Akono Tamou i te “Ngakau Mā” i Teia Tuatau Kino

“KARE e rauka i tetai tangata i te patoi e ko te tu viivii kore te manamanata i roto i te Akonoanga i teia tuatau.” Kua akakite te tangata tata nuti o te Katorika ko Vittorio Messori no runga i te au angaanga ainga tau kore tei tupu ua akenei i roto i te Akonoanga i Itaria. “E kare e rauka i te akatikatika i te reira na te takoreanga i te umuumuanga e kia vai tiama ua te au orometua, no te mea e 80 patene o te reira aronga e aronga totoma​—e au orometua ariki uaia i te rave ainga, tei kanga kino i te au tane e te au tamariki tamaroa.”​—La Stampa.

Kare ekoko e ko te totoa anga o te kino e akairo ia no teia “tuatau openga” o te akatereanga o teia au mea nei. (2 Timo. 3:​1-5) Mei tei akaariia mai e te nuti tei ripotiia, e akakeuanga kino ta te tu akono tau kore e akatupu ra ki runga i te tangata, e ki runga katoa i te aronga e karanga ra e e tangata ratou no te Atua. Te akakeu ra to ratou tu kino e te ngakau ma kore ia ratou kia rave i te au angaanga viivii kino. (Ephe. 2:⁠2) E tumuanga meitaki i reira, e kua akamatakite mai a Iesu e “no roto mai oki i te ngakau te manako kikino, te ta tangata, te moeaana, te akaturi, te keia, te tapepe pikikaa, e te akakino Atua.” (Mata. 15:19) Inara, te inangaro maira te Atua ko Iehova e kia inangaro tona au tavini i te “ngakau mā.” (Mase. 22:11) Akapeea i reira tetai Kerititiano i te akono tamou i te ngakau ma i teia tuatau kino?

Te Aiteanga Kia “Mā te Ngakau”?

I roto i te Pipiria, e taangaanga putuputuia ana te “ngakau” na roto i te manako akatutu ua. Tei tau ki tetai tataanga, te akakite maira te tuatua Pipiria i te ngakau e ko te “tuanga i roto roa i te tangata” e ko te “tuanga puapinga rava atu i roto tikai ta te Atua e manako maira, tei akatumuia te pirianga o tetai ki te Atua, e na te reira e akatere i te tu akono tau.” Te akatutu maira te ngakau i to tatou tu tikai i roto ake. Mei tei akatakaia mai e te tataanga tei taikuia mai i runga akenei, ko te ngakau ta Iehova e makitoro marie ra e tana e ariki rekareka ra i roto i tona au tavini.​—1 Pete. 3:4.

I roto i te Pipiria, ka rauka i te tuatua “ma” e te “viivii kore” i te akataka mai e eaa te mea ma i te pae kopapa. Inara te tau katoa ra taua tuatua ra ki te au mea kare i akaviiviiia​—kare i kairoia ki te kino, kare i reporepo, me kore kare i kino⁠—​i roto i te au tu akono tau e te pae akonoanga. I roto i te Tuatua i runga i te Maunga, kua akakite a Iesu e: “E ao to tei mā te ngakau.” Te tuatua ra aia no runga i te aronga i ma tikai a roto ake. (Mata. 5:⁠8) E ma tikai to ratou pirianga, to ratou au anoano, e to ratou au akakoroanga. Akakeuia e te aroa e te ngakau ariki rekareka, te inangaro ra ratou ia Iehova ma to ratou ngakau katoa, te ngakau tae tikai, kare e pikikaa. (Luka10:27) Kare ainei koe e inangaro ana kia ma koe i roto i taua tu ra?

Te Akaaoanga​—Kia Vai “Mā te Ngakau”

Ka inangaroia te tavini o Iehova kia “mā te rima” e kia “ngakau viivii kore” katoa. (Sala. 24:3, 4) Inara, i teia tuatau e akaaoanga maata tikai no te au tavini o te Atua kia vai “ngakau viivii kore” ua. Te akakeu nei a Satani e te ao i raro ake i tana tutaraanga i te taomianga pakari, pera katoa to tatou uaorai kopapa apa ua, i te akatakake ia tatou mei ia Iehova. E rauka ai i te patoi i teia au taomianga, e puapinga maata tikai e kia inangaro tatou i te “ngakau mā” e kia akono ngaueue kore i te reira. Ka rauka i te reira i te paruru e te tauturu ia tatou kia riro ua rai ei au oa no te Atua. Akapeea tatou i te akono tamou anga e kia ma ua te ngakau?

 I roto ia Ebera 3:12, ka kite mai tatou i te akamatakite anga e: “Kia matakite, e te au taeake, ko te vai aea te ngakau kino akarongo kore katoa ki roto i tetai e kotou, i te akaruke anga i te Atua ora.” Kare e rauka ia tatou i te akono tamou kia “mā te ngakau” me akatupu tatou i te ngakau “akarongo kore.” Eaa te au manako ta te Tiaporo ko Satani i akatotoa aere ei akaparuparu i te akarongo ki roto i te Atua? Te kapiti maira teia i te apiianga no te au mea tupu ua mai, te aite kore o te tu akono tau e te akonoanga, e te ekoko no runga i ta te Atua akauruanga i te au Tuatua Tapu. Auraka rava tatou e tuku ia tatou uaorai kia takinoia e taua au manako kino pakari ra. (Kolo. 2:⁠8) Ko te paruru anga meitaki roa atu no teia au akakinoanga, ko te tatau anga i te Pipiria i te au ra e te akamanako oonu anga. Ka rauka i te kite tika tikai i te Tuatua a te Atua i te akamaata atu i to tatou aroa ia Iehova e to tatou ariki ngateitei anga i te tu e akono ra aia i te au tangata. Ko taua aroa e te ariki anga rekareka e mea puapinga tikai, me ka inangaro tatou i te patoi atu i te au manako tarevake, e kia akono i to tatou akarongo ki roto ia Iehova kia ketaketa, kia rauka ia tatou te akono tamou i te ngakau ma.​—1 Timo. 1:​3-5.

Me Aro Atu i te Au Anoano o te Kopapa

Tetai tu akakino anga ta tatou penei ka aro atu no te tauta anga i te akono tamou i te “ngakau mā” te o maira te au anoano o te kopapa e te pae materia. (1 Ioa. 2:​15, 16) Te inangaro maata i te moni me kore te anoano kia maata te au apinga nui e kia rauka te au apinga materia, ka takino i te ngakau, te ka arataki atu i tetai Kerititiano kia rave i te au mea te patoi atura i te anoano o te Atua. Kua rave tetai pae i te tu tika kore i te ngai angaanga, kua pikikaa i tetai ke, me kore kua keia i te moni me kore i te au apinga kare na ratou.​—1 Timo. 6:9, 10.

I tetai tua, na te akatupu anga i te mataku tau kia kore e akamareka kore ia Iehova, te inangaro anga i te tuatua tau, e te tauta anga i te akono i te akava ngakau meitaki, te akaari ra tatou e te inangaro ra tatou i te “ngakau mā.” Ka akakeu taua aroa ra ia tatou kia rave ua atu rai ‘kia tika tatou uaorai i te au apinga katoa.’ (Ebe. 13:18, NW) Me rave tatou i te mea tika, ka rauka tetai akakite anga meitaki no te tu tika. Kua kitea mai e Emilio, tetai Kite no Itaria e angaanga ana  ei tangata akaoro apinga tari tangata no tetai kamupani, tetai kiri moni e 470 euro ($951.30, N.Z.). Kua poitirere tona au oa angaanga e kua oronga aia i te kiri moni ki tona pu akaaere, e kua orongaia atu te reira ki te tangata nana te kiri moni. Kua mareka tikai te au oa angaanga o Emilio i tona tu e kua akakeu ia ratou kia inangaro i te Pipiria e kua akamata i te apii. Tei tupu mai, e itu tangata i roto i tetai nga ngutuare e rua tei ariki mai i te tuatua mou. Ae, na te akono anga i te tu tika mei te ngakau ma, e akakeu tikai i etai ke kia akapaapaa i te Atua.​—Tito 2:⁠10.

Tetai apinga ke te ka riro ei akakeu anga kino ki runga i te ngakau ma o tetai Kerititiano, ko te manako tarevake no te tu akono tau kore o te ainga. Te tika e ko te pirianga ainga i mua ake i te akaipoipo, i vao ake i te akaipoipo, e te au pirianga totoma, e manakoia ra e te manganui e te meitaki ua ra, ka riro ei takino i te ngakau o tetai Kerititiano. Ko tetai tangata te ka ariki ua i te pirianga ainga tau kore, penei ka rave pikikaa i te aru e rua tu oraanga, te uuna ra aia i te ara. Kare rava te reira e akaari mai i te “ngakau mā.”

Kua papetitoia a Gabriele i tona 15 mataiti anga e kua akamata roa aia i te painia. Inara, i muri mai kua akamata aia i te akapou i tona taime ki te au pirianga oa tau kore i roto i te ngai tamataora anga i te po. (Sala. 26:⁠4) Ko te akamataanga teia o te oraanga tau kore e te pikikaa, e kua akaateaia aia mei te putuputuanga Kerititiano. Kua akakeu taua akoanga a Iehova iaia kia akamanako meitaki tikai. Kua maara ia Gabriele e: “Kua akamata au i te rave i te au mea ravarai kare rava au i manako maata atu ana i mua ana. Kua tatau au i te Pipiria i te au ra ravarai, te tauta anga i te akarongo ki ta Iehova e tuatua tika maira, e kua apii meitaki au i te au puka teokaratiki. Kua kite mai au i te puapinga e te merengo tikai o taku uaorai apii e te maata o te maroiroi te ka rauka mai mei te tatau anga i te Pipiria e te pure putuputu.” Kua tauturu teia ia Gabriele i te akaruke i tona tu akono tau kore e te akatupu akaou i tona pirianga kia Iehova.

I teianei te tavini akaou nei a Gabriele ei painia, raua ko tana vaine. Te mea tei tupu kiaia, te akapapuia maira e ka rauka te apii i te Pipiria e te au puka a “te tavini akono meitaki e te pakari” i te tauturu i tetai tangata kia rauka te ngakau ma e te kopae i te tu akono tau kore.​—Mata. 24:45; Sala. 143:⁠10.

Ei “Ngakau Mā” me Timataia

Kua riro te taomianga mei te aronga patoi, te turanga ngata i te pae moni, e te maki kino i te akaparuparu i tetai au tavini o te Atua. I tetai taime kua tupu katoa te akakeu anga kino ki to ratou ngakau. Kua na roto katoa ana te Ariki ko Davida i taua tu ra: “I tumatetenga roaʼi toku vaerua i roto iaku nei; kua tuputupuā toku ngakau i roto iaku nei.” (Sala. 143:⁠4) Eaa ra tei tauturu iaia kia autu atu i taua au turanga ra? Kua akamaara a Davida i te tu e akono ana te Atua i Tona au tavini, e te akaoraia anga aia. Kua akamanako oonu aia i ta Iehova i rave no Tona ingoa maata. Kua akamanako ua rai a Davida i te au angaanga a te Atua. (Sala. 143:⁠5) Mei te reira katoa, na te akamanako oonu anga ki runga i Tei Anga mai ia tatou, e te au mea ravarai tana i rave e te rave ua nei rai, e tauturu ia tatou me rokoia tatou e te timataanga.

Me kua manako tarevakeia mai tatou, penei ka riri tatou. Me manako putuputu tatou no runga i tei tupu, ka riro te reira ei manako kino atu i to tatou au taeake. Penei ka akamoupuku tatou, ka akatakake mai ia tatou e kare e inangaro tikai atu i tetai ke. Inara, te rotai ra ainei taua au tu ra ki to tatou inangaro kia rauka te “ngakau mā”? Te taka ua ra e, ko te akakoroanga e kia rauka taua tu ngakau ra, te o maira ta tatou akono anga atu e te ariu anga atu ki to tatou au taeake Kerititiano.

I roto i teia ao te maata ua atura te kino e te au tu akono viivii tau kore, e tuke maata to tatou ei au Kerititiano mou, no te mea te inangaro ra tatou i te “ngakau mā.” Te akakeu papuia nei to tatou oraanga, ia tatou e kite nei i te au o te ngakau tei tupu mai no te raveanga i te anoano o te Atua. Tei maata atu, te rekareka nei tatou i tetai pirianga oa vaitata ki Tei Anga mai ia tatou, te Atua ko Iehova, tei inangaro i te aronga “ngakau mā.” (Sala. 73:⁠1) Ae, ka o atu tatou ki roto i te aronga te ka mataora no te mea, mei ta Iesu rai i taputou mai “ka kite ratou i te Atua,” Iaia e tauturu ra i te aronga e inangaro ra kia “mā te ngakau.”​—Mata. 5:⁠8.