‘Tuatua i te Tuatua a te Atua ma te Mataku Kore’
‘Tuatua i te Tuatua a te Atua ma te Mataku Kore’
‘Akakiia maira ratou i te vaerua tapu, kua tuatua ua iora i te tuatua a te Atua ma te mataku kore.’—ANGA. 4:31.
1, 2. Eaa ra tatou ka tauta ei kia tukatau i roto i ta tatou angaanga orometua?
E TORU ra i mua ake i tona mate, kua akakite a Iesu ki tana au pipi e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” I mua ake ka aere atu ei aia ki te rangi, kua akaue a Iesu tei akatuia mai i tana au pipi kia ‘akariro i to te pa enua katoa ei pipi; Ma te apii atu ia ratou, kia akono i te au mea katoa tana i akaue atu kia ratou.’ Kua taputou mai aia kia ratou e te vaitata ua ra aia ia ratou “e tae ua atu ki te openga o teianei ao.”—Mata. 24:14; 26:1, 2; 28:19, 20.
2 Ei Au Kite no Iehova, te piri maroiroi nei tatou i roto i tetai angaanga tei akamataia i te anere mataiti mua. E angaanga puapinga te angaanga akaora anga no te tutu aere anga i te Patireia e te akariro anga i te tangata ei pipi. E mea puapinga i reira e, kia tukatau tatou i roto i ta tatou angaanga orometua! I roto i teia atikara, ka kite mai tatou akapeea te arataki anga a te vaerua tapu i te tauturu anga ia tatou kia tuatua ma te mataku kore, me piri tatou ki roto i te angaanga orometua. Ka akaari mai te nga atikara e aru maira e akapeea te vaerua o Iehova i te arataki anga ia tatou kia apii ma te kite karape e kia tutu putuputu aere.
Ka Inangaro Tatou i te Tu Mataku Kore
3. Eaa ra i umuumuia ai te mataku kore me piri atu ki roto i te tutuanga i te Patireia?
3 E akangateitei anga maata te angaanga tutu aere i te Patireia ta te Atua i oronga mai kia tatou. Inara, te o maira te au akaaoanga. Kua ariki viviki mai tetai au tangata i te tuatua meitaki o te Patireia o te Atua, inara e manganui tei aite ki te aronga i ora ana i te tuatau o Noa. “Kare rava [ratou] i kite, e rokoia iora ratou e te diluvi, e ope Mata. 24:38, 39) E aronga katoa tetai te aviri maira me kore te patoi maira ia tatou. (2 Pete. 3:3) Penei ka patoi mai te aronga mana taoonga, te au oa apii, te au oa angaanga, me kore te au mema katoa o te ngutuare. Kapiti mai ki teia patoianga koia oki, to tatou uaorai tu paruparu, mei te tu akama e te mataku e kare tatou e inangaroia mai. E maata te tumu te akangata ra ia tatou i te taangaanga i te “tuatua ma te tapupu kore” e te tuatua anga i te tuatua a te Atua “ma te mataku kore.” (Ephe. 6:19, 20, NW) Te akakoromakianga i te tuatua anga i te tuatua a te Atua te umuumuia ra te tu mataku kore. Eaa te ka tauturu ia tatou kia rauka mai te reira?
takiri akera ratou i te mate,” i karanga ai a Iesu. (4. (a) Eaa ra te tu mataku kore? (e) Akapeea te apotetoro ko Paulo i te akatoatoa anga i te tu mataku kore kia tuatua atu ki to Tesalonia?
4 Te tuatua Ereni tei uriia e e “mataku kore” ko te aiteanga e “akakite pu tikai, tuatua anga tika, akakite ua atu.” Te akakite maira taua tuatua i te manako no te “ngakau toa, irinaki papu, . . . kare e mataku ana.” Kare te aiteanga o te tu mataku kore e kia tuatua akakino me kore kia tuatua akateitei atu. (Kolo. 4:6) No runga i te mataku kore, te inangaro katoa ra tatou kia noo au ua ma te katoatoa. (Roma 12:18) Pera katoa, ia tatou e tutu aere ra i te tuatua meitaki o te Patireia o te Atua, te anoanoia ra tatou kia tuatua ma te mataku kore e i taua taime rai kia akamanako ma te tau e auraka tatou e akariri akakoro kore atu i tetai ke. E tika rai, te anoano ra te tu mataku kore i te au tu te umuumu maataia ra te tautaanga. Kare teia tu mataku kore e no roto mai i to tatou uaorai maroiroi. I muri ake i te ‘takinga kinoia anga te apotetoro ko Paulo ratou ko tona au oa i Philipi ra,’ akapeea ratou i te ‘akatoatoa anga i te tu mataku kore’ i te tuatua atu anga ki te aronga i Tesalonia? Na roto i “to matou Atua,” i tata ei a Paulo. (E tatau ia 1 Tesalonia 2:2. *) Ka rauka i te Atua ko Iehova i te akakore atu i to tatou mataku e te oronga mai i taua tu mataku kore ra kia tatou.
5. Akapeea a Iehova i te oronga anga i te tu mataku kore kia Petero, Ioane, e tetai atu au pipi?
5 Te akaapaia anga mai e te “au tutara [o te au tangata], e te aronga pakari, e te au tata tuatua,” kua tuatua te nga apotetoro ko Petero raua ko Ioane e: “E mea tika i te Atua kia akarongo atu ia kotou auraka te Atua, ka akamaara io ïa kotou. Kare oki matou e tika kia kore e tuatua i ta matou i akara akenei, e ta matou i akarongo akenei.” Kare ratou i pure ana ki te Atua kia akamutuia te takinokino anga, kua rave ra ratou e te au taeake irinaki i te patianga, i te tuatua anga e: “E akara mai koe, e te Atu [Iehova], i ta ratou nei akamataku anga mai, e akamaroiroi mai i to au tavini kia tuatua ua i taau tuatua ma te mataku kore.” (Anga. 4:5, 19, 20, 29) Akapeea a Iehova i te ariu mai anga ki ta ratou patianga? (E tatau ia Angaanga 4:31.) Kua tauturu a Iehova ia ratou kia akatoatoa i te mataku kore na roto i tona vaerua. Ka rauka katoa i te vaerua o te Atua i te rave i te reira no tatou. Akapeea e rauka mai ei ia tatou te vaerua o te Atua e kia aratakiia e te reira i roto i ta tatou angaanga orometua?
Akatupu Anga i te Tu Mataku Kore
6, 7. Eaa te mataara tika rava atu e rauka mai ei te vaerua tapu o te Atua? Oronga mai i te nga akaraanga.
6 Te mataara tika rava atu kia rauka mai te vaerua tapu o te Atua koia oki, e pati i te reira. Kua akakite a Iesu ki te aronga e akarongo maira kiaia e: ‘E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te vaerua tapu i te aronga e pati atu aia ra.’ (Luka 11:13) E tika rai, e pure putuputu tatou no te vaerua tapu. Me te tamataku maira tetai au tu o te angaanga orometua ia tatou—te rave anga i te akakitekiteanga i runga i te mataara, te tutu aere anga, me kore te angaanga anga i te ngai pitiniti—ka rauka ia tatou i te pure kia Iehova no tona vaerua e kia pati kiaia kia tauturu mai ia tatou kia akatoatoa i te tu mataku kore te anoanoia ra.—1 Tesa. 5:17.
7 Ko tera ta tetai vaine Kerititiano ko Rosa tona ingoa i rave. * I tetai ra ia Rosa e angaanga ra i ko i tana ngai angaanga, te tatau ra tetai puapii e angaanga ana raua i tetai ripoti no ko mai i tetai apii ke no runga i te takinokino anga i te tamariki. Kua manamanata tikai te puapii i tana e tatau ra e kua tuatua maata mai e, “Eaa te au apinga e tupu ra i teianei ao?” Kare a Rosa i inangaro ana i te tuku i taua atianga ra ma te kore e oronga atu i tetai akakiteanga. Eaa ra tana i rave kia rauka iaia i te tuatua atu ma te mataku kore? “Kua pure au kia Iehova e kua pati i tona vaerua kia tauturu mai iaku,” i karanga ai a Rosa. Kua rauka iaia i te oronga atu i tetai akakiteanga meitaki e te akanoo i tetai atoro akaou anga. E akamanako katoa ana i te turanga o tetai tamaine e rima ona mataiti ko Milane tona ingoa, e noo ra i New York City. Kua tuatua a Milane e: “I mua ake ka aere ei au ki te apii, e pure ua ana maua ko toku mami kia Iehova.” Eaa ta raua e pure ana? Kia oronga mai i te maroiroi kia Milane kia vai ngaueue kore ua aia e kia tuatua atu no runga i tona Atua! “Kua tauturu teia ia Milane kia akamarama atu i tona turanga no runga i te ra anauanga e te au orote e kare aia e piri ana me akamaaraia te reira,” i karanga ai tona metua vaine. Kare ainei teia nga akaraanga e akaari maira e ka rauka te pure i te tauturu i te akatoatoa i te tu mataku kore?
8. Eaa ta tatou i kite mai mei te peroveta ko Ieremia no runga i te akatupu anga i te tu mataku kore?
8 E akamanako katoa ana eaa tei tauturu i te peroveta ko Ieremia kia akatupu i te tu mataku kore. Te iki anga a Iehova iaia ei peroveta no te pa enua, kua pau atu a Ieremia e: “Kare au i kite i te tuatua: e tamaiti ua oki au nei.” (Iere. 1:4-6) I te tuatau i aereia, no ta Ieremia tauta pakari anga e te maroiroi i roto i tana angaanga tutuanga i manako ei te manganui iaia e e tangata tuatua puapinga kore ua no runga i te kino. (Iere. 38:4) No tetai 65 tuma mataiti, kua akakite mataku kore aia i ta Iehova au akavaanga. Kua kite meitaki tikaiia aia i Iseraela no tona tu mataku kore e te maroiroi i te tutu aere anga, e i tetai 600 mataiti i muri mai te tuatua anga a Iesu ma te tu mataku kore, kua irinaki tetai pae e koia a Ieremia tei akaoraia mai. (Mata. 16:13, 14) Akapeea te peroveta ko Ieremia tei emiemi i te akamataanga i te autu anga i tona tu akama? Kua tuatua aia e: “Riro atura ra [te tuatua a te Atua] mei te ai ka i roto i toku ngakau ra, kua popaniia ki roto i toku ra au ivi; roiroi akera au i te akakoromaki ua anga.” (Iere. 20:9) Ae, kua riro te tuatua a Iehova ei mana ririnui ki rungao ia Ieremia e kua akakeu iaia kia tuatua.
9. Eaa ra i rauka ai i te tuatua a te Atua i te akakeu ia tatou mei te tu rai i akakeuia ai a Ieremia?
9 I roto i tana reta ki to Ebera, kua tata te apotetoro ko Paulo e: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” (Ebe. 4:12) Ka rauka i te karere, me kore te tuatua a te Atua i te akakeu ia tatou mei te tu rai i akakeu ei te reira ia Ieremia. Kia akamaara ra e noatu e kua taangaangaia te au tangata kia tata i te Pipiria, kare te reira ei akaputunga ua i te puka no runga i te pakari o te tangata, e mea akauruia mai ra te reira e te Atua. I roto ia 2 Petero 1:21, ka tatau tatou e: ‘Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te vaerua tapu i tuku mai ia ratou ra.’ Me tuku tatou i te taime kia rave i tetai apiianga puapinga na tatou uaorai no runga i te Pipiria, ka akakiia to tatou au manako ki te karere tei akauruia mai e te vaerua tapu. (E tatau ia 1 Korinetia 2:10.) Ka riro taua karere ra “mei te ai ka” i roto ia tatou, e kare e rauka ia tatou i te tapu ua i te reira ki roto ia tatou uaorai.
10, 11. (a) Akapeea tatou me apii i te Pipiria me te inangaro ra tatou i te akatupu i te tu mataku kore na roto i te tuatua? (e) E akakite mai e tai takainga taau e parani ra kia akameitaki mai i te tu o taau uaorai apii.
10 Kia rauka i ta tatou uaorai apii Pipiria i te akakeu pakari ia tatou, e mea tau i te rave i te reira na roto i te tu e itae oonu ra te karere o te Pipiria i to tatou ngakau, i te akakeu anga ia roto ia tatou. Ei akaraanga, kua orongaia ki te peroveta ko Ezekiela tetai orama, tei pati iaia kia kai i te pokaikai o tetai puka e karere ririnui to roto e kia oronga i te reira ki te au tangata kare e ariu mai ana. E mea tau kia akamou tikai a Ezekiela i tona manako ki runga i te karere e kia akariro i te reira ei tuanga nona. Na te rave anga i te reira te akariro ra i te angaanga oronga anga i taua karere ra ei mea reka—mei te tongi anga i te meri.—E tatau ia11 Aiteite ua to tatou turanga ki to Ezekiela. I teia tuatau, kare te maataanga e inangaro ana i te akarongo eaa ta te Pipiria e tuatua ra. Me ka tamou marie ua rai tatou i te tuatua anga i te tuatua a te Atua, e mea puapinga kia apii tatou i te au Tuatua Tapu na roto i tetai tu e akatika ra ia tatou kia akamou tikai i te manako ki runga i ta te reira karere. E rave putuputu tatou i ta tatou au peu no te apiianga, kare e no tetai ua taime. E mea tau kia aite to tatou anoano ki to te tata taramo tei imene e: “Kia tikaia mai te tuatua a toku vaa, e te manako o toku ngakau, i mua i to aroaro, e Iehova, e toku mato, e toku akaora.” (Sala. 19:14) E puapinga tikai kia akapou tatou i te taime i te akamanako oonu i ta tatou e tatau ra, kia tomo oonu te tuatua mou o te Pipiria ki roto i te ngakau! Papu e, ka tauta tatou i te akameitaki mai i te tu o ta tatou uaorai apii. *
12. Eaa ra te au uipaanga Kerititiano i riro ei ei tauturu ia tatou kia aratakiia e te vaerua tapu?
12 Ko tetai mataara e puapinga ai tatou mei te vaerua tapu o Iehova koia oki “e akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga.” (Ebe. 10:24, 25) Na te tauta pakari anga kia tae putuputu tatou ki te au uipaanga Kerititiano, te akarongo meitaki anga, e te taangaanga anga i ta tatou i kite mai ko tetai au mataara meitakiia no tatou kia aratakiia e te vaerua. Kare ainei e na te vaerua o Iehova e oronga mai ana i te aratakianga na roto i te putuputuanga?—E tatau ia Apokalupo 3:6.
Au Akameitakianga no te Akatupu Anga i te Tu Mataku Kore
13. Eaa ta tatou ka kite mai mei tei akatupuia e te au Kerititiano o te anere mataiti mua i roto i te angaanga tutuanga?
13 E mana ririnui tikai te vaerua tapu i te ao katoa e pini ua ake, e ka rauka i te reira i te akamaroiroi i te au tangata kia rave i to Iehova anoano. I raro ake i ta te reira akakeuanga, kua rauka i te au Kerititiano o te anere mataiti mua i te akatupu i tetai angaanga maata no te tutu aere anga. Kua tutu aere ratou i te tuatua meitaki “tei akakiteia akenei ki te tangata ravarai i raro ake i teianei rangi.” (Kolo. 1:23) Me akamanako ra tatou e ko te maataanga ia ratou e aronga ‘apii koreia e te kite kore,’ papu tikai e kua akakeuia ratou e te mana ririnui rava atu.—Anga. 4:13.
14. Eaa te ka tauturu ia tatou kia ‘akakeuia e te vaerua’?
Roma 12:11, NW) No runga i “tetai ngati Iuda, ko Apolo te ingoa, tei anauia i Alekanederea, e tangata tukatau, kua tae mai ki Ephesia,” te karanga ra te Pipiria e: “I te mea e kua akakeuia aia e te vaerua, kua tuatua e kua apii aia ma te tu tika i te au mea no runga ia Iesu.” (Anga. 18:24, 25, NW) Na te “akakeu maroiroiia anga e te Vaerua,” ka rauka ia tatou i te akaari maata atu i te tu mataku kore i roto i ta tatou angaanga orometua mei tera are ki tera are e me akakitekite aere ua.—Roma 12:11, The Bible—An American Translation.
14 Te aru rotai anga i te aratakianga a te vaerua tapu te akakeuia ra tatou kia rave maroiroi ua atu rai i ta tatou angaanga orometua. Te au akameitakianga tei kapitiia mai no te pure putuputu anga no te vaerua, te rave maroiroi anga i taau uaorai apiianga puapinga, te akamanako oonu anga na roto i te pure i taau e tatau ra, e te aere putuputu anga ki te au uipaanga Kerititiano, ka rauka i te tauturu ia tatou kia ‘akakeuia e te vaerua.’ (15. Akapeea tatou e meitaki ei i te tuatua anga ma te tu mataku kore e maata maira?
15 Ko te tu mataku kore e maata maira i roto i te akakitekite anga, e akakeuanga papu te reira ki rungao ia tatou. Ka meitaki mai to tatou tu no te mea te marama meitaki ra tatou i te puapinga e te akameitakianga no ta tatou angaanga. Ka meitaki atu to tatou tu maoraora no te mea ka kite mai tatou i te rekareka maata me tukatau tatou i roto i te angaanga orometua. E ka akamatutuia to tatou maroiroi no te mea kua maata atu to tatou marama no runga i te tu rapurapu o te angaanga tutuanga.
16. Eaa ta tatou ka rave me kua iti mai to tatou maroiroi no te angaanga orometua?
16 Akapeea me kare tatou e maroiroi akaou ana i roto i te angaanga orometua me kore kare tatou e inangaro ana i te rave i te reira mei to mua ana? No reira te anoanoia ra kia tirotiro matatio tikai tatou ia tatou uaorai. Kua tata a Paulo e: “E kimi matatio ia kotou uaorai i to kotou akarongo; e akara matariki ia kotou uaorai.” (2 Kori. 13:5) E ui kia koe uaorai e: ‘Te akakeuia nei rai au e te vaerua? E pure ana au kia Iehova no tona vaerua? Te akaari maira ainei taku au pure e te irinaki ra au ki runga iaia no te rave i tona anoano? E au tuatua akameitakianga ainei to roto i reira no te angaanga orometua tei orongaia mai kia tatou? Akapeea ra taku uaorai au peu apiianga? Eia taime e akapou ana au i te akamanako oonu i taku e tatau ra e e akarongo ra? Te piri atura ainei au ki roto i te au uipaanga a te putuputuanga?’ Na te akamanako anga i teia au uianga e tauturu ei ia koe kia akara i te au ngai paruparu e kia rave i te au takainga tau.
Tuku i te Vaerua o te Atua kia Rauka ia Koe te Ngakau Toa
17, 18. (a) Mei teaa ra te maata e raveia nei te angaanga tutuanga i teia tuatau? (e) Akapeea tatou i te akaari anga i te ‘tuatua maata tikai ma te tapupu kore’ no te akakite anga i te tuatua meitaki o te Patireia o te Atua?
17 Kua akakite a Iesu tei akatuia mai ki tana au pipi e: ‘Ka rauka ra to kotou mana i te vaerua tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.’ (Anga. 1:8) Te rave maataia nei te angaanga tei akamataia i taua tuatau ra, i teia tuatau. Vaitata atu ki te itu mirioni Au Kite o Iehova te akakite aere ra i te karere o te Patireia i roto i te au enua tei tere atu ki te 230, na te akapou anga vaitata rai e e 1.5 pirioni ora i te mataiti i roto i te angaanga orometua. Mei teaa ra te rekareka i te piri maroiroi atu anga ki roto i teia angaanga kare e ripiti akaouia!
18 Mei te anere mataiti mua rai, te raveia nei te angaanga tutuanga i te ao katoa i teia tuatau i raro ake i te aratakianga a te vaerua o te Atua. Me akarongo tatou ki te aratakianga a te vaerua, ka akaari tatou i te ‘tuatua maata tikai ma te tapupu kore’ i roto i ta tatou angaanga orometua. (Anga. 28:31, NW) No reira, e mea tau kia aratakiia tatou e te vaerua ia tatou e akakite aere ra i te tuatua meitaki o te Patireia o te Atua!
[Au Tataanga Rikiriki i Raro]
^ para. 4 1 Tesalonia 2:2, (NW): “Inara, i muri ake i to matou rokoia anga e te kino e te takinga kinoia anga (mei ta kotou i kite) i Philipi, kua akatoatoa matou kia rauka te tu mataku kore mei to matou Atua i te akakite atu kia kotou i te tuatua meitaki o te Atua ma te ngata tikai.”
^ para. 7 Kua tauiia te au ingoa.
^ para. 11 Kia puapinga maataia i roto i taau tatauanga Pipiria e taau uaorai apii, e akara i te puka Benefit From Theocratic Ministry School Education, te ingoa o te nga pene “Apply Yourself to Reading” e te “Study Is Rewarding,” kapi 21-32.
Eaa Taau i Kite?
• Eaa ra tatou ka anoano ei kia tuatua i te tuatua a te Atua ma te mataku kore?
• Eaa ra tei tauturu i te au pipi mua kia tuatua ma te mataku kore?
• Akapeea tatou i te akatupu anga i te tu mataku kore?
• Akapeea tatou e puapingaia ai i te akatupu anga i te tu mataku kore?
[Au Uianga Apii]
[Tutu i te kapi 7]
Akapeea te au metua i te tauturu anga i ta ratou tamariki kia akatupu i te tu mataku kore?
[Tutu i te kapi 8]
Ka tauturu tetai pure poto ua ia koe kia akatoatoa ma te tu mataku kore i roto i te angaanga orometua