Au Uianga a te Aronga Tatau

Kua akakite a Iesu ki te aronga e akarongo maira iaia e: “Kia apa kore oki kotou mei to kotou Metua i te ao ra e apa kore.” Akapeea e rauka ai te tangata i teia tuatau kia “apa kore”?—Mata. 5:48.

Te taviri i te pau i teia uianga koia oki ko te marama anga e, i akapeea te au tuatua “apa kore” e te “turanga apa kore” i te taangaangaia anga i roto i te Pipiria. Kare te au apinga pouroa tei akatakaia e te Tuatua Tapu ei “apa kore,” i te mea apa kore takiri. E tika e, ko Iehova anake ua tei apa kore takiri. Ko te tangata ra me kore te au apinga, kare to ratou apa kore i aite ki to te Atua. Te nga tuatua Pipiria Epera e te Ereni tei uriia e “apa kore” te aiteanga i te maataanga o te taime e “ki katoa,” e “pakari,” me kore e “tarevake kore” kia tau ki te au turanga i akanooia e te aronga mana. I roto i te au tuatua o te au ra ravarai, e taangaangaia ana te reira kia tau ki tei akanooia. Ko te tuatua “reva meitaki tikai” tetai akaraanga.

Kua angaia a Adamu raua ko Eva ei nga tangata apa kore i te tu akono tau, te pae vaerua, e te pae kopapa. E tu apa kore to raua i tei tau ki te turanga tei akanooia e Tei Anga mai ia raua. No te akarongo kore, kare raua i tau ki teia turanga e no reira kua ngere i te turanga apa kore no raua uaorai e no ta raua uanga. I na roto mai i reira ia Adamu i iri ei te ara, te tu apa ua, e te mate ki runga i te tangata.—Roma 5:12.

Inara mei ta Iesu i akataka meitaki mai i roto i te Tuatua i runga i te Maunga, ka rauka i te au tangata apa ua te tu apa kore tei tau ki te turanga tei akanooia. I roto i taua ako ra, kua akanoo aia i te au turanga no te tu apa kore me kore no te aroa ki katoa. Ko teia te tu aroa, ta te Atua i akaari no te tangata. Karanga a Iesu e: “E aroa atu i to kotou aronga enemi, e akaora atu i tei tao mai; Kia riro kotou ei tamariki na to kotou Metua i te ao ra: te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mata. 5:44, 45) Na te akaari anga i te aroa mei te reira te tu, te aru ra te au pipi a Iesu i te akaraanga apa kore o te Atua.

Teia tuatau, te tauta nei te Au Kite o Iehova i te ao katoa nei i te akatupu i taua aroa turanga teitei ra, no etai ke. Te inangaro ra ratou i te tauturu i te au tangata tuke tuke te oraanga, te au iti tangata, e te au akonoanga pouroa, kia rauka te kite tika tikai i te tuatua mou o te Pipiria. I roto i te au enua e 236, te rave ra te Au Kite i teianei tere atu te 7,000,000 apii Pipiria ki te au tangata e inangaro maira.

“Ko tei aroa mai ia kotou, ko ta kotou e aroa atu, eaa ta kotou tutaki i reira?” i ui ei a Iesu. “Kare aina te aronga telona e pera katoa? E to kotou aronga taeake anake ra, ta kotou ïa e tangi atu, eaa ta kotou ngai maata atu i reira? kare aina te au etene e pera katoa?” (Mata. 5:46, 47) Kare te au Kerititiano mou e akaari ana i te tu papaki tai no te au tangata apii teitei me kore no te oraanga eteniki; kare katoa e akaari ana i te aroa no te aronga ua e aroa maira ia ratou. Te tauturu ra ratou i te putaua e te aronga maki, pera te tamariki e te ruaine. I roto i taua mataara ra, te aru ra te au Kerititiano i te aroa o Iehova e kia apa kore i roto i te turanga tei tau ki tei akanooia.

Ka rauka ainei ia tatou kia mataora i te turanga apa kore tei takoreia e Adamu? Ae, na te akarongo i roto i te atinga oko o Iesu, ka rauka i te au tangata akono te turanga apa kore pu tikai i te tuatau o te Tutaraanga Tauatini Mataiti a Karaiti, me akakore te Tamaiti a te Atua “i te angaanga a te diabolo.”—1 Ioa. 3:8.