Au Mapu​—Eaa ta Kotou ka Rave i to Kotou Oraanga?

“Te moto nei au, kare ra mei te mea e, e moto ki te matangi.”—1 KORI. 9:26.

1, 2. E puapingaia ai kotou ia kotou e pakari maira, eaa ta kotou ka anoano?

ME AERE kotou ki tetai ngai kare kotou i matau, e apai i tetai mapu e tetai kaveinga. Ka tauturu te mapu ia kotou kia kite teiea kotou e ka tauturu i te parani i tetai mataara tau kia aru. Ka tauturu te kaveinga ia kotou kia aru i te mataara tau. Inara, ka puapinga kore te mapu e te kaveinga me kare kotou i kite i te ngai e aere ra kotou. Kia kore e aere ke, ka anoanoia kotou kia kite tikai i te ngai e aere ra kotou.

² Mei te reira katoa te turanga ka aro atu kotou, ia kotou e pakari maira. Kua tu kotou i te mapu e te kaveinga ka rauka i te irinaki. Ko te Pipiria te mapu ei tauturu ia kotou kia parani i te mataara tau no te oraanga. (Mase. 3:5, 6) Me tereni meitakiia, ka tauturu maata mai to kotou akava ngakau ia kotou kia aru ua rai i te mataara tau. (Roma 2:15) Ka riro te reira ei kaveinga. Inara, e puapingaia ai to kotou oraanga, ka anoanoia kotou kia kite e te aere ra kotou kiea. Ka anoanoia kotou kia akanoo i te au akakoroanga papu tikai.

3. Eaa te au akameitakianga no te au akakoroanga ta Paulo i taiku i roto ia 1 Korinetia 9:26?

³ Kua akakite poto mai te apotetoro ko Paulo i te au akameitakianga no te akanoo anga i te au akakoroanga e te tauta anga i te itae i te reira, tona tataanga: “E teianei te oro nei au, kare ra mei te mea kare i kitea; te moto nei au, kare ra mei te mea e, e moto ki te matangi.” (1 Kori. 9:26) Me e au akakoroanga ta kotou, ka rauka ia kotou i te rave i te reira ma te papu tikai. Kare e roa atu, ka rave kotou i te au ikianga puapinga, ei akaraanga, te akamorianga, te angaanga, te akaipoipo, e te pamiri. Tetai taime, penei ka manako kotou e te aro atura kotou i te au ikianga ngata. Inara, me parani vave i te mataara ka aere kotou, tei akatumuia ki runga i te au tuatua mou e te au kaveinga i roto i te Tuatua a te Atua, kare kotou e timataia kia aru i te mataara tarevake.—2 Timo. 4:4, 5.

4, 5. (a) Eaa te ka tupu me kare kotou e akanoo i te au akakoroanga na kotou uaorai? (e) Eaa ra ta kotou au ikianga kia aratakiia e te inangaro kia akamareka i te Atua?

⁴ Me kare kotou e akanoo i tetai au akakoroanga na kotou uaorai, ka akakeu to kotou au oa e te au puapii ia kotou kia rave i ta ratou e manako ra e mea meitaki no kotou. Tika, noatu e au akakoroanga papu tikai ta kotou, ka oronga mai rai etai i to ratou manako. Me akarongo ki to ratou manako, ui kia kotou uaorai, ‘Ka tauturu ainei ta ratou akakoroanga i taiku mai kia akamaara au i Tei Anga iaku i toku ou anga, me ka riro ainei ei tamanamanata iaku?’—E tatau ia Koheleta 12:1.

⁵ Eaa ra ta kotou au ikianga no te oraanga kia aratakiia e to kotou inangaro kia akamareka i te Atua? Tetai tumu kua oronga mai a Iehova i te au mea meitaki ravarai no tatou. (Iako. 1:17) Te tikaanga, kia akameitaki maata te katoatoa ia Iehova. (Apo. 4:11) Eaa atu oki te mataara meitaki no kotou kia akaari i te ariki rekareka e kia akamanako ia Iehova me akanoo i ta kotou au akakoroanga? Ka akamanako tatou i te au akakoroanga ka tau te itae e ta kotou ka rave.

Eaa te Au Akakoroanga ka Akanoo Kotou?

6. Eaa te akakoroanga puapinga kia akanoo kotou, e no teaa ra?

⁶ Mei tei taikuia i te atikara i mua akenei,  tetai akakoroanga puapinga kia akanoo kotou, kia akapapu kia kotou uaorai e ko tei akakiteia i roto i Pipiria e mea tika tikai. (Roma 12:2; 2 Kori. 13:5) Penei te irinaki ra to kotou au oa i te au mea tupu ua e te au apiianga akonoanga pikikaa tukeke, no te mea kua akakite tetai kia ratou e ko teia ta ratou ka tau i te irinaki. Inara, kare kotou e irinaki ua atu i tetai mea no te inangaro ra tetai ia kotou kia irinaki i te reira. Akamaara ra, te inangaro ra a Iehova ia kotou kia tavini iaia ma to kotou manako katoa. (E tatau ia Mataio 22:36, 37.) Te inangaro ra to tatou Metua i te rangi ia kotou kia akaketaketa i to kotou akarongo ki runga i te au mea papu.—Ebe. 11:1.

7, 8. (a) Eaa te au akakoroanga no te tuatau poto te ka tauturu i te akaketaketa i to kotou akarongo? (e) Eaa ta kotou ka kite mai me taeria tetai o ta kotou au akakoroanga no te tuatau poto?

⁷ Ei akaketaketa i to kotou akarongo, eaa ka kore ei e akanoo i tetai akakoroanga no te tuatau poto? Tetai akakoroanga kia pure i te au ra ravarai. Kia taka meitaki e kia kore e taokioki ua ta kotou au pure, e akamanako me kore e tata i tetai au angaanga tikai tei tupu i taua ra ra, ka inangaro kotou i te taiku atu ki roto i ta kotou au pure. E taiku i te au akaaoanga ta kotou i aro atu e te au mea ta kotou i mataora ana. (Phili. 4:6) Tetai akakoroanga ke, e tatau i te Pipiria i te au ra ravarai. Kua kite ainei kotou e me tatau kotou e a kapi i te ra, ka rauka ia kotou te tatau i te katoaanga o te Pipiria i te mataiti okotai? * “E ao to te tangata . . . tei inangaro ra i te ture a Iehova,” i akakite ei a Salamo 1:1, 2, “e tei tana ture tona manako anga i te po e te ao.”

⁸ Te toru o te akakoroanga no te tuatau poto ta kotou ka akanoo, e akapapa i tetai pauanga no te au uipaanga putuputuanga. Te akamataanga, penei ka inangaro kotou i te tatau i te pauanga me kore i tetai irava. Muri mai, e pau kotou na roto i ta kotou uaorai au tuatua. Te tikaanga, te au taime e pau ra kotou, te oronga ra kotou i tetai apinga aroa kia Iehova.  (Ebe. 13:15) Me taeria e kotou tetai o teia au akakoroanga, ka maata mai to kotou irinaki papu, e to kotou arikianga rekareka ia Iehova, e ka papa ua kotou i te akanoo i tetai au akakoroanga no te tuatau roa.

9. Me kare kotou i riro ake ei papuritia no te Patireia, eaa te au akakoroanga no te tuatau roa ka akanoo kotou na kotou uaorai?

⁹ Eaa te au akakoroanga no te tuatau roa ka akanoo kotou na kotou uaorai? Me kare kotou i akamata ake i te akakite i te tuatua meitaki i te ngai tangata, penei ta kotou akakoroanga no te tuatau roa kia riro ei papuritia no te Patireia. Me taeria e kotou teia akakoroanga meitaki, ka inangaro kotou kia putuputu e kia tukatau, kia kore e topa tetai marama no te angaanga tutu aere. Ka inangaro katoa kotou kia kite i te taangaanga i te Pipiria i roto i te angaanga orometua. Me rave kotou i te reira, ka mataora kotou i te angaanga tutu aere. Penei e akamaata kotou i to kotou taime no te angaanga mei tetai are ki tetai, me kore te tauta anga i te rave i tetai apii Pipiria. Ei papuritia kare i papetitoia ake, eaa atu oki te akakoroanga puapinga no kotou kia tau no te papetito, e kia riro mai ei Kite akatapuia e tei papetitoia no te Atua ko Iehova?

10, 11 Eaa te au akakoroanga no te tuatau roa no te au mapu kua papetitoia kia akanoo no ratou uaorai?

¹⁰ Me kua papetitoia kotou ei tavini no Iehova, teia tetai au akakoroanga no te tuatau roa ka rauka ia kotou te itae. Penei ka inangaro kotou i tetai taime i te tauturu i te au putuputuanga kia tutu aere i te au ngai kare e angaanga putuputuia ana. Penei ka iki katoa kotou kia taangaanga i to kotou maroiroi e te oraanga meitaki i te angaanga painia tauturu me kore ei painia tamou. Rau ngauru tauatini ua atu painia mataora ka akakite mai kia kotou e ko te tavinianga tamou tetai mataara meitaki rava atu ei akamaara i Tei Anga mai ia kotou i to kotou ou anga. Ka rauka teia au akakoroanga, ia kotou e noo ra i te kainga. Ka puapinga katoa to kotou putuputuanga me taeria e kotou te reira.

¹¹ Penei ka taki atu tetai au akakoroanga no te tuatau roa ia kotou kia akamaata atu i ta kotou ka rauka i te rave. Ei akaraanga, penei ka parani kotou i te tavini i tetai ngai ke me kore i tetai enua ke e anoano maataia ra te tauturu. Penei ka inangaro kotou i te tauturu i te patu anga i te au Are Uipaanga Patireia me kore te au are o te opati manga i te au enua ke. Penei ka rauka ia kotou te angaanga atu i Betela me kore kia riro mai ei mitinari. Inara, te akakoroanga puapinga mua ta kotou ka anoanoia kia itae i mua ake ka rave ei i te au akakoroanga no te tuatau roa tei taikuia mai, kia papetitoia. Me kare kotou i papetitoia ake, akamanako eaa te o maira kia taeria teia akakoroanga puapinga i roto i to kotou oraanga.

Itae Anga i te Akakoroanga o te Papetitoanga

12. Eaa tetai au tumu i papetitoia ai tetai pae, e eaa ra teia kare e tau ana?

¹² Akapeea kotou me akataka mai i te akakoroanga no te papetitoanga? Penei ka manako tetai i te reira ei paruru ia ratou kia kore e rave i te ara. Tetai pae penei te manako ra ka papetito ratou no tei papetitoia to ratou au oa. Penei tetai au mapu te inangaro ra i te akamareka i to ratou au metua. Inara, kare te papetitoanga i tetai koreromotu te ka tapu ia kotou i te rave muna i te au mea ta kotou e inangaro ra i te rave; e kare katoa kotou e papetito no te maro anga a tetai ke. Ka papetitoia kotou me marama tikai kotou eaa te o maira no te riro anga ei Kite no Iehova e me papu ia kotou e kua papa kotou e te inangaro ra i te rave i teia apainga.—Kohe. 5:4, 5.

13. Eaa ra kotou ka papetitoia ai?

¹³ Tetai tumu kia papetitoia kua akaue a Iesu i tana au pipi kia “akariro i to te pa enua katoa ei pipi . . . , ka bapetizo atu ei ia ratou.” Kua akanoo katoa aia i te akaraanga na te papetito anga. (E tatau ia Mataio 28:19, 20; Mareko 1:9.) I runga ravao, e takainga puapinga te papetitoanga no te aronga e inangaro ra kia ora mai. Muri ake te taiku anga i te tarai anga a Noa i te araka, te ngai i ora mai ei aia e tona pamiri i te tuatau o te Vaipuke, kua akakite te apotetoro ko Petero e: “Ko tei tau i te reira ra, ko te bapetizo ïa e ora katoaʼi tatou i teianei, . . . i te tuakaouanga  o Iesu Mesia ra.” (1 Pete. 3:20, 21) Kare te aiteanga e mei tetai moni initurini rai te papetitoanga, ka rauka mai ia kotou e ua ake ka tupu mai tetai tumatetenga. Mari ra, ka papetitoia kotou no to kotou inangaro ia Iehova e te inangaro i te tavini iaia ma to kotou ngakau, vaerua, manako, e te ririnui katoa.—Mare. 12:29, 30.

14. Eaa ra tetai pae i emiemi ei i te papetito, inara eaa te akapapu anga tei orongaia mai kia kotou?

¹⁴ Penei ka emiemi tetai pae i te papetito no te mataku e a tetai tuatau i muri mai ka akaateaia ratou. Ko to kotou manako ainei teia? Me koia ia, kare te reira i te mea kino. Te aiteanga te marama ra kotou i te apainga puapinga tikai te riro anga ei Kite no Iehova. E tumuanga ke ainei tetai? Penei kare i papu roa ia kotou e ko te aru anga i te au turanga a te Atua te mataara meitaki rava atu no te oraanga. I taua turanga ra, na te akamanako anga i te au kino e tupu ra ki te aronga tei kopae i te au turanga Pipiria e tauturu ia kotou kia rave i tetai ikianga. I tetai tua, penei te inangaro ra kotou i te au turanga a te Atua inara kare kotou e irinaki ana e ka rauka ia kotou i te akatupu i te reira. E tika, e manako meitaki te reira, te akaari maira i to kotou tu akaaka. No te mea, te karanga ra te Pipiria e e pikikaa maata to te au ngakau o te tangata apa ua nei. (Iere. 17:9) Inara, ka puapingaia kotou me ‘akono marie kotou kia tau ki te tuatua a te Atua.’ (E tatau ia Salamo 119:9.) Noatu eaa te au tumu no to kotou tu emiemi no te papetito ka anoanoia kotou kia rave i tetai ikianga ngaueue kore. *

15, 16 Akapeea kotou e kite ei me kua papa kotou no te papetitoanga?

¹⁵ Akapeea kotou e kite ei me kua papa kotou no te papetitoanga? Tetai mataara, e ui kia kotou uaorai i teia au uianga: ‘Ka rauka ainei iaku i te akamarama i te au apiianga tumu o te Pipiria ki tetai ke? Te piri ra ainei au ki roto i te angaanga orometua noatu kare toku nga metua e piri mai ana? Te tauta ra ainei au i te aere ki te au uipaanga Kerititiano ravarai? Te maara ra ainei iaku i te au tuatau tikai i rauka ai iaku i te patoi i te taomianga a toku au oa? Noatu kua akamutu toku nga metua e te au oa i te tavini ia Iehova ka tavini ua atu ainei au iaia? Kua pure ainei au no runga i toku pirianga ki te Atua? Kua rave ainei tikai au i tetai akatapuanga ngakau katoa kia Iehova na roto i te pure?’

¹⁶ E tauianga maata te papetitoanga i roto i te oraanga, e e ikianga pakari tikai. Kua pakari ainei kotou i te akamanako no runga i teia takainga puapinga? Kare te pakari i akatumuia ki runga i te oronga anga i te au akoanga meitaki mei te paata mai, me kore te au pauanga umere i te uipaanga. Ka umuumuia kia rave i te au ikianga no runga i te marama anga i te au kaveinga Pipiria. (E tatau ia Ebera 5:14.) Me tei roto kotou i te turanga e ka rauka ia kotou i te rave i te reira, tei mua ia kotou te atianga  ngateitei rava atu—te tavini anga ia Iehova ma te ngakau katoa e te aru anga i te mataara te akaari ra e kua akatapu tikaiia kotou kiaia.

17. Eaa te ka tauturu ia kotou kia autu i te au timataanga i muri ake i to kotou papetitoanga?

¹⁷ Muri ake i te papetitoanga, maroiroi tikai to kotou manako te tavini anga i te Atua. Kare e roa atu, ka timataia to kotou akarongo e to kotou tu maroiroi. (2 Timo. 3:12) Auraka e manako e ko kotou anake ua ka akono atu i teia au timataanga. E pati tauturu ki to kotou au metua. Pati tauturu ki te aronga maroiroi i te pae vaerua i roto i te putuputuanga. Akatupu ua rai i te pirianga oa ki te aronga ka turuturu ia kotou. Auraka e ngaropoina te manako maira a Iehova ia kotou, e ka oronga mai aia i te maroiroi kia rauka ia kotou te aro atu i tetai ua atu manamanata ka tupu mai.—1 Pete. 5:6, 7.

Akapeea me Itae i ta Kotou Au Akakoroanga?

18, 19 Akapeea kotou e puapingaia ai me akara meitaki eaa te au mea puapinga kia kotou?

¹⁸ Noatu to kotou au akakoroanga meitaki, akaraanga ainei kare e rava ana to kotou taime i te rave i ta kotou e inangaro ra e e anoano ra i te rave? Me koia ia, akara meitaki eaa te au mea puapinga kia kotou. Ei akatutuanga: Rave mai i tetai pakete, tuku i tetai au toka mamaata ki roto. E oti akaki i te pakete ki te one. E pakete ta kotou kua ki i te toka e te one. Riringi i te reira ki vao, akono i taua au toka ra e te one. Teia taime, akaki i te pakete ki te one na mua, e oti tuku i te au toka ki roto i te pakete. E ngai ainei tetai no te au toka? Te tumu kua tuku kotou i te one na mua ki roto i te pakete.

¹⁹ Te aro atura kotou i tetai akaaoanga mei te reira rai no te akaaere anga i to kotou taime. Me tuku kotou i te au mea mei te tamataoraanga ei mea mua, kare rava te au mea puapinga tikai e o mai ki roto i to kotou oraanga—te au angaanga pae vaerua. Inara me aru kotou i te akoanga a te Pipiria kia akapapu “i te au mea e maata ua atu te meitaki,” ka kite mai kotou e e ngai tetai no te au anoano o te Patireia e no tetai tamataoraanga.—Phili. 1:10.

20. Me taitaia e me ekoko kotou ia kotou e tauta ra i te itae i ta kotou au akakoroanga, eaa ta kotou ka rave?

²⁰ Ia kotou e tauta ra i te itae i ta kotou au akakoroanga, kapiti mai te papetitoanga, penei tetai taime ka taitaia e ka ekoko kotou. Me koia ia, ‘e tuku kotou i ta kotou apainga kia Iehova ra, e nana kotou e tauturu mai.’ (Sala. 55:22) Teianei, kua rauka ia kotou te atianga kia piri atu ki te angaanga mataora rava atu e te puapinga i roto i te tuatua enua o te tangata, e kamupeini tutuanga e te apiianga i teianei ao. (Anga. 1:8) Ka rauka ia kotou te iki kia akara ua i te aronga e rave ra i teia angaanga. Me kore ka rauka ia kotou i te piri atu ki teia angaanga mataora. Eiaa e tapupu i te taangaanga i to kotou au tareni te turuturu anga i te au anoano o te Patireia. Kare rava kotou e tataraara i te tavini anga ‘i Tei anga ia kotou i to kotou ou anga ra.’—Kohe. 12:1.

[Au Tataanga Rikiriki i Raro]

Akapeea Kotou me Pau?

• Eaa ra kotou ka akanoo ei i te au akakoroanga?

• Eaa tetai au akakoroanga puapinga ka rauka i te itae?

• Eaa te o maira i te itae anga i te akakoroanga no te papetitoanga?

• Akapeea te akara meitaki anga eaa te au mea puapinga ei tauturu ia kotou kia rauka ta kotou au akakoroanga?

[Au Uianga Apii]

[Tutu i te kapi 13]

E akakoroanga ainei ta kotou no te tatau anga Pipiria i te au ra ravarai?

[Tutu i te kapi 15]

Eaa te ka tauturu ia kotou kia itae i te akakoroanga no te papetitoanga?

[Tutu i te kapi 16]

Eaa te apiianga ta kotou i kite mei teia akatutuanga?