Akapeea te Oko i te Akaoraanga ia Tatou

“Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.”​—IOA. 3:36.

1, 2. Eaa ra tetai tumu i nenei muaia ai te Zion’s Watch Tower?

“KO TETAI tangata apiipii meitaki tikai i te Pipiria te umere ra aia i te puapinga tikai o to Karaiti mate,” i akakite mai ei te a o te itiu o teia makatini i roto ia Okotopa 1879. Kua taopenga mai taua atikara ra ki teia manako puapinga: “Kia matakite tatou i tetai ua atu au apinga te akavaavaa ra, me kore te kopae ke ra i to Karaiti mate, ei atinga e te tarangaara i te ara.”​—E tatau ia 1 Ioane 2:1, 2.

² Ko tetai au tumu i nenei muaia ai te Zion’s Watch Tower i roto ia Tiurai 1879, koia oki ko te turuturu anga i te apiianga a te Pipiria no te oko. Tei tataia ki runga i to te reira au kapi te oronga maira i te “kai i te ora mou,” no te mea i te openga o te mataiti 1800, e maata te aronga te karanga ra e e Kerititiano ratou kua ekoko e akapeea to Iesu mate te riro anga ei oko no ta tatou ara. (Mata. 24:45) I taua taime rai, e maata tei irinaki i te apiianga no te tupu ua mai, e te manako patoi ra i te tikaanga tikai e kua topa te tangata mei te turanga apa kore. Te apii ra te aronga irinaki i te mea tupu ua e te meitaki maira te tangata, e kare e anoanoia te oko. E mea tau tikai i reira ta te apotetoro ko Paulo akoanga kia Timoteo e: “E akono meitaki i tei tukuia atu ia koe na, e ariu ke koe i te tuatua rikiriki mako kore kare e puapinga ra, e te tuatua taumāroia ra i tapikipikiia e e kite: Ko tei tāpuia e tetai pae ra, e tatipake rava akenei i te akarongo.”​—1 Timo. 6:20, 21.

3. Eaa te au uianga ta tatou ka akamanako i teianei?

³ Kare ekokoanga e te tauta ra koe kia kore e ‘tatipake mei te akarongo.’ No reira, e mea meitaki i te akamanako i teia au uianga: Eaa au ka  anoano ei i te oko? Eaa ta te reira i akatupu mai? Akapeea au e puapinga ai mei teia akanoonooanga meitaki maata te ka akaora mai iaku mei te riri o te Atua?

Akaoraia mei te Riri o te Atua

4, 5. Eaa te akapapu maira e te vai ra rai te riri o te Atua ki runga i teia akatereanga kino o te au mea nei?

⁴ Te akaari maira te Pipiria e te tuatua enua o te tangata, e mei te taime i rave ei a Adamu i te ara, ‘te vai ra rai’ te riri o te Atua ki runga i te au tangata ravarai. (Ioa. 3:36) E akapapu anga teia e ka mate te au tangata ravarai i te openga. Kare i rauka ana i te tutaraanga a Satani i te paruru tikai i te au tangata mei te au tumatetenga, e kare i rauka katoa ana i te kavamani o te tangata i te akono i te au anoano o tona au tangata ravarai. (1 Ioa. 5:19) No reira te takinoia nei rai te au tangata e te tamaki, te kino, e te putaua.

⁵ Te taka ua ra e, kare te akameitakianga a Iehova i runga i teia akatereanga o te au mea kino nei. Te karanga ra a Paulo e “kua akakiteia mai oki te riri o te Atua mei te rangi mai, i te au akono kore katoa i te Atua.” (Roma 1:18-20) No reira, ko te aronga te akono ra i tetai oraanga tataraara kore kare e akamareka ana i te Atua, kare ratou e ora mai i te tumatetenga no to ratou tu. I teia tuatau, te akakiteia maira to te Atua riri na roto i te au karere akavaanga te riringiia maira mei te au mate rai ki runga i to Satani ao, e ka kiteaia taua au akakiteanga ra i roto ta tatou au puka akatumuia ki runga i te Pipiria.​—Apo. 16:1.

6, 7. Eaa te angaanga e akatotoaia nei e te au Kerititiano akatainuia, e eaa te au atianga e tuera nei rai no te aronga tataki tai e tuanga ratou no te ao o Satani?

⁶ Te karanga ra ainei teia e kua tureiti te aronga tataki tai i te akaruke i ta Satani akatereanga e kia akaau mai ki te Atua? Kare, te vai ra te au atianga i te akaau kia Iehova e te tuera ua nei rai te reira. Ko te au Kerititiano akatainuia, ‘e karere ratou na te Mesia,’ te akatotoa nei i te angaanga orometua na te pati anga i te au tangata o te pa enua ravarai kia: ‘Akaongi ki te Atua.’​—2 Kori. 5:20, 21.

⁷ Kua tuatua te apotetoro ko Paulo e na Iesu e “akaora ia tatou i te riri a muri nei.” (1 Tesa. 1:10) Ka akatupu mai taua akakiteanga openga ra i to Iehova riri i te takore atu anga i te aronga kare i tataraara. (2 Tesa. 1:6-9) Koai ma te ka ora mai? Te akakite maira te Pipiria e: “Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.” (Ioa. 3:36) Ae, ko te aronga ravarai te ora ra e te taangaanga ra i te akarongo ki roto ia Iesu e tona oko, kare ratou e takoreia i te tuatau openga o to te Atua riri me tae ki te openga o teia akatereanga.

Te Au Angaanga a te Oko

8. (a) Eaa te manakonakoanga meitaki tei mua ia Adamu raua ko Eva? (e) Akapeea a Iehova i te akapapu anga e e Atua tu tika aia ma te apa kore?

⁸ Kua anga apa koreia mai a Adamu raua ko Eva. Naringa raua i akarongo ua rai ki te Atua, kua ki te enua i teianei i ta raua uanga mataora te noo kapiti anga i roto i te Parataito. Te mea mii ra, kua aati to tatou nga metua mua i ta te Atua akauenga. Tei tupu mai, kua akautungaia raua ki te mate mutu kore e kua tuaruia raua mei te Parataito mua. I te taime i anau tamariki ei a Adamu raua ko Eva, kua tuia te au tangata e  te ara, e i te openga iora kua ruaine e kua mate atu te nga tangata mua. Te akapapu maira teia e kua akatupu a Iehova i tana tuatua. Pera katoa, e Atua tu tika aia ma te apa kore. Kua akamatakite a Iehova ia Adamu e ko te kai anga i te ua rakau tureia ka tupu mai te mate​—e kua tupu mai rai te reira.

9, 10. (a) Eaa ra te uanga a Adamu i mate ei? (e) Akapeea tatou e ora mai ei i te mate mutu kore?

⁹ Ei uanga na Adamu, kua akatuangaia mai kia tatou tetai kopapa apa ua, tei akatupu mai i te ara e te openga iora e mate. Te ara anga a Adamu, kua ara katoa tatou. No reira kua o atu tatou ki roto i te utunga o te mate. Naringa e kua taui a Iehova i te ravenga o te mate e kare e tutakianga o te oko, kare aia i aru i tana i tuatua. E tika rai, kua tuatua a Paulo no tatou katoatoa i te tuatua anga aia e: “Kua kite oki tatou e, no te vaerua te ture: no te kopapa ra au, kua okoia i raro ake i te kino. Aue oki au ko te tangata mate maata e! naai au e akaora i teianei kopapa mate?”​—Roma 7:14, 24.

¹⁰ Ko te Atua ko Iehova anake ua te ka oronga mai i te tumuanga tau na te akakore tikai anga i ta tatou ara e te akamatara mai anga ia tatou mei te utunga o te mate mutu kore. Kua rave aia i teia na te tono mai anga i tana Tamaiti akaperepere mei te rangi mai kia anauia ei tangata apa kore, te ka oronga mai i tona oraanga ei oko no tatou. Kua vai apa kore ua rai a Iesu, kare mei ia Adamu rai. E tika rai, ‘kare roa aia i rave i te ara.’ (1 Pete. 2:22) No reira ka rauka ia Iesu i te anau mai i tetai uanga apa kore. Inara, kua tuku aia i te au enemi o te Atua kia tamate iaia kia rauka iaia i te akatamariki i ta Adamu uanga ara e te oronga anga ki te aronga e taangaanga ra i te akarongo i roto iaia kia rauka mai te ora mutu kore. Te akamarama maira te au Tuatua Tapu e: “Okotai oki Atua, okotai oki Arai i rotopu i te Atua e te tangata, ko te tangata ra ko Iesu Mesia; Ko tei oronga iaia uaorai ei oko i te tangata katoa.”​—1 Timo. 2:5, 6.

11. (a) Akapeea te au akameitakianga o te oko i te akatutuia mai anga? (e) Mei teaa ra te mamao te au akameitakianga o te oko?

¹¹ Te tu e angaanga ana te oko, te akatutuia maira e tetai turanga o te au tangata kua keiaia ta ratou moni e tetai pangika kino tikai, e kua o atu ki roto i te kaiou. Kua tiriaia te au ona o te pangika ki roto i te areauri no tetai au mataiti. Akapeea ra te aronga i pangika i ta ratou moni? Kua riro mai ratou ei aronga putaua, kare a ratou ravenga ke atu, mari ra kia monoia te pangika e tetai tangata meitaki apinganui e kia akaoki pouroa mai i te moni a te aronga na ratou te moni, i te takore anga i ta ratou kaiou. Mei te reira rai, kua oko mai te Atua ko Iehova e tana Tamaiti akaperepere i ta Adamu uanga e kua akakore atu i ta ratou ara na roto i te toto akamaringi anga o Iesu. No reira a Ioane Papetito i tuatua ai no runga ia Iesu e: “Ka akara na i te Punua-mamoe a te Atua, ko tei apai ke atu i te ara a to te ao!” (Ioa. 1:29) Ko te au tangata o te ao tei apai keia ta ratou ara, te kapiti maira i te aronga te ora ra e te aronga tei mate.

Tutaki Anga o te Oko

12, 13. Eaa ta tatou i kite mai to Aberahama oronga puareinga anga ia Isaaka?

¹² Ka marama tikai tatou e mei teaa ra te maata o te tutakianga o te oko ki to tatou Metua i te rangi e ki tana Tamaiti akaperepere. Te akakite maira te Pipiria i te au tupuanga te ka tauturu ia tatou kia akamanako oonu no runga i teia tumu manako. Ei akatauanga, e akamanako ana i to Aberahama manako i tona aere anga e toru ra ki Moria i te akarongo anga ki ta te Atua akauenga e: “Ka rave i taau tamaiti i tenana, i taau tamaiti okotai ra ko Isaaka, taau e akaperepere na, ka aere ki te enua ra kia Moria, ka apai mai ei iaia i reira, ei atinga karakaratio ki runga i tetai maunga taku e akakite atu kia koe.”​—Gene. 22:2-4.

¹³ Kua tae atura a Aberahama ki te ngai tei akatakaia. E akamanako ana i tona mamae ngakau te tapeka anga i te rima e te vaevae o Isaaka e kua tuku atura iaia kia takoto ki runga i te atarau ta Aberahama uaorai i patu. Kua mamae tikai a Aberahama i te taki anga i te matipi i te ta i tana tamaiti! E akamanako ana i to Isaaka manako iaia i runga i te atarau, te tiaki anga i te koputaanga mamae te ka tamate atu iaia. I taua taime ra kua tapu te angera a Iehova ia Aberahama. Ko ta Aberahama raua ko Isaaka  i rave i taua atianga ra, te tauturu maira ia tatou kia marama e mei teaa te maata o te tutakianga ta Iehova i rave i te akatikaanga kia tamateia Tana Tamaiti e te au rima rave o Satani. Te akarongo anga a Isaaka kia Aberahama te akatutu meitaki maira i to Iesu oronga puareinga anga iaia kia tamamaeia e kia mate no tatou.​—Ebe. 11:17-19.

14. Eaa te tupuanga i roto i te oraanga o Iakoba te ka tauturu ia tatou kia ariki rekareka i te tutaki no te oko?

¹⁴ Te akatutu katoaia maira te tutakianga o te oko na roto i tetai tupuanga i roto i te oraanga o Iakoba. I roto i tana au tamariki tamaroa pouroa, ko Iosepha ta Iakoba i inangaro maata atu. Ma te mii, kua vareae e kua riri to Iosepha au tuakana iaia. Inara, kua inangaro a Iosepha kia tono tona metua iaia i te akara e te peea ua ra tona ai tuakana. I taua taime ra, te tiaki ra ratou i te anana a Iakoba i te tua tokerau e 100 kiromita te mamao mei to ratou kainga i Heberona. E akamanako ana i to Iakoba manako te oki mai anga tana tamariki tamaroa ma te kakau o Iosepha tei ki i te toto! “No taku tamaiti te kakau!” i aue ei aia. “Kua pou aia i tetai puaka taae: kua etieti roaiā Iosepha!” Pouroa teia au mea i tupu kua tamamae tikai ia Iakoba, e e manganui te au ra kua aue aia no runga ia Iosepha. (Gene. 37:33, 34) Kare a Iehova e ariu tikai mai ana ki te au turanga mei ta te au tangata apa e rave ana. Inara, te akamanako oonu anga no runga i teia tupuanga i roto i to Iakoba oraanga, penei ka tauturu mai ia tatou kia marama e eaa to te Atua manako te akakinoia anga tana Tamaiti akaperepere e te tamate kinoia anga ei tangata i runga nei i te enua.

Puapinga Anga mei te Oko

15, 16. (a) Akapeea a Iehova i te akaari mai anga i tona tu arikianga no te oko? (e) Akapeea koe te puapingaia anga mei te oko?

¹⁵ Kua akatu mai te Atua ko Iehova i tana Tamaiti akarongo mou ma tetai kopapa vaerua kaka. (1 Pete. 3:18) E 40 ra, kua mama mai a Iesu tei akatuia mai ki tana au pipi, kia akaketaketa i to ratou akarongo e te akapapa ia ratou no tetai angaanga evangeria maata ki mua. E oti kua oki atu aia ki te rangi. Kua oronga atu  aia i te puapinga o tona toto akamaringiia ki te Atua, kia taangaangaia no tana au pipi mou katoatoa, tei taangaanga i te akarongo i roto i te puapinga o tona atinga oko. Kua akaari mai te Atua ko Iehova i tona tu ariki anga i te oko a Karaiti, na te tuku anga ia Iesu kia riringi mai i te vaerua tapu ki rungao i tana au pipi, tei akaputuputu mai i roto ia Ierusalema i te ra o te Penetekote 33 T.N.​—Anga. 2:33.

¹⁶ Kua akamata teia au pipi akatainuia a te Karaiti i te raurau i to ratou tangata tupu kia ora mai mei te riri o te Atua, na te papetitoanga i roto i te ingoa o Iesu Karaiti no te akakore anga i ta ratou ara. (E tatau ia Angaanga 2:​38-40.) Mei taua ra puapinga ra e tae mai ki teia tuatau, e mirioni ua atu au tangata mei te au pa enua tei akapiri vaitata mai ki te Atua no runga i te tumuanga o to Iesu atinga oko. (Ioa. 6:44) Tae mai ki teia uriurianga nei, te anoanoia ra tatou kia akamanako e rua nga uianga: Kua orongaia mai ainei kia tatou te manakonakoanga no te ora mutu kore no ta tatou uaorai au angaanga meitaki? Te rauka mai anga teia manakonakoanga umere, ka ngaro ainei te reira ia tatou?

17. Akapeea koe i te manako atu anga i te akameitakianga umere no te riro mai anga ei oa no te Atua?

¹⁷ E mea tau tikai te oko. Inara na te taangaanga anga i te akarongo i roto i te oko, e mirioni ua atu i teia tuatau kua riro mai ei au oa no te Atua, ma te manakonakoanga no te ora mutu kore i runga i te enua parataito. Na te riro mai anga ei oa no Iehova, kare ko te akapapu anga ia e ka vai rai tatou i roto i taua pirianga ra kiaia. Kia ora mai i te tuatau riri o te Atua, e akaari ua rai tatou i to tatou tu arikianga rekareka no “te ora e vai i te Mesia ra ia Iesu.”​—Roma 3:24; e tatau ia Philipi 2:12.

Taangaanga ua rai i te Akarongo i Roto i te Oko

18. Eaa te kapiti maira ki te taangaanga anga i te akarongo i roto i te oko?

¹⁸ Te tumu irava maata o teia atikara, ko Ioane 3:36, te akaari maira e ko te taangaanga anga i te akarongo i roto i te Atu ko Iesu Karaiti te kapiti maira i te akarongo anga kiaia. Te ariki rekareka anga i te oko te akakeu ra ia tatou kia aru rotai i ta Iesu au apiianga, kapiti mai tana i apii mai no runga i te tu akono tau. (Mare. 7:21-23) Kua ‘tae maira te riri o te Atua’ ki rungao i te aronga kare i tataraara ana te rave ra i te au peu mei te moeaana, te au tuatua takatakata kino e te “au tuatua viivii ravarai,” te kapiti maira i te akara putuputu anga i te ravenga ainga viivii.​—Ephe. 5:3-6.

19. Na roto i teea au mataara papu ka akaari ei tatou i to tatou akarongo i roto i te oko?

¹⁹ To tatou arikianga i te oko ka angaanga maata ua rai tatou ‘no te au ravenga tu akono i te Atua.’ (2 Pete. 3:11, NW) E akanoo tatou i tetai tuatau no te pure putuputu e te pure akatenga, tetai apii Pipiria na tatou uaorai, aereanga ki te uipaanga, akamorianga a te ngutuare, e te angaanga tutuanga maroiroi o te Patireia. “Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.”​—Ebe. 13:15,16.

20. Ko te aronga ravarai tei taangaanga i te akarongo i roto i te oko, eaa te akameitakianga ta ratou ka tapapa atu i te tuatau ki mua?

²⁰ Me tuku mai a Iehova i tona riri ki runga i teia akatereanga kino o teia au mea nei, e mea mataora no tatou i te taangaanga i te akarongo i roto i te oko e te akaarianga i te arikianga rekareka no te reira! E i roto i ta te Atua taputou no te ao ou, ka rekareka maata tatou no teia au mea te ka akaora ia tatou mei te riri o te Atua.​—E tatau ia Ioane 3:16; Apokalupo 7:9, 10, 13, 14.

Akapeea Koe me Pau?

• Eaa ra tatou ka anoano ei i te oko?

• Mei teaa te maata o te tutakianga o te oko?

• Eaa te au akameitakianga tei tupu mai no te oko?

• Akapeea tatou i te taangaanga anga i te akarongo i roto i te atinga oko o Iesu?

[Au Uianga Apii]

[Tutu i te kapi 13]

Te vai nei rai te atianga i te akaau kia Iehova

[Au Tutu i te kapi 15]

Akamanako oonu anga i teia au tupuanga no Aberahama, Isaaka, e Iakoba, ka tauturu ia tatou kia ariki rekareka i te tutakianga maata o te oko