Te Akatika ra Koe ia Iehova kia Uiui ia Koe?

E ANERE ua atu au uianga i roto i te Pipiria te tauturu ra i tetai kia akamanako oonu eaa to roto i tona ngakau. Ko te tikaanga, te taangaanga ra te Atua ko Iehova i te au uianga i te apii i te au tuatua mou puapinga. Ei akaraanga, e maata te au uianga ta Iehova i taangaanga i te akamatakite anga ia Kaina kia akatikatika i tona turanga kino. (Gene. 4:6, 7) I tetai au taime, ka rava ua e tai uianga no ko mai ia Iehova ei akakeu i tetai tangata kia rave tau i tetai angaanga. I te akarongo anga i ta Iehova e ui ra: “Koai taku e tono? koai te ka aere no tatou?” kua pau mai te peroveta ko Isaia e: “I na, teia au; ko au taau e tono.”​—Isa. 6:8.

Kua taangaanga meitaki katoa te Puapii Maata ko Iesu i te au uianga. Kua rekoti mai te au Evangeria e 280 tuma au uianga a Iesu. Noatu e kua taangaanga aia i te au uianga i tetai atianga i te akamuteki i tona aronga akaapa, te maataanga o te taime, tona akakoroanga ko te itae anga i te ngakau o te aronga e akarongo maira, te akakeu anga ia ratou kia akamanako i to ratou uaorai turanga pae vaerua. (Mata. 22:41-46; Ioa. 14:9, 10) Pera katoa, kua taangaanga te apotetoro ko Paulo, tei tata e 14 puka o te au Tuatua Tapu Ereni Kerititiano i te au uianga ma te akakeuanga. (Roma 10:13-15) Ei akatauanga, e manganui te au uianga tei roto i tana reta ki to Roma. Kua akakeu ta Paulo au uianga i tana aronga tatau kia ariki rekareka i “te oonu o te apinga nui o te pakari e te kite i te Atua.”​—Roma 11:33.

Noatu e ka akakeu tetai au uianga i tetai pauanga, te riro ra tetai pae ei akakeu anga i tetai kia akamanako oonu. Kua rekoti mai te au Evangeria i ta Iesu taangaanga maataanga i te rua o te manako i runga akenei. I tetai atianga, kua akamatakite a Iesu i tana au pipi e: “E matakite oki i te akaopue a te au Pharisea, e te akaopue a Heroda,” koia oki ta ratou au apiianga akavare e te pikikaa. (Mare. 8:15; Mata. 16:12) Kare te au pipi a Iesu i marama ana i te manako, e kua akamata ratou i te taumaro te ngaropoina anga ia ratou i te apai mai i te kai. E akara ana i te taangaanga anga a Iesu i te au uianga i roto i te pukapuka anga poto ua tei tupu mai. “Kua na ko atura aia kia ratou, Eaa kotou e akaeatu ei, i te mea kare a kotou kai? te vai ua na to kotou manako kore e te akono kore? e te vai poiri ua nei rai to kotou ngakau? E mata to kotou, kare e tika kia akara? e taringa oki, e kare e tau kia akarongo? . . . Eaa kotou i kore ei i kite?” Te tauturu ra ta Iesu au uianga ia ratou kia akamanako, i te akakeu anga i tana au pipi kia akamanako i te aiteanga tikai o tana au tuatua.​—Mare. 8:16-21.

“E Ui Ana oki Au ia Koe”

Kua taangaanga te Atua ko Iehova i te au uianga ei akatikatika i te manako o tona tavini ko Iobu. Na roto i te au uianga e manganui, kua apii a Iehova ia Iobu no runga i tona tu puapinga kore ei akaaite anga ki Tei Anga mai iaia. (Iobu, pene 38-41) Te tapapa atura ainei a Iehova i tetai pauanga ki taua au uianga tataki tai ra? Kare. Te akakeu ra taua uianga ra i to Iobu manako e te manako ngakau, mei teia rai e, “Iea koe iaku i akatumu i te enua nei?” I muri ake i tetai o taua au uiui anga pakari ra, kare a Iobu i kite e eaa tana ka tuatua mai. Kua tuatua ua ra aia e: “E akapeea atu au ia koe? E tapoki ana au i toku vaa ki toku rima.” (Iobu 38:4; 40:4) Kua marama a Iobu e kua taakaaka iaia uaorai. Inara, kare a Iehova e apii ua ra ia Iobu kia akaaka. Kua akatikatika katoaia to Iobu manako. Na roto i teea tu?

Noatu e “e tangata apa kore e te tiratiratu” a Iobu, e akaari mai ana tana au tuatua i tetai au taime i tona manako tarevake, ta Eliu i kite atu i tona akoanga ia Iobu no te ‘akatika anga iaia uaorai kare te Atua.’ (Iobu 1:8; 32:2; 33:8-12) No reira, kua akatikatika katoa ta Iehova au uianga i to Iobu manako. Te tuatua anga kia Iobu na roto i tetai puaioio, kua tuatua te Atua e:  “Koai teia e akapoiri i te ako, i te tuatua anake ra kare i kite ra? Ka tatua ana i to taukupu e akatangata tikai; e ui ana oki au ia koe, e naau e akakite mai iaku.” (Iobu 38:​1-3) Na roto i te au uianga, kua arataki atu i reira a Iehova i te manako ki tona pakari e te mana kotinga koreia tei akaariia mai na roto i tana au angaanga umere. Kua tauturu teia akamarama anga ia Iobu kia irinaki ki runga i ta Iehova akavaanga e te tu e rave ra aia i te au mea kare rava i tupu ana i mua ana. E tupuanga umere tikai teia no Iobu​—kia uiuiia e te Atua Mana Katoatoa!

Tuku ia Iehova kia Uiui Mai ia Tatou

Akapeea ra tatou? Ka puapinga katoa ainei tatou mei te au uianga tei rekotiia i roto i te Pipiria? Ae, ka puapingaia tatou! I te akatika anga i taua au uianga ra ia tatou kia tapu e kia akamanako, ka oronga mai te reira i te au akameitakianga maata kia tatou i te pae vaerua. Ko te au uianga ririnui i roto i te Tuatua a te Atua te akakeu ra i te tu meitaki tikai. E tika rai, “te tuatua a te Atua . . . te akakeu ra i te ririnui . . . e ka rauka i te makitoro marie i te au manako e te au inangaro o te ngakau.” (Ebe. 4:12, NW) Inara, kia puapinga maataia tatou, ka anoanoia tatou kia ui kia tatou uaorai taua au uianga ra, mei te mea rai e te uiui tikai maira a Iehova ia tatou. (Roma 15:⁠4) Ka akamanako ana tatou i tetai au akaraanga.

“Kare ainei e mea tika ta te Akava i to te ao katoa nei e rave?” (Gene. 18:25) Kua ui a Aberahama i teia uianga akamanako anga kia Iehova i te tuatau e akava ra te Atua ia Sodoma e Gomora. Kua manako a Aberahama e kare e tau ana e ka rave tika kore a Iehova i te reira​—te tamate anga i te aronga tuatua tika ma te aronga kino. Te akaari maira ta Aberahama uianga i tona akarongo pakari ki roto i ta Iehova tuatua tika.

I teia tuatau, penei ka tamanako ua tetai pae i te au mea no runga i ta Iehova akavaanga no te tuatau ki mua, mei teia rai e koai ma tikai te ka ora mai mei ia Aramakito me kore koai ma te ka akatuakaouia mai. Eiaa e akatika i taua au manako ra kia tamanamanata ia tatou, kia akamaara ra tatou i ta Aberahama uianga. Te kite anga e ko Iehova te Metua takinga aroa i te rangi e te irinaki pu tikai anga ki tana tuatua tau e te tu akaaroa mei ia Aberahama rai, kare tatou e kaimoumou i te taime e te maroiroi no runga i te au manamanata anoano koreia, te manako ekoko, e te taumaro puapinga kore ua.

“Koai oki to kotou, e tika kia akaroa atu i tona tu, kia apiapi aia, e okotai ake kubiti?” (Mata. 6:27) Te tuatua anga ki te urupu maata kapiti mai tana au pipi, kua taangaanga a Iesu i teia uianga i te akataka anga i to ratou anoano kia tuku ia ratou uaorai ki roto i te nga rima aroa o Iehova. Te tuatau openga o teia akatereanga kino o te au mea nei te akatupu ra i te au tu apiapi e manganui, e ko te akamanako ua anga i te reira kare e akaroa atu i to tatou oraanga me kore e akameitaki atu i te tu o te oraanga.

 Me apiapi tatou no runga ia tatou uaorai me kore i to tatou aronga akaperepere, ko te akamaara ua anga kia tatou uaorai i ta Iesu uianga, ka tauturu te reira ia tatou kia akamanako tau i to tatou au tu apiapi. Ka tauturu te reira i te akakore atu i te manamanata e te au manako papu kore te ka akapou i to tatou maroiroi i te pae manako, te pae manako ngakau, e te pae kopapa. Mei ta Iesu i akapapu mai kia tatou e, te kite pu tikai maira to tatou Metua i te rangi, tei angai i te au manu o te reva e te akamanea i te rakau rikiriki o te enua, i ta tatou e anoano nei.​—Mata. 6:26-34.

“E tika ainei i te tangata kia tuku i te ai ki roto i tona umauma, e kare ainei e ka tona kakau?” (Mase. 6:27) I roto i te au pene mua e iva o Maseli, te kapiti maira te au akoanga poto ua a tetai metua tane e oronga ra i te pakari tau ki tana tamaiti. Te uianga tei taikuia i runga akenei te akakite maira i te au tupuanga kino no te akaturi. (Mase. 6:29) Me kite ake tatou ia tatou e akameamea tau kore ra me kore te manako ra i te anoano ainga tarevake, kia riro teia uianga ei akamatakite anga ia tatou. Kia tau ki teia kaveinga, ka rauka i te ui i teia uianga me timataia tetai tangata kia aru i te mataara tau kore. Te akataka meitaki tikai maira te kaveinga tau o te Pipiria e: ‘Ka kokoti koe i taau e ruru ra’!​—Gala. 6:7.

“Koai oki koe na, ka akaapa atu ei i to tetai ke ra tavini?” (Roma 14:4) I roto i tana reta ki to Roma, kua uriuri a Paulo i te au manamanata tei tupu mai i roto i te putuputuanga o te anere mataiti mua. Ko tetai au Kerititiano, no roto mai i te au turanga peu tukeke, te akaapa ra i te au ikianga e te au angaanga a to ratou au taeake irinaki. Kua riro ta Paulo uianga ei akamaara anga kia ratou e kia ariki mai i tetai e tetai e kia akaruke i te akavaanga ki roto i te nga rima o Iehova.

Pera katoa i teia tuatau, no roto mai te iti tangata o Iehova i te au tu oraanga tukeke. Inara, kua taokotai akaperepere mai a Iehova ia tatou katoatoa. Te turuturu ra ainei tatou i taua taokotaianga ra? Me ka viviki tatou i te akaapa i te ikianga ta tetai taeake ka rave, e meitaki tikai kia ui tatou kia tatou uaorai i ta Paulo uianga i runga akenei!

Au Uianga ka Akavaitata Atu ia Tatou kia Iehova

Te akaari maira teia au akaraanga e akapeea te au uianga i roto i te Tuatua a te Atua i te akakeu anga i tetai tangata kia makitoro marie iaia uaorai. Te akamanako anga i te aerenga tuatua o te uianga tataki tai, ka tauturu ia tatou kia taangaanga tau i te reira i roto i to tatou uaorai au turanga. E ia tatou e tatau ra i te Pipiria, ka kite tatou i te au uianga puapinga ke atu.​—Akara i te pia i te kapi 14.

Te akatika anga i te au uianga ririnui tei kiteaia i roto i te Tuatua a te Atua kia akakeu oonu ia tatou, ka tauturu ia tatou kia akarotai i to tatou manako e te ngakau ki te au mataara tuatua tikai a Iehova. I muri ake te uianga a Iehova kiaia, kua akapapu mai a Iobu e: “I kite akenei au ia koe i te kite taringa nei; i teianei ra, te akara nei taku mata ia koe.” (Iobu 42:5) Ae, kua riro a Iehova ei peretana tika tikai kia Iobu, mei te mea rai e tei mua tikai Aia i tona nga mata. Kua akakite mai te pipi ko Iakobo i muri mai i teia manako e: “E akavaitata atu ki te Atua, e nana e akavaitata mai kia kotou na.” (Iako. 4:8) E akatika tatou i te au tuanga ravarai o te Tuatua a te Atua, kapiti mai ta te reira au uianga, i te tauturu ia tatou kia tupu i te pae vaerua e kia “akara” meitaki tikai ia Iehova!

[Pia i te kapi 14]

Akapeea koe te ui anga i teia au uianga ei tauturu ia koe kia aru i to Iehova manako no teia au mea?

▪ “Tei te atinga karakaratio e te atinga ta Iehova i pingapingareka, mei tei te akarongo i te tuatua a Iehova ra?”​—1 Samu. 15:22.

▪ “Kare ainei tei anga i te mata nei e akara?”​—Sala. 94:9.

▪ “Te kimi i tona uaorai kakā, kare ïa i te kakā”?​—Mase. 25:27.

▪ “Kua tika ainei toou riri?”​—Iona 4:⁠4.

▪ “Eaa ta te tangata puapinga, kia rauka iaia to teianei ao katoatoa, e riro atura tona vaerua?”​—Mata. 16:26.

▪ “Na te aa tatou e akataka ke atu i te aroa o te Mesia ra?”​—Roma 8:35.

▪ “Eaa taau kare te mea i rauka ia etai ke ra?”​—1 Kori. 4:7.

▪ “Eaa to te mārama tau anga i te poiri?”​—2 Kori. 6:14.

[Tutu i te kapi 15]

Eaa ta Iobu i kite mai mei ta Iehova au uianga?