Taki Atu te Tu Matakite ki te Au Tupuanga Meitaki

TE KITE ra koe e eaa te au atianga tau no te tutu aere, te ka tupu mai e tei kore i manakoia ana i roto i te ngai tutuanga a toou putuputuanga? Mei te reira rai to tatou au taeake Kerititiano i roto i te oire maata ko Turku, i te pae tai i Vinirani, e kua taki atu to ratou tu matakite ki te au tupuanga meitaki.

Tetai taime akenei, kua kite te au taeake i Turku e kua tae mai tetai pupu tangata no Asia ki roto i te oire, i te akaoti i te angaanga i runga i tetai aka pai turoto e maaniia ra i roto i te ngai maani pai. Muri mai, kua kitea mai e tetai taeake te au otera e noo ra te aronga angaanga manuiri. Kua kitea katoaia mai eia e, e apaiia ana te aronga angaanga na runga i te au bus i te popongi roa mei to ratou au otera i tetai tua o te oire, ki ko i te ava. I reira rai, kua akamatakite atu aia ki te au taeake o te putuputuanga tuatua Papaa i Turku.

Kua kite te aronga pakari i roto i taua putuputuanga ra e no te mea e maata te au manuiri i reira, te oronga maira te reira i tetai atianga tau no ratou kia akakite atu i te karere o te Patireia. I te Tapati o taua epetoma ra, kua uipa mai e tai ngauru papuritia vaitata ua atu ki te ngai e tapu ana te bus i te ora itu i te popongi. Te akamataanga, kare e tangata i ata mai ana. ‘Me kua tureti tatou?’ i akamanako ei te au taeake. ‘Me kua akaruke ratou ia Turku?’ Ina i reira, te aere maira okotai ia ratou i roto i te kakau angaanga i tetai tua i te mataara. Kua aru mai tetai tangata angaanga ke mai, e oti kua aru akaou mai tetai pae. Kare i roa, kua putunga mai tetai pupu aronga angaanga ki ko i te ngai e tapu ana te bus. Ina kua akamata te au papuritia i te tutu atu, te aere atu anga ki ko i te aronga angaanga e ta ratou au puka i roto i te reo Papaa. Te mea meitaki, kua pou mei tetai ora i rauka ai te nooanga no te aronga angaanga pouroa i runga i te au bus, e kua rava rai te taime o te au taeake i te tuatua atu ki te maataanga ia ratou. Te aere anga te au bus, kua apai te aronga angaanga e 126 puka rikiriki, e 329 makatini!

Kua riro te au tupuanga meitaki ei akamaroiroi i te au taeake kia rave akaou i te kamupeini i tera mai epetoma, te taime i atoro mai ei te akaaere kotinga. Tetai ra uaua, apa no te ora ono i te popongi, kua rave te akaaere kotinga i tetai uipaanga no te angaanga tutuanga, e kua aere tika atu e 24 papuritia ki te ngai e tapu ana te bus. Teia taime, kua apai katoa ratou i te au puka i roto i te reo Tagalog no te mea kua kitea mai ia ratou e e maata te au manuiri no te Piripine mai. Taua popongi ra, te aere anga te au bus ki ko i te ava, kua apai te aronga angaanga e itu puka, e 69 puka rikiriki, e 479 makatini. E akamanako ua ana i te mataora e te rekareka o te au taeake e te au tuaine tei piri ki roto i te kamupeini!

Mua ake ka oki ei te aronga angaanga ki to ratou au enua, kua rauka i te au taeake i te atoro atu i tetai papaki ia ratou i ko i to ratou au otera e i te akamarama maata atu i te karere o te Patireia. Kua akakite tetai aronga angaanga e kua araveiia mai ana ratou e te Au Kite i tetai au tuanga o teia ao i mua ana. Kua akakite mai te aronga angaanga i to ratou rekareka ki te au taeake no ta ratou tautaanga i te aravei mai ia ratou i te tuatau e noo ra ratou i Vinirani.

Te kite ra ainei koe eaa te au atianga tau te ka tupu ua mai kare i manakoia ana, i te ngai tutuanga a toou putuputuanga? Te tauta ra ainei koe kia taeria te au tangata no te au turanga keke mai? Me koia ia, penei e au tupuanga katoa rai taau i kite, mei ta to tatou au taeake rai i Turku.

[Mapu/​Tutu i te kapi 32]

(No runga i teia, akara i te puka)

VINIRANI

HELSINKI

Turku

[Akameitakianga]

STX Europe