Akamaroiroi ua Atu i te Putuputuanga

“E akapumaana kotou tetai ki tetai, e akatupu i te meitaki tetai ki tetai.”​—1 TESA. 5:11.

1. Eaa te au akameitakianga te riro mai anga ei mema i roto i te putuputuanga Kerititiano, inara eaa te au akaaoanga te vai nei rai?

E AKAMEITAKIANGA tikai te riro mai anga ei mema no te putuputuanga Kerititiano. E pirianga meitaki toou kia Iehova. Toou irinaki anga ki runga i tana Tuatua ei aratakianga, te paruru ra ia koe mei te au tupuanga kino no tetai oraanga kare e tau ana ei Kerititiano. Te koropiniia ra koe e te au oa tika tikai te inangaro ra ia koe kia puapingaia. Ae, e maata te au akameitakianga. Inara, tukeke te au manamanata e tupu ra ki te maataanga o te au Kerititiano. Penei ka inangaro tetai ia ratou i te tauturu kia marama i te au mea oonu no te Tuatua a te Atua. Te maki ra me kare te taitaia ra tetai pae, me kore te mamae ra no te au tupuanga no te au ikianga tau kore. Te noo nei tatou pouroa i roto i tetai ao akono kore i te Atua.

2. Eaa ta tatou ka rave me tupu te au manamanata ki to tatou au taeake, e no teaa ra?

² Kare tetai ia tatou e inangaro i te kite atu i tetai taeake Kerititiano e mamae ra me kore e manamanata ra. Kua akaaite te apotetoro ko Paulo i te putuputuanga ki tetai kopapa e kua tuatua e “kia mamae tetai melo ra, e mamae katoa te au melo ravarai.” (1 Kori. 12:12, 26) I roto i taua turanga ra, e tauta tatou i te turuturu i to tatou au taeake e te au tuaine. E maata te au papaanga Tuatua Tapu te ka rauka i te au mema  o te putuputuanga i te tauturu atu i tetai ke kia aro e kia autu atu i te au akaaoanga. Ia tatou e akamanako ra i taua au papaanga ra, e akamanako e akapeea koe i te oronga anga i te tauturu na te au mataara tei aiteite mei tei akatakaia mai. Akapeea koe i te tauturu anga i toou au taeake i te pae vaerua e te akamaroiroi anga atu i ta Iehova putuputuanga?

“Kua Arataki Maira Iaia ki to Raua Uaorai Ngutuare”

3, 4. Na roto i teea tu i tauturu ei a Akuila raua ko Peresila ia Apolo?

³ Te nooanga a Apolo ki Ephesia, kua riro ke ana aia ei tangata tutu evangeria maroiroi. “No te maroiroi o tona ngakau,” kua karanga te papaanga o Angaanga e, “kua tuatua iora, e apii marie atura i te tuatua a te Atu, ko te bapetizoanga a Ioane anake ra tana i kite.” Kare a Apolo i marama ana i te papetitoanga i roto ‘i te ingoa o te Metua, te Tamaiti, e te vaerua tapu,’ penei na tetai pipi a Ioane Papetito me kore na te au pipi a Iesu i akakite atu i te reira, i mua ake i te Penetekote 33 T.N. Noatu e tangata maroiroi a Apolo, kare aia i marama ana i tetai au tumu manako puapinga maata. Akapeea te taokotai anga ki te au taeake irinaki i te tauturu anga iaia?​—Anga. 1:4, 5; 18:25; Mata. 28:19.

⁴ Kua rongo ana te nga tokorua Kerititiano ko Akuila raua ko Peresila te tuatua mataku kore anga a Apolo i roto i te tunako, kua arataki atu iaia ki to raua kainga, e kua apii atura iaia. (E tatau ia Angaanga 18:24-26.) E tu aroa tikai teia tei raveia. E tika rai, kua aravei atu a Akuila raua ko Peresila ia Apolo na roto i tetai tu tau e te meitaki, kare aia i manako ana e te akaapaia maira aia. E kare aia i marama tikai ana i te tuatua enua no runga i te putuputuanga Kerititiano mua. Kare ekoko e kua rekareka tikai a Apolo i te akakite atu anga tona nga oa ou i teia au manako puapinga kiaia. Te marama anga i teia manako, kua “turu maata” atu a Apolo i tona au taeake i Akaia e kua oronga atu i tetai akakiteanga pakari.​—Anga. 18:27, 28.

5. Eaa te tauturu anga aroa ta te au papuritia o te Patireia e tauatini ua atu e oronga ra, e eaa tei tupu mai?

⁵ Te mataora tikai nei te au tangata e manganui i roto i te putuputuanga Kerititiano i teia tuatau no te tauturu anga a tetai aronga kia marama ratou i te Pipiria. E maata te au pirianga oa vaitata tei tupu mai i rotopu i te aronga apiipii e to ratou au puapii. Maataanga o te taime, te tauturu anga i te au tangata kia marama i te tuatua mou, te umuumuia ra te apii putuputu anga i te Pipiria kia ratou no tetai au marama. Inara, te inangaro ra te au papuritia o te Patireia i te rave i te reira no te mea te kite ra ratou e te o maira te oraanga o te au tangata. (Ioa. 17:3) E mea mataora tikai i te kite atu e te marama ra e te aru rotai ra te au tangata i te tuatua mou, e te taangaanga ra i to ratou oraanga i te rave i to Iehova anoano!

“E Tangata Rongo Meitaki oki Aia”

6, 7. (a) Eaa a Paulo i iki ei ia Timoteo ei oa teretere nona? (e) Eaa tei tauturu ia Timoteo kia tere ki mua?

⁶ Te atoro atu anga te nga apotetoro a Paulo raua ko Sila ia Lusetera i te rua o te tere mitinari, kua aravei atu raua i tetai tangata mapu  ko Timoteo tona ingoa, penei e mapu ua me kore e 20 tuma ona mataiti. “E tangata rongo meitaki oki aia i te au taeake i Lusetera e Ikonio.” E nga Kerititiano akatapuia te metua vaine o Timoteo, ko Eunike, e tona tupuna vaine ko Loi, kare ra tona metua tane i roto i te tuatua mou. (2 Timo. 1:5) Penei kua matau a Paulo i teia ngutuare tangata tona atoro mua anga i te ngai i nga mataiti i mua atu ana. I teianei te manako tikai maira te apotetoro ia Timoteo no te mea e tangata mapu meitaki tikai aia. No reira, ma te akatika anga a te pupu o te aronga pakari i reira, kua riro mai a Timoteo ei tangata tauturu ia Paulo i roto i te angaanga mitinari.​—E tatau ia Angaanga 16:1-3.

⁷ E maata atu ta Timoteo ka kite mai mei tona oa pakarikari. Kua tere meitaki aia ki mua, no reira kua rauka ia Paulo i te tono ia Timoteo kia atoro i te au putuputuanga e kia riro ei mata nona. E 15 mataiti e ara atu, kua mataora tikai a Timoteo te piri atu anga kia Paulo, e kua riro mai teia tangata mapu kare e tukatau rava ana e te akama ei akaaere meitaki tikai.​—Phili. 2:19-22; 1 Timo. 1:3.

8, 9. Eaa ta te au mema o te putuputuanga ka rave i te akamaroiroi atu i te au mapu? Oronga mai i tetai akaraanga.

⁸ E turanga puapinga to te au mapu tane e te au mapu vaine i roto i te putuputuanga Kerititiano i teia tuatau. Me akamaroiroiia e me tereniia e te au oa manako pae vaerua, ka rauka i teia au mapu i te itae e te ariki atu i te au apainga maata i roto i te iti tangata o Iehova. Akara aere i roto i toou putuputuanga! Te kite ra ainei koe i tetai au mapu te ka rauka i te oronga ia ratou uaorai, mei ia Timoteo rai? Na roto i taau tauturu e te akamaroiroi anga, penei ka riro mai ratou ei au painia, ei aronga angaanga i Betela, ei au mitinari, me kare ei au akaaere tutaka. Eaa taau ka rave i te tauturu ia ratou kia itae atu i taua au akakoroanga ra?

⁹ Te maara ra ia Martin ma te mataora, e mema no te Betela pamiri no tetai 20 mataiti, te manako mai anga tetai akaaere kotinga iaia e 30 mataiti i topa, i to raua angaanga kapiti anga i roto i te angaanga tutuanga. Kua tuatua oraora mai te akaaere no runga i tana uaorai angaanga i Betela i tona mapuanga. Kua akamaroiroi aia ia Martin kia akamanako i te oronga anga iaia uaorai ki ta Iehova akaaerenga na roto i te reira tu. Kua manako mai a Martin e e puapinga maata teia pukapukaanga kare e ngaropoina no te au ikianga tana ka rave i muri mai. Koai ra te ka kite mai i te meitaki taau ka rave no toou au oa mapu na te tuatua anga kia ratou no runga i te au akakoroanga teokaratiki?

“E Akapumaana Atu i te Ngakau Taitaia”

10. Eaa to Epaperodito manako, e no teaa ra?

¹⁰ Kua aere a Epaperodito no tetai tere mamao e te roiroi mei ia Philipi ki Roma i te  atoro i te apotetoro ko Paulo, tei roto i te are tapekaanga no tona akarongo. E tangata teretere apai karere teia no Philipi mai. Kare aia i apai ua i ta ratou apinga aroa na te apotetoro, kua parani katoa aia i te noo i ko iaia i te rave i tana ka rauka i te tauturu ia Paulo i roto i tona turanga ngata. Inara, iaia i Roma, kua makiia a Epaperodito e ‘mei mate takiri rava.’ Te manako anga e kare i puapingaia tana angaanga, kua taitaia tikai a Epaperodito.​—Phili. 2:25-27.

11. (a) Eaa tatou kare e poitirere me taitaia tetai i roto i te putuputuanga? (e) Eaa ta Paulo i akakite mai no runga i to Epaperodito turanga?

¹¹ E akatupu ana te au taomianga tukeke i te taitaia ki te au tangata i teia tuatau. Te akakite maira te au tareanga a te World Health Organization e e maata atu i te 1 i roto i te 5 o te au tangata ka taitaia i tetai tuatau i roto i to ratou oraanga. Te tupu katoa nei te taitaia ki te iti tangata o Iehova. No te au manamanata i te akonoanga i to tetai ngutuare tangata, te oraanga makimaki, te maromaroa no te tu puapinga kore, me kore no tetai atu au tumu i akatupu ei i te au manako taitaia tikai. Eaa ta te au tangata Philipi ka rave i te tauturu atu ia Epaperodito? Kua tata a Paulo e: “Ka oo mai kotou iaia i te Atu nei ma te rekareka maata; e mei iaia ra te tu, kia manako meitakiia e kotou. No te mea i vaitata aia i te mate i te angaanga a te Mesia nei, kare oki i akono i tona uaorai ora, kia akarava aia i to kotou takinga-meitaki iaku nei.”​—Phili. 2:29, 30.

12. Eaa te tumu akapumaana anga no te aronga taitaia?

¹² E akamaroiroi katoa tatou i to tatou au taeake tei maromaroa e tei taitaia. Papu e ka rauka ia tatou i te tuatua i tetai au mea papu no ta ratou tavini anga ia Iehova. Penei e maata ta ratou tauianga i rave i roto i to ratou oraanga kia riro mai ei au Kerititiano me kore kia tavini i roto i te angaanga orometua tamou. Te ariki rekareka nei tatou i taua au tautaanga ra, e e akapapu atu tatou kia ratou e te ariki katoa maira a Iehova i te reira. Me te arai ra te turanga pakarikari me kore te maki i tetai aronga akarongo mou mei te rave anga i ta ratou i rave ana i mua ana, e akangateitei ua atu rai tatou ia ratou no te au mataiti i tavini ana ratou. Noatu eaa te turanga, ko teia ta Iehova akoanga ki tona aronga akarongo mou e: “E akapumaana atu i te ngakau taitaia, e tauturu atu i tei apikepike, kia roa te akakoromaki anga i te tangata ravarai.”​—1 Tesa. 5:14.

‘E Akakore Atu i Tana Ara, e e Akapumaana Atu’

13, 14. (a) Eaa ta te putuputuanga o Korinetia ka rave, e no teaa ra? (e) Eaa tei tupu no te akaateaia anga te tangata ki vao?

¹³ Kua aro atu te putuputuanga o Korinetia i te anere mataiti mua i tetai turanga no te rave tataraara kore anga tetai tangata i te moeaana. Kua takino tona tu i te turanga tiama o te putuputuanga e kua poitirere katoa te aronga kare i roto i te tuatua mou. No reira, kua akaue atu a Paulo e kia akaateaia taua tangata ra mei te putuputuanga.​—1 Kori. 5:1, 7, 11-13.

¹⁴ E tupuanga meitaki tei rauka mai no taua akoanga ra. Kua paruruia te putuputuanga mei te akakeuanga kino, kua kite mai te tangata rave ara i te tarevake e kua tataraara ngakau tae. No te akaari mai anga te angaanga tau a taua tangata ra i te tu tataraara, kua akakite a Paulo i roto i te rua o tana reta ki taua putuputuanga ra e kia akaoki mai i taua tangata ra. Kare ra ko te reira ua te ka umuumuia. Kua akaue katoa a Paulo ki te putuputuanga e “e akakore atu kotou i tana ara [te tangata tei tataraara], e e akapumaana atu e tikaʼi, ko te apuku uaia aea taua tangata ra i te aue maata.”​—E tatau ia 2 Korinetia 2:5-8.

15. Eaa to tatou manako no te aronga tarevake tei tataraara e kua akaokiia mai ki te putuputuanga?

¹⁵ Eaa ta tatou i kite mai mei teia tupuanga? Ka maromaroa tatou me akaateaia tetai ki vao. Te akangateitei kore ra ratou i te ingoa o te Atua e te akakino ra i te putuputuanga. Penei kua rave katoa ratou i te ara kia tatou. Inara, me akara meitaki tikai te aronga pakari tei ikiia i te turanga tei akatakaia mai, tei tau ki ta Iehova aratakianga, kia akaokiia mai te tangata tei tataraara ki te putuputuanga, te  akaari maira te reira e kua akakore a Iehova i tana ara. (Mata. 18:17-20) Kare ainei tatou e aru i Tana akaraanga? E tika, ko te tu kino e kare e akakore i te ara, te patoi ra te reira ia Iehova. Ei akatupu i te au e te taokotaianga i roto i ta te Atua putuputuanga e kia mareka mai a Iehova, kare ainei e ka ‘akakite pu tikai tatou i to tatou aroa’ no te aronga tei tataraara tikai e tei akaokiia mai?​—Mata. 6:14, 15; Luka 15:7.

“E Meitaki oki Au Iaia”

16. Eaa ra a Paulo i mareka kore ei ia Mareko?

¹⁶ Te akaari maira tetai papaanga Tuatua Tapu e eiaa tatou e akamoupuku i te riri i te aronga tei akamareka kore mai ia tatou. Ei akaraanga, kua akamareka kore tikai a Ioane Mareko i te apotetoro ko Paulo. Akapeea ra? Te akamataanga a Paulo raua ko Banaba i to raua tere mitinari mua, kua aru atu a Mareko i te tauturu ia raua. Inara i tetai tuatau tikai o to ratou tere e no tetai tumu kare i akatakaia mai, kua akaruke a Ioane Mareko i tona nga oa e kua oki atu ki te kainga. Kua mareka kore tikai a Paulo i teia ikianga, e te parani anga i te rua o te tere, kua tauetono raua ko Banaba me ka aru akaou mai a Mareko ia raua. I te akamanako anga i tei tupu i roto i te tere mua, kare a Paulo i inangaro ia Mareko kia aru mai ia raua.​—E tatau ia Angaanga 13:1-5, 13; 15:37, 38.

17, 18. Akapeea tatou i kite ei e kua akatikatikaia te manamanata i rotopu ia Paulo raua ko Mareko, e eaa ta tatou ka kite mai no runga i teia?

¹⁷ Papu e, kare a Mareko i akatika ana kia akamaromaroaia aia no te kopaeanga a Paulo iaia, no te mea kua rave raua ko Banaba i te angaanga mitinari i tetai ngai ke. (Anga. 15:39) Kua akaariia mai tona tu akarongo mou e te tu irinakianga i roto i ta Paulo tataanga no runga iaia i tetai au mataiti i muri mai. Ko Paulo e mouauri i teianei i Roma, kua pati atu ia Timoteo na roto i tetai reta. I roto i taua reta rai, kua tuatua a Paulo e: “Arataki katoa mai koe ia Mareko; e meitaki oki au iaia i te angaanga i te taoonga nei.” (2 Timo. 4:11) Ae, kua irinaki a Paulo i teianei e te tere meitaki ra a Mareko ki mua.

¹⁸ E apiianga tetai te ka kiteaia mai no runga i teia. Kua akatupu mai a Mareko i te au tu ei mitinari meitaki. Kare aia i akaturoriia ana te kopae mua anga a Paulo iaia. E nga tangata manako pae vaerua raua ko Paulo, e kare raua i akamoupuku ana i tetai e tetai. I tetai tua ra, kua kite mai a Paulo i muri mai e e tangata tauturu meitaki tikai a Mareko. Me autu te au taeake i te au tu ngata e te au manamanata i topa, ko te mea meitaki kia rave ratou e akara ki mua e e tauturu atu i tetai ke kia tere ki mua i te pae vaerua. Te kite anga i te au tu meitaki o tetai ke, ka rauka i te akamaroiroi i te putuputuanga.

Te Putuputuanga e Koe

19. Eaa te tauturu ta te au mema pouroa o te putuputuanga Kerititiano ka oronga atu ki tetai e tetai?

¹⁹ I roto i teia tuatau “kino maata,” ka inangaro koe i te tauturu anga a toou au taeake e te au tuaine i roto i te putuputuanga, e ka inangaro katoa rai ratou i taau tauturu anga. (2 Timo. 3:1) Penei kare te au Kerititiano tataki tai e kite tikai i te mataara te ka akatikatika meitakiia te au turanga ta ratou ka aro atu, inara kua kite a Iehova. E ka taangaanga aia i te au mema tukeke o te putuputuanga​—e koe atu rai—​i te tauturu i tetai ke kia aru i te mataara tika. (Isa. 30:20, 21; 32:1, 2) No reira e akarongo meitaki ki te akamaroiroi anga a te apotetoro ko Paulo! “E akapumaana kotou tetai ki tetai, e akatupu i te meitaki tetai ki tetai, mei ta kotou rai oki e rave nei.”​—1 Tesa. 5:11.

Akapeea Koe me Pau?

• Eaa ka anoanoia ai kia akamaroiroi atu i tetai ke i roto i te putuputuanga Kerititiano?

• Eaa tetai au tu ngata kia tauturu atu koe i tetai ke kia autu?

• Eaa ra tatou ka inangaro ei i te tauturu anga a tetai ke i roto i to tatou putuputuanga?

[Au Uianga Apii]

[Tutu i te kapi 11]

Me te tupu ra teia turanga ngata ki tetai taeake Kerititiano, ka rauka ia tatou i te turuturu atu

[Tutu i te kapi 12]

E turanga puapinga to te au mapu tane e te au mapu vaine i roto i te putuputuanga Kerititiano i teia tuatau