Akameitakianga a te Ariki Aratakiia e te Vaerua o te Atua!

“Ka noo ua mairai te vaerua o Iehova ki runga iaia.”—ISA. 11:2.

1. Eaa tetai au manako ta tetai aronga i akakite no runga i te au manamanata o teianei ao?

“I ROTO i tetai ao kononinoni i te pae poritiki, te pirianga tangata e te turanga o te oraanga, akapeea te tangata ravarai te ora atu anga no tetai 100 mataiti akaou mai?” Ko te reira ta te tangata apii no runga i te tu o te au mea i runga i te rangi, ko Stephen Hawking i ui i te mataiti 2006. Kua akakite mai tetai atikara i roto i te tianara New Statesman e: “Kare i rauka ia tatou te takore i te putaua me kore te akatupu i te au i teianei ao. Kua rauka ra ia tatou i te rave i te mea tuke takiri. Kare mei te mea e kare tatou i tauta ana. Kua tauta tatou i te au mea ravarai mei tetai nga tu kavamani e rua e tuke ta raua tuanga e rave ana i roto i te turanga pae moni o te pa enua; mei te League of Nations ki te akamutuanga i te akaputu i te au apinga nukiria. Maata rava ta tatou au tamaki i tamaki ana i te ‘akamutu i te au tamaki’ te irinakianga e kua kite tatou akapeea me akamutu i te tamaki.”

2. Kare e roa atu ka akapeea a Iehova me taangaanga i tona tikaanga ngateitei i rungao i te enua nei?

² Kare te au tavini o Iehova e poitirere ana no taua au akakiteanga. Te akakite maira te Pipiria kia tatou e kare te tangata i angaia kia akaaere ia ratou uaorai. (Iere. 10:23) Ko Iehova anake to tatou tikaanga Ngateitei. No reira, e tikaanga tona kia akanoo i te au turanga no tatou, te akataka mai eaa te akakoroanga no to tatou oraanga, e kia arataki ia tatou ki taua akakoroanga ra. Pera katoa, kare e roa atu ka taangaanga aia i tona mana kia akaope atu i te tautaanga puapinga kore a te kavamani a te tangata. I taua taime rai, ka takore aia i te katoatoa tei patoi i tona tikaanga ngateitei, te akatuikaa ra i te au tangata ki te ara, te tu apa, e kia Satani te Tiaporo te “atua o teianei ao.”​—2 Kori. 4:4.

3. Eaa ta Isaia i totou no runga i te Mesia?

³ I roto i te Parataito i te ao ou, ka taangaanga a Iehova i tona turanga ngateitei aroa ki te tangata ravarai na roto i te Patireia o te Mesia. (Dani. 7:13, 14) No runga i to te reira Ariki, kua totou a Isaia e: ‘E tupu tetai tupu ou no roto i te tumu ra o Iese; e no roto mai i tona au aka e tupu mai ei tetai uri uua. Ka noo ua mairai te vaerua o Iehova ki runga iaia, te vaerua o te pakari e no te karape; te vaerua o te ako e no te mana; te vaerua no te kite, e no te mataku ia Iehova.’ (Isa. 11:1, 2) I teea au mataara i taangaanga ai te Atua i tona vaerua tapu kia akamana i te “tupu ou no roto i te tumu ra o Iese”​—ko Iesu Karaiti—​kia tutara i te tangata ravarai? Eaa te au akameitakianga ka tupu mai mei tana tutaraanga? E eaa ta tatou ka rave kia rauka mai taua au akameitakianga ra?

Akamanaia e te Atua kia Tutara

4-6. Eaa te kite puapinga tikai te ka tauturu ia Iesu kia tavini ei Ariki pakari e te tangi aroa, ei Taunga Maata, e ei Akava?

⁴ Te inangaro ra a Iehova i tona au tangata kia rauka te tu apa kore i raro ake i te aratakianga a tetai Ariki pakari e te tangi aroa, e Taunga Maata, e e Akava. No reira te Atua i iki ei ia Iesu Karaiti na roto i te vaerua tapu kia tau tikai no taua au apainga puapinga ra. Akamanako i tetai au tumu ka akatupu meitaki tikai ei a Iesu i tana au tuanga angaanga tei orongaia mai e te Atua.

⁵ Kua kite oonu tikai a Iesu i te Atua. Kua kite te Tamaiti anau tai i te Metua i mua roa atu i tetai ua atu tangata, penei no te au pirioni  mataiti. I taua tuatau, kua kite meitaki tikai a Iesu ia Iehova e kua akatakaia aia e ko te ‘tu tikai o te Atua akara koreia.’ (Kolo. 1:15) Kua tuatua a Iesu uaorai e: “Ko te akara mai iaku nei, kua akara ïa i te Metua.”​—Ioa. 14:9.

⁶ Te pae mai ia Iehova, ko Iesu tei kite maata tikai i te au mea ravarai tei angaia, kapiti mai te tangata ravarai. Te tatau ra a Kolosa 1:16, 17 e: “Nana oki [te Tamaiti a te Atua] i anga i te apinga tini ravarai nei, ko to te rangi, e to te enua nei, ko tei akaraia nei e te kore e akaraia . . . Ko mua rai aia i te au mea ravarai nei, koia oki tei mou i te au mea katoa nei.” Akamanako ana i te reira! Ko Iesu te pu rave angaanga a te Atua, tei piri atu ki te anga mai anga i te au mea ravarai. No reira, kua marama aia i te au mea ravarai no runga i te ao katoa e pini ua ake, kapiti mai te tu umere tikai o te roro tangata. Ae, ko te Karaiti te tu tikai o te pakari!​—Mase. 8:12, 22, 30, 31.

7, 8. Akapeea te vaerua o te Atua te tauturu anga ia Iesu i roto i tana angaanga orometua?

⁷ Kua akatainuia a Iesu ki te vaerua tapu o te Atua. ‘Tei rungao iaku te vaerua o Iehova,’ i tuatua ai a Iesu, ‘koia i akatainu mai iaku ei tutu aere i te evangelia i te tangata rikiriki; kua tono mai iaku e akanā i te aronga ngakau aue, ei tutu aere i te ora no te aronga tuikaa, kia akara akaou te matapo, e e tuku oki i te aronga i tapekaia ra, ei tutu aere i te mataiti inangaro a Iehova ra.’ (Luka 4:18, 19) Te papetitoia anga a Iesu, kua tauturu te vaerua tapu iaia kia kite i te au mea tana i apii mai i te tuatau i mua ake ka riro mai ei aia ei tangata, kapiti mai ta te Atua e inangaro ra iaia kia akatupu i te tuatau o tana angaanga orometua i te enua nei ei Mesia.​—E tatau ia Isaia 42:1; Luka 3:21, 22; Ioane 12:50.

⁸ No te mea kua akamanaia aia e te vaerua tapu, e kopapa e e manako apa kore tona, kua riro a Iesu ko te tangata maata rava atu tei ora ana i te enua nei, pera katoa ei Puapii maata rava atu. E tika, ko te aronga tei akarongo ana kiaia ‘kua va ua i tana tuatua.’ (Mata. 7:28) Tetai tumu, kua rauka ia Iesu te akakite i te tumu tikai o te au manamanata o te tangata ravarai—te ara, tu apa, e te kite kore i te pae vaerua. Te kite katoa ra aia i te tu tikai o te tangata e kua akono atu ia ratou kia tau ki to ratou tu.​—Mata. 9:4; Ioa. 1:47.

9. Akapeea toou irinaki papu ia Iesu ei Tutara te akaketaketaia anga, na te akamanako anga i tei tupu kiaia i te enua nei?

⁹ Kua ora ana a Iesu ei tangata. Ko tana i na roto mai ana ei tangata e tona pirianga vaitata ki te au tangata apa kua tauturu maata ia Iesu kia tau tikai ei Ariki. Kua tata te apotetoro ko Paulo e: “I tikaʼi [ia Iesu] kia akariroia mai mei tona au taeake te tu i te au mea katoa ra, kia riro aia ei taunga maata tuatua-mou e te aroa ua, i te au mea a te Atua ra, kia tatara aia i te ara a te tangata nei. E koia uaorai oki i mate i te mea rokoia e te timataanga ra, e tika oki iaia kia tauturu mai i te aronga i timataia ra.” (Ebe. 2:17, 18) No te mea kua ‘rokoia a Iesu e te timataanga,’ kua marama aia i te aronga e na roto ra i te timataanga. Kua akaari meitakiia te tu tangi aroa o Iesu i roto i tana angaanga orometua i te enua nei. Mama ua no te aronga maki, te pakipakitai, tei takinga kinoia—pera katoa te tamariki—te akavaitata atu kiaia. (Mare. 5:22-24, 38-42; 10:14-16) Te au tangata akaaka e tei inangaro i te kite no  runga i te Atua, kua akavaitata katoa atu kiaia. Tetai tua ra, te aronga akaparau, akatietie, e te aronga ‘kare e aroa no te Atua’ i roto ia ratou, kua kopae, kua makitakita, e kua patoi iaia.​—Ioa. 5:40-42; 11:47-53.

10. Na teea mataara maata i akapapu mai ei a Iesu i tona aroa no tatou?

¹⁰ Kua oronga mai a Iesu i tona oraanga no tatou. Penei te akapapuanga maata rava atu e ko Iesu te Tutara tau tikai, no tona inangaro kia mate no tatou. (E tatau ia Salamo 40:6-10.) “Kare rava e tangata aroa maata atu i te reira,” i tuatua ai a Karaiti, “kia oronga te tangata i tona uaorai ora no tona au taunga” me kore au oa. (Ioa. 15:13) Ae, kare mei te au tutara apa rai e oraanga puapinga to ratou no te moni tei rauka mai mei te aronga ta ratou e akaaere ra, kua oronga ra a Iesu i tona oraanga no te tangata ravarai.​—Mata. 20:28.

Akamanaia kia Taangaanga i te Oko

11. Eaa tatou ka irinaki papu tikai ei e ko Iesu to tatou Oko?

¹¹ E mea tau tikai e ka taangaanga a Iesu na mua ei Taunga Maata i te puapinga o tona atinga oko no tatou! E tika rai, i te tuatau o tana angaanga orometua i te enua nei, kua akaari mai a Iesu i tetai au akaraanga no tana ka rave ei Oko no tatou i te tuatau o tona Tutaraanga Tauatini Mataiti, ta tatou ka mataora me vai akarongo mou tatou. Kua akaora aia i te maki e te pakipakitai, kua akatu mai i tei mate, kua angai i te urupu tangata, e kua akaaere katoa i te reva. (Mata. 8:26; 14:14-21; Luka 7:14, 15) Tei maata atu, kua rave aia i teia au mea, kare no te akaariarianga i tona mana taoonga e te mana akaaere, inara kia akaari i tona tu tangi aroa e te inangaro. “Kua tika ïa iaku,” i tuatua ai aia ki te tangata repera tei pati mai kia rapkauia aia. (Mare. 1:40, 41) Ka akaari mai a Iesu i taua tu tangi aroa ra i te tuatau o tona Tutaraanga Tauatini Mataiti—inara takapini i te ao katoa.

12. Akapeea a Isaia 11:9 e akatupuia ai?

¹² Ka rave ua rai a Karaiti e te aronga ka tutara kapiti kiaia i te porokaramu apiianga pae vaerua ta Iesu i akamata i tetai 2,000 mataiti i topa. E akatupuia ai i reira te au tuatua a Isaia 11:9 e: “Ka ki te enua i te kite ia Iehova, mei te vairanga tai e ki i te tai ra.” Kare ekoko e ka kapitiia mai ki taua au apiianga a te Atua te au ikuikuanga e ka akapeea me akono i te enua e te au mea ora e manganui, tei akaueia atu kia Adamu i te akamataanga. Tae ki te openga o te 1,000 mataiti, e akatupuia ai i reira te akakoroanga mua o te Atua tei taikuia i roto ia Genese 1:28, e e taangaanga puia ai te atinga oko.

 Akamanaia kia Akava

13. Akapeea a Iesu te akaari anga i tona inangaro i te tuatua tika?

¹³ Ko Karaiti “tei akonoia e te Atua ei Akava i tei ora e i tei mate ra.” (Anga. 10:42) E akapumaana anga tikai i te kite e e tangata tika a Iesu, ko te tuatua tika e te tuatua mou mei te tatua rai no tona taukupu! (Isa. 11:5) Kua akaari mai aia i te tu rikarika no te noinoi, pikikaa, e tetai atu au tu kino, e kua ako pakari aia i te aronga kare e manako aroa ana i te aronga e mamae ra. (Mata. 23:1-8, 25-28; Mare. 3:5) Tei maata atu, kua akaari mai a Iesu e kare aia i akavareia e te au tu o te tangata, no te mea “kua kite oki aia i to roto i te tangata.”​—Ioa. 2:25.

14. Na roto i teea tu e akaari maira a Iesu i tona inangaro i te tuatua tika e te tu tika i teianei, e eaa ta tatou ka ui kia tatou uaorai?

¹⁴ Kua akaari ua rai a Iesu i tona inangaro i te tuatua tika e te tu tika na te akaaere anga i te angaanga tutuanga e te apii anga i roto i te tuatua enua o teianei ao. Kare rava e rauka i te tangata, te kavamani, e te vaerua kino i te akamutu i teia angaanga kia akatupuia, ki to te Atua inangaro tikai. No reira, papu tikai ia tatou e me ope a Aramakito kua autu i reira to te Atua tu tika. (E tatau ia Isaia 11:4; Mataio 16:27.) Ui kia koe uaorai: ‘Te akaari ra ainei au i to Iesu tu ki te au tangata i roto i taku angaanga orometua? Te oronga tikai ra ainei au i te ka rauka iaku kia Iehova, noatu kua kotingaia te turanga o toku oraanga kopapa?’

15. Eaa ta tatou ka akamanako ei tauturu ia tatou kia oronga tikai i te ka rauka ia tatou ki te Atua?

¹⁵ Ka tauturuia tatou kia tavini ngakau katoa i te Atua me akamanako tatou e nana teia angaanga tutuanga. Nana i akaue mai i te reira; na roto i tana Tamaiti te arataki ra aia i te reira; e na roto i te vaerua tapu kua akamana aia i te aronga e piri atura ki te reira. Te akaperepere ra ainei koe i te tikaanga ngateitei no te tavini ei oa angaanga no te Atua, ma tana Tamaiti tei aratakiia e te vaerua? Koai atu i te pae mai ia Iehova te ka akakeu i te itu mirioni tuma tangata, te maataanga te manakoia ra e au tangata ‘apii koreia e te kite kore,’ i te akakitekite i te karere Patireia ki te au tangata i roto i te 236 enua?​—Anga. 4:13.

Ka Puapingaia Koe na Roto ia Karaiti!

16. Eaa ta Genese 22:18 e akakite maira no te au akameitakianga a te Atua?

¹⁶ Kua akakite a Iehova kia Aberahama e: “Ka meitaki te pa enua katoa o te ao nei i toou ra uanga; ko koe i akarongo mai i toku reo nei.” (Gene. 22:18) Te akakite maira teia e ka akara papu atu te aronga ariki rekareka ki te au akameitakianga ta te Uanga Mesia ka apai mai. E te tavini maroiroi ra ratou i teia tuatau ma te akamanakoanga i taua au akameitakianga.

17, 18 Eaa te taputou a Iehova ka tatau tatou i roto ia Deuteronomi 28:2, e eaa te aiteanga o te reira no tatou?

¹⁷ I tuatua ana te Atua ki te uanga o Aberahama, te iti tangata o Iseraela e: “Ka iri teia katoa nei au meitaki [tei akanooia i roto i te Ture koreromotu] ki runga ia koe, e ka vai tika rai ia koe, kia akarongo koe i te reo o to Atua ra o Iehova.” (Deu. 28:2) Ka tau katoa teia ki te au tavini o te Atua i teia tuatau. Me ka inangaro koe i ta Iehova au akameitakianga, e “akarongo” ua rai ki tona reo. Ka aere mai tana au akameitakianga “ki runga ia koe, e ka vai tika rai ia koe.” Eaa ra te o maira ki teia?

¹⁸ Me akarongo tatou, te akamanako pakari ra tatou i tei tuatuaia i roto i te Tuatua a te Atua e te kai pae vaerua tana e oronga maira. (Mata. 24:45) Te aiteanga kia akarongo ki te Atua e tana Tamaiti. Kua tuatua a Iesu e: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki  te ao; ko tei akono ra i te anoano o taku Metua i te ao ra.” (Mata.7: 21) Te akarongo anga ki te Atua koia oki, kia kauraro puareinga uaorai ki te akanoonooanga tana i akanoo, te putuputuanga Kerititiano ma te aronga pakari tei ikiia, te “meitaki i te tangata nei.”​—Ephe. 4:8.

19. Akapeea e rauka ai ia tatou tetai akameitakianga?

¹⁹ I roto i te aronga “meitaki i te tangata nei,” ko te au mema o te Pupu Akaaere, e au komono ratou no te putuputuanga Kerititiano katoa. (Anga. 15:2, 6) E tika, ka akapapu mai to tatou tu ki te au taeake pae vaerua o Karaiti e akapeea tatou me akavaia i te tuatau o te mate maata e aere maira. (Mata. 25:34-40) No reira, tetai mataara e rauka ai ia tatou te akameitakianga, na te turuturu tiratiratu anga i te aronga akatainuia o te Atua.

20. (a) Eaa tetai apainga puapinga a te “meitaki i te tangata nei”? (e) Akapeea tatou me akaari e te ariki rekareka nei tatou i teia au taeake?

²⁰ Te kapiti katoa maira te “meitaki i te tangata nei” te au mema o te au Kumiti Manga, te au akaaere tutaka, e te aronga pakari o te putuputuanga—tei iki pouroaia e te vaerua tapu. (Anga. 20:28) Te apainga maata a teia au taeake ko te akamaroiroianga i te iti tangata o te Atua “kia riro tatou ravarai ei tangata pakari, i te akarongo okotai, e te kite i te Tamaiti a te Atua ra, kia taea te aite ra i te ki o te Mesia i te maata.” (Ephe. 4:13) E tika, e aronga apa ratou mei ia tatou rai. Tera ra, ka puapingaia tatou me ariu rekareka atu ki ta ratou tiaki anga aroa.—Ebe. 13:7, 17.

21. Eaa tatou ka rapurapu ei kia akarongo ki te Tamaiti a te Atua?

²¹ Kare e roa atu ka takore a Karaiti i te akatereanga kino a Satani. Me tupu te reira, tei runga to tatou oraanga i ta Iesu akavaanga, no te mea kua akamanaia aia e te Atua kia arataki i te “aronga maata rava” tei totouia mai, ki te “au pupui anga o te vai ora.” (Apo. 7: 9, 16, 17) No reira, kia rave maroiroi tikai tatou i teianei i te kauraro puareinga anga ki te Ariki tei aratakiia e te vaerua o Iehova.

Eaa Taau i Kite mei ia . . .

• Isaia 11:1-5?

• Mareko 1:40, 41?

• Angaanga 10:42?

• Genese 22:18?

[Au Uianga Apii]

[Tutu i te kapi 17]

Kite meitakiia to Iesu tu tangi aroa te akatu anga aia i te tamaine a Iairo

[Au Tutu i te kapi 18]

Akaaere ra a Iesu Karaiti i te tutuanga maata rava atu i roto i te tuatua enua