“Tauturu te Reira Iaku kia Itae i te Ngakau o te Tangata”

TETAI taime akenei i roto i te oire ko Porto Alegre, i te pae tai i te tua apatonga o Paratiri, kua raveia tetai uipaanga pa enua no runga i te au manamanata o te tangata. Raungauru ua atu tauatini tangata no te au enua e 135, tei tae mai ki taua akakoroanga ra. I te au taime akangaroi, kua aravei atu tetai pupu Kite no te putuputuanga i Porto Alegre i te au komono, i te akakite i te karere Pipiria no te Patireia kia ratou. Akapeea ra ratou i te komunikeiti anga?

“Kua taangaanga matou i te puka rikiriki, Good News for People of All Nations,” i akakite ei tetai painia ko Elizabete. Kua karanga katoa aia e: “E maata ua atu te au komono kare rava i rongo ana i te tuatua meitaki o te Patireia, kareka ra kua ariu meitaki ua mai ratou ki ta matou karere. Kua tuatua matou ki te au tangata mei Porivia, Tinito, Varani, Initia, Iseraela, e Naiteria. Tetai au komono, e au puka ta matou i roto i to ratou uaorai reo, tei ariki rekareka ua mai ratou.”

I Meiko kua taangaanga katoa tetai painia ko Raúl tona ingoa i teia puka rikiriki tei arikiia mai. Tetai taime akenei, kua aravei aia i tetai tangata Arapia koi mate ua akera tana vaine. Te oti anga taua tangata ra i te tatau i te kapi e akakite maira i te karere o te Patireia i roto i te reo Arapia, kua aue no te rekareka. No teaa ra? Kua tukia tona ngakau te tatau anga i te taputou a te Atua i roto ia Apokalupo 21:3, 4 i roto i tona uaorai reo, e ka kore te mate. Tetai atianga ke, iaia e tutu aere ra, kua aravei a Raúl i tetai tangata tuatua reo Potukara. Kua takake katoa tetai tei akaperepereia e ia—ko tana tamaiti. Tuku a Raúl kia tatau aia i te kapi i roto i te reo Potukara. Te oti anga, kua akakite taua tangata ra e ka inangaro aia kia maata atu tona kite no runga i te Pipiria, e kua ariki aia i tetai apii Pipiria.

Kua taangaanga a Raúl i te puka rikiriki Good News for People of All Nations ei akakitekite ki te aronga e tuatua ana i te reo Amenia, Tinito, Papaa, Varani, Tiamani, Hindi, Korea, Mixe, Peresia, Rutia, e Zapotec. Karanga aia: “Kua kite au e e puapinga te taangaanga i teia puka i roto i taku angaanga orometua. Tauturu te reira iaku kia itae i te ngakau o te tangata noatu kare au e tuatua ana i to ratou reo.”

I te mea te maata atura te tangata e aere ra e te noo ra ki te au ngai ke ke e te mamao, e maata to tatou atianga kia aravei i te aronga e tuatua ana i te reo ke. Ka rauka ia tatou i te taangaanga i te puka, Good News for People of All Nations ei akakite i te karere o te Patireia kia ratou. Te apai aere ra rai koe i te reira?

[Au Tutu i te kapi 32]

Ko Raúl e te puka rikiriki tei tauturu iaia kia itae i te ngakau o te tangata