Au Uianga a te Aronga Tatau

Eaa i rauka ai ia Iesu te akakite ki tetai vaine tei kite matauia ei vaine ara, e kua akakoreia tana ara?​—Luka 7:37, 48.

Ia Iesu e kaikai ra i roto i te are o tetai Pharisea ko Simona te ingoa, kua “tu ua iora i muri mai i tona poo vaevae” tetai vaine. Kua tamauu aia i tona vaevae ki tona roimata e kua orei i te reira ki tona rauru. I reira kua ongiongi aia i tona nga vaevae e kua akatainu atura ki te manongi kakara. Ko taua vaine ra, kua kite matauia aia ei “vaine ara i taua oire ra,” i karanga ai te papaanga Evangeria. E tika rai, kua ara te au tangata apa katoatoa, inara e taangaanga ana te au Tuatua Tapu i teia tuatua i te akataka i tetai tangata rave ara viivii me kore e rongo kino tona no te rave ara. Kare kore, e vaine akaturi aia. Ko taua tu tangata ra ta Iesu i tuatua e: “Kua akakoreia taau ara.” (Luka 7:36-38, 48) Eaa te aiteanga o ta Iesu tuatua? I te mea oki e kare te atinga oko i orongaia ake, akapeea e rauka ai teia akakoreanga ara?

I muri ake i te orei anga taua vaine ra e te akatainu anga i te vaevae o Iesu, tera ra i mua ake ka akakore ei a Iesu i tana ara, kua taangaanga aia i tetai akatutuanga ei akamarama i tetai manako puapinga ki te pu ngutuare, ko Simona. I te akaaite anga i te ara ki tetai kaiou maata kare e peke i te tutaki, kua tuatua atu a Iesu kia Simona e: “Toko rua a tetai tangata puke kai ou: e rima anere denari i ta tetai tangata, e rima ngauru i ta tetai. No te mea ra, kare rava o raua apinga e tutaki naʼi, akakore ua atura aia i to raua katoa ou. E tenana e akakite mai koe, ko teiea tei maata i te anoano iaia i taua nga tangata ra?” Kua pau atu a Simona e: “Te manako nei au ko tei akakoreia e ia te ou maata ra.” Kua na ko atu a Iesu e: “E manako tika toou.” (Luka 7:41-43) Ka anoanoia tatou katoatoa kia akarongo i te Atua, no reira me kare tatou e akarongo iaia e ka ara, kare i reira tatou i tutaki i te Atua i tei tau iaia. Ka putunga i reira ta tatou kaiou. Ko Iehova ra, kua akaaiteia aia ki tetai tangata akakaiou tei puareinga ua i te akakore i te au kaiou. No reira a Iesu i akamaroiroi ei i tana au pipi kia pure ki te Atua e kia pati: “E akakore mai i ta matou ara, mei ia matou i akakore i ta tei ara ia matou nei.” (Mata. 6:12) Te akataka maira a Luka 11:4 i teia au kaiou, e e au ara.

Eaa te au turanga i akakore ei te Atua i te au ara i te tuatau i topa? Te umuumu maira tona tu tika apa kore i te utunga o te mate no te ara. No reira a Adamu i tutaki ei i tana ara ki tona oraanga. Inara, i raro ake i te Ture ta te Atua i oronga ki te iti tangata o Iseraela, ka akakoreia te ara a tetai tangata na te akaatinga anga i tetai manu kia Iehova. Kua akakite te apotetoro ko Paulo: “E kare e rainga te mea i kore i tamāia i te toto i ta te ture ra; e kare e toto i akataeia ra, kare rava e matara anga o te ara.” (Ebe. 9:22) Kare te ngati Iuda i kite i tetai atu ravenga e rauka ai i te Atua te akakore i te ara. No reira, kare i te mea poitirere e kua patoi te aronga e matakitaki maira i te tuatau o Iesu i tana i tuatua ki te vaine. Te aronga e noo ra i runga i te kaingakai e Iesu, kua tuatua akera i roto ia ratou e: “Koai teia e akakore katoa i te ara nei?” (Luka 7:49) Eaa i reira te tumuanga tau e rauka ai te akakore i te au ara a teia vaine ara kino?

Ko te totou mua tikai tei tuatuaia i muri ake te meameaau anga nga tangata mua, kua tuatua no runga i te akakoroanga o Iehova i te oronga mai i tetai “uanga” te ka akaparuparuia tona pooavae e Satani e tona “uanga.” (Gene. 3:15) Kua tupu teia akaparuparu anga i te tamate angaia a Iesu e te au enemi o te Atua. (Gala. 3:​13, 16) Kua riro te toto akamaringiia o te Karaiti ei oko te ka akarangatira i te tangata ravarai mei te ara e te mate. No te mea kare e rauka i tetai apinga i te arai ia Iehova i te akatupu i tana i akakoro kia rave, i te oti ao anga aia i te tuatua i te au tuatua tei rekotiia i roto ia Genese 3:15, i roto i to te Atua manako, kua peke rai te oko i te tutaki. Ka rauka iaia i teianei,  i te akakore i te ara a te aronga e taangaanga ra i to ratou akarongo i roto i tana au taputou.

I te tuatau i mua ake i te au Kerititiano, e maata ta Iehova au tangata i ariki ei aronga tuatua tika. Ko tetai o ratou ko Enoka, Noa, Aberahama, Rahaba, e Iobu. No te akarongo, kua tapapa atu ratou i te akatupuanga o te au taputou a te Atua. “Kua akarongo a Aberahama i te Atua,” i tata ei te pipi ko Iakobo, “e i akonoia atura ïa ei tuatua-tika nana.” No runga ia Rahaba, kua karanga a Iakobo e: “Koia katoa oki te vaine akaturi ra ko Rahaba, kare aina aia i akatikaia i te angaanga?”​—Iako. 2:21-25.

Kua rave te Ariki ko Davida o Iseraela i taito i te au ara kino, inara e akarongo maroiroi tona i roto i te Atua mou e kua akaari i te tu tataraara tika tikai i te au taime roa ai. Pera katoa, te akakite maira te au Tuatua Tapu e: “Ko [Iesu] ta te Atua i tuku mai ei akaongi, kia irinaki i tona toto, ei akakite anga mai i tana tuatua-tika i te akakore anga i te au ara i raveia i muatangana, i te akakoromaki anga o te Atua; Ei akakite anga mai oki i tana tuatua-tika i teianei: kia tika tana tuatua, ka akatika mai ei aia i te tangata i akarongo ia Iesu ra.” (Roma 3:25, 26) Akatumuia ki runga i te atinga oko o Iesu te ka orongaia mai i te tuatau ki mua, kua rauka ia Iehova i te akakore i te au ara a Davida ma te kore e akaoko i Tana uaorai umuumuanga no te tu tika.

Taka ua ra e, mei te reira rai, te turanga o te vaine tei akatainu i te vaevae o Iesu. E oraanga akono tau kore tona, inara kua tataraara aia. Kua kite aia e ka anoano aia kia akaoraia mai mei te ara, e kua akaari aia na roto i tana i rave e te ariki tikai ra aia i te tangata ta Iehova i oronga no teia akaoraanga. Noatu e kare te atinga i tutakiia ake, kua papu tikai taua atinga ra e kua taangaanga ke ia ana ki te au tangata mei iaia rai. No reira, kua akakite a Iesu kiaia e: “Kua akakoreia taau ara.”

Mei tei akaari meitakiia mai e teia papaanga, kare rava a Iesu i kopae ana i te aronga ara. Kua rave aia i te mea meitaki no ratou. Tei maata atu, te puareinga ua ra a Iehova i te akakore i te ara a te aronga tei tataraara. E akapapuanga mataora e te pumaana tikai te reira no tatou, te au tangata apa ua nei!

[Tutu i te kapi 7]

Akonoia atura te reira ei tuatua tika na ratou