Au Mapu​—Kia Aratakiia e te Tuatua a te Atua

“E aruaru i te pakari, e aruaru i te kite.”—MASE. 4:5.

1, 2. (a) Eaa tei tauturu i te apotetoro ko Paulo kia autu i tona au manamanata? (e) Akapeea e rauka ai ia kotou te pakari e te kite?

“KIA anoano au i te rave i te mea meitaki ra, te vaitata ua nei te kino iaku i reira.” Kua kite ainei kotou naai i tuatua i taua au tuatua? Na te apotetoro ko Paulo. Noatu e inangaro to Paulo ia Iehova, tetai taime e ngata iaia i te rave i te mea tika. Eaa tona manako no runga i teia manamanata i roto iaia? Kua tata aia e: “Aue oki au ko te tangata mate maata e!” (Roma 7:21-24) Te marama ra kotou i to Paulo manako? Te kite ra ainei kotou i te ngata i tetai taime i te rave i te mea tika? Kare ainei te reira e akataitaia ana ia kotou, mei ia Paulo rai? Me koia ia, auraka e maromaroa. Kua autu a Paulo i te au akaaoanga tana i aro atu, e ka autu katoa kotou.

² Kua autu a Paulo no te mea kua akatika aia kia aratakiia aia e te au “tuatua tikai.” (2 Timo. 1:13, 14) Tei tupu mai, kua rauka iaia te pakari e te kite kia autu atu i te au akaaoanga e kia rave i te au ikianga meitaki. Ka tauturu te Atua ko Iehova ia kotou kia rauka te pakari e te kite. (Mase. 4:5) Kua oronga mai aia i te akoanga meitaki roa atu i roto i tana Tuatua, te Pipiria. (E tatau ia 2 Timoteo 3:16, 17.) Akamanako ana akapeea kotou te puapinga anga mei te au kaveinga Tuatua Tapu no runga i to kotou au metua, te akaaere anga i te moni, e me ko kotou anake ua.

Aratakiia te Pamiri e te Tuatua a te Atua

3, 4. Eaa i ngata ei ia kotou te akarongo ki te au ture a to kotou au metua, inara eaa ra te au metua i tuku mai ei i te au ture?

³ Te ngata ra ainei ia kotou i te aru i te au ture a to kotou au metua? Eaa ra te tumu? Te inangaro ra kotou i te rave i ta kotou e inangaro ra. E tu natura i te inangaro i teia. E tuanga teia no te tupu anga mai ei tangata mamaata. Ia kotou ra i te kainga, e apainga ta kotou kia akarongo ki to kotou au metua.—Ephe. 6:1-3.

⁴ Me marama kotou i te tumu i tuku mai ei to kotou au metua i te au ture e te au umuumuanga no kotou, ka mama ua ia kotou te aru i te reira. E tika, ka manako kotou tetai taime mei ia Brielle * rai e 18 ona mataiti, tei karanga no runga i tona nga metua e: “Kua ngaropoina ia raua mei teaa rai te tu me tae ki toku mataiti. Kare raua e inangaro kia tuatua au i toku manako e kia rave i tetai ikianga, me kore kia riro mai ei tangata mamaata.” Mei ia Brielle rai, penei te manako ra kotou e te tapupu ra to kotou au metua ia kotou. Inara, kua tuku mai to kotou au metua i te au ture, no to ratou manako maata ia kotou. Pera katoa, kua kite te au metua Kerititiano e e apainga ta ratou kia Iehova no te tu e akono ra ratou ia kotou.—1 Timo. 5:8.

5. Akapeea te akarongo anga ki to kotou au metua te akapuapinga anga ia kotou?

⁵ E tika, te akarongo anga ki te au ture a to kotou au metua, mei te tutaki anga i tetai kaiou i te pangika—te meitaki ia kotou i te tutaki anga i te reira, ka inangaro mai te pangika i te oronga maata mai i te moni kia kotou. Mei te reira rai, e apainga ta kotou kia akangateitei e kia akarongo ki to kotou au metua. (E tatau ia Maseli 1:8.) Te maata atu i to kotou akarongo, kare kore ka oronga maata mai to kotou au metua i te tu rangatira kia kotou. (Luka 16:10) Tera ra, me aati ua rai kotou i te au ture, auraka e poitirere me akaiti mai to kotou au metua i to kotou turanga rangatira.

6. Akapeea te au metua me tauturu i te au mapu kia akarongo?

 ⁶ Tetai mataara no te au metua kia tauturu i ta ratou au mapu kia akarongo i te au ture i akanooia, e oronga i te akaraanga. Me aru puareinga ua ratou ki ta Iehova e umuumu maira, ka akaari mai e te tau ra te au ture a te Atua. Ka tauturu teia i te au mapu kia marama e e mea tau te akarongo i te au ture tei akanooia e to ratou au metua. (1 Ioa. 5:3) Tei maata atu, te taiku maira te Pipiria i tetai au atianga te oronga anga a Iehova i te tuatau ki tona au tavini kia akakite i to ratou manako no runga i tetai au manamanata. (Gene. 18:22-32; 1 Ari. 22:19-22) E au atianga ainei tetai kia oronga te au metua i te tuatau no ta ratou tamariki kia tuatua mai no runga i tetai au tumu manako?

7, 8. (a) Eaa te akaaoanga ta tetai au mapu e aro atu ana? (e) Eaa ta kotou i kite mai te ka tauturu ia kotou kia puapingaia mei te akoanga?

⁷ Penei ka aro katoa atu te au mapu i te akaaoanga te manako anga e e tau kore te akaapaanga a to ratou au metua. Tetai au taime, penei kua manako ana kotou mei tetai mapu rai ko Craig tona ingoa, tei karanga e, “Mei te akava muna rai toku metua vaine—e akara ua ana aia i te au mea kare i rauka iaku i te rave.”

⁸ E oronga putuputuia ana te akatikatika anga me kore te akoanga na roto i te tu akaapaanga. Te akakite maira te Pipiria e ko te akoanga, noatu te tau meitaki ra, e ngata tikai i te ariki. (Ebe. 12:11) Eaa te ka tauturu ia kotou kia puapingaia mei te akoanga tei orongaia kia kotou? Tetai manako puapinga kia akamaara e ko te akoanga a to kotou au metua, no to ratou inangaro ia kotou. (Mase. 3:12) Te inangaro ra ratou i te tauturu ia kotou kia kopae i te au peu kino e kia akatupu i te au tu meitaki. Kare kore te kite ra to kotou au metua e me kare ratou e akatikatika ia kotou, mei te mea rai e te riri ra ratou ia kotou! (E tatau ia Maseli 13:24.) Pera katoa, kia marama e ko te rave anga i te au tarevake e tuanga ia no te apiianga. No reira, me akatikatikaia kotou, eaa ka kore ei e akara i te pakari o tei tuatuaia mai? “Ko te [pakari] oki i oko naʼi aia ra, e meitaki maata ïa i to te ario; e kia maata oki aia ra, e meitaki maata ïa i to te auro meitaki ra.”—Mase. 3:13, 14.

9. I te manako ua anga ki runga i te au mea kare paa e tika ana, eaa ta te au mapu ka rave?

⁹ Inara, e tarevake ana te au metua. (Iako. 3:2) Me ako atu ia kotou, penei ka tuatua manako kore atu ratou i tetai taime. (Mase. 12:18) Eaa te ka akatupu i to kotou au metua kia tuatua akapera? Penei kua taitaia ratou, me kore kua manako i to kotou au tarevake e kare ratou i puapingaia. I te manako ua anga i ta kotou e manako ra e kare e tika ana, eaa ka kore ei e akaari i te akameitakianga no to ratou inangaro maata i te tauturu ia kotou? Me ariki kotou i te akoanga, ka tauturu te reira ia kotou me tangata mamaata mai.

10. Akapeea kotou me akono meitaki atu i te au ture e te au akatikatika anga a to kotou au metua?

¹⁰ Ka inangaro ainei kotou kia akono meitaki atu i te au ture e te au akatikatika anga a to kotou au metua? Me koia ia, ka anoanoia kotou kia akameitaki mai i te tu e komunikeiti ra kotou. Ka akapeea kotou me rave i te reira? Te takainga mua kia akarongo. ‘Kia rapurapu i te akarongo,’ i karanga ai te Pipiria, “kia tavarevare i te tuatua, kia tavarevare oki i te riri.” (Iako. 1:19) I to te viviki ua i te akatika ia kotou uaorai, tauta i te akatere i to kotou manako ngakau e kia akarongo i te tuatua a to kotou au metua. Akamanako ki runga i te tuatua, kare ki runga i te tu i orongaia mai ei te reira. E oti, e akaari kia ratou e kua marama kotou i ta ratou i tuatua mai, na te akakite anga ma te akangateitei e kua tarevake kotou. Me akapera kotou, ka akapapu kia ratou e kua akarongo kotou i ta ratou i tuatua mai. Akapeea me inangaro kotou i te akamarama atu i ta kotou i tuatua e i rave? Te maataanga o te taime, e tu pakari kia ‘tāpu i to kotou vaa’ kia rauka rava ia kotou i te aru i ta to kotou au metua e inangaro ra. (Mase. 10:19) Me kite mai to kotou au metua e kua akarongo kotou, ka akarongo mai ratou kia kotou. Na roto i taua tu pakari ra, te akapapu ra e te aratakiia ra kotou e te Tuatua a te Atua.

 Aratakiia e te Tuatua a te Atua me Akaaere i te Moni

11, 12 (a) No runga i te moni, eaa ta te Tuatua a te Atua e akamaroiroi ra ia tatou kia rave, e no teaa ra? (e) Akapeea to kotou au metua te tauturu anga ia kotou i te akaaere i te moni?

¹¹ “E akapuanga tei te moni,” i akakite ei te Pipiria. Inara te akaari katoa maira teia irava e e puapinga rava atu to te pakari i te moni. (Kohe. 7:12) Te akamaroiroi maira te Tuatua a te Atua ia tatou kia manako tau i te moni, kia kore e inangaro maata i te reira. Eaa ra kotou ka kopae ei i te inangaro maata i te moni? Akamanako ana i teia akatutuanga: I roto i te rima o tetai tangata karape i te tunu kai, e mea puapinga te matipi koi. Inara, me taangaangaia taua matipi ra e tetai tangata manako kore ka tupu mai te kino. Me taangaanga karapeia, ka riro te moni ei mea puapinga. Inara, te aronga i “māro e kia maata te apinga” te maataanga o te taime ka ngere i te au pirianga oa, te pirianga pamiri, e to ratou pirianga ki te Atua. Te ka tupu, ka koputa ratou ia ratou uaorai “i te iriea e manganui.”—E tatau ia 1 Timoteo 6:9, 10.

¹² Akapeea kotou e kite ei i te akaaere karape i te moni? Eaa ka kore ei e pati tauturu mei to kotou au metua no te akaaere i ta kotou moni? “E riro te tangata pakari i te akarongo, e e tupu te kite, e rauka te kite tikai i te tangata akono meitaki,” i tata ai a Solomona. (Mase. 1:5) Kua pati tetai tamaine mapu ko Anna tona ingoa, no te aratakianga karape mei tona nga metua. Kua karanga aia e, “Kua apii mai toku metua tane iaku akapeea me akaaere i taku moni, e kua akaari mai aia i te puapinga no te akanoo meitaki anga i te tu ka akaaere au i taku moni.” Kua apii katoa te metua vaine o Anna iaia i te au apiianga tau. “Kua akaari mai aia kiaku i te puapinga kia akara meitaki i te moni o te apinga i mua ake ka oko ei,” i karanga ai a Anna. Akapeea a Anna te puapinga anga? Kua pau mai aia e: “Te rauka nei iaku i teianei i te akaaere meitaki i taku uaorai moni. E matakite ana au i taku moni e akapou ra, e kua rauka iaku te tu rangatira e te manako au kia kore e o atu ki roto i te kaiou.”

13. Akapeea kotou me akatere ia kotou uaorai me oko i tetai apinga?

¹³ Penei ka kite mai kotou e te maata maira ta kotou kaiou me oko rapurapu i te au apinga kia akamareka ua i to kotou au oa. Eaa te ka tauturu ia kotou kia kopae i teia au ereere? Me oko i tetai apinga, e akamanako akapeea me akatere ia kotou uaorai. Ko teia ta Ellena e rave ana, e 20 tuma ona mataiti. “Me aru au i toku au oa,” i karanga ai aia, “ka parani vave e ka tare meitaki au i taku moni ka akapou. . . . Kua kite katoa au e e mea meitaki i te aru i te au oa e akamanako meitaki ana i ta ratou moni e ka akamaroiroi mai iaku kia akara meitaki i te moni o te apinga e kia kore e oko i te apinga mua taku ka kite.”

14. Eaa ra kotou ka matakite ei i “te pikikaa o te apinga”?

¹⁴ E tuanga puapinga te angaanga e te akaaere anga i te moni i roto i te oraanga. Inara, kua akakite mai a Iesu e ka mataora tikai te aronga “tei manako i to ratou anoano i te pae vaerua.” (Mata. 5:3, NW) Kua akamatakite mai aia e ka pokiaia te inangaro pae vaerua o tetai tangata e “te pikikaa o te apinga.” (Mare. 4:19) E puapinga tikai i reira kia tuku kotou ia kotou uaorai kia aratakiia e te Tuatua a te Atua e kia manako tau i te moni!

Aratakiia e te Tuatua a te Atua me ko Kotou Anake Ua

15. Eaa te taime ka timata maataia to kotou tu tiratiratu ki te Atua?

¹⁵ Eaa to kotou manako te taime ka timata  maataia to kotou tu tiratiratu ki te Atua—ia kotou i rotopu i tetai ke me kore ko kotou anake ua? Ia kotou i te apii me kore i te angaanga, e maata atu to kotou matakite anga i te pae vaerua. Te matakite ra kotou i te au mea ka takino i to kotou turanga pae vaerua. Te taime ra e akaangaroi ra kotou e kare kotou e matakite roa ana, mama ua i reira i te timata i to kotou turanga akono tau.

16. Eaa ra kotou ka akarongo ei kia Iehova me ko kotou anake ua?

¹⁶ Eaa ra kotou ka akarongo ei kia Iehova me ko kotou anake ua? Akamaara i teia: Ka tamamae kotou me kore ka akarekareka i to Iehova ngakau. (Gene. 6:5, 6; Mase. 27:11) Te manako maira a Iehova i ta kotou e rave ra no te mea ‘te tiaki maira aia ia kotou.’ (1 Pete. 5:7) Te inangaro ra aia ia kotou kia akarongo kiaia kia puapingaia kotou. (Isa. 48:17, 18) Te kopae anga tetai au tavini o Iehova i Iseraela taito i tana akoanga, kua tamamae ratou iaia. (Sala. 78:40, 41) I tetai tua, kua inangaro maata a Iehova i te peroveta ko Daniela, e kua kapiki tetai angera iaia e “tangata akaperepere maataia.” (Dani. 10:11) No teaa ra? Kua vai tiratiratu a Daniela ki te Atua kare i te ngai tangata ua, pera katoa me koia anake ua.—E tatau ia Daniela 6:10.

17. Eaa te au uianga ka ui kotou kia kotou uaorai me iki i te tamataoraanga?

¹⁷ Kia vai tiratiratu ki te Atua me ko kotou anake ua, e akatupu kotou i to kotou ‘ngakau kite kia kite i te meitaki e te kino’ e kia tereni i taua au kite “mātau” ra na te rave anga i te mea tika. (Ebe. 5:14) Ei akaraanga, me iki kotou i te akarongo ki tetai akatangi imene, te au teata ka akara, e te au ngai i runga i te Internet, ka tauturu te au uianga e aru maira ia kotou kia iki i te mea tika e kia kopae i te mea tarevake. Ui kia kotou uaorai i teia au uianga e aru maira: ‘Ka akamaroiroi ainei teia au mea iaku kia akaari i te tu tangi aroa, me ka akakeu ainei iaku kia rekareka “i te kino”?’ (Mase. 17:5) ‘Ka tauturu ainei iaku kia “inangaro i te meitaki” me ka akatupu ainei iaku kia kore e “rikarika i te kino”?’ (Amo. 5:15) Ta kotou ka rave me ko kotou anake ua te akaari maira eaa tikai ta kotou e akaperepere ra.—Luka 6:45.

18. Eaa ta kotou ka rave me kua rave muna ana kotou i tetai angaanga tarevake, e no teaa ra?

¹⁸ Eaa ta kotou ka rave me i rave muna ana kotou i tetai angaanga kua kite kotou e tarevake? Akamaara e, “ko tei tapoki i tana ara, kare ïa e manuia: ko tei aaki ra e kua akaruke, e aroaia ïa.” (Mase. 28:13) Kare i te tu pakari i te rave ua atu i te mea tarevake e te ‘akariri atu i te vaerua tapu o te Atua’! (Ephe. 4:30) E apainga ta kotou ki te Atua, ki to kotou au metua, e kia kotou uaorai kia akakite i tetai ua atu tarevake. No runga i teia, ka rauka i “te aronga pakari o te ekalesia” i te tauturu maata ia kotou. Te na ko ra te pipi ko Iakobo e: “Na ratou e pure [i te tangata tei tarevake] ma te akatainu iaia i te manongi i te ingoa o te Atu [Iehova] ra: E e ora taua maki ra i te pure akarongo, e na te Atu [Iehova] aia e akatu ki runga; e i rave na aia i te ara ra, e akakoreia tana.” (Iako. 5:14, 15) E tika rai, ka tupu te akama e penei tetai atu au tupuanga mareka kore. Inara, me kare kotou e mataku i te pati  tauturu, kare e maata to kotou kino, ka mataora kotou no te akava ngakau ma.—Sala. 32:1-5.

Akarekareka i te Ngakau o Iehova

19, 20 Eaa ta Iehova e inangaro ra no kotou, inara eaa ta kotou ka rave?

¹⁹ E “Atua mataora” a Iehova, e te inangaro ra aia ia kotou kia mataora. (1 Timo. 1:11, NW) Te manako tikai maira aia ia kotou. Noatu kare e tangata e kite maira i ta kotou tauta anga i te rave i te mea tika, te kite maira aia. Te kite maira a Iehova i te au mea ravarai. Te akara maira aia, kare i te kimi apa, mari ra kia turuturu i ta kotou tauta anga i te rave i te mea meitaki. “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”—2 Para. 16:9.

²⁰ No reira e tuku ia kotou kia aratakiia e te Tuatua a te Atua e kia taangaanga i ta te reira e ako maira. Ka rauka i reira ia kotou te pakari e te kite ka anoanoia kia autu i te au manamanata e kia rave i te au ikianga ngata o te oraanga. Kare kotou e akamareka ua i to kotou au metua e ia Iehova, mari ra ka rekareka katoa kotou i te oraanga mataora tikai.

[Tataanga Rikiriki i Raro]

Akapeea Kotou me Pau?

• Eaa ta te au mapu ka rave kia autu e kia puapingaia mei te au ture e te au akatikatika anga a te au metua?

• Eaa ra i puapinga ai kia manako tau no runga i te moni?

• Akapeea kotou me vai tiratiratu kia Iehova me ko kotou anake ua?

[Au Uianga Apii]

[Tutu i te kapi 6]

Ka vai tiratiratu ainei kotou ki te Atua me ko kotou anake ua?