Akatupu i te Inangaro no te Tatau e te Apii ki Roto i Taau Tamariki

TE TAUTA anga i te apii i taau tamariki i te tatau e te apii, tetai nga mataara puapinga roa atu i te akameitaki atu i to ratou oraanga no te tuatau ki mua. E rekareka maata tikai ta teia au angaanga nei ka akatupu! To tetai aronga au manakonakoanga akaperepere roa atu koia oki, no to ratou metua e tatau maira kia ratou. Ka riro te tatau ei mea mataora, e ta te reira ka akatupu. Mea puapinga tikai teia no te au tavini o te Atua, i te mea ka akatupu teia i tetai pirianga vaitata kia Iehova me apii i te Pipiria. Kua akakite tetai metua Kerititiano e, “Ko te au mea akaperepere maataia e maua koia oki ko te tatau e te apii.”

Ka riro te au tu meitaki i te apii, ei tauturu i taau tamariki kia akatupu i tetai pirianga vaitata ki te Atua. (Sala. 1:1-3, 6) Noatu kare te tu kite i te tatau i te umuumuanga no te ora, te akaari maira ra te Pipiria e e maata ta te reira akameitakianga ka apai mai no tatou. Ei akaraanga, te karanga ra a Apokalupo 1:3 e: “E ao tona to tei tatau, e to te aronga e akarongo i teianei tuatua totou.” Tetai katoa, ko te puapinga o te akamou i te manako, tetai tuanga puapinga no te apii, te akaari takaia maira te reira i roto i te ako akauruia a te apotetoro ko Paulo kia Timoteo e: “Ka akamanako tikai i teianei au tuatua; ko taau ïa e rave auraka e tivata.” No teaa ra? “Kia kite te tangata katoa i te tupu anga o toou kite.”​—1 Timo. 4:15.

E tika rai, e kare te kite ua anga i te tatau e te apii, i te akapapuanga e ka riro teia au tu ei akapuapinga i tetai tangata. E manganui tei rauka ia ratou teia kite, kare i taangaanga i te reira; mari ra, kua akapou i to ratou taime ki te au angaanga puapinga kore ua. Ka akapeea ra te au metua i te akatupu anga i te anoano no te kite te ka puapingaia, ki roto i ta ratou tamariki?

Toou Aroa e Taau Akaraanga

Ka mataora te tamariki i te au atianga o te apii me raveia te reira na roto i te aroa. Kua maara ia Owen raua ko Claudia, e tokorua Kerititiano, no runga i ta raua nga tamariki: “E mea reka roa na raua te taime apii no te mea e taime puapinga tikai te reira​—rauka ia raua te tu ponuiaau e te pumaana. Kua rauka ia raua te akapiri i teia angaanga ki tetai turanga akaperepereia.” I te tamariki e tupu maira i te au mataiti ngata o to ratou mapuanga, ka riro te turanga akaperepereia no te au angaanga apii a te pamiri ei akatuke ua rai i to ratou manako no runga i te apii. E painia te nga tamariki a Owen raua ko Claudia i teianei, e te riro nei rai te inangaro no te tatau e te apii tei akatupuia ki roto ia raua, ei mea puapinga kia raua.

Tetai tauturu meitaki o te aroa koia oki e akaraanga. Te tamariki e kite putuputu ra i to ratou metua e tatau ra e te apii, ka manako rai ratou e e tuanga teia angaanga no to ratou uaorai oraanga. Ei metua, ka akapeea ra koe i te akanoo anga i taua tu akaraanga ra mei te mea e e ngata ia koe te tatau? Penei ka inangaroia kia akatano i te au mea puapinga maata atu me kore i toou tu no runga i te tatau. (Roma 2:21) Me e tuanga maata te tatau no taau peu matau i te au ra, ka akakeu oonu teia i taau tamariki. Toou maroiroi​—i roto tikai i te tatau Pipiria, te akapapa no te au uipaanga, e te apii a te pamiri—​ka riro ei akakite taka ua mai i te puapinga o taua angaanga ra.

 No reira, e mea puapinga tikai toou aroa e toou akaraanga i roto i te akatupu anga i te anoano no te tatau ki roto i taau tamariki. Eaa ra te au takainga tau taau ka rave, ei akamaroiroi ia ratou?

Inangaro Tei Akamata Mai ki te Tatau

Eaa tetai au takainga puapinga i roto i te itae anga i toou akakoroanga kia akatupu i te inangaro no te tatau ki roto i taau tamariki? Akapapu e kia papa ua tetai au puka na ratou i te rikiriki anga. Te akakite ra tetai tangata pakari Kerititiano, tei akatupu tona nga metua i te inangaro no te tatau ki roto iaia e: “Akamatau i taau tamariki i te taangaanga i te au puka. Me akapera, ka riro te au puka ei mea akaperepereia e ratou e ei tuanga no to ratou oraanga.” Ka riro i reira te puka tei akatumuia ki runga i te Pipiria, mei te puka Te Tangata Maata Rava Atu Tei Ora Ana, ei mea akaperepereia e te tamariki i mua roa ake ka kite ei ratou i te tatau. Me tatau koe i taua au puka ki taau tamariki, te akamaeu ra koe ia ratou kare e ki te reo anake ua, mari katoa ra ki “te au mea a te vaerua” e te “au tuatua a te vaerua.”​—1 Kori. 2:13, NW.

Tatau maata ua rai. Akanoo i tetai porokaramu no te tatau kapiti e taau tamariki i te au ra ravarai. Te apii ra te reira ia ratou i te akatangi meitaki i te tuatua e te akamaroiroi ia ratou i te tatau putuputu. E mea puapinga katoa te tu e tatau ana koe. Kia oraora, e ka akapera rai ratou. Ka kite koe e ka pati mai taau tamariki kia tatau ua rai koe i taua tua ra. E rave i ta ratou e pati maira! I te openga, ka inangaro ratou kia kite i tetai au tumu manako ke. Kia matakite ra, eiaa e maro i taau tamaiti kia tatau kapiti korua. Kua akanoo a Iesu i te akaraanga na te apii anga i te aronga e akarongo maira iaia “i tei tau ia ratou kia akarongo.” (Mare. 4:33) Me kare koe e maro i taau tamariki, ka rekareka ua ratou i te tapapa atu i te au taime tatau, e ka piri vaitata atu koe ki toou akakoroanga kia akatupu i te inangaro no te tatau ki roto ia ratou.

Akamaroiroiia kia piri mai ki roto, e uriuri i taau i tatau. Ka poitirere koe e, kare roa, ka rauka i taau tamariki i te akataka, i te tuatua, e i te marama i te aiteanga o te au tuatua. Ka riro te uriuri anga i taau i tatau ei akameitaki roa atu i to ratou turanga. Ka tauturu katoa te pukapukaanga i te tamariki kia “kite i te au tuatua ka anoanoia ratou a muri mai, kia akataka e kia marama me tatau,” e akamarama ra tetai puka no runga i te tumu manako o te tauturu anga i te tamariki kia riro mai ei aronga meitaki i te tatau. “No te tamariki rikiriki e tauta ra to ratou manako ou kia marama,” i karanga ai taua puka ra, “ka anoanoia kia tuatua​—te maata atu taau tuatua no runga i te au manako puapinga . . . ko te meitaki roa atu ia.”

Maani taau tamariki kia tatai mai kia koe, e oti akamaroiroi ia ratou kia ui mai i tetai au uianga. Penei ka inangaro koe i te ui i tetai au uianga e te tamanako atu i tetai au pauanga. Na teia mataara, ka kite te tamariki e ko te au puka, e puna uaorai te reira no te au akakiteanga, e e aiteanga to te au tuatua e tatau ra ratou. E puapinga tikai teia tu mei te mea e i akatumuia taau e tatau ra ki runga i te Tuatua a te Atua, te puka puapinga maata roa atu.​—Ebe. 4:12.

Inara auraka rava e akangaropoina e ko te tu kite i te tatau, e mea ngata te reira. Ka anoanoia tetai taime pera te taangaanga i te reira, e tukatau meitaki ei te rave i te reira. No reira e oronga i te akameitakianga mauruuru i te akamaroiroi i te inangaro maata o te tamariki i te tatau. Ka riro te akameitakianga i taau tamariki ei akamaroiroi ia ratou kia akatupu i te inangaro no te tatau.

Puapinga e te Mataora

Ka riro te apiianga i taau tamariki akapeea me apii ei oronga i tetai aiteanga no ta ratou e tatau ra. Ko te apii, te o maira te apii anga i te au tumu tika e te marama anga i to ratou pirianga ki tetai e tetai. Ka anoanoia te kite i te akamako, te akamaara, e te taangaanga i te au akakiteanga. Me kite ana te tamaiti e akapeea me apii e ka marama e peea te reira i te tauturu anga iaia, ka riro mai te reira ei mea puapinga e te mataora.​—Kohe. 10:10.

Apii i te au mea puapinga ka anoanoia no te apii. Te au aiai Akamorianga a te Ngutuare, te uriuri i te tia i te au ra, e te au taime mei te  reira, ka oronga mai i te au atianga meitaki no te apii i te au tu kite i te apii i taau tamariki. Te noo mari ua e te akamou ki runga i te tumu manako no tetai au atianga poto ua, ka apii te reira ia ratou kia akamou i te manako tei anoanoia no te apii. Tetai, ka rauka ia koe te akamaroiroi i taau tamaiti kia akakite mai kia koe e eaa te pirianga o tana i apii ua akenei, ki tana i kite ke ana. Ka apii teia iaia akapeea me akaaiteite. Peea me pati koe i taau tamaine kia akamarama poto ua mai tana i tatau? Ka tauturu teia iaia kia marama i te aiteanga e kia akamaara i te reira. Akara akaou, koia oki e ripiti akaou i te au manako maata me oti i te tatau i tetai atikara, ko tetai tauturu teia ka rauka ia koe te apii kia maara ia ratou. Ka rauka katoa i te apii i te tamariki rikiriki kia tata poto ua i tetai au manako i te au taime apii me kore i te au uipaanga a te putuputuanga. E puapinga te ka rauka me akamou i to ratou manako ki te reira! Ka riro teia au ravenga ngoie ua i te akaoraora e i te tauturu maata i te apii noou e no taau tamariki.

Akatupu i tetai au turanga te ka tauturu i te apii. Me rava meitaki te reva e te marama, kapiti mai te turanga muteki ua e te tau, ka ngoie roa atu te akamou anga i te manako. E tika rai, e e mea puapinga te tu o te au metua ki te apii. “E mea puapinga tikai noou kia rave putuputu e kia akataka ua rai i tetai taime no te tatau e te apii,” i akakite ei tetai mama. “Na teia e tauturu i taau tamariki kia akamako meitaki. Ka kite ratou e eaa te ka anoanoia i te rave i te taime tei akatakaia.” Manganui te au metua kare e akatika ana i tetai au angaanga ke i te taime o te apii. Karanga tetai tangata, e e akakeuanga maata tikai to teia tu i roto i te apii anga i te au tu meitaki o te apii ki te tamariki.

Akaketaketa i te puapinga o te apii. Te mea openga, e tauturu i taau tamariki kia kite e akapeea ratou me taangaanga i ta ratou i apii. Te taangaanga anga i ta ratou i apii ka akaketaketa i te akakoroanga tikai o te apii. Kua akakite tetai taeake mapu e: “Me kare au i kite i te puapinga no taku e apii ra, e ngata ana iaku kia inangaro i te apii i te reira. Me ka rauka ra iaku uaorai te taangaanga i te reira, ka inangaro au kia marama au i te reira.” Me kite te au mapu i te apii ei mataara no te akatupu i tetai akakoroanga, ka mou rai to ratou manako ki te reira. Ka akamata i reira ratou i te akatupu i te inangaro no te apii, mei ta ratou rai e inangaro ana i te tatau.

Tutaki Meitaki Rava Atu

Maata ua atu te au puapinga ka rauka mai me akatupuia te inangaro no te tatau ki roto i taau tamariki. Te puapinga i rauka i roto i te apii, te ngai angaanga, te au pirianga tangata, te marama no runga i te ao e noo nei tatou, e te akamou anga i te au pirianga aroa i rotopu i te metua e te tamaiti, tetai pae uao te reira, ma te kore e taiku atu i te merengo maata ta te tatau e te apii uaorai e akatupu ana.

Puapinga maata atu, ka riro te tu inangaro i te apii ei tauturu i taau tamariki kia riro mai ei au tangata mataku i te Atua. Te inangaro i te apii, ko te taviri ia no te akamaeu i to ratou manako e te ngakau e rauka ai “te tipoto, e te tiroa, e te oonu, e te teitei” o te tuatua mou o te Tuatua Tapu. (Ephe. 3:18) E tika, e e maata te ka anoanoia te au metua Kerititiano kia apii ki ta ratou tamariki. I te au metua e akapou ra i to ratou taime e te maroiroi, e te rave i te au mea ravarai i te tauturu i ta ratou tamariki kia akamata vave ua i tetai oraanga meitaki, irinaki ratou e i te openga ka iki ta ratou tamariki kia riro mai ei aronga akamori ia Iehova. Ka riro te apiianga i taau tamariki i te au tu meitaki o te apii ei oronga i tetai mataara no ratou kia akamou i tetai pirianga meitaki ki te Atua. E tumuanga tau tikai toou i reira, kia pure e kia umuumu i te au akameitakianga a Iehova ia koe e tauta ra i te akatupu i te inangaro no te tatau e te apii ki roto i taau tamariki.​—Mase. 22:6.

 [Pia/​Tutu i te kapi 26]

Tatauanga . . .

• Akapapu e kia papa ua tetai au puka

• Tatau maata

• Akamaroiroi kia piri mai ki roto

• Uriuri i taau i tatau

• Akamaroiroi i taau tamariki kia tatau mai kia koe

• Akamaroiroi i taau tamariki kia ui mai i tetai au uianga

Apiianga . . .

• Akanoo te metua i tetai akaraanga meitaki

• Tereni i taau tamariki i te . . .

○ akamou i te manako

○ akaaiteite

○ akamarama poto ua

○ akara akaou

○ tata i tetai au manako

• Akatupu i te au turanga ka akamaroiroi i te apii

• Akaketaketa i te puapinga o te apii