‘Mei Teaa ra to Kotou Tu e Tikaʼi’

“E teianei ka pou anake taua au mea katoa nei, mei te aa ra to kotou tu e tikaʼi i te tuatua tapu e te akono i te Atua.”​—2 PETE. 3:11.

1. Eaa ra te rua o te reta a Petero i riro ei ei akamaroiroianga tau tikai ki te au Kerititiano i tona tuatau?

TE TATAANGA te apotetoro ko Petero i te rua o tana reta akauruia, kua akakoromaki ana te putuputuanga Kerititiano i te au takinokino anga, kare ra teia i akaparuparu ana i to ratou maroiroi me kore i akamarie mai i to ratou tupuanga. No reira kua taangaanga te Tiaporo i tetai ravenga ke, tei puapingaia i te au taime ravarai i mua ana. Mei tei akakiteia mai e Petero, kua tauta a Satani i te akaturori i te iti tangata o te Atua na roto i te au orometua pikikaa “kua ki to ratou mata i te akaturi” e e “ngakau mātau ua to ratou i te noinoi apinga.” (2 Pete. 2:1-3, 14; Iuda 4) No reira, kua riro mai te rua o ta Petero reta ei akamaroiroianga ngakau tae kia vai akarongo mou ua.

2. Eaa te manako maata i roto ia 2 Petero pene 3, e eaa te au uianga ka ui tatou kia tatou uaorai?

² Kua tata a Petero e: “Te manako nei oki au e mea tika, i toku noo anga i teianei puakapa, kia akamatutu atu ia kotou, i te akakite akaou anga atu rai; Kua kite oki au e kua vaitata au i te kopae i teianei puakapa . . . E akamaroiroi oki au kia vai marie ua mairai teianei au tuatua i roto i to kotou manako kia riro ke au ra.” (2 Pete. 1:13-15) Ae, kua kite a Petero e te vaitata maira tona mate, inara te inangaro ra aia kia akamaara uaia rai tana akamaaraara anga tau tikai. E tika rai, kua riro mai te reira ei tuanga no te Pipiria e ka rauka ia tatou katoatoa i te tatau i te reira i teia tuatau. E puapinga tikai te pene 3 o te rua o ta Petero reta kia tatou, no te mea te akamanako maata te reira i “te au rā openga” o teia akatereanga o te au mea nei e te takoreanga o te rangi e te enua akatutuanga. (2 Pete. 3:3, 7, 10) Eaa te akoanga ta Petero e oronga maira no tatou? Akapeea tatou i te taangaanga anga i tana akoanga i te tauturu ia tatou kia rauka mai to Iehova marekaanga?

3, 4. (a) Eaa te tuatua akakeu anga ta Petero i akakite mai, e eaa te akamatakiteanga tana i oronga mai? (e) Eaa nga tumu manako e toru ka akamanako tatou?

³ I muri ake i te akakite anga mai i te takoreia anga te ao o Satani, kua tuatua a Petero e: “Mei  te aa ra to kotou tu e tikaʼi i te tuatua tapu e te akono i te Atua.” (2 Pete. 3:11, 12) Te taka meitaki ra e, kare aia e ui ra i te uianga inara te akakite ra i tetai tuatua akakeu anga. Kua kite a Petero e ko te aronga anake ua te rave ra i to Iehova anoano e te akaari ra i te au tu o te Atua te ka ora mai i “te rā akaoko anga” e aere mai nei. (Isa. 61:2) No reira, kua tuatua katoa te apotetoro e: “E tenana, e aku au akaperepere e, kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra [te au puapii pikikaa], e inga iora kotou i to kotou maroiroi anga na.”​—2 Pete. 3:17.

⁴ Te riro anga e ko tetai aronga tei ‘kite ana i teianei au mea,’ kua kite a Petero e i te au ra openga, kia matakite tikai te au Kerititiano e kia akono tamou ratou i to ratou tu tiratiratu. I muri mai, kua akamarama meitaki mai te apotetoro ko Ioane i te tumu. Kua kite ana aia te uriia anga mai a Satani mei te rangi e “e riri maata” tona i te aronga “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apo. 12:9, 12, 17) Ka autu te au tavini tiratiratu akatainuia o te Atua ma to ratou au oa akarongo mou te “mamoe ke atu.” (Ioa. 10:16) Akapeea ra tatou tataki tai? Ka rauka ainei ia tatou i te akono tamou i to tatou tu tiratiratu? Ka tauturuia tatou i te rave i te reira me tauta tatou (1) i te akatupu i te au tu o te Atua, (2) te vai topata kore anga e te apa kore i te pae akono tau e te pae vaerua, e te (3) te manako tau tikai anga i te au timataanga. Ka akamanako ana tatou i teia au tumu manako.

Akatupu i te Au Tu o te Atua

5, 6. Eaa te au tu ka aruaru tatou i te akatupu, e eaa i anoanoia ai te ‘tautaanga pakari’?

⁵ Te akamataanga i te rua o tana reta, kua tata a Petero e: “Ka akamaroiroi ua [me kore “tauta pakari,” NW] i te kapiti katoa to kotou akarongo ki te mataku kore; e te mataku kore oki, ki te kite; Te kite oki, ki te noo marie; te noo marie, ki te akakoromaki; te akakoromaki oki, ki te akono i te Atua; Te akono i te Atua oki, ki te aroa taeake; te aroa taeake oki, ki te aroa i te tangata katoa. E tei ia kotou te reira au mea, e te maata ra, na te reira e akakite e, kare kotou i te akatau e te uua kore i te kite i to tatou Atu ia Iesu Mesia ra.”​—2 Pete. 1:5-8.

⁶ E tika rai, te anoanoia ra te ‘tautaanga pakari’ kia o atu ki roto i te au angaanga te ka tauturu ia tatou kia akatupu i te au tu o te Atua. Ei akaraanga, te anoanoia ra te tautaanga kia aere ki te au uipaanga katoatoa a te Kerititiano, kia tatau i te Pipiria i te au ra ravarai, e kia akono tamou i tetai porokaramu apii meitaki naau uaorai. E te umuumuia ra te angaanga pakari e te parani meitaki anga kia rave putuputuia te Akamorianga a te Ngutuare i te aiai, ma te mataora e te puapinga tikai. Me rave putuputu tatou i tetai peu matauia e te meitaki, ka mama ua te reira​—me kite tikai tatou i te au akameitakianga.

7, 8. (a) Eaa ta tetai pae i tuatua ana no runga i te Akamorianga a te Ngutuare i te aiai? (e) Akapeea kotou i te puapinga anga mei ta kotou akamorianga a te ngutuare?

⁷ No runga i te akanoonooanga no te akamorianga a te ngutuare, kua tata tetai tuaine e: “Kua tauturu mai te reira ia matou kia kite i te au tumu manako e manganui.” Kua tuatua tetai e: “E tika rai, kare au i inangaro ana kia akamutu te apii puka. E uipaanga reka tikai te reira naku. I teianei, ia matou e rave ra i ta matou Akamorianga a te Ngutuare i te po, kua kite mai au e te kite ra a Iehova eaa ta matou e anoano ra e te tuatau e anoano ra matou i te reira.” Kua akakite tetai pu ngutuare e: “Kua tauturu maata mai te akamorianga a te ngutuare ia maua. E mea puapinga tikai te rauka anga tetai uipaanga tei akatanotanoia ki to maua turanga tikai ei nga tokorua akaipoipo! Kite mai maua e te meitaki ua atura to maua akaari anga i te ua o te vaerua tapu, e te maata atura to maua rekareka i roto i ta maua angaanga orometua.” Kua tuatua tetai pu ngutuare e: “Te rave nei te tamariki i ta ratou uaorai kimikimi anga e e maata atu ta ratou i kite mai​—e te mataora ra ratou i te reira. Te tauturu ra teia akanoonooanga kia maata atu to matou irinaki anga e te kite maira a Iehova i to matou manamanata  e te pau maira i ta matou pure.” Te manako akapera ra ainei koe no runga i teia au mea pae vaerua umere no ko mai i te Atua?

⁸ Auraka e akatika i te au mea rikiriki kia tamanamanata i te akamorianga a te ngutuare. Kua tuatua tetai nga tokorua akaipoipo e, “I te au po Paraparau no nga epetoma e a i topa, kua tupu mai tetai apinga i roto i to matou ngutuare e mei akamutu rai matou i te rave i ta matou apii, inara kare matou i akatika ana kia tamanamanataia mai e te reira.” E tika, i tetai au taime ka akatanotano koe i taau akapapaanga. Noatu rai, e tauta kia kore e akakoreia ta kotou Akamorianga a te Ngutuare i te aiai​—kare katoa no tetai epetoma!

9. Akapeea a Iehova i te tauturu anga ia Ieremia, e eaa ta tatou ka kite mai mei tona akaraanga?

⁹ Kua riro te peroveta ko Ieremia ei akaraanga meitaki no tatou. Kua anoano aia i te tauturu anga pae vaerua tei rauka mai iaia no ko mai ia Iehova e kua ariki maata tikai i te reira. Kua tauturu taua akamaroiroi anga ra iaia kia tutu aere ma te akakoromaki ki te au tangata kare e ariu mai ana. ‘Te tuatua a Iehova ra kua riro mei te ai ka ra kua popaniia ki roto i toku au ivi,’ i karanga ai aia. (Iere. 20:8, 9) Kua tauturu katoa te reira iaia kia akakoromaki i te au tuatau ngata tei tupu mai te takoreia anga a Ierusalema. I teia tuatau, kua rauka ia tatou te katoaanga o te Tuatua tataia a te Atua. Me apii maroiroi tatou i te reira e te akamanako anga i te au manako o te Atua, mei ia Ieremia rai, ka akakoromaki tatou ma te rekareka i roto i te angaanga orometua, te vai akarongo mou anga i roto i te au timataanga, e te vai viivii kore anga i te pae akono tau e te pae vaerua.​—Iako. 5:10.

Kia Vai “Topata Kore, e te Apa Kore”

10, 11. Eaa ra tatou ka akamaroiroi ua atu ei kia vai “topata kore, e te apa kore,” e eaa ta te reira e umuumu maira ia tatou?

¹⁰ Ei au Kerititiano, kua kite tatou e te noo nei tatou i te tuatau openga. No reira, kare tatou e poitirere e te rave maata nei teianei ao i te au mea ta Iehova e rikarika ra, mei te noinoi, te ainga viivii, e te tu kino. Kia tau ki ta Apokalupo 2:13, 14, ka akataka potoia ta Satani ravenga na roto i teia tu: ‘Me kare te au tavini o te Atua e tamatakuia, penei ka rauka i te akaturori ia ratou.’ No reira, e akamanako tikai tatou i ta Petero akamatakiteanga aroa e: “Ka akamaroiroi, kia rokoia mai kotou e [te Atua] ma te au, ma te topata kore, e te apa kore.”​—2 Pete. 3:14.

¹¹ I konei te ripiti nei a Petero i tana akoanga i mua atu ana na te tuatua anga e kia “tauta pakari.” Te taka ua ra e, te kite nei a Iehova​—tei akauru ia Petero kia tuatua i taua au manako ra—​e te anoanoia ra tatou kia tauta kia vai “topata kore, e te apa kore,” kare i akaviiviiia e te ao o Satani. Te o maira te tauta anga i te paruru i to tatou ngakau kia kore e rave i te au anoano tarevake. (E tatau ia Maseli 4:23; Iakobo 1:14, 15.) Te kapiti katoa maira te reira i te patoi ngaueue kore anga i te aronga e poitirere ra no runga i te tu o to tatou oraanga Kerititiano e ‘te akakino ra ia tatou.’​—1 Pete. 4:4.

12. Eaa te akapapu anga ta tatou ka kite mai i roto ia Luka 11:13?

¹² No to tatou tu apa nei, e ngata tikai i te rave i te mea tika. (Roma 7:21-25) Te irinaki nei tatou e ka autu tatou me uri atu kia Iehova, tei oronga aroa mai i te vaerua tapu ki te aronga te pati ngakau tae ra kiaia. (Luka 11:13) Te akatupu ra taua vaerua ra i te au tu te akamareka ra i te Atua e te tauturu ra ia tatou kia autu atu i te  au akavareanga e te au timataanga e tupu ra i roto i te oraanga, te ka maata atu e vaitata maira te ra o Iehova.

Ka Akaketaketa te Au Timataanga ia Koe

13. Me tupu mai te au timataanga i roto i to tatou oraanga, eaa te ka tauturu ia tatou kia akakoromaki?

¹³ Ia tatou e noo ra i roto i teia akatereanga taito o te au mea nei, ka tupu ua rai te au timataanga tukeke. Ma te kore e akamanako taitaia, eaa ka kore ei e akamanako i te au timataanga ei atianga no te akapapu anga i toou aroa ki te Atua e te akaketaketa anga i toou akarongo kiaia e ki tana Tuatua? Kua tata te pipi ko Iakobo e: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.” (Iako. 1:2-4) Kia maara katoa ra e te ‘kite ra a Iehova i te akaora i te aronga akono i te Atua i roto i te timataanga.’​—2 Pete. 2:9.

14. Akapeea te akaraanga o Iosepha i te akamaroiroi anga ia koe?

¹⁴ E akamanako ana i te akaraanga o te tamaiti a Iakoba ko Iosepha, tei okoia e tona au tuakana ei tuikaa. (Gene. 37:23-28; 42:21) Kua kore ainei to Iosepha akarongo no taua angaanga kino ra? Kua riri ainei aia i te Atua no te akatika anga i te kino kia tupu kiaia? Kua pau taka meitaki mai te Tuatua a te Atua e kare! Kare ra e ko te opengaia o to Iosepha timataanga. I muri mai, kua akaapa pikikaaia aia no te tautaanga i te rave i te tauati, e kua tukunaia ki roto i te are auri. Kua akamori ngaueue kore atu rai aia i te Atua. (Gene. 39:9-21) Inara, kua tuku aia i te au timataanga i te akaketaketa iaia, e kua tutaki maataia aia no runga i teia.

15. Eaa ta tatou ka kite mai mei te akaraanga o Naomi?

¹⁵ E tika rai, ka akamaromaroa e ka akataitaia te au timataanga ia tatou. Penei kua manako akapera rai a Iosepha i tetai au taime. Kua manako pera katoa rai tetai au tavini akarongo mou o te Atua. E akamanako ana ia Naomi, tei takake atu tana tane e tana nga tamariki tamaroa. “Auraka au kia tuatuaia ia Naomi,” i karanga ai aia. “Kia tuatuaia ra au ia Mara; e tumatetenga maata oki ta te Mana katoatoa i tuku mai iaku nei.” (Ruta 1:20, 21) E tu natura e te marama uaia atura to Naomi manako. Mei ia Iosepha rai, kare aia i akaturoriia i te pae vaerua e kare katoa i ngaueue kore ana tona tu tiratiratu. Kua tutaki mai a Iehova i taua vaine akaperepere ra. (Ruta 4:13-17, 22) Tei maata atu, i roto i te enua Parataito e aere maira, ka takore aia i te au kino ravarai ta Satani e ta tona ao kino i akatupu. “Kare oki te muatangana ra e maaraia, kare e akamanako akaouia atu.”​—Isa. 65:17.

16. Eaa to tatou tu no runga i te pure, e no teaa ra?

 ¹⁶ Noatu eaa te au timataanga ka tupu mai kia tatou, ka tauturu te aroa o te Atua ia tatou. (E tatau ia Roma 8:35-39.) Me kare a Satani e akamutu i te tauta i te akaparuparu ia tatou, ka puapinga kore ua aia me “akono meitaki” tatou e me “matakite, ma te pure.” (1 Pete. 4:7) Kua tuatua a Iesu e: “E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.” (Luka 21:36) Na te ako mai anga ia tatou kia “tamou tikai i te pure,” te akakite maira a Iesu e ko te taime teia kia akamanako meitaki tatou i to tatou turanga i mua iaia e tona Metua. Te aronga anake ua e turanga ariki meitakiia to ratou te ka ora atu i te ra o Iehova.

Kia Vai Maroiroi i Roto i ta Iehova Angaanga

17. Me te ngata ra taau ngai angaanga tutuanga, akapeea koe e puapinga ai mei te akaraanga meitaki o te au peroveta i taito?

¹⁷ Te piri anga ki roto i te au angaanga pae vaerua te akamaroiroi ra ia tatou. Te akamaara maira teia i ta Petero au tuatua e: “Mei te aa ra to kotou tu e tikaʼi i te tuatua [“au angaanga,” NW] tapu e te akono i te Atua.” (2 Pete. 3:11) Ko te au angaanga maata rava atu koia oki ko te akakitekite anga i te tuatua meitaki. (Mata. 24:14) E tika rai, te riro ra te angaanga tutuanga ei akaaoanga i tetai au ngai, penei no te inangaro kore me kare no te patoianga me kore no te maata rava te angaanga a te tangata ma te au manamanata o te oraanga i te au ra ravarai. Kua akakoromaki katoa rai te au tavini o Iehova i taito i taua au tu ra. Inara, kare rava ratou i tuku ana i te au i te oki ua anga “i tera rā, i tera rā” ma ta ratou karere tei orongaia mai e te Atua. (2 Para. 36:15, 16; e tatau ia Ieremia 7:24-26.) Eaa tei tauturu ia ratou kia akakoromaki? Te akamanako ra ratou i ta ratou tukuanga angaanga mei ta Iehova e manako ra, kare mei ta teianei ao. Pera katoa, te akamanako ra ratou i te reira ei akangateitei anga maata i te apai anga i te ingoa o te Atua.​—Iere. 15:16.

18. Eaa ta te angaanga tutuanga o te Patireia ka akatupu no te tuatau ki mua no te akangateitei anga i te ingoa o te Atua?

¹⁸ E turanga ngateitei katoa to tatou no te akakitekite anga i te ingoa o Iehova e tona akakoroanga. E akamanako ana i teia: No ta tatou angaanga tutuanga tikai, kare e rauka i te au enemi o te Atua i te tuatua e kare rava i akakiteia ana kia ratou no runga iaia e tona akakoroanga me akava aia ia ratou. E tika rai, mei ia Pharao i taito ra, ka kite mai ratou e ko Iehova te ka tamaki atu ia ratou. (Exo. 8:1, 20; 14:25) I taua taime rai, ka akangateitei a Iehova i tona au tavini akarongo mou na te akamarama meitaki tikai anga e ko ratou tikai tona au komono.​—E tatau ia Ezekiela 2:5; 33:33.

19. Akapeea tatou i te akaari anga e te inangaro ra tatou i te taangaanga meitaki i te akakoromaki maata o Iehova?

¹⁹ Te tae anga ki te openga o te rua o tana reta, kua tata a Petero ki tona au taeake irinaki e: “[“E tamanako ana,” NW] kotou i te akakoromaki maata o to tatou Atu ra, ko te ora ïa.” (2 Pete. 3:15) Ae, e taangaanga meitaki ua atu rai tatou i te akakoromaki maata o Iehova. Akapeea ra? Na te akatupu anga i te au tu te akamareka ra iaia, na te vai ‘topata kore anga e te apa kore,’ na te akamanako tau anga i te au timataanga, e na te piri maroiroi anga ki roto i te angaanga tutuanga o te Patireia. Na te rave anga i te reira, te tuku ra tatou ia tatou uaorai ki roto i te au akameitakianga mutu kore te piri atura ki “te rangi ou e te enua ou.”​—2 Pete. 3:13.

Maara Ainei ia Koe?

• Akapeea tatou i te akatupu anga i te au tu o te Atua?

• Akapeea tatou i te vai ‘topata kore anga e te apa kore’?

• Eaa ta tatou i kite mai mei ia Iosepha raua ko Naomi?

• Eaa ra te piri anga ki roto i te angaanga tutuanga i riro ei ei akangateitei anga maata?

[Au Uianga Apii]

[Tutu i te kapi 9]

Eaa te ka tauturu ia kotou e te au tane kia akatupu i te au tu o te Atua i roto ia kotou e to kotou ngutuare tangata?

[Au Tutu i te kapi 10]

Eaa ta tatou i kite mai te autu anga a Iosepha i te au timataanga?