Taokotaiia i Roto i te Aroa​—Ripoti o te Uipaanga Mataiti

MAATA tikai te mataora i ko i te Are Uipaanga Akaputuputuanga o te Au Kite o Iehova i Jersey City, New Jersey, U.S.A. I te popongi ia Okotopa ra 3, 2009, tere atu i te 5,000 tei akaputuputu mai no te 125 uipaanga mataiti o te Taiate Punanga Tiaki Pipiria e te Pepa o Pennsylvania. E tauatini ua atu tangata tei akarongorongo e tei akarakara i te porokaramu na runga i te vitio tei tamouia ki tetai ngai e toru o Betela i Marike e te Betela o Kanata. E 13,235 tei mataora tikai i te taokotai mai anga no to ratou aroa ia Iehova i te akarongo anga ki te uipaanga e toru ora.

Na Geoffrey Jackson o te Pupu Akaaere i rave i te tuanga a te tiamana. Kua akamata aia i te porokaramu na te akakite mai anga i te pupu imene o Betela tei imene mai i te au imene mei ta tatou puka imene ou. Na tetai mema o te Pupu Akaaere ko David Splane tei akaaere i te pupu imene, tei uriuri poto mai i te puapinga tikai o te akatangianga imene i roto i te akamorianga ma. Kua patiia atu te katoatoa kia imene mai e toru imene ou i te uipaanga; kua imene te pupu imene na mua, e oti kua imene kapiti mai te pupu imene e te katoatoa. No teia akaputuputuanga puapinga ua i taangaangaia ai te pupu imene; kare teia akaraanga e aruia e te au putuputuanga, e te au akaputuputuanga kotinga e te tapere.

Au Ripoti mei te Au Opati Manga

Ko te au mema o te Kumiti Manga tei atoro mai kua oronga mai i te au ripoti mei te au opati manga e rima. Kua akakite mai a Kenneth Little e kare e roa atu ka nenei a Kanata i te maataanga o te makatini na Marike raua ko Kanata, maata atu i reira i te tai ngauru taime ta taua opati manga ra ka nenei mai. E tupu ei teia, ka angaanga te matini nenei e rua tuanga i te ra, e 16 ora te katoaanga i roto i te ra okotai.

Kua ripoti mai a Reiner Thompson i te angaanga Patireia e raveia ra i Tominika Repapuriki, e kua akataka mai a Albert Olih i ta tatou au angaanga i Naiteria. Kua akamarama mai a Emile Kritzinger no Motamapiki mai, e i muri ake i te au raungauru mataiti no te takinokino anga i reira, kua retitaia te Au Kite o Iehova i te mataiti 1992. I roto i teia nga enua e toru, kua kake maata mai te numero o te au papuritia. Kua akakite mai a Viv Mouritz no te opati manga o Autireria i te au angaanga e raveia ra i roto ia Timoa Itinga, e akonoia ra e te au taeake i Autireria.

Au Kumiti o te Pupu Akaaere

I te mataiti 1976, kua tukuia te au angaanga katoatoa a te Au Kite o Iehova ki raro ake i te akaaereanga a te au kumiti e ono o te Pupu Akaaere. I muri mai, kua ikiia te au mema o te pupu mamoe ke atu ei aronga tauturu. E 23 te tauturu nei i te angaanga e raveia nei. E ono ia ratou kua uiuiia atu. E 341 mataiti te katoaanga o to ratou angaanga tamou anga​—mei tetai 57 mataiti i te tangata okotai.

Kua akamarama mai a Don Adams, tei aere mai ki roto i te Betela i te mataiti 1943, e ko te Kumiti Akaaere, ko ratou te au akaaere o tetai atu au kumiti e rima, te akapapu anga e te angaanga kapiti meitaki ra te au tangata toko rima. Ka akono tau atu teia kumiti i te au tupuanga poitirere mamaata, te au takinokino anga, te au akavaanga, te au tumatetenga, e tetai atu au tupuanga rapurapu te tupu ra ki te Au Kite o Iehova i te ao katoa.

Kua akataka mai a Dan Molchan i te angaanga a te Kumiti Tangata, te akaaere ra i te turanga pae vaerua e te pae kopapa o te aronga i Betela e 19,851 i te ao katoa nei. Kua tuatua a David Sinclair e akapeea te Kumiti Neneianga i  te akaaere anga i te oko mai anga i te au apinga e te au matini no te au opati manga. Aru mai, kua akakite mai a Robert Wallen, tei tavini ana i te Betela no tetai 60 mataiti, e akapeea te Kumiti Tavini Anga i te akatereanga i te angaanga a te iti tangata o Iehova i roto i te ngai tutuanga e te au putuputuanga. Kua akamarama poto mai a William Malenfant i te angaanga pakari a te Kumiti Apiianga i te akapapaanga i te porokaramu o te uruoaanga. I te openga, kua akataka mai a John Wischuk e akapeea te Kumiti Tataanga i te akaaere anga i te akapapa meitaki anga e te maani anga i te au apinga no ta tatou au puka. *

No Runga i te Aroa te Irava Mataiti o te 2010

Na te au mema o te Pupu Akaaere i oronga mai i te au akoanga e toru. Kua akamata a Gerrit Lösch na roto i te uianga, “Inangaro ainei koe kia inangaroia mai koe e tetai ke?” Kua akamarama mai aia e ko te aroa te anoano tumu tikai o te au tangata, e e mataora tikai ana tatou i te reira. Kua ora mai tatou no te aroa, no te mea na Iehova i anga mai ia tatou na roto i te aroa karapii kore. Ko te akakoroanga maata no ta tatou angaanga tutuanga e te apiianga, no to tatou aroa ia Iehova.

Te akaariia nei te aroa tei akatumuia ki runga i te kaveinga ki to tatou tangata tupu pera katoa ki to tatou au enemi. (Mata. 5:​43-45) Kua akamaroiroiia te katoatoa kia akamanako i ta Iesu i rave no tatou, tei papaia, tei aviriia, tei tutuaia ki te uavare, e kua koia. Noatu rai teia, kua pure aia no te au vaeau tei patiatia iaia. Kare ainei teia e akakeu ra ia tatou kia aroa maata atu iaia? Kua akakite mai i reira te Taeake Lösch i te irava mataiti no te 2010: 1 Korinetia 13:7, 8, ‘E akakoromaki to te aroa i te au mea katoa. Kare ua te aroa e kore.’ Tei ia tatou te manakonakoanga no te oraanga mutu kore, pera katoa kia aroa atu e kia aroaia mai e tuatau ua atu.

Te Akaoro ra Ainei Koe e kua Pou te Penitini?

Kua akamata a Samuel Herd i tana akoanga ki tetai akatutuanga. Penei te tiki maira toou oa ia koe kia aere korua ki tetai tere e 50 kiro mita te mamao. Ia koe e noo ra i te pae iaia, akara atu koe e tei runga te vaito o te penitini i te ngai kua pou. Kua akakite atu koe ki toou oa e te pou ra tona penitini. Kua karanga mai aia e auraka e manamanata; e a rita penitini e vai ra i roto i te tangika. Inara, kare i roa ana kua pou te penitini. E meitaki ainei i te ‘akaoro e kua pou te penitini’ e kare e rauka i te aere ki tetai ngai ke? E meitaki atu i reira i te akaki takiri i te tangika penitini! Na roto i te tu akatutuanga, ka anoanoia tatou kia akaki ua rai i to tatou tangika ki te penitini, koia oki to tatou kite no Iehova.

E rauka ai te reira, ka anoanoia tatou kia akaki putuputu i to tatou penitini. E a mataara e rauka ai ia tatou i te rave i teia. Te mea mua, apiianga naau uaorai, kia kite meitaki i te Pipiria na te tatau anga i te reira i te au ra ravarai. Kare e kia tatau ua i te au tuatua, ka tauta tatou  kia marama i ta tatou e tatau ra. Te rua, e taangaanga meitaki i ta tatou Akamorianga a te Ngutuare i te aiai. Te rave maata ra ainei tatou i te kai pae vaerua i te au epetoma me kore e manga ua ta tatou e rave ra kia ora mai? Te toru, te aere anga ki te apii a te putuputuanga e te au uipaanga. Te a, te akamanako oonu anga i te au tu o Iehova ma te tamanamanata kore. Te karanga ra a Salamo 143:5 e: “Te manako nei au i te tuatau taito ra; te akamaaraara nei au i taau ra au angaanga katoa.”

‘Ka Kakā Mai te Aronga Tuatua-Tika’

Na John Barr i oronga mai i te toru e te openga o te akoanga, tei akamarama mai i te akatutuanga a Iesu no runga i te au titona e te au titania. (Mata. 13:​24-30, 38, 43) Te taiku ra taua akatutuanga ra ki te “mou” i te tuatau e akaputuputuia ai te “tamariki o te basileia” e kua akaateaia mai te au titania kia tutungiia.

Kua akataka meitaki mai te Taeake Barr e kare te akaputuputu anga e raveia e mutu kore ua atu. Kua taiku aia ia Mataio 24:34, te tuatua anga e: “Kare e ope teianei uki, e ope ei teianei au tuatua ravarai i te tupu.” Kua tatau aia i te manako e rua taime: “Ko te aiteanga tikai o ta Iesu e tuatua ra, te aronga akatainuia tei ora ana i te akamataanga o te akairo i te mataiti 1914, ka ora mai ratou i te tuatau o tetai atu o te aronga akatainuia te ka kite atu i te akamataanga o te mate maata.” Kare tatou i kite i te roa anga tikai o “teianei uki,” inara te kapiti maira i teia nga pupu e rua te ka ora atu i taua taime rai. Noatu e tukeke te mataiti o te aronga akatainuia, ko te aronga i roto i te nga pupu e rua o taua uki ra te ka ora mai i taua taime rai i te tuanga o te ra openga. E mea pumaana tikai i te kite atu e ko te aronga mapu akatainuia te ora ra rai i taua taime ra i te tuatau o taua aronga pakarikari akatainuia ra, tei kite atu i te akairo i te tupuanga te reira i te akamataanga o te mataiti 1914, kare ratou e mate i mua ake i te akamataanga o te mate maata!

Te tapapa mataora atu nei te “tamariki o te basileia” i ta ratou tutakianga i te rangi, inara kia vai akarongo mou ua rai tatou, te kaka ua anga e tae ua atu ki te openga. E tikaanga ngateitei no tatou i te kite anga te akaputuputu angaia te “titona” i to tatou tuatau.

I muri ake i te imene openga, kua oronga a Theodore Jaracz o te Pupu Akaaere i te pure openga. Kua riro teia porokaramu uipaanga mataiti ei akamaroiroi anga tikai!

[Tataanga Rikiriki i Raro]

[Pia i te kapi 5]

APII NA TE ARONGA PAKARI

I te uipaanga mataiti, kua akakite mai a Anthony Morris, tetai mema o te Pupu Akaaere e ka raveia tetai au terenianga no te aronga pakari o te putuputuanga. Kua akamata tetai apii na te aronga pakari i Marike i te akamataanga o te mataiti 2008 i te ngai apiianga maata i Patterson, New York. Koi oti ua akera te pupu 72 o te aronga pakari e 6,720 i te tereniia. E maata atu te ka raveia. I roto ia Marike anake ua, te vai ra e 86,000 aronga pakari. No reira, kua akatika te Pupu Akaaere e kia rave akaouia tetai apii i Brooklyn, New York, akamata i roto ia Titema 7, 2009.

E rua marama, e a akaaere tutaka te ka tereniia ei au puapii i Patterson. Ka nekeia atu teia aronga ki Brooklyn no te apiianga, e e a tangata akaou mai te ka tereniia. Ka rave i reira ratou i te apiianga i Brooklyn, e ko te au tangata mua e a ka rave ratou i te apiianga i ko i te au Are Akaputuputuanga e te au Are Uipaanga Patireia. Ka ripiti uaia rai teia e rauka ua atu e 12 puapii no te apiianga e ono pupu apii i te au epetoma tataki tai i roto i te reo Papaa i Marike. Ka tereniia i reira e a puapii no te apii atu anga i te reo Paniora. Kare teia apii e mono i te Apii Terenianga Orometua; ko te akakoroanga o teia ko te akameitaki atu anga i te turanga pae vaerua o te aronga pakari. Ka akamata te au opati manga i te ao katoa i te rave i te au apii i ko i te au Are Akaputuputuanga e te au Are Uipaanga Patireia i te mataiti tavini anga o te 2011.

[Au Tutu i te kapi 4]

Akamata te uipaanga mataiti i te imene anga mei roto mai i ta tatou puka imene ou, “Sing to Jehovah”