‘E Akamaroiroi rai i te Apii’

“TE KARANGA nei oki kotou e, ko au te Orometua, e te Atu: e tuatua tika oki ta kotou; koia tikai oki au nei.” (Ioa. 13:13) Na roto i taua au tuatua ra, kua akapapu atu a Iesu ki tana au pipi e e puapii tana angaanga. I reira, i mua ua ake ka aere ei a Iesu ki te rangi, kua akaue aia i tana au pipi: “E teianei, ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.” (Mata. 28:19, 20) Muri mai, kua akaketaketa katoa a Paulo i te puapinga o te riro anga ei au puapii no te Tuatua a te Atua. Kua ako aia i te tangata pakari Kerititiano ko Timoteo: “E akamaroiroi rai i te tatau i te tuatua, e te ako, e te apii, . . . Ka akamanako tikai i teianei au tuatua; ko taau ïa e rave auraka e tivata; kia kite te tangata katoa i te tupu anga o toou kite.”​—1 Timo. 4:13-15.

Teia tuatau, tei aite rai ki taua taime ra, e tuanga puapinga te apii no ta tatou angaanga orometua e te au uipaanga Kerititiano. Akapeea tatou me akamaroiroi ua atu rai i te apii, e na teea au mataara e tauturu ei teia ia tatou kia meitaki atu me kore kia uua, ei au puapii no te Tuatua a te Atua?

Aru i te Puapii Maata

Te tu e apii ana a Iesu, mea marekaia e te manganui e akarongo maira iaia. Ka akara ana i te akakeuanga a tana au tuatua ki runga i te aronga i aere ki te tunako i Nazareta. Kua rekoti te tangata tata Evangeria ko Luka e: “Kua akatika anake atura ratou iaia, umere atura i te tuatua meitaki no roto mai i tona vaa.” (Luka 4:22) Kua aru te au pipi a Iesu i te akaraanga a to ratou Pu. Ae, kua akamaroiroi te apotetoro ko Paulo i tona au oa Kerititiano: “E aru mai kotou iaku mei iaku katoa i aru i te Mesia nei.” (1 Kori. 11:1) No tei aru i te au ravenga a Iesu, kua uua tikai a Paulo i ‘te apii anga i te ngai tangata, i tera are i tera are.’​—Anga. 20:20.

Apii Anga ‘i te Ngai Okoanga’

Tetai akaraanga puapinga o to Paulo tu karape i te apii i te ngai tangata, tei roto te reira ia Angaanga pene 17. Ka tatau tatou i reira, no runga i tona tere ki Atene, i Ereni. Te ngai ua atu ka akara a Paulo i roto i taua oire ra​—i runga i te mataara, i te au ngai tangata—​e au itoro tetai i reira. No reira rai a Paulo i manamanata ei! Noatu te reira, kua rauka rai iaia i te akakoromaki. Tera ra, “kua māro atura aia ki te ngati Iuda i roto i te sunago ra, . . . e i tana oki i aravei atu i te okoanga ra, kare e rā i vata.” (Anga. 17:16, 17) E akaraanga meitaki tikai no tatou! Na te tuatua atu anga ki te au tu tangata anake, eiaa na roto i te tu akaapaapa, mari ra na roto i te tu akangateitei, ka akamaroiroi teia i tetai aronga kia akarongo mai e kia akaatea mai mei te tuikaaanga ki te akonoanga pikikaa.​—Anga. 10:34, 35; Apo. 18:4.

Manganui te aronga ta Paulo i tutu atu i te ngai okoanga, kare i ariki mai. Tetai aronga kite karape tei akarongo mai iaia, kare to ratou irinakianga i au ki te au tuatua mou tana i tutu atu. Me aro atu a Paulo i te au taumaroanga, e akamanako meitaki ana aia i ta ratou tuatua. Karanga tetai papaki e e “tangata tuatua tarevakaua” aia (e “tangata koikoi ua”). Ko etai kua karanga e: “E mea tu demoni ke tana e tuatua aere nei.”​—Anga. 17:18.

Inara, kare a Paulo i taitaia ana no te au tuatua aviri a te aronga e akarongo maira iaia. Mari ra, i te patiia anga aia kia akamarama atu i tana apiianga, kua akariro a Paulo i taua atianga ra ei rave i tetai akoanga maramarama ua tei akaari meitaki mai tona tu karape i te apii. (Anga. 17:19-22; 1 Pete. 3:15) Ka akara akaou tatou i te tuanga keke o tana akoanga, e kia tamou mai te apiianga ei tauturu ia tatou kia akameitaki atu i to tatou tu karape i te apii.

 Tuatua i te Au Manako Tei Inangaroia

Kua akakite a Paulo: ‘E te au tangata Atene nei, e maata ua to kotou mātau i te akamori i te demoni, kua kite io nei au. Iaku oki i aaere ua io nei e te tutaka ua anga atu i ta kotou e akamori nei, kite atura au i tetai atarau e te tuatua i tataia ki rungao, Na te Atua Kitea Kore. Ko ta kotou oki e akamori ua nei ma te kite kore iaia, koia taku e akakite atu kia kotou nei.’​—Anga. 17:22, 23.

E akamanako mari ana a Paulo i te au mea ravarai takapini iaia. Mei te au mea tana i tirotiro mata aere, e maata tana i kite mai no runga i te aronga e ako atura aia. E apiianga katoa ta tatou ka mou mai no runga i te pu ngutuare me akara meitaki tatou. Ei akaraanga, e maata ta te au apinga kangakanga i roto i te aua, me kore ta te au akairo i runga i te pa ka akakite mai. Me kua nakiro ia tatou e eaa te turanga o te pu ngutuare, ka rauka ia tatou kia akamanako meitaki e eaa ta tatou ka tuatua e ka akapeea tatou i te tuatua anga.​—Kolo. 4:6.

E karere akamaroiroi ta Paulo kare e akaapaapa. Kua kitea mai iaia e ko te “akamori” a to Atene kare i akatumuia ki runga i te kite tika tikai. Kua akakite taka meitaki atu a Paulo e ka akapeea ratou te oronga anga i ta ratou akamorianga ki te Atua mou. (1 Kori. 14:8) E mea puapinga tikai kia tuatua taka meitaki tatou e te papu tikai me tutu i te tuatua meitaki o te Patireia!

Kia Matakite e Eiaa e Papakitai

Kua na ko atu rai a Paulo e: “Ko te Atua i anga i teianei ao, e te apinga tini ravarai i roto, te Atu o te rangi ma te enua nei, kare ïa i noo i roto i te nao i angaia e te rima tangata nei; Kare ana puapinga i rauka i te rima tangata mei te mea e, i toe tetai mea ngiti iaia, koia uaorai oki tei oronga mai i te ora, e te aʼo, e te au mea katoa, ki te au mea ravarai.”​—Anga. 17:24, 25.

Te taki ra a Paulo i te manako kia Iehova ko Tei Oronga mai te Ora no tatou, te rave anga i te reira ma te matakite i te taiku anga iaia e ko “te Atu o te rangi ma te enua nei.” E tikaanga ngateitei tikai kia tauturu i te aronga ngakau tika mei te au turanga tukeke mai o te akonoanga e te au peu, kia marama e ko te Atua ko Iehova te tumu o te ora!​—Sala. 36:9.

Aru mai kua akakite a Paulo: “E nana i anga i te tangata i te pa enua katoa nei i te toto okotai ra, . . . e kua akono i te tuatau i akono takereia atu, e te kotinga o to ratou kainga; Kia kimi ratou i te Atu, peneiake ko te aa atu ratou iaia, e kitea atu, kare ra aia i atea ke atu ia tatou katoa nei.”​—Anga. 17:​26, 27.

Na te tu e apii ana tatou, ka rauka ia tatou te akaari e mei teaa te tu o te Atua ta tatou e akamori nei. Ma te kore e papakitai, kua akatika a Iehova i te tangata o te pa enua ravarai kia “aa atu ratou iaia, e kitea atu.” Pera rai tatou, i te tuatua ma te papakitai kore ki te katoatoa rava ta tatou ka aravei. E tauta ana tatou i te tauturu i te aronga tei irinaki i Tei Anga mai kia akatupu i te pirianga vaitata kiaia, te ka taki atu ki te au akameitakianga mutu kore. (Iako. 4:8) Ka akapeea ra tatou me tauturu i te aronga tei ekoko i to te Atua vaianga? Ka aru tatou i te akaraanga a Paulo. Akara ana eaa tana i tuatua.

“Nona oki to tatou ora, e i aaere ei, e i noo ei oki; mei ta e tokotai puke atu peʼe no kotou i tuatua maira e, ‘E tamariki katoa tatou nana.’ E teianei, e tamariki tatou na te Atua ra, kare e tika kia manako tatou e, e aite te Atua i te auro, e te ario, e te toka.”​—Anga. 17:28, 29.

 Kua umuumu a Paulo kia akarongo mai te tangata e kia ariki mai i tana tuatua na te taiku anga i te au atu pee ta to Atene i kite e i ariki. Kia umuumu rai tatou i te tuatua i te au manako tei inangaroia na te uriurianga i ta tatou i kite e ka ariki mai te aronga e akarongo maira ia tatou. Ei akaraanga, ka irinakiia rai ta Paulo akatutuanga i roto i tana reta ki to Epera, i teia tuatau: “E akatu oki to te au are ravarai nei; ko tei akatu ra i te au mea katoa, ko te Atua ïa.” (Ebe. 3:4) Na te akamaroiroi anga i te pu ngutuare kia akamanako i teia akatutuanga ngoie ua e tauturu ia ratou kia ariki e e tika ta tatou tuatua. Akara ana i tetai tuanga uua o te apiianga i roto i ta Paulo akoanga​—te akakeuanga.

Akaketaketa i te Turanga Rapurapu

Kua akakite a Paulo e: “Kare atura te Atua i akono i taua au tuatau kite kore ra; e teianei ra, te akaue mai nei aia i te tangata ravarai e tataraara, auraka ei ngai toe: No te mea kua akonoia e ia te ra e akava mai ei aia i to te ao katoa nei ma te tuatua-tika, na te tangata i akonoia e ia ra.”​—Anga. 17:30, 31.

No te mea kua akatika te Atua i te kino kia vai mai, kua oronga mai aia i te tuatau no tatou kia akaari kiaia e eaa tikai to roto i to tatou ngakau. Mea puapinga kia akakite tatou i te turanga rapurapu o to tatou tuatau, e kia tuatua ma te papu tikai no runga i te au akameitakianga a te tutaraanga o te Patireia, tei vaitata roa mai i teianei.​—2 Timo. 3:1-5.

Tuketuke te Ariu Mai Anga

“Kite akera ra ratou i te tuatua i te tuakaouanga i tei mate ra, kua taitoito maira tetai pae; na ko maira oki tetai pae, E akarongo akaou atu matou ia koe i tenana tuatua. Aere aturā Paulo mei rotopu atu ia ratou. Kua akarongo maira tetai pae tangata, e kua kapiti maira kiaia.”​—Anga. 17:32-34.

E ariu vave mai ana tetai aronga ki ta tatou apiianga; penei ka anoanoia tetai tuatau no etai kia irinaki mai i ta tatou tuatua. Inara me ka riro ta tatou maramaanga taka ua e te mama i te tauturu i tetai tangata okotai kia rauka te kite tika tikai ia Iehova, kare aiteia to tatou rekareka kia taangaangaia e te Atua kia akavaitata mai te tangata ki tana Tamaiti!​—Ioa. 6:44.

Au Apiianga no Tatou

Ia tatou e akamanako ra i ta Paulo akoanga, e maata ta tatou ka kite no runga i te akamarama anga i te au tuatua mou o te Pipiria ki etai ke. Me rauka ia tatou te tikaanga kia oronga i te akoanga ki te katoatoa i roto i te putuputuanga, kia tauta tatou i te aru ia Paulo na te taangaanga anga i te au tuatua tau te ka tauturu i tetai tangata irinaki kore kia marama e kia ariki i te tuatua mou o te Pipiria. Ka inangaro tatou kia akakite i te tuatua mou ma te taka meitaki, inara kia matakite tatou eiaa e akavaavaa i te irinakianga o tetai ua atu tangata irinaki kore i reira. I taua taime rai, i roto i ta tatou angaanga tutu aere ki te katoatoa, e tauta tatou i te akaari i te tu te ka akaariu mai e te tu tau. Me akapera, te aru tika ra tatou i te ako a Paulo kia ‘akamaroiroi rai tatou i te apii.’

[Tutu i te kapi 30]

Ta Paulo apiianga, taka meitaki, mama ua, e te tau

[Tutu i te kapi 31]

E aru tatou ia Paulo na te akamanako anga i te manako ngakau o te aronga e tutu atura tatou