Akapou Toku Maroiroi i Roto i te Akaaerenga a Iehova

Akakiteia e Vernon Zubko

I UTUUTUIA au i runga i tetai pama vaitata atu ki Stenen, e oire i roto i te tapere o Saskatchewan, i Kanata. Toku nga metua, ko Fred raua ko Adella, kua angaanga pakari raua i te apii ia matou no runga i te Atua e te oronga mai te au mea materia no maua ko toku tuaine o mua ake iaku ko Aurellia, e toku nga teina ko Alvin raua ko Daryl, e toku tuaine openga ko Allegra. E teia noa ai, te akameitaki maata nei rai matou i to matou nga metua no tei apii ia matou i te tuatua mou.

E Kerititiano akatainuia toku papa, e e tangata tutu evangeria mataku kore. Angaanga pakari aia kia rauka te au mea tei anoanoia no te oraanga, inara kua akapapu katoa aia e kia kite te katoatoa e e Kite aia. E tuatua ua ana aia no runga i te tuatua mou. Kare rava e ngaropoina iaku tona tu maroiroi e te ngakau toa. E akakite ua mai ana aia kiaku e, “E akapou i toou maroiroi i roto i te akaaerenga a Iehova, e ka kopae ia koe i te au manamanata e manganui.”

E akakitekite putuputu ana matou i te pae mataara i Stenen e te au ngai vaitata mai. Kiaku, kare te reira i te mea mama. Roto i te au oire pouroa e aronga akatupu pekapeka tetai, e aviri mai ana ia matou te au tamariki. I tetai taime, e varu rai oku mataiti, e te tu ra i te ope o te mataara e Te Punanga Tiaki e te makatini E Ara!, i aere mai ei tetai pupu tamariki te koropini iaku. Kua rave ratou i toku pare ou mei runga i toku katu e kua tuku i te reira ki runga i te pou i te pae iaku. Te mea meitaki ra, kua kite mai tetai taeake pakari ake e tiaki ra iaku. Kua aere mai aia e kua ui mai e, “Vern, eaa te manamanata?” Tangaro viviki ua taua au tamariki ra ia ratou. Noatu te mareka kore o tei tupu, kua riro te reira ei apii iaku e me akakitekite aere i te pae mataara, e oriori aere, eiaa e tu ua mei te pou rai. Iaku e maata maira kua riro taua terenianga ra ei oronga mai i te ngakau toa tei anoanoia noku i te aere mei tera are ki tera are.

Kua papetitoia maua ko Alvin i roto ia Me mataiti 1951. E 13 oku mataiti i taua taime ra. Te maara nei iaku te Taeake ko Jack Nathan, tei oronga i te akoanga no te papetito, kua akamaroiroi mai ia matou auraka rava kia topa tetai marama kare e tuatua no runga ia Iehova. * Roto i to matou pamiri, e manakoia ana te angaanga painia e ko te ngai angaanga meitaki rava atu i te rave. No reira i te mataiti 1958, te oti anga taku apii, kua neke atu au ki Winnipeg, i Manitoba, i te painia. Noatu e mataora ua a Papa no te angaanga ra au i roto i te pitiniti a te pamiri ei tangata tamania rakau, kua turuturu pakari raua ko Mama i te angaanga orometua tamou e kua ariki raua kia neke au.

Kainga Ou e te Tokorua Ou

I te mataiti 1959 kua pati mai te opati  manga i tetai ua atu ka rauka i te neke ki Quebec, te ngai e anoano maataia ra te aronga tutu evangeria. Kua aere au i te painia i Montreal. E aka tuke tikai! Mea ou roa teia i roto i toku oraanga, iaku e apii ra i te tuatua reo Varani, e te akatano atu iaku ki te au peu tini tukeke. Kua akakite mai to matou akaaere kotinga kiaku, “Auraka rava e karanga e, ‘Ta matou teia e rave ana i te kainga.’” E apiianga meitaki tikai tera.​—1 Kori. 9:22, 23.

Kare oku tokorua painia i toku neke anga ki Quebec. Inara, kua riro mai tetai tuaine ko Shirley Turcotte, taku i aravei i Winnipeg, ei tokorua tinamou noku, i to maua akaipoipo anga i roto ia Peperuare mataiti 1961. No roto katoa mai aia i tetai pamiri tei inangaro tikai ia Iehova. Noatu kare au i kite ana i taua taime ra e, ka riro mai aia ei akapuanga puapinga no te maroiroi e te turuturuanga kiaku, i te au mataiti tei aereia.

Tere Tutu Aere i Gaspé

E rua mataiti i muri ake to maua akaipoipoanga, kua tukuia maua ei nga painia takake ki Rimouski, i Quebec. I tera mai tuatau tupuanga rau, kua pati mai te opati manga ia maua kia aere ki tetai tere tutu aere na roto i te Gaspé Peninsula, i te pae tai i te tua itinga o Kanata. Ta maua tukuanga angaanga, kia akatotoa i te ua o te tuatua mou. (Kohe. 11:6) E 1,000 makatini ta maua i tuku ki roto i te motoka, e te au puka vaitata atu ki te 400, pera katoa te kai e te kakau, e kua akamata i to maua tere tutu aere e tai marama. Angaanga marie ua maua i roto i te au oire rikiriki pouroa i Gaspé. Kua akamatakiteia na roto i te ratio e te aere atu nei te Au Kite, e kua akakiteia ki te tangata auraka e ariki i ta maua au puka. Inara, kare te maataanga o te tangata i marama tika i te tuatua akakite no ta tatou au puka, e kua ariki mai ratou i te reira.

Taua au mataiti ra, ko te tikaanga kia tutu aere, e mea ou ua i tetai au tuanga o Quebec, e e mea matauia kia araiia e te akava. I tupu teia i roto i tetai oire maata e oronga aere ra maua i te au puka vaitata rai e i te au are ravarai. Kua pati mai tetai opita kia aru maua iaia ki te opati o te akava, e kua pera rai maua. Kitea mai iaku e na te roia o te oire i tuku i te ota kia arai ia maua eiaa e tutu aere. I te mea kare te akava maata i reira i taua ra ra, kua oake atu au i tetai reta tei tata taka meitakiia no ko mai i te opati manga i Toronto, tei akamarama mai to maua tikaanga kia tutu aere. Te oti anga te reta i te tatau, viviki ua te roia i te karanga mai e: “I, kare au e inangaro i te manamanata. Na te orometua o te ekaretia i akakite mai kia arai au ia korua.” I te mea kua inangaro maua kia kite te tangata o te oire e kua tikaia ta tatou angaanga e te ture, i reira kua oki viviki atu maua ki te ngai i araiia ai maua e te akava e kua akamata akaou i ta maua angaanga orometua.

Tera mai popongi, te oki atu anga maua i te aravei i te akava maata, kare aia i mareka ana i te akarongo anga e i araiia ana maua. Riri tikai aia i te tuatua anga ki te roia i runga i te tereponi! Akakite mai te akava e me tupu akaou tetai manamanata, kia ringi tika atu iaia e nana e akono i te reira. Noatu e manuiri ua maua e kare e kite meitaki i te tuatua Varani, e meitaki tikai te tangata kia maua e te oaoa. Inara kua akamanako maua e, ‘Me ka kite rai ratou e ko te tuatua mou teia?’ Rauka mai te pauanga i te au mataiti i muri mai to maua oki atu anga te patu i te au Are Uipaanga Patireia i Gaspé. Kitea mai ia maua e e maata te aronga ta maua i akakitekite atu ana, tei riro mai ei au taeake no maua i teianei. Ae, na Iehova i akatupu i te reira.—1 Kori. 3:6, 7.

Rauka Tetai Tuanga na Maua

Anauia ta maua tamaine ko Lisa i te mataiti 1970. Riro teia tuanga no ko ia Iehova ei akamaata atu i te mataora i roto i to maua oraanga. Angaanga kapiti matou ko Shirley raua ko Lisa i roto i te au angaanga patu Are Uipaanga Patireia. Te akamutu anga a Lisa i te aere ki te apii, karanga mai aia e: “Mami korua ko Tati, kua kite au e noku i akamutu ei korua i te angaanga orometua tamou, no reira ka inangaro au te painia ei akarava atu i taua taime ra.” E 20 tuma mataiti i muri mai, te painia nei rai a Lisa, teia taime raua ko tana tane ko  Sylvain. Maata te au angaanga patu are i te pa enua, tei rauka ia raua te tikaanga ngateitei kia rave kapiti. To matou akakoroanga ei pamiri, kia akamama ua i to matou oraanga e kia papa ua i te angaanga na Iehova. Kare rava e ngaropoina iaku te tuatua a Lisa i tona akamata anga i te painia. Ae, nana i akakeu iaku kia oki akaou ki te angaanga orometua tamou i te mataiti 2001, e mei te reira taime mai toku painia anga. Te riro nei rai te angaanga painia ei apii iaku kia irinaki ia Iehova i te au mea ravarai taku ka rave, e kia akamama ua i te oraanga ma te merengo e te mataora.

Au Angaanga Patu Are Anoanoia te Aroa, Tiratiratu, e te Akarongo Mou

Kua apii mai a Iehova iaku e me papa ua tatou e me ariki i tetai ua atu angaanga ka oronga mai aia, maata ua atu te akameitakianga ka rauka. Mea akaperepere naku te tavini i roto i te Kumiti Patu Anga o te Tapere, e i roto i te angaanga patu are ma to tatou au taeake e te au tuaine i Quebec, e te au ngai ke atu.

Tetai aronga tauturu kare e tukatau roa ana i te oronga akoanga, kareka i roto i te angaanga patu Are Uipaanga Patireia e mea umere tikai ratou. Rave teia au taeake akaperepere i te angaanga ma te ngakau katoa, e te kitea ra to ratou tareni. E are taurekareka ua rai te rauka mai ana no te akamori ia Iehova.

Kua uiia mai ana kiaku e, “Eaa te au tu puapinga roa atu o te aronga tauturu i roto i te angaanga patu Are Uipaanga Patireia?” Taku i kite, te mea mua kia aroa tetai ia Iehova e tana Tamaiti, pera te taokotaianga taeake. (1 Kori. 16:14) Te rua, ka anoanoia te tu tiratiratu e te akarongo mou. Me kare e tau ki ta tatou i inangaro—e ka tupu teia—ka aru ua atu rai te tangata tiratiratu i te akanoonooanga a te akaaerenga. Ka riro te tu akarongo mou ei akakeu iaia kia tauturu i te au angaanga a te tuatau ki mua.

Akameitaki Maata ia Iehova

Noatu i mate toku papa i te mataiti 1985, kareka tana apiianga kia akapou i toku maroiroi i roto i te akaaerenga a Iehova, kare i ngaropoina, te mou nei rai i roto i toku ngakau. Mei tetai aronga i rauka ta ratou tukuanga angaanga i runga i te rangi, tetai tuanga o to Iehova akaaerenga, kare ekoko e te angaanga maroiroi ra rai aia. (Apo. 14:13) E 97 o mami mataiti i teianei. No te maki akangoru, kare e rauka iaia te tuatua meitaki mai; noatu ra, kua kite aia i te Pipiria. E taiku ana aia i te irava i roto i tana au reta e te akamaroiroi ia matou kia tavini akarongo mou atu rai ia Iehova. Akameitaki maata tikai matou pouroa i to matou nga metua akaperepere!

Akameitaki maata tikai au ia Iehova no toku tokorua akarongo mou ko Shirley. Mou rai roto i tona ngakau te tuatua a tona mama e, “e maata to Vern taime ka pou i roto i te tuatua mou, e kia oronga koe i tetai taime nona kia tauturu i etai ke.” To maua akaipoipo anga e 49 mataiti i topa, kua iki maua kia pakari kapiti i te tavini anga ia Iehova, e me ora kapiti atu i te openga o teia akatereanga, ka mapu kapiti maua e ka tavini iaia e tuatau ua atu. Ae, te ‘maata nei ta maua rave anga i te angaanga a te Atua.’ (1 Kori. 15:58) Akono meitaki tikai a Iehova ia maua, e kua akapapu e kare rava maua i ngere i tetai ua atu mea meitaki.

[Tataanga Rikiriki i Raro]

[Tutu i te kapi 31]

“To matou akakoroanga ei pamiri, kia akamama ua i to matou oraanga e kia papa ua i te angaanga na Iehova”