E Akono i ta te Vaerua e e Akatupu i Toou Akatapu Anga

‘E akono i ta te vaerua, e auraka e akatupu i to te kopapa ra inangaro’​—GALA. 5:⁠16.

1. Eaa te au papetitoanga tei tupu i te ra o te Penetekote?

TE TUATUA anga te au pipi a Iesu i te au tuatua ke ke i te ra o te Penetekote mataiti 33 T.N., i muri ake te reira i te papetitoia anga ratou ki te vaerua tapu. Kua akaari ratou i te apinga aroa temeio o te vaerua. (1 Kori. 12:​4-10) Eaa te angaanga tei tupu mai mei teia apinga aroa e te akoanga ta te apotetoro ko Petero i oronga? Kua ‘puta atura te ngakau’ o te manganui. No ta Petero raurau anga, kua tataraara ratou e kua papetitoia. Te karanga ra te rekoti no te tuatua enua e: “Te aronga katoa i āriki marie i tana tuatua, bapetizoia iora ïa; e kapiti katoaia maira kia ratou e toru katoa paa tausani i taua rā ra.” (Anga. 2:​22, 36-41) Mei ta Iesu rai i ikuiku, kua papetitoia ratou i roto i te vai i te ingoa o te Metua, te Tamaiti, e te vaerua tapu.​—Mata. 28:⁠19.

2, 3. (a) Akamarama mai i te tuke i rotopu i te papetitoanga ki te vaerua tapu e te papetitoanga i te ingoa o te vaerua tapu. (e) Eaa ra te papetitoanga ki te vai i umuumuia no te katoatoa te ka riro mai ei au Kerititiano mou i teia tuatau?

² Inara, e tuke ainei tetai i te papetitoanga ki te vaerua tapu e te papetitoanga i te ingoa o te  vaerua tapu? Ae. Te aronga i papetitoia ki te vaerua tapu, kua anau akaouia ei tamariki anauia i te vaerua na te Atua. (Ioa. 3:⁠3) Kua akatainuia ratou kia riro mai ei au ariki tei kapitiia mai e ei kau taunga tauturu no te tuatau ki mua, i roto i te Patireia o te Atua i te rangi, e ko ratou tetai tuanga o te kopapa vaerua o Karaiti. (1 Kori. 12:13; Gala. 3:27; Apo. 20:⁠6) No reira, ko teia papetitoanga​—te papetitoia anga ki te vaerua tapu​—ko ta Iehova i rave, i te ra o te Penetekote e i muri ake, i tona ikianga i te aronga tataki tai kia riro mai ei aronga tuanga e Karaiti. (Roma 8:​15-17) Akapeea ra te papetitoanga ki te vai i te ingoa o te vaerua tapu, tetai mea e rave putuputuia ana i ko i te au akaputuputuanga e te au uruoaanga o te iti tangata o Iehova i to tatou tuatau?

³ Ko te papetitoanga ki te vai, e takainga te reira e rave ana te au Kerititiano mou ei akatutu i to ratou akatapuanga arai koreia ki te Atua, ko Iehova. Mei te reira katoa te aronga tei rauka ia ratou te kapikianga no te rangi. Tera ra, ko te papetitoanga ki te vai, e takainga tei anoanoia no te au mirioni ua atu tane e te vaine i teia tuatau, e manakonakoanga to ratou i teianei kia ora e tuatau ua atu i runga i te enua. Noatu ra e eaa te manakonakoanga o te tangata, ko te papetitoanga ki te vai i te ingoa o te Metua, e no te Tamaiti, e no te vaerua tapu e takainga e anoanoia ra no tetai kia rave kia rauka i te Atua i te ariki mai iaia. No reira, ko te au Kerititiano pouroa tei papetitoia na roto i teia mataara, te tapapaia ra kia ‘akono tamou i ta te vaerua.’ (E tatau ia Galatia 5:16.) Te akono ra ainei koe i ta te vaerua e, te akatupu ra i toou akatapu anga?

Te Aiteanga o te Tuatua “E Akono i ta te Vaerua”

4. Eaa te aiteanga tikai no te ‘akono i ta te vaerua’?

⁴ Ei ‘akono i ta te vaerua’ te o maira te arikianga i te angaanga a te vaerua tapu ki rungao ia koe, te arikianga i te vaerua tapu kia akakeu ia koe. Penei, ka karanga koe e ko te aiteanga koia oki kia akaaereia e te vaerua tapu i roto i taau au angaanga i te au ra. Te oronga maira a Galatia pene 5 i te tuke i rotopu i te riroanga i raro ake i te akakeu anga o te vaerua tapu e te akakeu anga o te kopapa.​—E tatau ia Galatia 5:​17, 18.

5. Te riro mai anga i raro ake i te akakeu anga o te vaerua tapu, te o maira te kopaeanga i teea au angaanga?

⁵ Me tei raro ake koe i te akakeu anga o te vaerua tapu, te inangaro ra koe i te kopae atu i te au angaanga o te kopapa. Te kapitiia maira ki taua au mea ra “te moeaana, te akaturi, te tuatua viivii ra, e te kanga, Te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake, Te vareae, te ta tangata, te konā kava, te kariei.” (Gala. 5:​19-21) Tera te tu, te ‘tamate ra koe i ta te kopapa i te vaerua.’ (Roma 8:5, 13) Na te reira e tauturu ia koe kia tamou i toou manako ki runga i te au mea o te vaerua e te aru rotai anga ki to te reira au aratakianga, i to te tuku ua anga ia koe uaorai kia akatereia e te au anoano o te kopapa.

6. Akatutu mai i te mea e anoanoia ra e rauka ai i te akaari i te ua o te vaerua.

⁶ I te vaerua tapu e angaanga ra ki runga ia koe, te akaari ra koe i te au tu o te Atua, ‘ta te vaerua e akatupu ra.’ (Gala. 5:​22, 23) Kua kite ra koe e, ka anoanoia koe kia tauta pakari. Ei akatutuanga: Te tatanu ra te tangata pama i tona enua. E tika, ka anoanoia te ra e te vai; me kare e ra e te vai, kare aia e rauka i te tapapa i tetai mou. Penei e akaaite atu tatou i te vaerua tapu ki te ra. Te anoanoia ra te vaerua tapu no tatou kia akaari i te ua o te vaerua. Inara, eaa te  ka tupu me kare te tangata pama e angaanga pakari? (Mase. 10:⁠4) Ae, te tu i tatanu ei koe i te one o toou ngakau, ka akatuke i te tu e te maata o te ua o te vaerua tapu i roto ia koe. No reira, e ui kia koe uaorai e, ‘Te akatika ra ainei au i te vaerua tapu kia akatupu i tona ua na te angaanga kapiti atu anga ki te reira?’

7. Eaa ra i puapinga ai te apii e te akamanako anga oonu me te inangaro ra koe i te tatanu i te ua o te vaerua tapu?

⁷ E rauka ai tetai mou meitaki, ka anoano katoaia te au tangata pama kia pipi i ta ratou kai tanu ki te vai. Kia rauka i te tatanu i te ua o te vaerua, ka anoano koe i te au vai o te tuatua mou e kitea ra i roto i te Pipiria e te na roto maira i te putuputuanga Kerititiano i teia tuatau. (Isa. 55:⁠1) Penei kua akakite ana koe ki te manganui o te tangata e ko te au Tuatua Tapu kua akauruia mai te reira e te vaerua tapu. (2 Timo. 3:16) Pera katoa, te oronga maira te tavini akono meitaki e te pakari i te marama maata e umuumuia ra no runga i te au vai ma o te tuatua mou Pipiria. (Mata. 24:​45-47) Te taka ua ra te akakiteanga. E rauka ai kia riro tatou ki raro ake i te akakeu anga o te vaerua tapu, ka anoanoia tatou kia tatau e kia akamanako oonu ki runga i te Tuatua a te Atua. Me te rave ra koe i te reira, te aru ra koe i te au akaraanga meitaki o te au peroveta tei “uiui, e kua kimi pu tikai” i te au tuatua tei orongaia atu. E mea umere e kua akaari katoa te au angera i te inangaro oonu no te au tuatua mou pae vaerua no runga i te Uanga tei taputouia e te putuputuanga Kerititiano tei akatainuia.​—E tatau ia 1 Petero 1:​10-12.

Akakeuia e te Vaerua​—Akapeea Ra?

8. Eaa ra i puapinga ai kia koe kia pati kia Iehova no tona vaerua?

⁸ Kare mei te mea ua e kia apii i te au Tuatua Tapu e kia akamanako oonu i te reira. Ka anoanoia koe kia pati ua rai i te tauturu a Iehova e tana aratakianga. Ka rauka iaia ‘i te rave kia maata ua atu te au mea katoa ta tatou e pati nei, e ta tatou e manako nei.’ (Ephe. 3:20; Luka 11:13) Ka akapeea ra koe me pau atu i tetai tangata e ui maira e, “Eaa ra au ka pati ua atu ei me kua kite takere te Atua ‘i te au mea e tau iaku, ou au i pati atu ei’?” (Mata. 6:⁠8) Tetai tumu, koia oki, me pure koe no te vaerua tapu, te akakite ra koe i toou irinaki ia Iehova. Ei akaraanga, me aere mai tetai tangata kia koe no te tauturu, ka rave koe i taau ka rauka i te rave i te tauturu atu iaia, te tumu, no te mea kua pati mai aia i taau tauturu, i te akaarianga e te irinaki ra aia ia koe. (E akaaite ia Maseli 3:27.) Mei te reira rai a Iehova, te mareka ra aia ia koe e pati ra i tona vaerua, e ka oronga rai aia i te reira kia koe.​—Mase. 15:⁠8.

9. Akapeea te tae anga ki te au uipaanga Kerititiano i te tauturu anga ia koe kia riro mai ki raro ake i te akakeu anga o te vaerua o te Atua?

⁹ Ka rauka ia koe i te ariki rekareka e ko tetai mataara ke kia riro mai i raro ake i te akakeu anga o te vaerua o te Atua, te o maira ta tatou au uipaanga, te au akaputuputu anga, e te au uruoaanga. E mea puapinga tikai i te tauta kia tae e kia aru i te porokaramu. Na te raveanga i te reira e tauturu ia koe i te marama i “te au mea oonu rai o te Atua.” (1 Kori. 2:10) E au akameitaki anga katoa tetai me pau putuputu. E akamanako i te au uipaanga i aere ei koe i te au epetoma e a i topa. Eia taime ia koe te tuku anga i toou rima ki runga, ei pau, i te akakite i toou akarongo? Te kite ra ainei koe i tetai au ngai ka anoanoia koe kia akatikatika? Me koia ia, e akapapu e eaa taau ka rave i te au epetoma ki mua. Ka kite a Iehova i toou tu puareinga ua me piri atu koe ki roto i te au uipaanga, e ka oronga mai  aia i tona vaerua tapu, te ka tauturu ia koe kia maata atu taau ka rauka mai.

10. Te akonoanga i ta te vaerua, te o maira i te orongaanga i teea pati anga ki etai atu?

¹⁰ Te akonoanga i ta te vaerua, te kapiti maira i te pau atu anga i te pati anga ta tatou e tatau ra ia Apokalupo 22:17 e: ‘Te tuatua nei te vaerua ma te vaine akaipoipo ou ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.’ Ko te vaerua, e angaanga ra na roto i te pupu akaipoipo tei akatainuia, te oronga atu nei i teia pati anga no runga i te vai ora. Me kua ariki koe i te kapiki anga e “aere mai!” kua papu ainei ia koe i te karanga e, “Aere mai!”? E tikaanga ngateitei tikai i te kapiti atu ki roto i teia angaanga akaora anga!

11, 12. Akapeea te vaerua tapu i te o mai anga ki roto i te angaanga tutu aere?

¹¹ Te akatupuia nei teia angaanga puapinga tikai i raro ake i te arataki anga o te vaerua tapu. Kua tatau tatou e i akapeea te vaerua tapu i te anere mataiti mua i te akatueraanga i te au ngai ou no te au mitinari. Ko te apotetoro ko Paulo e tona au oa kua ‘tāpuia iora e te vaerua tapu, auraka e tuatua aere i te tuatua i Asia’; e kare katoa ratou i akatikaia kia tomo ki roto ia Bitunia. Kare tatou i kite tikai e i akapeea te vaerua i te arai anga ia ratou i te aere atu ki roto i taua au ngai ra, tera ra te taka ua ra e kua taki atu te vaerua ia Paulo ki roto i te au ngai maata o Europa. Kua kite aia i tetai orama no tetai tangata Makedonia e pati akatenga ra no te tauturu.​—Anga. 16:​6-10.

¹² I teia tuatau, te pera nei rai te vaerua o Iehova i te aratakianga i te angaanga tutu aere i te ao katoa nei. Kare te au orama temeio e taangaangaia ana kia arataki; inara, te arataki ra a Iehova i te aronga akatainuia, na roto i tona vaerua tapu. E na te vaerua e akakeu ana i te au taeake e te au tuaine kia rave i te ka rauka ia ratou i roto i te tutu aere anga e te apiianga. Kare ekoko e kua piri ana koe ki roto i teia angaanga puapinga tikai. Ka rauka ainei ia koe i te akamaata mai i toou rekareka i roto i teia angaanga mataora?

13. Ka akapeea koe me kauraro atu ki te arataki anga a te vaerua tapu? Akatutu mai.

¹³ Ka rauka ia koe i te kauraro atu ki te arataki anga a te vaerua tapu na te taangaanga anga i te au tuatua akakite tei orongaia mai no te iti tangata o te Atua. E akamanako ana i te mapu ko Mihoko no Tiapani mai. Ei painia ou ua, kua manako aia e kare aia i tukatau roa ana i te akono i te au atoro akaou anga; kua manako aia e kare aia i kite e ka akapeea me tuatua i roto i te tu kia inangaro mai te tangata ngutuare. Mei te reira taime aere, kua orongaia mai te au akakiteanga tau i roto i Ta Tatou Angaanga Patireia e ka akapeea me akono i te au atoro akaou anga poto ua. E oti i reira kua neneiia te poroutia A Satisfying Life​—How to Attain It. Kua riro te reira ei mea puapinga tikai i roto i te angaanga orometua i Tiapani. Kua taangaanga a Mihoko i te au akakiteanga e ka akapeea me taangaanga i te poroutia, e ka akapeea me akono tikai i te au atoro akaou anga poto ua. Kare i roa ana kua akamata aia i te au apii Pipiria ki te aronga penei, i te taime mua kua patoi mai i te apii. Kua akakite mai aia e, “E maata tikai taku apii​—mei te 12 tetai taime, i te taime okotai⁠—​e kua pati au ki tetai pae kia tiaki ua, ka apii rai au ia ratou!” E tika rai, me akono koe i ta te vaerua, te taangaanga anga i te arataki anga e orongaia ra ki te au tavini o Iehova, e maata taau ka kokoti.

 Irinaki i te Vaerua o te Atua

14, 15. (a) Akapeea ra e rauka ai i te tangata apa ua nei i te akatupu i to ratou akatapu anga? (e) Akapeea koe me kimi i te au oa meitaki?

¹⁴ Ei orometua akataoongaia, e angaanga orometua taau ka rave. (Roma 10:14) Penei kare koe manako ana e kua tau tikai koe i te rave i taua apainga ra. Inara, mei te turanga rai o te aronga akatainuia, no ko mai i te Atua toou tikaanga. (E tatau ia 2 Korinetia 3:5.) Ka rauka rai ia koe i te akatupu i toou akatapu anga, na te rave anga i te ka rauka ia koe i te rave, e kia irinaki ki runga i te vaerua o te Atua.

¹⁵ E tika, kare i te mea mama ua kia tatou te aronga apa ua nei, i te akatupu i to tatou akatapu anga ki to tatou Atua apa kore, ko Iehova. Tetai manamanata, koia oki, tetai aronga taau i kapiti ana i te taime mua, penei te umere ra i toou tu ou e penei ka ‘akakino ia koe.’ (1 Pete. 4:⁠4) Inara, eiaa e ngaropoina e kua akatupu koe i te au pirianga oa ou, te pirianga oa mou tikai koia oki kia Iehova e kia Iesu Karaiti. (E tatau ia Iakobo 2:​21-23.) E mea puapinga katoa rai kia kite i te au taeake e te au tuaine i roto i taau putuputuanga, ko tetai tuanga o “te kapiti anga katoa o te au taeake” i roto i teianei ao. (1 Pete. 2:17, NW; Mase. 17:17) Na roto i tona vaerua ka tauturu a Iehova ia koe kia rauka toou au oa te ka riro ua rai ei akakeu anga meitaki kia koe.

16. Eaa ra koe, mei ia Paulo rai, ka ‘rekareka ai i te paruparu’?

¹⁶ Noatu e e au oa toou i roto i te putuputuanga ei tauturu ia koe, penei ka kite rai koe i te tu ngata i te akono i te au akaaoanga i te au ra. Taau ka akono atu penei i tetai taime ka ngaro koe, mei te mea rai e tei roto koe i tetai ana roangarere, ki i te au manamanata. Ko te tuatau tikai te reira noou kia uri kia Iehova, i te patianga i tona vaerua tapu. “Kia paruparu oki au ra,” i tata ai te apotetoro ko Paulo, “te maroiroi ra au i reira.” (E tatau ia 2 Korinetia 4:​7-10; 12:10.) Kua kite a Paulo e ka rauka i te vaerua o te Atua i te akaiti mai i te tu paruparu o te tangata nei, noatu eaa to ratou tu. No reira, ka rauka i te mana ririnui o te Atua i te akamaroiroi ia koe me kite koe i te tu paruparu e te inangaro ra i te tauturu. Kua tata a Paulo e ‘e mea rekareka kiaia te paruparu.’ Te tuatau e paruparu ra aia, i kite ei aia i te vaerua tapu i te angaanga anga ki runga iaia. Ka rauka rai ia koe i te kite i taua tu ra!​—Roma 15:⁠13.

17. Ka akapeea te vaerua tapu i te tauturu anga ia koe, ia koe e aere ra ki te ngai i akakoroia e koe?

¹⁷ Ka anoano tatou i te vaerua o te Atua e rauka ai ia tatou tetai oraanga akatapuia kiaia. E akamanako ana e ko koe tetai rangatira pai. Toou akakoroanga koia oki, kia tavini ia Iehova e tuatau ua atu. Kua aite rai te vaerua tapu mei te matangi te ka anoanoia e koe, kia taeria te ngai i akakoroia e koe ma te meitaki e te au. Kare koe inangaro kia papanu aereia e te vaerua o teia ao o Satani. (1 Kori. 2:12) E akataka koe e ko teea te matangi meitaki e kia aru i te reira. Ko te vaerua tapu oki te reira. Na roto i te Tuatua a te Atua e tana akaaerenga tei aratakiia e te vaerua, ka rauka i te vaerua tapu i te akakeu ia koe kia aru i te mataara tika.

18. Eaa toou akakoroanga i teianei, e no teaa ra?

¹⁸ Me te apii ra koe ki te Au Kite o Iehova, te rekareka ra i te pirianga pae vaerua e ratou, inara kare koe i rave ake i te au takainga puapinga o te akatapu anga e te papetito, e ui kia koe uaorai e, ‘Eaa ra au ka emiemi ei?’ Me te kite ra koe i te angaanga a te vaerua tapu i te akatupuanga i te anoano o Iehova i teia tuatau, e te ariki ra koe i te reira angaanga, e rave i te au takainga taau i kite e ko te mea tika. Ka akameitaki tikai a Iehova ia koe. Ka oronga ua mai aia i tona vaerua tapu kia koe. Me kua roa koe i te papetitoia anga, e mea papu e kua kite koe i te akakeu anga o te vaerua tapu. Kua kite mata koe, e kua kite e, i akapeea te Atua i te akamaroiroi anga ia koe ki tona vaerua. Kia tupu ua rai te reira tu​—ae, e tae roa atu ki te tuatau mutu kore. No reira, e akakoro tikai kia akono tamou i ta te vaerua tapu.

Maara Ainei ia Koe?

• Eaa te aiteanga kia ‘akono i ta te vaerua’?

• Eaa te ka tauturu ia koe kia ‘akono tamou i ta te vaerua’?

• Ka akapeea koe me akatupu i toou akatapu anga?

[Au Uianga Apii]

[Tutu i te kapi 15]

Te tatanuanga i te one o toou ngakau,ka anoanoia kia tauta pakari

[Tutu i te kapi 17]

Te akakeuia ra ainei koe e te vaerua o te Atua?