Piri Pu Tikai ki Roto i te Kokoti Anga Maata Pae Vaerua

‘Kia maata te rave anga i te angaanga a te Atu.’​—1 KORI. 15:58.

1. Eaa te patianga ta Iesu i oronga ki tana au pipi?

IA RATOU e aere ra na roto ia Samaria i te openga o te mataiti 30 T.N, kua akangaroi a Iesu i ko i tetai rua vai i te pae i te taoni, ko Sikara. I reira kua tuatua aia ki tana au pipi e: “Ka akateitei i to kotou mata, ka akara i te au koro ra; kua teatea ïa i teianei kua mou.” (Ioa. 4:35) Te taiku ra a Iesu, kare ki te kokoti anga tikai, inara ki te akaputuputu anga pae vaerua o te au tangata tataki tai ngakau tika te ka riro mai ei au pipi nana. Te pati tikai ra aia i tana au pipi kia rave i te angaanga kokoti anga. E maata te angaanga ka raveia, poto ua ra te tuatau no te rave anga i te reira!

2, 3. (a) Eaa te akakite maira e tei roto tatou i te tuatau kokoti anga? (e) Eaa ta teia atikara ka akamanako?

² E aiteanga puapinga tikai ta Iesu au tuatua no te kokoti anga i to tatou tuatau. Tei roto tatou i te tuatau ‘kua teatea te mou’ no te kokoti anga i te au tangata i teianei ao. I te au mataiti ravarai, te orongaia nei te patianga ki te au tangata e mirioni ua atu kia apii i te au tuatua mou no te ora, e e tauatini ua atu au pipi ou tei papetitoia. E tikaanga manea to tatou kia o atu ki roto i te angaanga kokoti anga maata rava atu o te au tuatau katoa, i raro ake i te akaaere anga a te Pu o te mou, ko te Atua ko Iehova. Te ‘rave maata ra’ ainei koe i teia angaanga kokoti anga?​—1 Kori. 15:58.

³ I te tuatau o tana angaanga orometua e toru e te apa mataiti i runga nei i te enua, kua akapapa a Iesu i tana au pipi no ta ratou tuanga ei aronga kokoti anga. Ka akamanako teia atikara e toru apiianga puapinga ta Iesu i apii ki tana au pipi. Te akakite maira te apiianga tataki tai i tetai tu te puapinga tikai ra kia tatou, ia tatou e tauta ra i te rave i te ka rauka ia tatou i te akaputuputu mai i te au pipi i teia tuatau. Ka akamanako tataki tai ana tatou i teia au tu.

Puapinga Tikai te Tu Akaaka

4. Akapeea a Iesu i te akatutu mai anga i te tu puapinga no te tu akaaka?

⁴ E akamanako ana i te mea e tupu ra: Koi taumaro ua akera te au pipi e koai tei maata atu. Penei te kite uaia atura te manako irinaki kore e te tu riririri i runga i to ratou mata. No reira kua kapiki a Iesu i tetai tamaiti iti kia tu ki rotopu ia ratou. Te akara anga ki te tamaiti iti ra, kua tuatua aia e: “Ko te taakaaka iaia uaorai mei teianei tamaiti iti, koia te ka maata i te basileia o te ao ra.” (E tatau ia Mataio 18:1-4.) Ma te kore e manako mei teianei ao rai, tei akara i te tu o tetai tangata no tona mana, te apinga nui, e te taoonga, te anoanoia ra te au pipi kia marama e ko to ratou tu maata tei runga ia i te ‘taakaaka anga ia ratou uaorai’ i roto i nga mata o tetai ke. Ka akameitaki e ka taangaanga anake ua a Iehova ia ratou me akaari ratou i te tu akaaka tika tikai.

5, 6. Eaa koe ka taakaaka ai kia piri pu tikai atu ki roto i te angaanga kokoti anga? Akatutu mai.

⁵ Tae mai ki teia tuatau, e maata te aronga i teianei ao te akapou ra i to ratou oraanga i te aruaru anga i te mana, te apinga nui, e te taoonga. Tei tupu mai, e iti ua to ratou taime me kore kare e taime no te au anoano pae vaerua. (Mata. 13:22) Ei tuke ra, te mataora nei te iti tangata o Iehova i te ‘taakaaka ia ratou uaorai’ i roto i nga mata o tetai ke, kia rauka mai te akameitakianga e te arikianga a te Pu o te mou.​—Mata. 6:24; 2 Kori. 11:7; Phili. 3:8.

⁶ E akamanako ana i te akaraanga o Francisco, e tavini ana ei tangata pakari i Marike Apatonga. I tona mapuanga, kua akamutu aia i  te apii univetiti kia riro mai ei painia. “I muri ake i toku tapao anga no te akaipoipo,” i maara ai iaia, “ka rauka ua iaku tetai angaanga te ka oronga mai i te turanga tinamou maata i te pae moni kia maua ko taku vaine. Inara, kua iki maua i te akamama mai i to maua oraanga e te rave kapiti anga i te angaanga orometua tamou. I muri mai, te anau mai anga te tamariki, kua maata atu te au akaaoanga. Kua tauturu mai ra a Iehova ia maua kia akanoo ki ta maua ikianga.” Kua taopenga a Francisco e: “Kua tere atu ki te 30 mataiti, rekareka tikai au i te tavini anga ei tangata pakari, pera katoa tetai atu au tukuanga angaanga takake. Kare rava maua i tataraapa ana i te akono anga i tetai oraanga mama ua.”

7. Kua taangaanga ainei koe i te akoanga tei kiteaia i roto ia Roma 12:16, e eaa te ka tupu mai?

⁷ Me karanga koe e kare ki ‘te au mea teitei’ o teianei ao e te akatika anga ia koe uaorai kia ‘arite atu ki te au mea akaaka,’ ka rekareka katoa koe i tetai atu au akameitakianga e te au tukuanga angaanga i roto i te angaanga kokoti anga.​—Roma 12:16; Mata. 4:19, 20; Luka 18:28-30.

Ka Rauka te Tutaki Anga no te Angaanga Maroiroi

8, 9. (a) E akakite poto mai i te akatutuanga a Iesu no te au tareni. (e) Te riro tikai ra teia akatutuanga ei akamaroiroi anga kiaai ma?

⁸ Ko te angaanga maroiroi tetai tu ta tatou e inangaro ra kia piri pu tikai atu ki roto i te angaanga kokoti anga. Kua akatutu mai a Iesu i teia na roto i te parapore o te au tareni. * Ko taua akatutuanga ra, no runga i tetai tangata tei oronga i tana au apinga ki te nga tavini e toru, i mua ake ka aere ei aia ki tetai enua mamao. Kua rauka mai i te tavini mua e rima tareni, te rua e rua tareni; e te toru, e tai tareni. I muri ake te akaruke anga to ratou pu, kua angaanga maroiroi e te viviki te nga tavini mua e kua ‘oko aere atu’ i ta raua tareni. Ei tuke ra, e tangata “akatau” te toru o te tavini. Kua tanu aia i tana tareni i roto i te one. Te oki mai anga te pu, kua tutaki aia i te nga tavini mua na te iki anga ia raua ‘ki rungao i te au mea maata.’ Kua rave mai aia i te tareni tana i oronga atu ki te toru o te tavini e kua akaatea i taua tavini ra mei roto i tona kainga.​—Mata. 25:14-30.

⁹ Kare ekoko e ko toou inangaro tikai ko te aru anga i te au tavini maroiroi i roto i ta Iesu parapore e te piri pu tikai anga ki roto i te angaanga akariro anga i te tangata ei pipi. Akapeea me te kotinga pakari ra toou au turanga i taau e rave ra i teianei? Penei no te kino i te pae moni te maro ra ia koe kia angaanga roa atu no te akono anga i toou ngutuare. Me kore kare koe e mataora akaou ana i tetai oraanga maroiroi e te meitaki. Me ko tera te turanga, tei  roto i te parapore o te au tareni tetai karere akamaroiroi anga ia koe.

10. Akapeea te pu i roto i te parapore o te au tareni i te akaari mai anga i te tu manako tau, e eaa ra teia i riro ei ei akamaroiroi anga kia koe?

¹⁰ Akara ana e kua kite te pu i roto i te parapore i te au tu tukeke te ka rauka i tana au tavini tataki tai i te rave. Kua akakite mai aia i teia i te oronga anga aia i te au tareni “tei tau katoa i aua nga tangata ra.” (Mata. 25:15) Tei tapapaia, e maata atu ta te tavini mua i rave i ta te rua o te tavini. Inara, kua kite mai te pu i te au tautaanga maroiroi a teia nga tavini na te akakiteanga e e nga tavini “meitaki e te pikikaa kore” raua aiteite ua to raua tutakiia anga. (Mata. 25:21, 23) Pera katoa, te kite maira te Pu o te mou, te Atua ko Iehova, e ka tamanamanata mai toou turanga i taau ka rauka i te rave i roto i tana angaanga. Te kite ua maira aia i taau au tautaanga ngakau tae i te tavini iaia e ka tutaki tau mai aia ia koe.​—Mare. 14:3-9; e tatau ia Luka 21:1-4.

11. Akatutu mai e akapeea te angaanga maroiroi i roto i te au turanga ngata i te akatupu anga i te au akameitakianga maata.

¹¹ Te akaari maira te akaraanga o Selmira, e tuaine Kerititiano e noo ra i Paratiri, e ko te angaanga maroiroi anga i roto i te angaanga a te Atua, kare e tei runga i tetai turanga meitaki i roto i te oraanga. E 20 mataiti i topa, kua pupuiia te tane a Selmira e tetai aronga keikeia, tei akaruke mai kia utuutu aia i ta raua tamariki e toru. E angaanga roa ana aia ei vaine tama are e te roiroi i te aere mamao anga na runga i te apinga akaoro kua ki i te tangata. Noatu teia au turanga ngata, kua akanoonoo aia i tana au angaanga kia rauka iaia i te tavini ei painia tamou. I muri mai e rua ana nga tamariki tei piri mai kiaia ki roto i te angaanga painia. “Kua tere atu te au mataiti, kua apii au i te Pipiria ki tetai 20 tuma tangata, e kua riro mai ratou ei au mema no toku ‘pamiri,’” i akakite ei aia. “Tae mai ki teia ra, te mataora tikai nei au no to ratou aroa e te pirianga oa. E pirianga akaperepere te reira kare rava e rauka i te okoia ki te moni.” Kua tutaki tikai te Pu o te mou i ta Selmira tautaanga maroiroi!

12. Akapeea tatou i te akaari anga i te tu maroiroi i roto i te angaanga tutuanga?

¹² Me te kotinga ra te turanga o te oraanga i teianei i toou taime ka akapou koe ki roto i te angaanga orometua, ka rauka rai ia koe i te akamaata atu i taau angaanga kokoti anga na te akapuapinga anga i taau angaanga orometua. Me aru meitaki koe i te au manako tau i ko i te Uipaanga Tavini Anga o te epetoma, ka akameitaki mai koe i toou tu karape no te tutu aere anga e te rave anga i te au tu ou no te akakitekite anga. (2 Timo. 2:15) Me ka rauka, e akaruke i te au angaanga puapinga kore me kare e rave i te reira i tetai taime ke atu, kia turuturu ua atu rai koe i te au akanoonooanga no te angaanga tutuanga a te putuputuanga.​—Kolo. 4:5.

13. Eaa te taviri puapinga maata no te akatupu anga e te akono tamou anga i te tu maroiroi?

¹³ E akamanako ana e e tupu mai ana te angaanga maroiroi no roto mai i tetai ngakau ariki rekareka. (Sala. 40:8) Kua mataku te toru o te tavini tei taikuia i roto i ta Iesu parapore i tona pu, te akamanako anga iaia ei tangata tau kore e te maro maata. Tei tupu mai, kua tanu taua tangata ra i tana tareni, kare i taangaanga ana i te reira i te akamaata atu i te au apinga a tona pu. Kia kopae i taua tu manako kore ra, te anoanoia ra tatou kia akatupu e kia akono tamou i tetai pirianga vaitata ki te Pu o te mou, ko Iehova. E tuku i tetai taime no te apii e te akamanako oonu anga i tona au tu meitaki​—tona aroa, te akakoromaki, e te akaaroa. Na roto i taua tu ra, ka akakeuia toou ngakau kia rave i te ka rauka ia koe i roto i tana angaanga.​—Luka 6:45; Phili. 1:9-11.

“Kia Tapu Kotou”

14. Eaa te umuumuanga puapinga te ka aruia e te aronga te inangaro ra kia riro ei aronga kokoti anga?

¹⁴ Te taikuanga mei te au Tuatua Tapu Epera, te akakite maira te apotetoro ko Petero i to te Atua anoano no tona au tavini i runga nei i te enua, i te tuatua anga e: “Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra; Kua oti oki i te tataia e, ‘Kia tapu kotou; te tapu nei oki au.’” (1 Pete. 1:​ 15, 16; Levi. 19:2; Deu. 18:13) Te akataka maira teia akakiteanga e te anoanoia ra te aronga kokoti anga kia ma i te pae akono tau e i te pae vaerua. Ka rauka ia tatou i te aru i taua umuumuanga puapinga ra na te rave anga i te au takainga no te tamaanga, na roto i tetai tu akatutuanga. Akapeea me rave i te reira? Ma te tauturu anga a te tuatua mou a te Atua.

15. E mana to te tuatua mou a te Atua i te rave i teaa no tatou?

¹⁵ Kua akaaiteia te tuatua mou a te Atua ki tetai vai tamaanga. Ei akatauanga, kua tata te apotetoro ko Paulo e kua ma te putuputuanga o te au Kerititiano akatainuia i mua i te aroaro o te Atua, mei tetai vaine akaipoipo viivii kore rai a te Karaiti, tei oreiia ki ‘te orei anga vai a te tuatua ra, ma te tapu e te apa kore.’ (Ephe. 5:25-27) I mua atu ana, kua tuatua katoa a Iesu no runga i te mana tamaanga a te tuatua a te Atua, tana i akakitekite aere. Te tuatua anga ki tana au pipi, kua tuatua a Iesu e: “Kua mā ra kotou i tenana, i te tuatua taku i apii atu ia kotou.” (Ioa. 15:3) No reira, e mana to te tuatua mou a te Atua i te rave anga i te tamaanga i te pae akono tau e i te pae vaerua. Me akatika ra tatou i te tuatua mou a te Atua kia tama ia tatou na roto i teia tu ka ariki mai i reira aia i ta tatou akamorianga.

16. Akapeea tatou i te tama ua anga ia tatou uaorai i te pae vaerua e te tu akono tau?

¹⁶ No reira, kia riro mai ei aronga angaanga i roto i te angaanga kokoti anga a te Atua, e takore tatou na mua i te au peu viivii i te pae akono tau e te pae vaerua i roto i to tatou oraanga. Ae, e tau ei no teia tikaanga ei aronga angaanga kokoti anga, kia riro tatou ei akaraanga meitaki i te turuturu anga i to Iehova au turanga teitei i te pae akono tau e i te pae vaerua. (E tatau ia 1 Petero 1:14-16.) Mei ia tatou e tama ua ra i to tatou kopapa, e mea tau kia aru putuputu tatou i te akakeu anga tamaanga a te tuatua mou a te Atua. Te o maira te tatau anga i te Pipiria e te aere anga ki te au uipaanga Kerititiano. Te anoano katoaia ra kia taangaanga ngakau tae tatou i te au akamaaraara anga a te Atua i roto i to tatou oraanga. Na te rave anga i te reira ka tauturu ia tatou kia patoi atu i to tatou uaorai au tu ara e te kopae anga i te au akakeuanga kino a teianei ao. (Sala. 119:9; Iako. 1:21-25) Ae, e mea pumaana tikai i te kite e ma te tauturu anga a te tuatua mou a te Atua, ka ‘orei’ katoaia ta tatou ara kino!​—1 Kori. 6:9-11.

17. Kia vai ma ua, eaa te akoanga Pipiria ta tatou ka akarongo atu?

¹⁷ Te ariki ra ainei koe i te akakeu anga tamaanga a te tuatua mou a te Atua i roto i toou oraanga? Ei akaraanga, akapeea koe me ariu atu me akamatakiteia atu kia koe i te au kino no te au tamataoraanga viivii o teianei ao? (Sala. 101:3) Te kopae ra ainei koe i te au pirianga oa ma te au oa apii kare e tau ana e te au oa angaanga kare e aiteite ana to kotou irinakianga? (1 Kori. 15:33) Te tauta ngakau tae ra ainei koe i te autu atu i toou uaorai au tu paruparu te ka akaviivii ia koe i roto i nga mata o Iehova? (Kolo. 3:5) Te akatakake maira ainei koe mei te au manamanata poritiki o teianei ao e te tu akaepaepaanga enua i roto i te au tipoti taemoemo anga?​—Iako. 4:4.

18. Akapeea te tamaanga i te pae vaerua e te tu akono tau i te tauturu anga ia tatou kia riro mai ei aronga kokoti anga puapinga?

¹⁸ I toou akarongo meitaki anga ki taua au manako ra ka rauka mai te au tupuanga memeitaki tikai. Te akaaite anga i tana au pipi akatainuia ki te au rara o te vine, kua tuatua a Iesu e: “E te au rara ua kore katoa i roto iaku nei, [na taku Metua] ïa e tipu ke atu; e te au rara ua katoa, nana ïa e tope, kia maata ua atu te ua.” (Ioa. 15:2) Ia koe e rave ra i te vai  tamaanga no te tuatua mou o te Pipiria, maata atu taau ua ka akatupu mai.

Au Akameitakianga i Teianei e te Tuatau ki Mua

19. Akapeea te au pipi a Iesu i te akameitakiia anga no ta ratou tautaanga ei aronga kokoti anga?

¹⁹ Ko te au pipi akarongo mou tei akarongo ki ta Iesu tereni anga kua akamanaia i muri mai ki te vaerua tapu i te Penetekote 33 T.N. kia riro ei au kite “e tae ua atu ki te openga o te enua ra.” (Anga. 1:8) Te tavini ra ratou ei au mema no te pupu akaaere, ei au mitinari, ei aronga pakari tutaka, e e tuanga puapinga ta ratou e rave ra i te tutu aere anga i te tuatua meitaki ‘tei akakiteia ki te tangata ravarai i raro ake i teianei rangi.’ (Kolo. 1:23) E maata atu te au akameitakianga ta ratou i kokoti mai, e te oronga anga i te mataora ki tetai ke!

20. (a) Eaa te au akameitakianga tei rauka mai ia koe no te piri pu tikai anga ki roto i te kokoti anga pae vaerua? (e) Eaa taau e akakoro ra i te rave?

²⁰ Ae, na te akaari anga i te tu akaaka e te tu maroiroi, e te turuturu anga i te au turanga teitei no te Tuatua a te Atua, ka rekareka tatou i te piri pu tikai anga ma te puapinga ki roto i te kokoti anga maata pae vaerua e raveia ra i teianei. E tupu ra te mamae e te taitaia ki te manganui i roto i teia ao noinoi apinga e te tu oraanga akanavenave, ka kite mai tatou i te rekareka e te marekaanga tika tikai. (Sala. 126:6) Te mea puapinga rava atu, ‘kare ta tatou angaanga a te Atu i te mea puapinga kore.’ (1 Kori. 15:58) Ka tutaki mutu kore mai te Pu o te mou, te Atua ko Iehova ia tatou no ‘ta tatou angaanga, e to tatou anoano i te akakite anga i tona ingoa.’​—Ebe. 6:10-12.

[Tataanga Rikiriki i Raro]

Maara Ainei ia Koe?

Ia koe e tauta ra kia piri pu tikai ki roto i te angaanga kokoti anga . . .

• eaa ra i puapinga ai kia akaari i te tu akaaka?

• ka akapeea koe i te akatupu anga e te akono tamou anga i te tu maroiroi?

• eaa ra i puapinga ai kia vai ma ua i te pae akono tau e i te pae vaerua?

[Au Uianga Apii]

[Tutu i te kapi 17]

Ka tauturu te tu akaaka ia tatou kia akono i tetai oraanga mama ua te akamanako maata ra i te au anoano o te Patireia