Kia Maroiroi no te Akamorianga Mou

“Te maata ua nei te mou, te iti nei ra te aronga e kokoti.”—MATA. 9:37.

1. Akapeea koe te akataka anga i te tu rapurapu?

E PEPA puapinga taau e anoanoia ra kia akaraia e tetai tangata i mua ake ka ope ei te ra. Eaa taau ka rave? Kua akairo koe i te reira “RAPURAPU!” Te aere ra koe ki tetai akanooanga puapinga tikai, inara kua tureiti koe. Eaa taau ka rave? Kua akakite koe ki te tangata akaoro motoka, “Taviviki ine; e mea RAPURAPU teia!” Ae, me e angaanga taau e umuumuia ra kia raveia e te viviki ra te taime i te pou, ka manako apiapi koe e te manamanata. Kua panapana viviki toou pukuatu, e kua angaanga viviki atu koe ma te pakari. E tu rapurapu te reira!

2. Eaa te angaanga rapurapu roa atu no te au Kerititiano mou i teia tuatau?

² Te angaanga rapurapu roa atu i teia tuatau no te au Kerititiano mou, ko te tutu aere anga i te tuatua meitaki o te Patireia e te akariro anga i te tangata no te pa enua ravarai ei pipi. (Mata. 24:14; 28:19, 20) Te tuatua anga no runga ia Iesu, kua tata te pipi ko Mareko e kia raveia teia angaanga “na mua,” koia oki, i mua ake ka tae mai ei te openga. (Mare. 13:10) Ko te reira tikai te mea tau. Kua akakite a Iesu e: “Te maata ua nei te mou, te iti nei ra te aronga e kokoti.” Kare e rauka i te tiaki; ka umuumuia kia akaputuputuia te mou i mua ake ka pou ei te tuatau.​—Mata. 9:37.

3. Eaa ta te maataanga i rave no te anoano rapurapu kia tutu aere?

³ No te mea ko te angaanga tutu aere te mea puapinga roa atu kia tatou, ka tau tatou kia oronga maata i to tatou taime, maroiroi, e te manako i te ngai ka rauka. E mea meitaki tikai e e maata te rave ra i te reira. Kua akamama mai tetai i to ratou oraanga kia tavini tamou ei au painia, ei au mitinari, me kore kia angaanga i ko i tetai kainga Betela takapini i te ao. Maata ta ratou angaanga e rave ra. Penei e maata ta ratou i akaatinga, e e maata te au akaaoanga. Kua akameitaki maata ra a Iehova ia ratou. Mataora tatou no ratou. (E tatau ia Luka 18:28-30.) Noatu e kare tetai pae i o atu ki roto i te pupu painia tamou, te akapou maata ra ratou i te taime ka rauka no teia angaanga akaoraanga, kapiti mai te tauturu anga i te akaora mai i ta tatou tamariki.​—Deu. 6:6, 7.

4. Eaa te tumu ka ngaro ei te tu rapurapu o tetai pae?

⁴ Mei ta tatou i kite, e piri ua ana te tu rapurapu ki tetai tuatau kotingaia, akanooia, tetai tuatau openga. Te noo nei tatou i te tuatau openga, e e maata te akakiteanga—a te Tuatua Tapu e te tuatua enua—i te akapapu i te reira. (Mata. 24:3, 33; 2 Timo. 3:1-5) Inara, kare atu e tangata i kite i te tuatau tikai e tae mai ei te openga. Te oronga anga i te au akakite anga no “te akairo,” te akataka anga i “te openga o teianei ao,” kua akakite tikai mai a Iesu e: “Kareka te reira rā e te reira ora, kare rava tetai e kite, kare oki te au angela o te rangi, ko toku Metua anake ra.” (Mata. 24:36) No te reira, penei ka ngata i tetai aronga i te akono tamou i te tu rapurapu i te au mataiti ravarai, me kua akono tamou tikai ratou i te reira no tetai tuatau roa. (Mase. 13:12) E manako akapera ana ainei koe i tetai taime? Eaa te ka tauturu ia tatou kia akatupu me kore kia akono tamou i te tu rapurapu no te angaanga ta te Atua ko Iehova e Iesu Karaiti e inangaro ra ia tatou i te rave i teia tuatau?

Akamanako i to Tatou Akaraanga, ko Iesu

5. Na roto i teea au tu i akaari mai ei a Iesu i te tu rapurapu no te angaanga orometua?

⁵ O te au tangata ravarai tei akaari ana i te  tu rapurapu no te tavini anga i te Atua, te akaraanga puapinga rava atu, ko Iesu Karaiti. E tai tumu no tona tu rapurapu, koia oki e maata tana ka rave i roto i te toru e te apa mataiti. No reira, e maata atu ta Iesu i rave no runga i te akamorianga mou i ta tetai ua atu tangata i rave. Kua akakite aia i te ingoa e te akakoroanga o tona Metua, kua tutu aere i te tuatua meitaki o te Patireia, kua akakite i te tu pikikaa e te au apiianga pikikaa a te au arataki akonoanga, e kua turuturu i to Iehova turanga ngateitei e tae ua atu ki te mate. Kua teretere aia i te au ngai o te enua—te apiianga, tauturu anga e te rapakau anga i te au tangata. (Mata. 9:35) Kare rava i rauka ana i tetai ua atu tangata i te akatupu i tana i rave i roto i tetai tuatau poto. Kua angaanga pakari atu a Iesu i te rave i tana ka rauka.​—Ioa. 18:37.

6. Eaa te mea maata i roto i to Iesu oraanga?

⁶ Eaa tei akakeu ia Iesu kia angaanga ma te roiroi kore i roto i tana angaanga orometua? Mei te totou a Daniela, kua kite a Iesu e mei teaa te roa o tona tuatau i te akaoti i tana angaanga tei tau ki te papaanga a Iehova. (Dani. 9:27) No reira, mei tei akakiteia ana, ka ope tana angaanga orometua i te enua nei “i rotopu oki i taua ebedoma ra,” me kore i muri ake i te toru e te apa mataiti. Muri ua ake tona tomo autu anga ki roto ia Ierusalema i te tuatau pururu anga rau i te mataiti 33 T.N., kua tuatua a Iesu e: “Kua tae ki te ora e akakakāiaʼi te Tamaiti a te tangata nei.” (Ioa. 12:23) Noatu e kua kite a Iesu e te vaitata maira tona mate, kare rava aia i tuku ana e ko te mea maataia i roto i tona oraanga. Mari ra, kua taangaanga aia i te au atianga i te rave i te anoano o tona Metua e kia akaari i te aroa ki te au tangata. Na taua aroa ra i akakeu iaia kia taokotai mai e kia tereni i te au pipi, te tono anga ia ratou kia rave i te angaanga tutu aere. Kua rave aia i teia kia rave ua atu ratou i te angaanga tana i akamata, e ka maata atu ta ratou angaanga i tana i rave ana.​—E tatau ia Ioane 14:12.

7, 8. Eaa te manako o te au pipi te tama anga a Iesu i te iero, e eaa ra a Iesu i rave ei i te reira?

⁷ Kua akaari papu mai tetai tupuanga i roto i to Iesu oraanga i tona tu maroiroi tikai. Kua tupu teia i te akamataanga o tana angaanga orometua, i te tuatau o te Pasa i te mataiti 30 T.N. Kua aere mai a Iesu e tana au pipi ki Ierusalema e kua kite atu i “te aronga i oko i te puakatoro, e te mamoe, e te kukupa, e te aronga oko moni i te noo anga i roto i te iero.” Akapeea a Iesu i te ariu atu anga, e eaa te manako o tana au pipi no runga i te reira?—E tatau ia Ioane 2:13-17.

⁸ Ta Iesu i rave e i tuatua i taua atianga ra, kua maara i te au pipi te au tuatua totou a tetai taramo a Davida e: “Kua riro roa au i te maroiroi i to are.” (Sala. 69:9) Eaa ra te tumu? No ta Iesu i rave te o maira tetai takinokino anga maata. No te mea te turuturu ra te aronga mana akaaere o te iero—te kau taunga, te au tata tuatua, e tetai atu—i te au angaanga pitiniti kino kia puapingaia ratou, e raveia ra i reira. Te akakite atea anga e te tamanamanata anga i ta ratou angaanga pikikaa, te akariro ra  a Iesu iaia ei enemi no te au arataki akonoanga o te reira tuatau. Mei ta te au pipi e tamanako tau ra i te turanga, kua taka papu te ‘maroiroi i te are o te Atua,’ me kore te maroiroi no te akamorianga mou. Eaa teia tu maroiroi? Tuke ainei mei te tu rapurapu?

Akaaiteia te Tu Rapurapu e te Maroiroi

9. Akapeea me akataka i te tu maroiroi?

⁹ Kua akataka mai tetai tikitinari i te “maroiroi” ei “inangaro pakari e te ririnui i te aruaru i tetai apinga,” e te akakite maira i te au tuatua aiteite mei te inangaro maata, te manako ngakau pakari, te manako maoraora e te totomapu. Papu tikai te akaariia maira ta Iesu angaanga orometua na roto i teia au tuatua. No reira, te taiku ra te Today’s English Version i te irava e: “Toku inangaro maata i toou are, E te Atua e, te ka ra i roto iaku mei te ai rai.” Te mea umere, i roto i tetai au reo Asia, no roto mai te tuatua “maroiroi” i te nga tuatua e rua, te aiteanga tikai e “ngakau vera,” mei te mea e te ka ua ra te ngakau. No reira rai i maara ai i te au pipi te au tuatua a Davida to ratou kite anga i ta Iesu i rave i roto i te iero. Eaa tei akariro i to Iesu ngakau kia ka, ei akatutu ua anga, e te akakeu iaia kia rave i te reira?

10. Eaa te aiteanga o te “maroiroi” tei taangaangaia i roto i te Pipiria?

¹⁰ Te tuatua “maroiroi” i roto i te taramo a Davida no roto mai i tetai tuatua Epera e uri putuputuia ana e “vareae” i tetai tuanga o te Pipiria. (E tatau ia Exodo 20:5; 34:14; Iosua 24:19.) Te karanga ra tetai tikitinari Pipiria i teia tuatua e: “E taangaanga putuputuia ana teia ki te pirianga akaipoipo . . . Mei te vareae tau rai o te tane me kore o te vaine i te manako pakari i tetai tikaanga, kua akakite te Atua i Tona tikaanga ki te aronga tikai e iti tangata Nona, e kua paruru i te reira.” No reira, te maroiroi i roto i te Pipiria e maata atu i te manako pakari e te maoraora te aruaruanga i tetai apinga, mei tei akaariia e te aronga e reka ana i te angaanga tipoti. E manako papu no te vareae to Davida tu maroiroi, te akakoromaki anga i te tu akakino, te inangaro maata i te paruru i tetai ingoa meitaki.

11. Eaa tei akakeu ia Iesu kia tauta pakari ma te maroiroi?

¹¹ Tano ua te manako o te au pipi a Iesu no runga i te au tuatua a Davida, ki ta ratou i kite ia Iesu e rave ra i roto i te iero. Kua tauta pakari a Iesu kare no tei akanooia te tuatau, mari ra no tona maroiroi—me kore vareae—no te ingoa o tona Metua e no te akamorianga ma. Te kiteanga aia e te akakinoia ra e te akaapaia ra te ingoa o te Atua, maroiroi tikai aia, me kore kua vareae, e kua akatikatika atu i te manamanata. Te kiteanga a Iesu e te taomi ra e te akono tau kore ra te au arataki akonoanga i te au tangata akaaka, kua akakeu tona maroiroi iaia kia akaora i te au tangata e kia akakite katoa i te au akautunga anga pakari ki runga i te au arataki akonoanga.​—Mata. 9:36; 23:2, 4, 27, 28, 33.

Kia Maroiroi no te Akamorianga Mou

12, 13 Eaa ta te au arataki akonoanga o Kerititome i teia tuatau i rave no runga i te (a) ingoa o te Atua? (e) Patireia o te Atua?

¹² Aiteite ua te tu o te au akonoanga i teia tuatau, me kore kino atu te reira i to Iesu tuatau. Ei akaraanga, e akamaara e ko te apinga mua ta Iesu i apii ki tana au pipi kia pure, no runga i te ingoa o te Atua: “Kia tapu toou ingoa.” (Mata. 6:9) Te kite ra ainei tatou i te au arataki akonoanga, te au orometua tikai o Kerititome, te apiianga i te tangata kia kite i te Atua na roto i tona ingoa e te akatapu anga me kore te akangateitei anga i taua ingoa ra? Kare, kua tuatua pikikaa ratou i te Atua na roto i te au apiianga pikikaa mei te Toru Tai, te mate kore o te tangata, te ai era, te maani anga i te Atua ei mea muna, marama koreia, kino, e te tamamae katoa i te tangata. Kua akakino katoa ratou i te Atua na roto i ta ratou au angaanga akama tikai e te pikikaa. (E tatau ia Roma 2:21-24.) Pera katoa, kua tauta pakari ratou i te uuna i te ingoa o te Atua e te akapae katoa anga i te reira mei ta ratou au urianga o te Pipiria. No reira, te arai ra ratou i te au tangata kia kore e akavaitata atu ki te Atua e kia kore e akatupu i tetai pirianga kiaia.​—Iako. 4:7, 8.

¹³ Kua apii katoa a Iesu i tana au pipi kia  pure no te Patireia o te Atua: “Kia tae toou basileia. Kia akonoia toou anoano i te enua nei, mei tei te ao katoa na.” (Mata. 6:10) Noatu e te ripiti ua ra te au arataki akonoanga o Kerititome i taua pure ra, kua akamaroiroi atu ratou i te tangata kia turuturu i te angaanga poritiki e tetai ua atu au akaaerenga a te tangata. Tei maata atu, kua akavaavaa ratou i te aronga e tauta ra i te tutu aere e te akakitekite i teia Patireia. Tei tupu mai, te manganui e karanga ra e au Kerititiano ratou, kare e tuatua ana no runga i te Patireia o te Atua, e kare e irinaki ana i te reira.

14. Akapeea te au orometua o Kerititome te akameangiti anga i te puapinga o te Tuatua a te Atua?

¹⁴ Na roto i te pure ki te Atua, kua akakite taka meitaki a Iesu e: “Ko te tuatua aau na te tuatua-mou.” (Ioa. 17:17) E iaia i te enua nei, kua akakite a Iesu e ka iki aia i “te tavini akono meitaki e te pakari” kia oronga mai i te kai vaerua no tona iti tangata. (Mata. 24:45) Noatu e kua viviki ratou i te karanga e te apii ra ratou i te Tuatua a te Atua, te rave akarongo mou ra ainei te au orometua o Kerititome i te angaanga ta te Pu i oronga kia ratou? Kare. Te karanga ra ratou e e tua pikikaa e te maani ua to roto i te Pipiria. Kare i angai i ta ratou anana ki te kai vaerua, te akapumaana e te akaoraora ia ratou, kua akanavenave ua ra te au orometua i te taringa o te aronga irinaki ma te au apiianga a te tangata. Kapiti mai, kua akameangiti ratou i te puapinga o te au turanga akono tau o te Atua, kia irinaki te au tangata e te rave ra ratou i te tu akono tau.​—2 Timo. 4:3, 4.

15. Eaa toou manako no runga i te au mea ravarai ta te au orometua i rave i roto i te ingoa o te Atua?

¹⁵ No te au mea ravarai i raveia—i roto i te ingoa o te Atua o te Pipiria—manganui te au tangata kare e mataora ana me kore kua ngaro takiri to ratou akarongo ki roto i te Atua e te Pipiria. Kua topa ratou ki roto i te ereere a Satani e tona akatereanga kino o te au mea nei. Me kite e me akarongo koe i taua au mea e raveia ra i te au ra ravarai, ka akapeea koe? Ei tavini no Iehova, me kite koe i te akaapaanga e te akakino anga e tukuia ra ki runga i te ingoa o te Atua, kare ainei koe e akakeuia kia akatikatika atu i te tarevake? Me kite koe i te au tangata ngakau tae e te ngakau tika e akavareia ra e e akono tau koreia ra, kare ainei koe e akakeuia ana i te akapumaana atu i te au tangata e takinokinoia ra? Te kite anga a Iesu i te au tangata i tona tuatau e “kua mate ratou i te roiroi, e kua pueurikiriki keia, mei te mamoe tiaki kore ra,” kare aia i tangi ua ia ratou. Mari ra, “kua apii atura aia ia ratou i te au tuatua e manganui.” (Mata. 9:36; Mare. 6:34) E au tumuanga tau to tatou kia maroiroi no te akamorianga mou, mei ia Iesu rai.

16, 17. (a) Eaa te ka akakeu ia tatou kia tauta pakari i roto i te angaanga orometua? (e) Eaa ta tatou ka akamanako i roto i te atikara e aru maira?

 ¹⁶ Me maroiroi tatou i roto i ta tatou angaanga orometua, ka riro te au tuatua a te apotetoro ko Paulo i roto ia 1 Timoteo 2:3, 4 ei mea puapinga tikai. (E tatau.) E angaanga pakari ana tatou i roto i te angaanga orometua kare no tei kite tatou e te noo nei tatou i te tuatau openga, mari katoa ra kua kite tatou e ko teia te anoano o te Atua. Inangaro aia kia kite te au tangata i te tuatua mou e kia kite katoa ratou i te akamori e te tavini iaia e kia akameitakiia. Te akakeuia nei tatou kia tauta pakari i roto i te angaanga orometua, kare no te mea te poto nei te tuatau, no te mea ra te inangaro nei tatou i te akangateitei i te ingoa o te Atua e te tauturu i te tangata kia kite i tona anoano. Te maroiroi nei tatou no te akamorianga mou.​—1 Timo. 4:16.

¹⁷ Ei iti tangata no Iehova, kua akameitakiia tatou no te kite i te tuatua mou no runga i te akakoroanga o te Atua no te tangata ravarai e no te enua nei. E ravenga meitaki ta tatou i te tauturu i te tangata kia rauka te mataora e tetai manakonako anga papu no te tuatau ki mua. Ka rauka ia tatou i te akaari kia ratou akapeea e rauka ai te paruru anga me takoreia to Satani akatereanga o te au mea nei. (2 Tesa. 1:7-9) Eiaa e taitaia e te taroaroa ra te ra o Iehova, kia rekareka ra tatou e e taime rai tetai no tatou kia maroiroi no te akamorianga mou. (Mika 7:7; Haba. 2:3) Akapeea tatou me akatupu i taua tu maroiroi? Ka akamanako tatou i teia i roto i te atikara e aru maira.

Ka Rauka Ainei ia Koe te Akataka?

• Eaa tei akakeu ia Iesu kia angaanga ma te roiroi kore i roto i tana angaanga orometua?

• Eaa te aiteanga o te “maroiroi” i roto i te Pipiria?

• Eaa ta tatou e kite nei i teia tuatau te ka akakeu ia tatou kia maroiroi no te akamorianga mou?

[Au Uianga Apii]

[Tutu i te kapi 8]

Te mea maata kia Iesu ko te rave anga i te anoano o tona Metua e te akaari anga i te aroa ki te au tangata

[Tutu i te kapi 10]

Tumuanga tau tikai to tatou kia maroiroi no te akamorianga mou