Au Uianga a te Aronga Tatau

Roto ia Genese 6:3 ka tatau tatou e: ‘Kare rava toku vaerua e tauta uaorai ki te tangata nei, e kopapa oki aia. E teianei, ko tona au rā e toe nei, okotai ïa anere, e rua ngauru te mataiti.’ Te akatopa maira ainei a Iehova i te oraanga o te tangata ki te 120 mataiti, e ko te reira ainei te roa i to Noa tutu aere anga no runga i te Vaipuke?

Te pauanga ki nga tuanga e rua o te uianga, kare.

Mua ake i te Vaipuke, manganui te tangata tei noo ana no te au anere mataiti. E 600 o Noa mataiti i tupu ei te Vaipuke, e 950 ona mataiti i te ora anga. (Gene. 7:6; 9:29) Tetai aronga tei anauia i muri ake i te Vaipuke, tere atu i te 120 mataiti to ratou ora anga. E 438 o Arepakada mataiti i mate ei aia, e 433 o Sala mataiti i mate ei. (Gene. 11:10-15) Inara i to Mose tuatau, kua topa mai te mataiti ki te 70 me kore 80. (Sala. 90:10) No reira kare a Genese 6:3 e akanoo ra e 120 mataiti te roa i te oraanga o te tangata.

I roto i taua irava, te tuatua ra ainei te Atua kia Noa i te akamatakite i te tangata no te akapouanga te ka tupu i roto i te 120 mataiti? Kare. Maata te taime i tuatua ana te Atua kia Noa. Ka tatau tatou e taingauru irava i muri mai i roto i te papaanga e: “Kua tuatua maira te Atua ia Noa, Kua vaitata roa te openga o te tangata katoatoa ra iaku; kua ki oki te enua i te takinga-kino.” Te au mataiti tei aru mai, kua oti ia Noa te aka angaanga maata o te tarai anga i te araka, e i taua taime ra “kua tuatua mairā Iehova kia Noa, Ka aere koe ma toou kopu-tangata katoa ki roto i te araka.” (Gene. 6:13; 7:1) I tetai atu au atianga kua akakite a Iehova i tetai au mea kia Noa.​—Gene. 8:15; 9:1, 8, 17.

 Kareka ra, e tuke rai ta Genese 6:3 e tatau ra; kare te reira e taiku ra ia Noa, e kare katoa e karanga ra e te tuatua ra te Atua kiaia. Ka tau kia maramaia e e tuatua mama ua no te akakoroanga o te Atua me kore no tana tukuanga tika. (Akaaite ia Genese 8:21.) Mea puapinga, i roto i te rekoti o te tuatua enua no runga i te au mea tei tupu i mua roa ake i te tuatau o Adamu, ka kite tatou i te au tuatua mei te: “Kua tuatua iora te Atua.” (Gene. 1:6, 9, 14, 20, 24) Te taka ua ra e, kare a Iehova e tuatua ra ki tetai tangata i runga i te enua, no te mea kare te tangata i angaia ake.

No reira e mea tau kia taopenga e, te akakite maira a Genese 6:3 i ta te Atua tukuanga tika kia takore i teia akatereanga kino i te enua nei. Kua tuku a Iehova i tana tika kia rave i te reira i roto i te 120 mataiti, noatu kare a Noa i kite ake i te reira. Eaa ra te tumu i akakotingaia ai tetai tuatau? Eaa ra te tumu ka tiaki ei?

Te oronga maira te apotetoro ko Petero i te tumu: “Te akakoromaki anga roa o te Atua, ka tatari ei aia i te tuatau ia Noa ra, i te tarai anga i te araka ra, i oraʼi e tokotai puke tangata i te vai, koia oki nga tangata toko varu ra.” (1 Pete. 3:20) Ae, te akakite anga te Atua i tana tukuanga tika no runga i te 120 mataiti, te vai ra rai tetai au mea ka anoanoia i te rave. Mei tetai 20 mataiti i muri mai, kua anau mai a Noa e tana vaine i te tamariki. (Gene. 5:32; 7:6) Kua mamaata mai ta raua tamariki tamaroa e toru, kua akaipoipo, e kua maata mai te pamiri ki te “toko varu” tangata. E oti kua tarai ratou i te araka, e kare te reira i te angaanga iti me akamanakoia te maatamaata o te araka, e te maata o to Noa pamiri. Ae, kua riro to te Atua akakoromaki anga no te 120 mataiti, ei oronga i tetai tuatau no taua au mea ra kia oti kia akaoraia mai e varu aronga akarongo mou mei roto “i te vai.”

Kare te Pipiria i akataka mai i te mataiti i akakite ei a Iehova kia Noa e ka tupu te Vaipuke. Mei te taime i anau ei tana au tamaroa, kua maata mai, e kua akaipoipo, penei e 40 me kore e 50 mataiti toe i mua ake i te Vaipuke. I reira kua tuatua atu a Iehova kia Noa e: “Kua vaitata roa te openga o te tangata katoatoa ra iaku.” Karanga katoa atu aia e kia tarai a Noa i tetai araka maatamaata, e kia tomo aia e tona pamiri ki roto. (Gene. 6:13-18) Te au raungauru mataiti i toe mai, maata atu ta Noa i rave i to te oronga ua mai anga i tetai akaraanga o tona oraanga tuatua tika. E ‘tangata ako aia i te tuatua-tika,’ no te akakite anga i te karere akamatakiteanga taka ua—to te Atua akakoroanga kia takore i te aronga akono kore i te Atua i taua tuatau ra. Kare a Noa i kite eaa te roa i mua ake e eaa te mataiti e tupu ei te reira, kua papu ra iaia e ka tupu. E kua kite oki koe e kua tupu rai te reira.​—2 Pete. 2:5.