Au Kotoeanga​—Eaa to Iehova Manako no te Reira?

“NA TE vaine taau i o mai ei tokorua noku ra, i oronga mai i to taua rakau kiaku ra, kai iora au,” i tuatua ai te tane. “I pikikaa mai te ovi iaku, kai iora au,” i pau atu ei te vaine. Na taua au tuatua tei tuatuaia ki te Atua e to tatou nga metua mua, ko Adamu raua ko Eva, i akataka mai i te akamataanga o te tuatua enua roa o te tangata, no te maani au kotoeanga.​—Gene. 3:12, 13.

Na te utunga ta Iehova i tuku ki runga ia Adamu raua ko Eva no to raua tu akarongo kore akakoro tikai, i akataka meitaki mai e, kare aia i ariki ana i ta raua kotoeanga. (Gene. 3:16-19) Ka tau ainei tatou i reira kia taopenga e, kare a Iehova e ariki ana i te au kotoeanga pouroa? Me ko tetai au kotoeanga ua ainei tana ka ariki ei mea tau? Me koia ia, akapeea tatou i reira e kite ei te tuke? Ei pauanga, ka akamanako ana tatou na mua i te aiteanga o te kotoeanga.

Ko te kotoeanga, e tumu te reira tei orongaia ei akamarama e eaa tetai apinga i raveia ai, e kare i raveia, e ka kore ei e raveia. Penei ko te kotoeanga e akamaramaanga tau no tetai tarevake, e penei e tu tataraara tika tikai te oronga maira i tetai tumu kia tangi atu me kore kia akakore i te ara. Inara, mei te turanga rai o Adamu raua ko Eva, ka riro te kotoeanga ei akavareanga, e tumu pikikaa tei orongaia ei uuna i te mea tika tikai. No te mea e ko te tu tera o te au kotoeanga, e manako tarotokakaia ana te reira.

Me maaniia te au kotoeanga—mei te mea tikai e te piri atura ki ta tatou tavinianga i te Atua—kia matakite tatou kia kopae ‘i te akavare anga ia tatou uaorai ki te tuatua tika kore.’ (Iako. 1:22) No reira, ka akamanako ana tatou i tetai au akaraanga e tetai au kaveinga Pipiria te ka tauturu “kia kitea ia tatou te mea mareka na te Atu.”​—Ephe. 5:10.

Ta te Atua e Tapapa Maira kia Rave Tatou

I roto i te Tuatua a te Atua ka kite tatou i te au akauenga taka meitaki, ka tau tatou ei iti tangata no Iehova kia akono. Ei akatauanga, ko te angaanga ta Karaiti i akaue kia “aere . . . e akariro i to te pa enua katoa ei pipi,” e akauenga te taangaangaia nei rai e te au pipi mou pouroa a te Karaiti. (Mata. 28:19, 20) I te mea e, e puapinga maata tikai te akatupu i taua akauenga ra, no reira te apotetoro a Paulo i akakite ei e: “E ae oki toku kia kore au e tutu i te evangelia!”​—1 Kori. 9:16.

Noatu ra, tetai pae tei apii ana i te Pipiria e tatou no tetai tuatau roa, te emiemi nei rai i te tutu aere i te tuatua meitaki o te Patireia o te Atua. (Mata. 24:14) Tetai pae tei piri mai ana ki te angaanga tutu aere i mua ana kua akamutu i te rave i te reira. Eaa tetai au tumu e orongaia maira i tetai au taime e te aronga kare e piri mai ana ki te angaanga tutu aere? Eaa to Iehova manako i te aronga e emiemi ra i te akono i tana au akauenga taka meitaki i te tuatau i topa?

Au Kotoeanga Kare te Atua e Ariki

“E ngata roa.” No te aronga akama ua, penei e akaraanga ngata tikai i te piri atu ki te angaanga tutu aere. Akamanako ana ra e, eaa te ka mou mai mei te akaraanga o Iona. Kua orongaia mai tetai tukuanga angaanga ngata tikai nana—kua tuatua a Iehova kiaia kia akakite e ka akapouia a Nineve. Kare e ngata i te kite atu i te tumu i manako ei a Iona e e ngata tikai i te rave i taua angaanga ra. E oire maata a Nineve no Asura, e e rongo kino to te iti tangata Asura no to ratou tu viivii. Penei kua manako a Iona e: ‘Eaa ra toku turanga i rotopu i taua au tangata ra? Eaa ra ta ratou ka rave mai kiaku?’ Kare i roa  ana, kua oro aia. Tera ra, kare a Iehova i ariki ana i te kotoeanga a Iona. Kua tuku akaou a Iehova iaia kia aere, e tutu aere ki te iti tangata Nineve. Teia taime, kua akatupu a Iona i tana tukuanga angaanga ma te ngakau toa, e kua akameitaki a Iehova i tei tupu mai.​—Iona 1:1-3; 3:3, 4, 10.

Me manako koe e e ngata roa ia koe te tukuanga angaanga kia tutu aere i te tuatua meitaki, e akamaara e “kare rav[a] e mea e kore ei e tika i te Atua.” (Mare. 10:27) Papu e ka akamaroiroi a Iehova ia koe me pati ua atu rai koe i tana tauturu, e ka akameitaki aia ia koe me tauta koe kia rauka te ngakau toa i te rave i taau angaanga orometua.​—Luka 11:9-13.

“Kare au e inangaro ana.” Eaa taau ka rave me kare toou ngakau e tae ana, i te rave i taau angaanga orometua Kerititiano? Akamaara e ka rauka ia Iehova te akakeu ia koe, e kia akatuke i toou inangaro. Kua akakite a Paulo e: “Ko te Atua oki tei angaanga ki roto ia kotou, i te inangaro e te rave, mei tana i anoano ra.” (Phili. 2:13) No reira, ka rauka ia koe i te pati kia Iehova kia akakeu ia koe kia inangaro i te rave i tona anoano. Kua rave te Ariki ko Davida i te reira. Kua pati akaaka aia kia Iehova e: “E arataki koe iaku i te tuatua-mou naau ra.” (Sala. 25:4, 5) Ka rauka ia koe te rave i te reira, na te pure akatenga anga kia akakeu a Iehova ia koe kia inangaro i te rave i tei marekaia e ia.

E tika rai, me roiroi me kore me akamaroiroi koreia tatou i tetai au taime, ka maro tatou ia tatou uaorai kia aere ki tetai uipaanga i ko i te Are Uipaanga Patireia, me kore kia piri atu ki te angaanga orometua. Me ko te reira te tu, ka taopenga ainei tatou i reira e kare tatou e inangaro mou ana ia Iehova? Kare rava ia. Kua tauta pakari te au tavini akarongo mou o te Atua i te tuatau i topa i te rave i te anoano o te Atua. Ei akatauanga, kua akakite a Paulo e ‘te moto nei ra au i taku kopapa,’ kia rauka iaia te akono i te au akauenga a te Atua. (1 Kori. 9:26, 27) No reira, noatu e ka maro tatou ia tatou uaorai kia rave i te angaanga orometua, ka papu ia tatou e ka akameitaki a Iehova ia tatou. Eaa te tumu? No te mea te maro ra tatou ia tatou uaorai kia rave i te anoano o te Atua no te tumu tau—no te inangaro ia Iehova. Na te rave anga i te reira, te oronga ra tatou i tetai pauanga ki te tuatua a Satani e, ka akaruke te au tavini o te Atua Iaia me timataia ratou.​—Iobu 2:4.

“Maata roa taku angaanga.” Me kare koe e piri atu ki roto i te angaanga orometua no te mea te manako ra koe e e maata roa taau angaanga, e mea puapinga maata kia akamanako koe i te au mea mua kia koe. “E na mua ra kotou i te kimi i te basileia,” i akakite ei a Iesu. (Mata. 6:33) Te aru i te reira kaveinga ei aratakianga, penei ka anoanoia koe kia akamama i toou oraanga me kore kia akapou i tetai au taime tamataora no te angaanga orometua. E tika e, e ngai rai to te tamataora e tetai atu au angaanga naau uaorai, inara kare te reira i te kotoeanga tau no te kopae i te angaanga orometua. Ka tuku ua rai te tavini o te Atua i te anoano o te Patireia na mua i roto i tona oraanga.

“Kare au e mako roa ana.” Penei ka manako koe e kare koe e tau ei orometua no te tuatua meitaki. Kua manako katoa tetai au tavini akarongo  mou o Iehova i te tuatau Pipiria e kare ratou i mako roa ana i te rave i te au angaanga ta Iehova i tuku mai kia ratou. Akamanako ana i te akaraanga o Mose. I te tuku anga mai a Iehova i te angaanga nana, kua karanga atu a Mose e: “E taku Atu, kare au i te tangata vaa tukatau, mei ia koe rai i tuatua mai ki to tavini nei, e mei muatangana mairai: e reo murare oki, e te ngunguau toku.” Noatu, e kua akamaroiroi a Iehova iaia, kua pau atu a Mose e: “E taku Atu e, teia taku tuatua kia koe, e tono koe i tei tau ia koe kia tono ra.” (Exo. 4:10-13) Eaa ta Iehova i rave?

Kare a Iehova i ariki ana i te kotoeanga a Mose kia kore e rave i tana tukuanga angaanga. Inara, kua iki a Iehova ia Aarona kia tauturu ia Mose i te rave i taua angaanga ra. (Exo. 4:14-17) Tetai atu, i te au mataiti tei aru mai, kua turu a Iehova ia Mose e kua oronga kiaia i tetai ua atu apinga tana i anoano kia puapinga i te akatupu i te au tukuanga angaanga ta te Atua i oronga kiaia. Teia tuatau, ka papu ia koe e ka akakeu a Iehova i te au taeake irinaki tukatau kia tauturu katoa ia koe i te rave i taau angaanga orometua. Tei runga ravao ra, te akapapu maira te Tuatua a te Atua ia tatou e, na Iehova e akariro ia tatou kia tau no te angaanga tana i akaue mai ia tatou kia rave.​—2 Kori. 3:5; akara i te pia  “Au Mataiti Mataora Rava Atu o Toku Oraanga.”

“Kinokino toku ngakau te tuatua a tetai ke.” Kua akamutu tetai pae i te piri ki te angaanga orometua me kore i te aere ki te au uipaanga putuputuanga no te kinokino i to ratou ngakau, i te manako anga e ka ariki a Iehova i teia kotoeanga no te mea kua akamutu ratou i te rave i te angaanga orometua. Noatu e e mea marama ua e ka taitaia tatou me kinokino to  tatou ngakau i te tuatua a tetai ke, e kotoeanga tau ainei te reira kia akamutu i te piri atu ki te au angaanga Kerititiano? Penei kua tupu katoa te mamae ngakau kia Paulo e tona oa irinaki ko Banaba i muri ake i tetai pekapeka i rotopu ia raua tei taki atu ki “te taumāro maata.” (Anga. 15:39) Inara kua akaruke ainei raua roa ai i te piri atu ki te angaanga orometua no teia tu? Kare!

Mei te reira rai, me kua kinokino koe i tetai taeake irinaki, e akamaara e kare toou enemi e ko toou taeake Kerititiano apa ua, mari ra ko Satani, tei inangaro i te akapou ia koe. Kare ra oki te Tiaporo e puapinga me ka rauka ia koe te ‘patoi atu iaia ma te akarongo turori kore.’ (1 Pete. 5:8, 9; Gala. 5:15) Me e akarongo toou mei te reira rai, te aiteanga ‘kare ïa koe e akama.’​—Roma 9:33.

Te ka Tau kia Rave Tatou me Kotingaia

Mei teia au akaraanga no te au kotoeanga, te kitea uaia ra e kare e kotoeanga Tuatua Tapu tau kia kore e rave i ta Iehova au akauenga taka meitaki, kapiti mai te angaanga tutu aere i te tuatua meitaki. Tera ra, penei e au tumu tika tikai ta tatou ka kore ei e rauka i te rave i ta tatou angaanga orometua. Penei ka riro tetai atu au apainga Tuatua Tapu ei akaiti mai i te taime ta tatou ka akanoo no te angaanga tutu aere. Tetai taime katoa, penei kua roiroi tikai me kore e maki tatou i te rave i te ka rauka ia tatou i roto i te tavinianga ia Iehova. Inara, te akapapu maira te Tuatua a te Atua e kua kite a Iehova i to tatou manako ngakau tae e te marama maira i to tatou turanga.​—Sala. 103:14; 2 Kori. 8:12.

No reira, ka anoanoia tatou kia matakite, eiaa e akaapa maata ia tatou me kore i etai ke i roto i teia au mea. Kua tata te apotetoro ko Paulo e: “Koai oki koe na, ka akaapa atu ei i to tetai ke ra tavini? tei tona uaorai pu tona mou e tona inga.” (Roma 14:4) Eiaa e akaaite i to tatou turanga ki to etai ke, akamaara ra e “ka ope takiri rava tatou i te aaki i te tuatua iaia uaorai i te Atua ra.” (Roma 14:12; Gala. 6:4, 5) Me pure kia Iehova e te oronga i ta tatou kotoeanga, kia rave tatou i te reira ma ‘te tika o to tatou akava-ngakau.’​—Ebe. 13:18.

Tumu i Mataora ai Tatou te Tavini ia Iehova

Ka rauka ia tatou pouroa te tavini ia Iehova ma te mataora mou no te mea ko tana umuumuanga—noatu eaa to tatou turanga i roto i te oraanga—e tau ua ana e ka rauka ua. Eaa i rauka ai ia tatou kia tuatua akapera?

Te na ko ra te Tuatua a te Atua e: “Auraka koe e tāpu i te meitaki i te tangata e tau iaia ra, e tei to rima rai taua meitaki ra kia o atu.” (Mase. 3:27) Eaa taau i kite i roto i teia materi no ta te Atua au umuumuanga? Kare a Iehova e akaue ana kia akaaiteite i toou meitaki ki te meitaki o toou taeake, mari ra kia tavini koe Iaia me “tei to rima rai taua meitaki ra.” Ae, tatou tataki tai​—noatu te paruparu me kore te ririnui o te meitaki i roto i to tatou rima—​ka rauka i te tavini ia Iehova ma te ngakau katoa.​—Luka 10:27; Kolo. 3:23.

[Pia/​Tutu i te kapi 14]

 “Au Mataiti Mataora Rava Atu o Toku Oraanga”

Noatu te kino o to tatou manamanata kopapa e te manako ngakau, eiaa tatou e rapurapu i te karanga e ka arai teia au tu ia tatou i te piri pu tikai ki roto i te angaanga orometua. Ei akatutuanga, akamanako ana i tei tupu kia Ernest, e taeake Kerititiano i Kanata.

Kare a Ernest i te tangata tukatau i te tuatua e e tangata akama ua aia. Muri ake i te kino anga tona mokotua, kua akaruke aia i tana ngai angaanga patu are. Noatu tona mokotua kino, kua tauturu tona turanga ou iaia kia akapou maata i tona taime i te angaanga orometua. Te akamaroiroianga i ko i te au uipaanga putuputuanga kia painia tauturu, kua akaketaketa i tona manako kia rave i te reira. Kare ra aia i manako e ka tau aia kia painia.

Ei akapapu e, kare e rauka iaia te painia tauturu, kua tuku aia i tana patianga kia painia e tai marama. Poitirere aia e, kua oti meitaki tana tukuanga angaanga. Ina, manako aia, ‘kua kite au e kare rava e rauka iaku te rave akaou i te reira.’ Ei akapapu i tona manako, kua tuku aia i te patianga no te rua o te marama—e kua oti akaou iaia te reira.

Kua tavini a Ernest ei painia tauturu no tetai mataiti, e kua karanga e, “Papu iaku e kare e rauka iaku kia painia tamou.” Ei akapapu i tona manako, kua pati aia kia painia tamou. Poitirere tikai aia e kua pou tera mataiti mua iaia, i te painia. Painia ua atu rai aia, e kua akameitakiia i te painia tamou anga no te rua mataiti, e tae ua atu ki tona matenga. I mua ake ra i tona matenga, e akakite ua ana aia ki te aronga e atoro mai ana iaia ma te aue e, “Ko te au mataiti e tavini ra au ia Iehova ei painia, te au mataiti mataora rava atu o toku oraanga.”

[Tutu i te kapi 13]

Ka autu tatou i tetai ua atu tu ngata ka arai ia tatou mei te angaanga orometua

[Tutu i te kapi 15]

Mareka a Iehova me tavini tatou iaia ma te ngakau katoa na te rave pouroa i te ka rauka ia tatou