Patoi i ta Satani Akakiteanga Pikikaa

‘AURAKA e vavare. Kare to kotou Atua e akaora ia kotou. E uri mai ra me kore ka mate kotou!’ Ko teia te karere ta Rabasake, te komono o te ariki o Asura ko Senakeriba, i akakite ki te au tangata o Ierusalema. Kua tomoia e te pupu vaeau o te ariki te enua o Iuda. E ko te au tuatua a te komono, kua akakoroia ei akaparuparu i te irinakianga o te au tangata o Ierusalema e te tamataku ia ratou kia tuku i te au.​—2 Ari. 18:28-35.

Kua kite matauia te au tangata o Asura no to ratou tu kino rikarika. E tamataku ana ratou i to ratou au enemi na te akataka anga i te au kino rikarika ta ratou e rave ana ki te aronga tei opuia. Tei tau ki ta te tangata tata tuatua enua ko Philip Taylor, e akatupu ana ratou i te “au ravenga tamatakutaku kapiti mai i te au akakitekiteanga pikikaa, ei tamataku anga i te tangata kia noo ua ki raro ake i ta ratou akatereanga e te tamataku anga i te au enemi na te akakitekite taka meitaki anga i te au angaanga rikarika i te akavare pikikaa anga i te manako.” E ririnui pakari teia akakiteanga pikikaa. E “takino ana [te reira] i te manako,” i karanga ai a Taylor.

“E kukumianga ta [te au Kerititiano mou], kare ki te toto e te kiko ra, mari ra . . . ki te au vaerua ririnui kino,” koia oki, te au mea vaerua ora tei meameaau i te Atua. (Ephe. 6:12, NW) Ko Satani te pu maata i rotopu ia ratou. Te akatupu katoa nei aia i te mataku na roto i te akakiteanga pikikaa.

Kua maro a Satani e ka rauka iaia i te akaparuparu i to tatou tu tiratiratu. I te tuatau o te pateriareka ko Iobu, kua akakite aia ki te Atua ko Iehova e: “E riro oki ta te tangata katoa ra ei oko i tona ora.” Koia oki, na te akamaata anga i te au taomianga, kare e roa ka akaparuparu tetai tangata i tona tu tiratiratu ki te Atua. (Iobu 2:4) Kua tika ainei ta Satani? Kua akakotingaia ainei to tatou tu tiratiratu—me pakari rava te timata anga ka akaruke ainei tatou i ta tatou au kaveinga kia ora atu tatou? Te inangaro nei a Satani kia manako akapera tatou. No reira, te taangaanga nei aia i te au akakiteanga pikikaa akavare i te akatupu i taua tu manako ra ki roto ia tatou. Akara tatou i tetai o tana au ravenga no te raveanga i teia e akapeea tatou i te patoianga iaia.

“To Ratou Tumu, ko te One-pueu Ïa”

Kua taangaanga a Satani ia Eliphaza, tetai o te au oa toko toru o Iobu tei atoro atu iaia, kia taumaro e e tu paruparu tikai to te tangata. Na te taiku anga i te au tangata e ‘e aronga e noo ra i roto i te au are one,’ kua akakite aia kia Iobu e: ‘Ko to ratou tumu, ko te one-pueu ïa, tei paruparu ki mua i te aroaro o te neu. Te pou ua nei ratou mei te popongi mai e tae ua atu ki te aiai: te mate takiri nei rai ratou ma te akono koreia atu.’​—Iobu 4:19, 20.

I tetai ngai katoa i roto i te au Tuatua Tapu, kua akaaiteia tatou ki te “āriki karakaraea”​—e au kapu potera tei maaniia ki te karakaraea. (2 Kori. 4:7) E tu paruparu rai to tatou no te anau araia mai anga na roto i te tu apa. (Roma 5:12) Me ko tatou anake ua, mama ua ia Satani i te tamaki mai ia tatou. Inara ei au Kerititiano, e tauturu to tatou. Noatu to tatou tu paruparu, e oa tumanava tatou i roto i nga mata o te Atua. (Isa. 43:4) Tei maata atu, e oronga mai ana a Iehova i te vaerua tapu ki te aronga e pati atura kiaia. (Luka 11:13) Ka oronga mai tona vaerua i te “mana maata meitaki,” kia rauka ia tatou i te autu i tetai ua atu timataanga ta Satani ka tuku mai ki runga ia tatou. (2 Kori. 4:7; Phili. 4:13) Me patoi tatou i te Tiaporo, ma te “akarongo turori kore,” ka akamaroiroi pakari e ka akaketaketa mai te Atua ia  tatou. (1 Pete. 5:8-10) No reira, eiaa tatou e mataku i te Tiaporo ko Satani.

Te Tangata “Tei Inu ua i te Kino”

“Eaa oki te tangata nei, ka viivii kore ei aia? e ta te vaine nei i anau, ka riro ei tana ei tuatua-tika?” i ui ei a Eliphaza. E kua pau rai aia na te tuatua anga e: “I na, i tona aronga tapu ra, kare [te Atua] i irinaki atu; kare oki te au rangi ra i te mea viivii kore ki mua i ona mata. Ka tanga atu ei oki i te mea rikarika e te viivii ra i te tangata nei, ko tei inu ua i te kino mei te vai ra!” (Iobu 15:14-16) Te akakite ra a Eliphaza kia Iobu e kare a Iehova e manako maira e e tangata tuatua tika tetai. Te taangaanga katoa ra te Tiaporo i taua tu manako papu kore ra. Te inangaro ra aia kia manamanata tatou i to tatou au tarevake i topa, e kia manako akaapa ia tatou uaorai, e kia manako e kare te reira e rauka kia akatikatikaia. Te inangaro katoa ra aia kia manako tatou e e maata ta Iehova e umuumu maira ia tatou e kare Tona tangi aroa, akakore i te ara e te turuturuanga e rauka i te takore atu i to tatou tarevake.

E tika rai, “kua rave katoatoa oki [tatou ] i te ara, e kua ngere i te akameitaki a te Atua.” Kare e rauka i tetai tangata apa i te aru i te au turanga apa kore o Iehova. (Roma 3:23; 7:21-23) Inara, kare te aiteanga e kare tatou e puapinga ana kiaia. Kua kite a Iehova e “ko taua ovi taito ra ïa, ko tei karangaia i te diabolo ra, e ko Satani,” te taangaanga kino nei i to tatou turanga ara. (Apo. 12:9, 10) Te marama ra te Atua e “e one tatou,” e kare aia e kimi apa ana no runga ia tatou.​—Sala. 103:8, 9, 14.

Me kopae tatou i te arataa kino e te pure kia Iehova ma te ngakau tataraara e te akaaka, ‘ka akakore maata mai aia i te ara.’ (Isa. 55:7; Sala. 51:17) Te akakite maira te Pipiria e noatu e te ‘aite ua ra ta tatou au ara ki te mea kutekute, ka teatea ïa mei te kiona ra.’ (Isa. 1:18) Kia tauta pakari ra tatou kia kore e tuku i te au i te raveanga i te anoano o te Atua.

I roto i to tatou turanga ara, kare rava e rauka ia tatou tetai turanga tuatua tika ki mua i te Atua. Kua ngere a Adamu raua ko Eva te tu apa kore e te manakonakoanga no te oraanga mutu kore no raua uaorai e no tatou katoatoa. (Roma 6:23) No tona aroa maata i te au tangata, kua oronga mai a Iehova i tetai ravenga no te akakore i ta tatou ara me akarongo tatou ki roto i te atinga oko o tana Tamaiti ko Iesu Karaiti. (Mata. 20:28; Ioa. 3:16) E akaarianga umere tikai te reira i to te Atua “aroa”! (Tito 2:11) Ka akakoreia ta tatou ara! Eaa tatou ka akatika ai ia Satani kia akavare ia tatou kia irinaki e kare ta tatou ara e akakoreia mai?

“Ka Rave Atu ei i Tona Ivi e Tona Kiko”

Kua maro a Satani e ka tuku a Iobu i te au no tona akarongo me paruparu tona oraanga kopapa. Na te akaaoanga ia Iehova, kua tuatua te Tiaporo e: “Ka rave atu ei i tona ivi e tona kiko, kare aia e kore i te akakino ia koe ki mua i to mata.” (Iobu 2:5) Kare e ekoko e ka mataora te Enemi o te Atua me rauka iaia i te akatupu kia manako puapinga kore tatou no to tatou tu makimaki.

 Inara, kare a Iehova e kopae ia tatou me kare e rauka ia tatou i te rave i te au mea ta tatou i rauka ana i te rave i mua ana i roto i tana angaanga orometua. Akapeea ra me kua takinoia me kore kua kino tetai oa o tatou? Ka iti ainei to tatou akaperepere iaia no te mea kare e maata ana tana e rave ra no tatou mei tana i rave ana i mua ana? Kare rava! Ka aroa e ka akono ua rai tatou iaia—me kua kino tikai aia no te raveanga i tetai angaanga na tatou. Ka iti mai ainei ta tatou ka tapapa atu mei ia Iehova? “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na,” i akakite ei te Pipiria.​—Ebe. 6:10.

Te tuatua ra te au Tuatua Tapu no runga “i tetai vaine takaua apinga kore” penei tei turuturu ana i te akamorianga a te Atua no te au mataiti e manganui. Te kite atu anga a Iesu iaia e tuku ra i te “nga lepeta e rua” ki roto i te pia apinga o te iero, kua manako ainei aia i tana moni tauturu ei mea puapinga kore? Kare, kua akapaapaa aia iaia no te raveanga i te ka rauka i tona turanga i te turuturu i te akamorianga mou.​—Luka 21:1-4.

Me tamou marie tatou i to tatou tu tiratiratu, papu ia tatou e ka tinamou to tatou pirianga kia Iehova, noatu eaa te kino ta te tu ara i tuku mai ki runga ia tatou no te ruaine e te makimaki. Kare rava te Atua e akaruke i tona aronga akarongo mou no te mea ua nei e kua kotingaia e te tu kino to ratou turanga i te tavinianga iaia.​—Sala. 71:9, 17, 18.

Ariki “i te Pare o te Ora”

Akapeea tatou i te paruruanga ia tatou mei te akakiteanga pikikaa a Satani? Kua tata te apotetoro ko Paulo e: “Kia maroiroi kotou i te Atu, e i te ririnui o tona mana. E kakau i te rakei katoa a te Atua ra, kia tika ia kotou kia patoi i te ravenga pakari a te diabolo ra.” Ko tetai o taua tuanga paruruanga pae vaerua, koia oki ko “te pare o te ora.” (Ephe. 6:10, 11, 17) No runga i te akakiteanga pikikaa a Satani, e akapapu tatou e te ariki e te aao ra tatou i taua pare ra. E paruru ana te pare o te vaeau i tona upoko. To tatou ‘pare no te manakonakoanga o te ora’​—to tatou irinakianga i te akatupuanga i te au taputou a te Atua no runga i tona ao ou mekameka—​ka paruru te reira i to tatou manako mei te au pikikaa a Satani. (1 Tesa. 5:8, NW) Ka anoanoia tatou kia tamou e kia vai ngaueue kore taua manakonakoanga ra na te apii maroiroi anga i te au Tuatua Tapu.

Kua akakoromaki a Iobu i te au takinoanga rikarika a Satani. E ketaketa tikai to Iobu akarongo no te tuakaouanga kare rava te tamatakuanga o te mate i akaparuparu ana iaia. Mari ra, kua karanga aia kia Iehova e: “Naau e kapiki mai, e naku e io atu kia koe: e tangi rai koe ki te angaanga a to rima ra.” (Iobu 14:15) Noatu e ka mate a Iobu no te akono tamou anga i tona tu tiratiratu, kua irinaki aia e no te aroa o te Atua i Tona au tavini akarongo mou, i akakeu ei Iaia kia akatuakaou mai i tei mate.

Kia irinaki katoa tatou i te Atua mou. Ka rauka ia Iehova i te akatikatika i tetai ua atu apinga ta Satani e ta tona aronga turuturu ka tuku mai ki runga ia tatou. Kia akamaara katoa i ta Paulo i akapapu mai kia tatou e: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”​—1 Kori. 10:13.

[Tutu i te kapi 20]

Akaperepere a Iehova i taau tavini akarongo mou

[Tutu i te kapi 21]

Ariki i te pare o te ora, e aao ua rai i te reira