Eaa i Anoanoia ai kia Tae Vave?

KARE e ngoie ua ana kia tae vave, me kore, kia tae viviki atu. Tetai au mea ngata ka anoanoia tatou kia autu, koia oki te mamao te aere anga, maata te apinga akaoro, e e maata te angaanga. E oti akera, e puapinga tikai te tae vave. Ei akaraanga, i te ngai angaanga, ko te tangata tae vave e manakoia ana aia ei tangata tau kia irinakiia e te maroiroi. I tetai tua ra, te tangata i tae reiti mai ka riro ei akatuke i te angaanga a etai atu e te turanga meitaki o te au apinga e te angaanga e raveia ra. Ka riro te tu tavarevare ei arai i tetai tamaiti kia kore e tae ki tetai au apii, e te akangata iaia te tere ki mua i roto i tana apii. Me tureiti no tetai akanooanga i ko i te taote rapakau maki me kore te taote nio penei ka tamanamanata i te rapakauanga ka orongaia atu kiaia.

I tetai au ngai ra, kare te tae vave anga e manakoia ana ei mea puapinga. I roto i taua turanga ra, ko te tae reiti ka ngoie ua i te riro ei peu matau na tatou. Me koia ia, e mea puapinga tikai kia akatupu tatou i te inangaro kia tae vave. Me marama tatou i te puapinga o te tae vave, papu roa ka tauturu ia tatou kia tae vave. Eaa tetai au tumu no te tae vave? Peea tatou e puapingaia ai me tae vave? E eaa te au akameitakianga ta tatou ka kokoti no tei tae vave?

Iehova​—E Atua Tavarevare Kore

Te tumu puapinga roa atu no tatou kia tae vave koia oki, ka inangaro tatou i te aru i te Atua ta tatou e akamori ra. (Ephe. 5:1) Ko Iehova te akaraanga meitaki roa atu no te tae vave. Kare rava aia e tavarevare ana. E aru tika  ana aia i tana akanoonooanga i te akatupu i tana au akakoroanga. Ei akaraanga, te iki anga a Iehova i te takore i te ao kino i roto i te tiruvi, kua akakite aia kia Noa e: “Ka tarai koe i tetai araka noou, ei gophera to rakau.” Te vaitata anga mai te openga, kua karanga a Iehova kia Noa kia tomo ki roto i te araka e kua akakite kiaia: “E itu po toe, e akatopa mai ei au i te ua ki runga i te enua nei, e kia rua takau po, e kia rua takau ao; e ka akapou au i te au mea ora katoa i angaia e au ki rungao i te enua nei.” I taua taime rai, “e tae akera ki te po itu ra, ko te vai diluvi maira ïa ki runga i te enua.” (Gene. 6:14; 7:4, 10) E akamanako ana eaa te ka tupu kia Noa e tona ngutuare naringa kare ratou i tae vave ki roto i te araka. Mei te Atua rai ta ratou e akamori ra, kua anoanoia ratou kia tae vave.

Mei te 450 mataiti i muri ake i te Vaipuke, kua akakite a Iehova ki te pateriareka ko Aberahama e ka anau mai aia i tetai tamaiti e ka na roto iaia te Uanga taputouia. (Gene. 17:15-17)  Kua karanga te Atua e ka anau a Isaaka i “teianei tuatau i te mataiti i mua nei.” Kua tupu ainei te reira? Te akakite maira te au Tuatua Tapu kia tatou e: “Kua to iora oki a Sara, e e tamaiti tana i anau na Aberahama i tona ruaine anga ra, i te tuatau ta te Atua i akakite maira.”​—Gene. 17:21; 21:2.

E maata te au akaraanga i roto i te Pipiria e akaari maira i to te Atua tu tavarevare kore. (Iere. 25:​11-13; Dani. 4:20-25; 9:25) Te akakite maira te Pipiria kia tatou kia tapapa i to Iehova ra akavaanga no te tuatau ki mua. Noatu e ka akaraanga “roa” i te manako o te tangata ua nei, papu ia tatou e kare te reira “e tavarevare.”​—Haba. 2:3.

Tae Vave, Puapinga i Roto i te Akamorianga

Kua anoanoia te tane ngati Iseraela pouroa kia tae mai e kia tae vave ki te ngai i akatakaia no “te au oroa a Iehova.” (Levi. 23:2, 4) Kua akanoo katoa te Atua i te taime ka orongaia ai tetai au atinga. (Exo. 29:38, 39; Levi. 23:37, 38) Kare ainei teia e akaari maira e te inangaro ra te Atua i tona au tavini kia tae vave no ta ratou akamorianga?

I te anere mataiti mua, te ikuiku anga te apotetoro ko Paulo i to Korinetia e ka akapeea me rave i te au uipaanga Kerititiano, kua raurau atu aia kia ratou e: “E rave ra te au mea ravarai ma te tika e te manea.” (1 Kori. 14:40) Kia tau ki te reira, ka akamata te au akaputuputuanga Kerititiano no te akamorianga i te taime i akanooia. Kare rai to Iehova manako no runga i te tae vave i tuke. (Mala. 3:6) Eaa i reira ta tatou ka rave, kia tae vave ki teia au akaputuputuanga Kerititiano?

Peea e Puapingaia ai me Tae Vave

Kua kite tetai pae aronga e e tauturu maata me parani i mua ake. (Mase. 21:5) Ei akatauanga, me ka mamao te ngai ta tatou ka aere kia tae i te taime i akatakaia, e tau ainei kia akaruke tatou e kia vaitata roa te taime ka aere ei? Kare ainei i te mea meitaki kia akaruke vave tatou kia kore e tureiti, noatu e ka tupu tetai apinga kitea koreia i runga i te ara? (Kohe. 9:11, NW) “Tetai apinga ka tauturu i tetai ua atu kia tae vave koia oki kia kite tikai e eaa te roa e tae ei,” i karanga ai a José tetai mapu tane e tae vave ua ana. *

Tetai pae, penei ka anoanoia kia rave i tetai au akanooanga kia akaruke vave i te ngai e angaanga ra ratou, kia rauka ia ratou i te tae vave atu no te au uipaanga Kerititiano. Ko teia ta tetai Kite i Etiopia i rave te kite anga aia e ka tae reiti aia e 45 miniti no te au uipaanga Kerititiano no te mea no tana ngai angaanga. Kua akanoo aia no tetai oa angaanga kia tae vave mai ei mono iaia i te au po uipaanga. No tana i rave, kua ariki te Kite i te angaanga akaou atu e itu ora no tona oa angaanga.

Me e tamariki rikiriki ta tatou, ka riro te tae vave anga ki te au uipaanga ei akaaoanga tikai. Te apainga no te akapapa anga i te tamariki e mea matau na te metua vaine e rave ana, tera ra ka tau rai te au mema o te pamiri kia tauturu atu. Tetai metua vaine no Meiko ko Esperanza tona ingoa e varu ana tamariki i akono ana koia anake ua. To ratou mataiti i teianei mei te 5 ki te 23. Te akamarama maira a Esperanza e eaa ta tona pamiri e rave ana kia tae vave: “E tauturu ana taku au tamaine maata i te akapapa i te tamariki rikiriki. Rauka iaku i te akaoti i taku angaanga ngutuare e kia akapapa iaku kia akaruke no te au uipaanga i te taime i akatakaia.” E taime akatakaia to teia pamiri kia akaruke i te kainga, e e angaanga taokotai ana te katoatoa i te rave i teia.

Puapingaia Anga mei te Tae Vave ki Taau Akamorianga

Te akamanako anga i te au akameitakianga no te tae vave anga ki te au uipaanga Kerititiano, ka akamaroiroi i to tatou inangaro e te akakoroanga kia rave i te au mea pouroa ka rauka kia tae vave. Tetai vaine mapu ko Sandra tona ingoa, tei akariro ei tu matau kia tae vave ki te au uipaanga, kua karanga e: “Taku e reka ana i te tae vave anga koia oki, e tuatau toku no te aravei atu i te au taeake e te au tuaine, te tuatua anga kia ratou, e kia matau meitaki atu kia  ratou.” Me tae vave tatou ki te Are Uipaanga Patireia, ka puapingaia tatou i te akarongo no runga i te angaanga akakoromaki e te tu akarongo mou a etai atu tei tae mai. Ka riro katoa te tae anga tatou ki reira e te pukapuka anga akamatutu, ei akamaroiroianga ki to tatou au taeake e te au tuaine, ‘te akamaroiroi anga ia ratou kia maata te aroa, e i te au angaanga memeitaki ra.’​—Ebe. 10:24, 25.

Te imene e te pure akamata i te au uipaanga Kerititiano, e tuanga puapinga no ta tatou akamorianga. (Sala. 149:1) Akapaapaa ta tatou au imene ia Iehova, akamaara mai kia tatou i te au tu ka tau tatou kia akatupu, e te akamaroiroi ia tatou kia mataora i te piri atu ki roto i te angaanga orometua. Peea te pure akamata? I te au tuatau taito, kua kapiki a Iehova i te iero e ko tona “are pure anga.” (Isa. 56:7) Teia tuatau, e akaputuputu ana tatou kia oronga i te au pure ki te Atua i ko i ta tatou au uipaanga. Te pure akamata, kare no te pati ua i ta Iehova aratakianga e tona vaerua tapu, mari katoa ra ei akapapa i to tatou manako e to tatou ngakau kia ariki i te tuatua te ka akamanakoia. Kia akakoro tatou kia tae vave ki ta tatou uipaanga no te imene e te pure akamata.

Te tuatua anga no runga i te tumu i tae vave ei aia ki te au uipaanga, kua akakite a Helen e 23 ona mataiti e: “Toku manako e mataara teia kia akaari au i toku inangaro no Iehova, no te mea nana i oronga mai i te au tuatua, kapiti mai i te au imene e te pure akamata.” Kare ainei i te mea tau no tatou kia manako na roto i taua tu rai? Ae, e mea tau rai no tatou. No reira, e tauta pakari tatou i te akariro ei mea matau kia tae vave ki ta tatou au angaanga pouroa, te au angaanga tikai no ta tatou akamorianga i te Atua mou.

[Tataanga Rikiriki i Raro]

[Tutu i te kapi 26]

Akapapa vave

[Tutu i te kapi 26]

Tuku i tetai taime va no te au mea kitea koreia

[Au Tutu i te kapi 26]

Kokoti i te au akameitakianga no te tae vave ki te au uipaanga