Te Angaanga Tana i Rave kua “Aru” Iaia

KO THEODORE JARACZ, e mema no te Pupu Akaaere o te Au Kite o Iehova, kua akangaroi mei tona oraanga i te enua nei i te popongi Ruitoru, Tiunu 9, 2010. E 84 ona mataiti, e te ora nei tana vaine ko Melita, e 53 o raua mataiti i te akaipoipoanga. Te ora katoa nei tona tuaine pera katoa tetai tamaiti e nga tamaine, ka akatamariki aia.

Kua anauia aia ia Tepetema 28, 1925, i Pike County, Kentucky, i Marike, e i te tae anga te mataiti ki te 15, kua akatutu te Taeake Jaracz i tona akatapuanga kia Iehova ia Aukute 10, 1941. E rua mataiti i muri mai, e 17 ona mataiti, kua rave aia i te angaanga painia tamou, te akamata anga i tana angaanga roa vaitata e 67 mataiti i roto i te tavinianga tamou.

I te mataiti 1946, e 20 o te Taeake Jaracz mataiti, kua aere atu aia ki te Apii Pipiria Punanga Tiaki o Gileada, pupu itu. Muri ake i te karatuatianga, kua tukuia atu te Taeake Jaracz kia tavini ei akaaere tutaka i roto ia Cleveland, Ohio, e tuanga no Marike. I te mataiti 1951, kua tukuia aia ei akaaere i te angaanga i ko i te opati manga o Autireria. Kua ripoti mai te 1983 Yearbook of Jehovah’s Witnesses e ko te Taeake Jaracz, “kua akamaroiroi maata i te au taeake i roto i te enua na tona tu toto mapu no te turanga teokaratiki mako tikai e tana aratakianga meitaki i te ngai tutuanga.”

Muri ake i te oki anga ki Marike, kua akaipoipo te Taeake Jaracz ia Melita Lasko i te ra 10 o Titema, 1956. Kua akamata raua i to raua oraanga akaipoipo i roto i te angaanga tutaka, i te tavini maroiroi anga i te au kotinga e te au tapere i roto i tetai tuanga maata o Marike. Te pae openga o te mataiti 1974, kua patiia te Taeake Jaracz kia riro mai ei mema no te Pupu Akaaere o te Au Kite o Iehova.

Ka akamaara uaia rai te Taeake Jaracz ei tavini akono mou e te tiratiratu no Iehova, tei tamou marie ma te ngakau katoa ki runga i te au angaanga teokaratiki. E tane aroa aia e te takinga meitaki, e e tangata akono i ta te vaerua, tei tuku ua rai i te anoano o etai ke na mua ake i tona. (1 Kori. 13:4, 5) Kua akaariia teia inangaro ngakau tae no etai ke e tona manako oonu no te katoatoa rava, kia akonoia i roto i te tu tau e te akaaroa. Tetai katoa, kua akaataia mai tona aroa e te inangaro no te tangata i roto i tona tu toto mapu i te angaanga orometua.

Noatu te maata o te mii no tei ngaro tetai mema angaanga pakari e te akaperepereia o te pamiri Betela, e te taokotaianga taeake i te ao katoa, te mataora nei matou i te tavinianga tiratiratu a te Taeake Jaracz kia Iehova, i te au raungauru mataiti tei aereia mai. Irinaki tikai matou e kua ‘mou marie aia e tae ua atu ki te matenga e kua rauka te korona ora.’ (Apo. 2:10) Papu katoa ia matou e ko te angaanga tana i rave kua “aru” iaia koia oki, kua akatae aia ki te openga.—Apo. 14:13.