatupu ra i te au tangata kia tuatua mareka kore. Kare rava tatou e inangaro i to tatou tu akono tau kore kia riro ei akakino anga i te ingoa o Iehova. Mei ta Paulo rai i tuatua e: “Auraka kotou kia riro ei turorianga, i te ngati Iuda, e te Eleni, e te ekalesia katoa a te Atua: ei iaku katoa e akarekareka i te tangata ravarai i te au mea katoa nei, kare au i kimi i te meitaki noku uaorai, no te tangata katoa ra e manganui, kia ora ratou.”​—1 Kori. 10:32, 33.

Te kimianga i tetai ngai nooanga e tetai akanoonooanga tau, ka riro ei akaaoanga tikai no te aronga te inangaro ra i te turuturu i to Iehova turanga tuatua tika. Inara, kia “tamou ua atu rai [te au Kerititiano] i te akapapu i tei arikiia e te Atu ra.” Ka anoanoia ratou kia akapapu e kare e mea tau kore e tupu ra i roto i to ratou ngutuare. (Ephe. 5:5, 10, NW) Te umuumuia nei te au Kerititiano kia pure no te arataki anga a te Atua e kia rave i ta ratou ka rauka i te paruru i to ratou turanga pae kopapa e te tu akono tau e pera katoa te ingoa meitaki o Iehova.