Akakoromaki i te Tu Pikikaa o te Tokorua

KUA tavini ana a Margarita raua ko tana tane, ko Raúl, ia Iehova ei nga orometua tamou no tetai au mataiti. * Inara i muri ake i te anau mai anga ta raua tamaiti mua, kua paruparu to Raúl pirianga kia Iehova. Kua rave iora a Raúl i te ainga tau kore e kua akaateaia mai mei te putuputuanga Kerititiano. “Te tupu mai anga teia au mea nei,” i tuatua ai a Margarita, “kua manako au e ka mate au. Mamae tikai toku ngakau, kare au i kite e eaa taku ka rave.”

I muri ua ake te akaipoipoanga a Jane, kua pikikaa tana tane iaia na roto i tetai ravenga ke mai. Kua akamata aia i te takinokino iaia. “Te taime mua i moto mai ei aia iaku,” i karanga ai a Jane, “kua poitirere au, kua taakamaia, e kua taakaakaia. Ko tei riro mai ei peu matau, e pati akatenga ua mai ana aia kia akakore au i tana i rave. Kua manako mai au e e apainga Kerititiano naku kia akakore ua atu e kia akangaropoina atu i te reira. Kua manako katoa au e e tu tiratiratu kore i te akakite i to maua manamanata ki tetai ke​—pera katoa ki te aronga pakari i roto i ta maua putuputuanga. Kua riro mai teia tu takinokino e te akakore anga i tana i rave ei peu matau i te au mataiti ravarai. I te au taime ravarai, kua manako mai au e e apinga ke atu tetai te ka rauka iaku i te rave kia inangaro mai taku tane iaku. I tona akaruke anga iaku e ta maua tamaine, kua manako mai au e kare oku puapinga, e naringa e kua rave au e kua tuatua i tetai au mea meitaki no te akatinamou anga i to maua akaipoipo.”

 Mei ia Margarita rai raua ko Jane, penei te mamae ra koe i te pae manako ngakau, i te pae moni, e te taitaia ra i te pae vaerua no te mea kua pikikaaia koe e taau tane. Penei e tane koe te mamae ngakau ra e te tupu ra te turanga ngata no te mea kare taau vaine i vai tiratiratu ana. Papu e te noo nei tatou i roto ‘i te tuatau te tupu nei te kino maata,’ mei ta te Pipiria rai i totou mai. Te akakite maira teia totou e i te “tuatau openga ra,” ka takinoia te pirianga ngutuare, ka kore takiri te aroa natura i roto i te au turanga ravarai. Ka pikikaa tetai pae no ta ratou e tuatua ra e te tavini ra ratou i te Atua. (2 Timo. 3:1-5) Ka tupu katoa teia au manamanata ki te au Kerititiano mou; no reira, eaa te ka tauturu ia koe kia akakoromaki ua me pikikaaia koe?

Akara ia Koe Mei ta Iehova e Akara Maira

I te akamataanga, ka ngata ia koe i te irinaki e ka tamamae kino mai te tangata taau e inangaro ra ia koe. Penei ka akamata koe i te akaapa ia koe uaorai no tana ara i rave.

Inara, e akamaara e, kua pikikaa katoaia te tangata apa kore ko Iesu e tetai tangata tana i irinaki ana e i inangaro ana. Kua iki a Iesu, i tona au oa piri vaitata, te au apotetoro, i muri ake i te akamanako anga na roto i te pure. Ko ratou katoatoa e 12 e au tavini irinakiia no Iehova. No reira, papu e kua mii tikai a Iesu te ‘riro mai anga a Iuda ei pikikaa.’ (Luka 6:12-16) Inara, kare a Iehova i akaapa ana ia Iesu no ta Iuda i rave.

E tika rai, e aronga apa ua te au tokorua akaipoipo. E rave ana te nga tokorua i te tarevake. Kua tata tika tikai mai tetai tata taramo akauruia e: “Naringa koe, e Iehova, e akairo ana i te au ara nei, e te Atu, koai te ka mou?” (Sala. 130:3) I te aru anga ia Iehova, e tauta te nga tokorua i te akakore atu i te tu apa o tetai e tetai.​—1 Pete. 4:8.

Inara, “ka ope takiri rava tatou i te aaki i te tuatua iaia uaorai i te Atua ra.” (Roma 14:12) Me rave ua rai tetai tokorua akaipoipo i te tuatua akakino me kore te au angaanga kino, e tutaki anga ta te tokorua apa kia Iehova. Te akaapa ra a Iehova i te tu kino e te tuatua akakino, no reira kare e tumuanga tau kia akakino atu i tetai tokorua ma te inangaro kore e te akangateitei kore. (Sala. 11:5; Ephe. 5:33; Kolo. 3:6-8) Ko te tikaanga, me riri putuputu tetai Kerititiano e kare e tataraapa ana e kare e taui ana, ka akaateaia aia mei te putuputuanga Kerititiano. (Gala. 5:19-21; 2 Ioa. 9, 10) Kare te tokorua akaipoipo e manako kinokino no te ripoti anga i taua tu tau kore ra ki te aronga pakari. E tika rai, te tangi aroa maira a Iehova i te aronga e takinokinoia ra no taua ravenga kino ra.

Me akaturi tetai tokorua, kare aia i ara ua ki tona tokorua te ara katoa ra aia kia Iehova. (Mata. 19:4-9; Ebe. 13:4) Me kua tauta ana te tokorua mako ua i te aru i te au kaveinga Pipiria, kare aia e manako kinokino no runga i te ara pikikaa a te tokorua akaturi ra.

Kia maara ra e kua kite a Iehova e eaa toou manako. Te akataka maira aia iaia uaorai ei pu tane no te iti tangata o Iseraela, e tei roto i tana Tuatua te au irava akakeu anga te akakite maira i tona mii no te au angaanga akaturi i te pae vaerua a taua iti tangata ra. (Isa. 54:5, 6; Iere. 3:1, 6-10) Kia papu e te kite meitaki maira a Iehova i toou roi mata e tae ua ra me kua pikikaaia koe e toou tokorua akaipoipo. (Mala. 2:13, 14) Te kite maira aia i toou anoano no te akapumaana e te akamaroiroianga.

Oronga Mai a Iehova i te Akapumaana

Ko tetai au mataara e oronga mai ana a Iehova i te akapumaana koia oki, na roto i te putuputuanga Kerititiano. Kua rauka ia Jane taua turuturu anga ra. “Tano tikai te taime i atoro mai ei te akaaere kotinga ki te tuatau te maromaroa tikai ra au,” i maara ai ia Jane. “Kua kite aia i toku taitaia maata te tuku mai anga taku tane i te pepa kopaeanga. Kua akapou aia i te taime i te tauturu iaku kia akamanako i taua au irava ra i roto ia 1 Korinetia 7:15. Kua tauturu mai te au irava Pipiria e tana au tuatua takinga meitaki i te akamaru mai i toku manako kinokino e kua oronga mai i te manako au kiaku.” *

Kua kite katoa mai a Margarita, tei taikuia i  mua akenei, e te oronga maira a Iehova i te tauturu tau na roto i te putuputuanga Kerititiano. “I toku kite anga e kare taku tane i tataraara,” i karanga ai a Margarita, “kua apai au i ta maua tamariki e kua neke atu ki tetai oire ke. Te tae atu anga matou, kua rauka mai iaku i te tarau e rua nga pia moe. I tera mai ra, maromaroa maata tikai au, e iaku e akapae maira i te au apinga i roto i te kiri i topapaia mai ei te ngutupa. Manako mai au e ko te vaine nona te are, e noo maira i te pae mai. Ma te umere tikai ko te tuaine tei apii ana i te Pipiria ki toku metua vaine e tei tauturu ana i toku ngutuare kia kite mai i te tuatua mou. Kare aia i manako ana e ka aravei aia iaku i roto i teia are no te mea te aere maira aia i te apii i te Pipiria ki te vaine nona te are. Maru tikai toku ngakau​—kare i rauka iaku i te akakoromaki i toku manako ngakau mamae. Kua akamarama atu au i toku turanga, e kua aue kapiti maua. Kua akapapa viviki aia kia tae matou ki te uipaanga i taua ra ra. Kua ariki meitaki mai te putuputuanga ia matou, e kua rave te aronga pakari i te au akanoonooanga tau i te tauturu iaku i te akono i te au anoano pae vaerua o toku ngutuare.”

Ka Rauka i Tetai Ke i te Tauturu Mai

E tika rai, ka rauka i te au mema o te putuputuanga Kerititiano i te tauturu mai na roto i te au mataara e manganui. Ei akaraanga, i teianei kua rauka mai ta Margarita ngai angaanga. Kua tauturu mai tetai ngutuare i roto i te putuputuanga i te akono i tana tamariki i muri ake te aerenga apii me ka anoanoia.

“Ko taku tikai e mareka ana,” i akakite ei a Margarita, “me aru mai te au taeake e te au tuaine iaku e taku tamariki ki roto i te angaanga orometua.” Ma taua tauturu anga ra, te tauturu maira te au mema o te putuputuanga ‘i te rave i te au apainga a tetai e tetai’ e te rave anga i te reira te akatupu ra “i te ture a te Mesia.”​—Gala. 6:2.

Ko te aronga te mamae ra no te ara a tetai ke te ariki tikai ra i teia tauturuanga tau. Kua tuatua a Monique tei akarukeia e tana tane ma te kaiou i runga i te kati e $21,165 (N.Z.) e te utuutu anga i ta raua tamariki e a, e: “E tu aroa tikai to toku au taeake e te au tuaine i te pae vaerua. Kare rava au i kite e ka akapeea au i te autu anga i te reira me kare ratou i turuturu mai ana. Kua irinaki au e kua oronga mai a Iehova i te au taeake meitaki tikai, tei tauturu mai i taku tamariki. Mataora tikai au i te kite anga i taku tamariki e tupu maroiroi ra i te pae vaerua no taua tauturu anga ra. Me inangaro au i tetai aratakianga, e tauturu mai ana te aronga pakari iaku. Me inangaro au i te tuatua ki tetai tangata, ka akarongo mai ratou.”​—Mare. 10:29, 30.

E tika rai, ka kite mai tetai oa aroa e ko teea te taime kare e taiku mai i te au manamanata e tupu ra ki tetai ke. (Kohe. 3:7) “Maataanga o  te taime,” i karanga ai a Margarita, “e mataora ana au i te tuatua ki te au tuaine i roto i taku putuputuanga ou no runga i te angaanga tutuanga, ta matou apii Pipiria, ta matou tamariki​—kare ra no runga i toku au manamanata. Rekareka au e kare ratou i taiku mai ana i te au mea tei tupu ana kiaku e kua tauturu mai te reira iaku kia akamata i tetai oraanga ou.”

Patoi i te Inangaro i te Tupau Atu i te Kino

I tetai au taime ka riri koe no te mamae kino tana i rave mai, i manako ei koe e ko koe te tumu i rave ei toou tokorua i te ara. Me akatika koe i te reira kia tupu mai, ka akaparuparu teia riri ia koe kia kore e vai akarongo mou ua kia Iehova. Ei akatauanga, penei ka timataia koe kia kimi i tetai au ravenga i te tupau atu i te kino ki toou tokorua tiratiratu kore.

Me kite koe e te tupu maira taua au manako ra i roto ia koe, e akamanako koe i te akaraanga o Iosua raua ko Kaleba. Kua tuku teia nga tangata akarongo i to raua oraanga ki roto i te kino i te tutaka anga i te Enua Taputou. Kua ngere tetai aronga tutaka i te akarongo e kua akaanga ke i te au tangata kia kore e akarongo kia Iehova. Kua inangaro tetai au ngati Iseraela i te pepei ia Iosua raua ko Kaleba ki te toka i to raua akamaroiroi anga i te iti tangata kia vai akarongo mou ua. (Nume. 13:25–14:10) Tei tupu mai no ta Iseraela i rave, kua maroia a Iosua raua ko Kaleba kia aaere i roto i te metepara e 40 mataiti, kare no to raua uaorai tarevake, inara no te tarevake o tetai ke.

Noatu e kua maromaroa a Iosua raua ko Kaleba, kare raua i tuku ana i te au ara a to raua au taeake kia akariri ia raua. Tei runga to raua manako i te akono anga i to raua tu parani i te pae vaerua. I te openga o te 40 mataiti i roto i te metepara, kua akameitakiia ratou e te ngati Levi kia ora mai i roto i taua uki ra e kua akatikaia kia tomo ki roto i te Enua Taputou.​—Nume. 14:28-30; Iosu. 14:6-12.

Penei ka tamamae te au mea ta toou tokorua i rave ana kia koe no tetai au tuatau. Penei ka ope te akaipoipo, ka mamae ua rai toou ngakau e ka ngata te turanga pae moni a muri mai. Kia kore e akamanako ua i te au manako taitaia, kia maara ra e ko Iehova tei kite meitaki i tana ka rave ki te aronga tei kopae tikai i tona au turanga, mei ta te ngati Iseraela akarongo kore i kite mai i roto i te metepara.​—Ebe. 10:30, 31; 13:4.

Ka Rauka ia Koe te Akakoromaki!

Eiaa e akatika i te au manako papu kore kia taomi ia koe, e akamanako ua ra koe i to Iehova manako. “Kua kite mai au e te akarongo anga ki te au tepu akatangi anga o The Watchtower e te Awake! kua tauturu mai te reira iaku kia akakoromaki ua,” i karanga ai a Jane. “Kua riro katoa te au uipaanga ei tumu maata no te akaketaketa anga. Na te piri maroiroi anga ki roto i te au uipaanga i tauturu ei iaku kia kore e manako atu i toku au manamanata. Kua tauturu katoa mai rai te angaanga tutuanga iaku. Na te tauturu anga i tetai ke i te akaketaketa i to ratou akarongo ki roto ia Iehova, kua akaketaketa katoa au i toku akarongo. Te akono anga i te aronga apii Pipiria i tauturu ei iaku kia akamanako ua rai i te au mea puapinga.”

Kua tuatua a Monique, tei taikuia i mua akenei e: “Na te aere ua anga ki te au uipaanga e te piri putuputu anga ki roto i te angaanga tutuanga, i rauka ai iaku i te akakoromaki. Kua akapiri vaitata toku ngutuare ki tetai e tetai e ki te putuputuanga. No tei tupu kiaku kua tauturuia mai au kia kite au i toku uaorai tu paruparu. Kua timataia au, inara ma ta Iehova tauturu anga i rauka ai iaku te akakoromaki.”

Ka rauka katoa ia koe i te akakoromaki i taua au timataanga ra. Noatu te mamae no tei pikikaaia, e tauta i te aru i te akoanga akauruia a Paulo e: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—Gala. 6:9.

[Au Tataanga Rikiriki i Raro]

[Tutu i te kapi 31]

Te au tokorua tei akarukeia, te ariki tikai ra i te aronga tei tauturu ia ratou i roto i te angaanga orometua