Au Mapu​—Patoi i te Taomianga a te Au Oa

‘Ei tuatua kia rapakauia i te tai, i te kite anga i te mea tika kia tuatua atu ki te tangata katoa ra.’—KOLO. 4:6.

1, 2. Eaa te manako o tetai au mapu no te akaraanga tuke, e eaa ra te tumu?

KARE ekoko kua rongo ana kotou i te tuatua “taomianga a te au oa” pera katoa kua na roto ana kotou i te reira. Tetai taime, penei kua akakoko ana tetai tangata ia kotou kia rave i tetai mea kua kite kotou e tarevake. Eaa to kotou manako me tupu te reira? “Tetai taime e inangaro ana au kia ngaro au,” i tuatua ai a Christopher, e 14 ona mataiti, “me kore kia riro au mei toku au oa apii kia kore au e akaraanga tuke.”

² Te akakeu maata ra ainei to kotou au oa ia kotou? Me koia ia, eaa te tumu? Te inangaro ra ainei kotou ia ratou kia ariki mai ia kotou? Kare te reira inangaro e tarevake ana. Te tikaanga, e inangaro katoa ana te aronga mamaata kia arikiia mai ratou e to ratou au oa. Kare e tangata—te mapu e te aronga pakarikari—e reka ana kia kopaeia aia. E tika rai, kare tetai aronga e reka mai me rave kotou i te mea tika. Kua na roto katoa a Iesu i te reira tu. Noatu ra, kua rave ua rai a Iesu i te mea tika. I tetai pae e aru ra iaia e kua riro mai ei au pipi nana, kua akavaavaa tetai pae i te Tamaiti a te Atua “e kare aia i manako meitakiia.”—Isa. 53:3.

Te Taomianga kia Aru—Mei Teaa ra te Ririnui?

3. Eaa ra i tarevake ei i te aru i te au turanga a to kotou au oa?

³ Tetai taime, penei ka timataia kotou kia aru i te au turanga o to kotou au oa kia kore ratou e kopae mai ia kotou. E tarevake te reira. Auraka rava te au Kerititiano ‘e tauriuriia, mei  te tamariki ra.’ (Ephe. 4:14) Mama ua te au tamariki rikiriki te akakeuia e tetai ke. Inara, ei au mapu, ka riro mai kotou ei tangata mamaata a tetai ra. No reira, me te irinaki ra kotou e e meitaki te au turanga a Iehova no kotou, ka tau kotou kia aru i ta kotou e irinaki ra. (Deu. 10:12, 13) Me rave kotou i te mea ke, te tuku ra kotou i to kotou oraanga na tetai ke e akaaere. Te tikaanga, me tuku ua kotou ki te taomianga a tetai ke, te akaaere ra ratou ia kotou.—E tatau ia 2 Petero 2:19.

4, 5. (a) Akapeea a Aarona i te tuku ua atu anga ki te taomianga, e eaa te au apiianga ta kotou ka kite mai mei teia? (e) Eaa te au ravenga ka taangaanga to kotou au oa i te tuku mai i te taomianga kia kotou?

⁴ Tetai atianga, kua tuku ua atu a Aarona, te tuakana o Mose ki te au taomianga a te au tangata. Te akakoko anga to Iseraela iaia kia maani i tetai atua no ratou, kua rave aia i te reira. Kare a Aarona i te tangata paruparu. I mua atu ana, kua tu raua ko Mose ki mua ia Pharao, te tangata mana ririnui roa atu i Aiphiti. Kua tuatua mataku kore atu a Aarona kiaia, te akakite anga i te karere a te Atua. Inara, te tuku mai anga te au taeake Iseraela i te taomianga ki runga iaia, kua tuku ua atu a Aarona ki ta ratou. E akakeu anga ririnui te taomianga a te au oa! Kua mama ua ia Aarona i te patoi i te ariki o Aiphiti kare ra i tona au taeake.—Exo. 7:1, 2; 32:1-4.

⁵ Mei te akaraanga o Aarona e akaari maira, kare te taomianga a te au oa i kotinga uaia ki te au mapu, kare katoa i te manamanata ki te aronga te inangaro ra i te rave i te kino. Ka akakeu katoa te akaaoanga a te au oa i te aronga e inangaro tikai ra i te rave i te mea tika, kapiti mai ia kotou. Ka tauta to kotou au oa i te maro ia kotou kia rave i te mea tarevake, na te akanauru anga, te akaapa anga, e te tatiaeae anga ia kotou. Noatu te tu o te taomianga, e ngata tikai te patoi atu. E rauka ai te patoi i te reira, kia papu tikai i ta kotou e irinaki ra.

“E Akara Matariki ia Kotou Uaorai”

6, 7. (a) Eaa ra i puapinga ai kia papu to kotou irinakianga, e akapeea kotou me akatupu i te reira? (e) Eaa te au uianga ka ui kotou uaorai no te akaketaketa anga i to kotou irinaki papu?

⁶ Ei patoi atu i te taomianga a te au oa, kia papu ia kotou na mua e te tika ra ta kotou au irinakianga e te au turanga. (E tatau ia 2 Korinetia 13:5.) Ka tauturu te irinaki papu ia kotou kia mataku kore, noatu e tu akama to kotou. (2 Timo. 1:7, 8) Noatu ra me e tangata mataku kore, penei ka ngata rai iaia i te rave i tetai mea kare aia e irinaki tikai ana. No reira eaa ka kore ei e akapapu kia kotou uaorai e ko tei apiiia atu kia kotou mei roto i te Pipiria ko  te mea tika tikai ainei ia? Akara meitaki na mua i te au irinaki anga tumu tikai. Ei akaraanga, te irinaki ra kotou i te Atua e kua akarongo ana kotou i tetai ke te akakite anga eaa ratou i irinaki ei e te vai ua nei aia. E oti, e ui kia kotou uaorai e, ‘Eaa te akapapu maira kiaku e te vai ua nei te Atua?’ Kare taua uianga ra i akakoroia kia akaekoko i te manako, mari ra kia akaketaketa i to kotou akarongo. Mei te reira rai, e ui kia kotou uaorai e, ‘Akapeea au i kite e e mea akauruia mai te au Tuatua Tapu a te Atua?’ (2 Timo. 3:16) ‘Eaa ra i papu ei iaku e ko teia te “tuatau openga”?’ (2 Timo. 3:1-5) ‘Eaa ra au i irinaki ei e e meitaki to Iehova au turanga noku?’—Isa. 48:17, 18.

⁷ Penei ka emiemi kotou i te ui i taua au uianga ra, no te mataku e kare kotou e kite i te au pauanga. Ka riro ra te reira mei te emiemi anga i te akara i te vaito penitini o to kotou motoka, no te mataku te tou ra te nira ki te ngai kua “Pou” te penitini! Me kare e penitini i roto i te tangika, ka anoanoia kotou kia akara e kia pikao i tetai ki roto. Mei te reira rai, e mea meitaki kia kite kotou i te ngai kare kotou e papu tikai ana e kia akaketaketa i te reira.—Anga. 17:11.

8. Akamarama mai akapeea kotou me akaketaketa i to kotou irinaki papu e e meitaki te akauenga a te Atua kia kopae i te moeaana.

⁸ Akamanako i tetai akaraanga. Te raurau maira te Pipiria ia kotou kia “rere ke atu” i te moeaana. E ui kia kotou uaorai e, ‘Eaa ra i meitaki ei kia aru au i taua akauenga ra?’ Akamanako i te au tumu i rave ei to kotou au oa i taua au tu ra. E akamanako katoa i te au tumu tukeke e ko tetai e rave ra i te moeaana ‘te takinga-kino ra ïa i tona uaorai kopapa.’ (1 Kori. 6:18) Teianei e akamanako i te au tumu, e kia ui kia kotou uaorai e: ‘Ko teea te mataara meitaki atu i te aru? E puapinga tikai ainei te rave i te ainga tau kore?’ E akamanako maata atu no runga i te manamanata, e e ui kia kotou uaorai e, ‘Eaa toku manako me ka tuku ua atu au ki te ainga tau kore?’ Te akamataanga, ka mareka to kotou au oa ia kotou, inara eaa to kotou manako i muri mai me tei ko kotou i to kotou au metua me kore tei ko i te au taeake Kerititiano i te Are Uipaanga Patireia? Mei teaa ra to kotou manako me tauta kotou i te pure ki te Atua? Ka inangaro tikai ainei kotou i te akaatinga i to kotou turanga ma i mua i te Atua, kia akamareka ua i to kotou au oa apii?

9, 10 Akapeea te irinaki papu ki ta kotou e irinaki ra te tauturu anga ia kotou kia papu tikai, ia kotou i ko i to kotou au oa?

⁹ Me e mapu kotou, tei roto kotou i te tuatau o to kotou oraanga te tupu atura to kotou tu manako tau. (E tatau ia Roma 12:1, 2.) E taangaanga i teia tuatau i te akamanako pakari i te aiteanga kia kotou uaorai kia riro ei Au Kite no Iehova. Ka tauturu taua akamanako oonu anga ia kotou kia akaketaketa i te irinaki papu ki ta kotou e irinaki ra. E oti, me aro atu kotou i te taomianga a te au oa, ka rauka ia kotou i te pau viviki atu ma te papu tikai. Ka kite kotou mei tetai tuaine mapu Kerititiano tei tuatua e: “Me patoi au i te taomianga a toku au oa, te akakite ra au ki tetai ke e koai au. E puapinga tikai taku ‘akonoanga’ kiaku. Kua akatumuia toku manako, au akakoroanga, au tu akono tau, e toku oraanga katoa ki runga i te reira.”

¹⁰ Ae, e tauta pakari kia vai ngaueue kore i ta kotou i kite e ko te tika. (Luka 13:24) Penei ka manako kotou me e puapinga rai te reira. Inara e akamaara i teia: Me ka tataraara ua rai kotou me kore ka akama no to kotou turanga, ka kite mai tetai ke e ka akamaata mai i te taomianga. Inara, me tuatua papu kotou, ka poitirere kotou e kare to kotou au oa e tuku mai i te taomianga.—Akaaite ia Luka 4:12, 13.

‘Kimi i te ka Tuatua Atu’

11. Eaa te puapinga kia akapapa no te taomianga a te au oa?

¹¹ Tetai takainga puapinga no te patoi anga i te taomianga a te au oa, ko te akapapaanga. (E tatau ia Maseli 15:28.) Te aiteanga no te akapapa anga, kia na mua i te akamanako no runga i te au turanga ka tupu mai. Tetai taime  ka tauturu te akamanako anga na mua ia kotou kia kopae i tetai maroanga maata. Ei akaraanga, penei te kite atura kotou i tetai pupu o to kotou au oa apii e kai avaava ra. Kare ainei e ka oronga mai ratou i tetai avaava kia kotou? Te kite anga i te manamanata, eaa ta kotou ka rave? Te akakite maira a Maseli 22:3 e: “E kite mamao te tangata pakari i te kino, e kua pipini iora.” Na te aere anga na tetai ngai ke, ka kopae atu kotou i te manamanata. Kare te reira i te tu mataku; e tu pakari te reira.

12. Eaa tetai mataara meitaki me aro atu kotou i tetai taomianga a te au oa?

¹² Akapeea me ka aro atu kotou i tetai manamanata? Akapeea me ui mai tetai oa ma te irinaki kore, “Kua piri ainei koe ki te tane?” Te mea puapinga, kia aru i te akoanga i roto ia Kolosa 4:6 e: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.” Mei ta teia irava e akakite nei, te tu me pau atu kotou tei runga ia i to kotou au turanga. Kare kotou e anoanoia kia oronga i tetai akoanga roa no runga i te Pipiria. Penei ka rava ua tetai pauanga papu e te mama ua. Ei akaraanga, te pauanga i te uianga me kua piri ainei koe ki te tane, penei e pau atu koe e, “Kare,” me kore, “Kare ia i te manamanata noou.”

13. Eaa i puapinga ai kia akamanako meitaki me pau atu i tetai uianga puapinga kore a tetai oa?

¹³ E oronga ua ana a Iesu i tetai pauanga poto ua, kare e puapinga e rauka mai me maata roa te tuatua. E tika, tona uiuiia anga e Heroda, kare a Iesu i tuatua atu ana. (Luka 23:8, 9) E meitaki te muteki no te au uianga puapinga kore. (Mase. 26:4; Kohe. 3:1, 7) Tetai tua, penei ka kite kotou e te inangaro tikai ra tetai tangata i te kite i to kotou irinaki anga—ei akaraanga, no te akono tau i te pae ainga—noatu e kua tuatua kino mai ana aia ia kotou i mua ana. (1 Pete. 4:4) I roto i taua turanga, e mea tau i te akamarama meitaki atu i to kotou turanga Pipiria. Me koia ia, auraka e mataku. Kia papa ua i te “akakite atu” i to kotou manako.—1 Pete. 3:15.

14. Akapeea kotou te akaoki tau anga i te taomianga a to kotou au oa i roto i tetai au turanga?

¹⁴ I tetai au turanga, ka rauka ia kotou i te akaoki atu i te taomianga. Inara, e rave i te reira na roto i te tu tau. Ei akatauanga, me maro mai tetai oa apii ia kotou kia rave i te avaava, e karanga atu kotou e, “Kare au e inangaro” e oti e karanga, “Manako nei au e tangata kite koe, kare koe e kai avaava ana!” Te kite ra kotou akapeea me akaoki i te taomianga? Kare kotou e anoanoia kia akamarama atu eaa kotou kare kai avaava ana, ka akakeuia ra to kotou au oa kia akamanako i te tumu i kai ei ratou i te avaava. *

15. Eaa te taime tau no te aere ke anga mei to kotou au oa e tauta ra i te taomi ia kotou, e no teaa ra?

¹⁵ Akapeea me tupu ua te taomianga a to kotou au oa noatu ta kotou tauta anga? I te reira turanga, meitaki atu i te aere ki tetai ngai ke. Me noo roa atu kotou, ka maata atu te  taomianga kia tuku kotou i te au. No reira, e akaruke i te reira ngai. Ka rave kotou i te reira ma te kore e manako e kua puapinga koreia kotou. No te mea, kua rauka ia kotou i te akatere i taua turanga ra. Kare i rauka ia ratou i te akatere ia kotou, e kua akarekareka kotou i to Iehova ngakau.—Mase. 27:11.

‘Parani te ka Puapingaia’

16. Akapeea me tupu mai te taomianga mei te aronga te karanga ra e au Kerititiano ratou?

¹⁶ Tetai taime, penei ka na roto mai te taomianga kia piri ki roto i tetai angaanga tau kore mei tetai au mapu e karanga ra e e tavini ratou no Iehova. Ei akaraanga, akapeea me tae kotou ki tetai tamataora anga tei akanooia e taua mapu ra e kua kite mai e kare e tangata mamaata ei akaaere? Akapeea me kua apai mai tetai mapu i te kava ki te tamataora anga e karanga ra e e Kerititiano aia, e kare kotou e tetai atu i reira i akatikaia e te ture kia inu i te kava? Penei ka tupu mai tetai au turanga ka anoanoia kotou kia aru i to kotou akava ngakau tei tereniia e te Pipiria. Kua akakite mai tetai mapu Kerititiano e: “Kua akaruke maua ko toku teina i te teata no te maata te tuatua viivii. Kua iki tetai pae i te noo ua atu. Kua akameitaki mai to maua nga metua ia maua no ta maua i rave. Inara, kua riri tetai pae ia maua no te akariro ia ratou kia akara anga kino.”

17. Me aere ki tetai tamataora anga, eaa te mea tau kia rave kotou no te aru anga i te au turanga a te Atua?

¹⁷ Mei tei tupu i mua atu ana, te aru anga i to kotou akava ngakau tei tereniia e te Pipiria ka o atu kotou ki roto i tetai turanga mareka kore. Inara, e rave i ta kotou i kite e ko te mea tika. Kia papa ua. Me ka aere kotou ki tetai tamataora anga, parani i tetai ravenga ke no te akaruke anga, e ua ake kare ta kotou i tapapa atu e tupu mai. Kua akanoo tetai au mapu e to ratou au metua kia ringi atu no tetai mataara no te oki vave ki te kainga me anoanoia. (Sala. 26:4, 5) Ka riro taua ‘au parani ei mea puapinga.’—Mase. 21:5, NW.

‘E Rekareka, i to Kotou Ou Anga’

18, 19 (a) Eaa i papu ei ia kotou e te inangaro ra a Iehova ia kotou kia mataora? (e) Eaa to te Atua manako no runga i te aronga i patoi i te taomianga a te au oa?

¹⁸ Kua anga a Iehova ia kotou kia rekareka i te oraanga, e te inangaro ra aia ia kotou kia mataora. (E tatau ia Koheleta 11:9.) Akamaara e ta to kotou au oa i rave ‘e navenave poto ua o te kino.’ (Ebe. 11:25) Te inangaro ra te Atua mou i tetai apinga puapinga atu i te reira no kotou. Te inangaro ra aia ia kotou kia mataora e tuatau ua atu. No reira, me aro atu kotou i te timataanga kia rave i tetai mea kua kite kotou e kino i roto i te mata o te Atua, akamaara e i te openga iora, ta Iehova e pati maira kia kotou e mea puapinga tikai no kotou.

¹⁹ Ei mapu, ka anoanoia kotou kia kite e noatu e ka akamareka kotou i to kotou au oa, i te au mataiti ka aereia kare e maara i te maataanga ia ratou to kotou ingoa. Te tuke ra, me ka patoi kotou i te taomianga a to kotou au oa, ka maara ua rai ia Iehova te reira, e kare rava e ngaropoina iaia to kotou tu akarongo mou. ‘Ka kiriti mai aia i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.’ (Mala. 3:10) Tei maata atu, te oronga aroa maira aia i tona vaerua tapu, te tauturu ia kotou i te ngai e ngere ra kotou. Ae, ka rauka ia Iehova i te tauturu ia kotou i te patoi i te taomianga mei to kotou au oa!

[Tataanga Rikiriki i Raro]

Maara Ainei ia Koe?

• Mei teaa te akakeu anga ririnui te taomianga a te au oa?

• Eaa te tuanga o te irinaki papu no te patoi atu i te taomianga a te au oa?

• Akapeea kotou me akapapa i te aro atu anga i te taomianga a te au oa?

• Akapeea kotou i kite ei te akaperepere ra a Iehova i to kotou tu akarongo mou?

[Au Uianga Apii]

[Tutu i te kapi 8]

Eaa ra a Aarona i ariki ei te maani i te punua puakatoro auro?

[Tutu i te kapi 10]

Kia papa ua—e iki na mua i taau ka tuatua