Akamaroiroiia kia Autu i Tetai ua Atu Timataanga

“E tika iaku te au mea ravarai nei i te Mesia, ko tei akamaroiroi mai iaku nei.”​—PHILI. 4:13.

1. Eaa ra te iti tangata o Iehova i aro atu ei i te au turanga kino e manganui?

KUA tupu putuputu ana te au turanga kino ki te iti tangata o Iehova. Tetai au timataanga no to tatou uaorai tu apa me kore no te au mea kino e tupu nei i teianei ao e noo nei tatou. Tetai no te ke e tupu nei i rotopu i te aronga e tavini ra i te Atua e te aronga kare e tavini ana iaia. (Gene. 3:15) Mei te akamataanga o te tuatua enua o te tangata, kua tauturu te Atua i tona au tavini akarongo mou kia autu i te takinokinoanga akonoanga, patoi i te taomianga a te au oa, e kia akakoromaki i te au turanga kino. Ka akamaroiroi katoa tona vaerua tapu ia tatou kia akapera.

Tauturuia kia Autu i te Takinokinoanga Akonoanga

2. Eaa te akakoroanga o te takinokinoanga akonoanga, e eaa tona au tu tukeke?

² Te takinokinoanga akonoanga e tamanamanata anga tei akakoroia ei akakino i te irinaki o te au tangata. Tona akakoroanga kia akakore atu i taua au irinakianga, kia kore e totoa, me kore kia takore atu i te tu tiratiratu o te aronga irinaki. Tukeke te tu o te takinokinoanga, tetai ka kite uaia atu, tetai kare e kiteia. Te akaaite ra te Pipiria i ta Satani tamakianga ki ta te riona ou e te atepi.​—E tatau ia Salamo 91:13.

3. Eaa te akataka maira i te takinokinoanga mei te tu rai a te riona e te atepi?

³ Mei tetai riona taae rai, putuputu a Satani te tamaki pu mai na te takino anga, akamouauri me kore arairai anga. (Sala. 94:20) Te akataka maira te au ripoti a te Yearbook i te au angaanga a te Au Kite o Iehova i teia tuatau e e maata te au akakiteanga o taua au takinokinoanga. Takinokino ra te au pupu akatupu pekapeka i te iti tangata o te  Atua i te au ngai, tei aratakiia e tetai au orometua me kore aronga maro i te pae poritiki. Kua riro teia au kino ei taruri ke i tetai pae. Mei te atepi rai, e takino katoa ana te Tiaporo i te tangata mei te au ngai manako koreia, te akakino anga i te manako e te akavare anga i te au tangata kia rave i tona anoano. Kua akakoroia teia tu kino kia akaparuparu me kore kia akakino i to tatou akarongo. Inara na roto i te vaerua tapu o te Atua, ka autu tatou i taua nga tu takinokinoanga.

4, 5. Eaa te mataara meitaki i te akapapa no te takinokinoanga, e no teaa ra? Oronga mai i tetai akaraanga.

⁴ Akamanako ua anga i te au turanga tukeke o te takinokinoanga i te tuatau ki mua, kare ko te mataara meitakiia no te tapapa atu i te reira. E tika, kare tatou i kite eaa te takinokinoanga ka tupu kia tatou i te tuatau ki mua, no reira eiaa e manamanata atu i te reira. E apinga ra tetai ka rauka ia tatou i te rave. Maataanga o te aronga tei akakoromaki i te takinokinoanga, kua puapingaia na te akamanako oonu anga i te akaraanga akarongo mou o te aronga tiratiratu tei rekotiia i roto i te au Tuatua Tapu, pera katoa i te au apiianga e te akaraanga o Iesu. Kua tauturu teia ia ratou kia akaoonu atu i to ratou inangaro no Iehova. Na te reira inangaro i tauturu ia ratou kia patoi atu i te au tu timataanga ka aro atu ratou.

⁵ Akamanako ana i te akaraanga o nga tuaine e rua i Maraui. Te tautaanga i te maro ia raua kia oko i tetai kati poritiki, kua papaia raua e tetai pupu tangata kino, aeaeia te kakau e kua tamataku i te tauati ia raua. Kua pikikaa taua pupu tangata kia raua e kua oko te au mema pamiri o Betela i te au kati poritiki. Akapeea te nga tuaine te ariu atu anga? “Ko te Atua ko Iehova anake ta maua ka tavini. Me kua oko te au taeake i te opati manga i te au kati, kare rai maua e taui. Kare maua e tuku i te au, noatu e ka tamate kotou ia maua!” Muri ake i taua tu mataku kore ra, kua tukuia te nga tuaine kia aere.

6, 7. Akapeea a Iehova me akamaroiroi i tona au tavini kia aro atu i te takinokinoanga?

⁶ Kua kite te apotetoro ko Paulo e kua ariki te au Kerititiano i Tesalonia i te karere o te tuatua mou raro ake i te “mate maata” inara ‘ma te rekareka o te vaerua tapu.’ (1 Tesa. 1:6) Tika e manganui te au Kerititiano i te tuatau i topa e i teianei tei aro atu e tei autu i te takinokinoanga, tei ripoti mai e i te tuatau ngata roa atu o te au timataanga kua kite mai ratou i te manako ngakau au tikai, tetai tuanga o te vaerua tapu o te Atua. (Gala. 5:22) Na te reira au i tauturu ia ratou kia paruru i to ratou ngakau e te manako. Ae, taangaanga ana a Iehova i tona mana ririnui ei akamaroiroi i tona au tavini kia autu i te au timataanga e kia rave i te ikianga pakari me tupu te turanga kino. *

⁷ Umere ana te aronga e akara maira no te tautaanga a te iti tangata o te Atua i te akono tamou i to ratou tu tiratiratu noatu te takinokinoanga pakari. Te akaraanga, kua rauka i te Au Kite te maroiroi ririnui atu i to te tangata ua nei. Te akapapu maira te apotetoro ko Petero kia tatou e: ‘Kia akakinoia kotou i te ingoa o te Mesia ra, e ao to kotou; no te mea te noo ra te vaerua kakā, te vaerua o te Atua, ki runga ia kotou: kua akakinoia aia e ratou, kua akameitakiia ra e kotou.’ (1 Pete. 4:14) Te takinokinoia nei tatou no te turuturu anga i te au turanga tuatua tika, te akaari maira e te mareka maira te Atua ia tatou. (Mata. 5:10-12; Ioa. 15:20) E akapapuanga mataora teia i ta Iehova akameitakianga!

Tauturuia kia Patoi i te Taomianga a te Au Oa

8. (a) Eaa tei tauturu ia Iosua e Kaleba kia patoi i te taomianga a te au oa? (e) Eaa ta tatou i mou mai mei te akaraanga o Iosua e Kaleba?

⁸ Tetai patoianga kare e kiteia atu ta te au Kerititiano ka akakoromaki ko te taomianga a te au oa. I te mea e ririnui atu te vaerua o  Iehova i to te vaerua o teianei ao, ka rauka ia tatou te patoi i te au tangata e aviri maira ia tatou, tei akatotoa i te pikikaa me kore tei tauta i te maro ia tatou kia aru i to ratou au turanga. Ei akaraanga, eaa tei tauturu ia Iosua e Kaleba kia patoi i te au manako o te au tangata tutaka tai ngauru tei tonoia ki te enua o Kanaana? Kua aru raua i te aratakianga a te vaerua tapu e kua tupu mai te “ngakau ke” me kore te manako ke.​—E tatau ia Numero 13:30; 14:6-10, 24.

9. Eaa ra te au Kerititiano ka inangaro ei kia tuke mei te manganui?

⁹ Kua akamaroiroi katoa te vaerua tapu i te au apotetoro a Iesu kia akarongo ki te Atua, kare ra i te aronga ta te manganui e akangateitei ra ei au puapii no te akonoanga tika. (Anga. 4:21, 31; 5:29, 32) E mea inangaro na te manganui i te rave i ta tetai e rave ra, kia kore te manamanata e tupu. Te au Kerititiano mou ra, ka vai ngaueue kore ki ta ratou i kite e ko te mea tika. Noatu ra, e akameitaki anga ki te maroiroi tei na roto mai i te mana ririnui o te Atua, kare ratou e mataku e e tuke ratou. (2 Timo. 1:7) Akamanako i tetai ngai kare tatou e tuku ua atu ki te taomianga a te au oa.

10. Eaa te manamanata ta tetai au Kerititiano e aro atu ana?

¹⁰ Penei ka manamanata tetai au mapu me kite ratou e kua o atu tetai taeake ki roto i te tu kare e tau ana ki te tuatua tapu. Ka manako ratou e me pati ratou i te tauturu a te aronga pakari kare to ratou taeake e irinaki akaou ia ratou; no reira kare ratou e tuatua no runga i te manamanata no to ratou tiratiratu ki to ratou taeake. Penei ka maro tei rave i te tarevake i tona au taeake kia kore e akakite i tana ara. Kare ra teia tu manamanata e tupu ana ki te au mapu ua. Ngata katoa i tetai aronga mamaata i te aravei atu i te aronga pakari o te putuputuanga no runga i te tarevake o tetai taeake me kore tetai mema o te pamiri. Inara eaa ta te au Kerititiano mou ka rave no taua tu taomianga?

11, 12. Eaa te mea meitaki i te rave me maro mai tetai mema o te putuputuanga ia tatou kia kore e akakite i tana tarevake, e no teaa ra?

¹¹ Akamanako ana i teia turanga. Penei kua kite a Alex e taeake mapu, e e peu matau na Steve, tona oa i roto i te putuputuanga, te akarakara i te au ravenga ainga viivii. Kua akakite a Alex kia Steve e te manamanata ra aia i ta tona oa e rave ra. Inara, kare a Steve e akarongo atu ana ki tana tuatua. Te akamaroiroi anga a Alex iaia kia tuatua no runga i te reira ki te aronga pakari, pau atu a Steve me e oa mou tikai raua, kare a Alex e akakite i teia ki te aronga pakari. Mataku ainei a Alex e ka ngere aia i tona oa? Penei ka manako aia e koai ra ta te aronga pakari ka irinaki me kare a Steve e akakite i te tika. Kare ra te reira turanga e meitaki mai me ka muteki ua a Alex. Ka ngere i reira a Steve i tona pirianga kia Iehova. E mea meitaki no Alex kia akamaara e “e rokoia e te ii tei mataku i te tangata ra: ko tei irinaki ia Iehova ra, e ora ïa.”  (Mase. 29:25) Eaa ra ta Alex ka rave? Na roto i te tu aroa ka aravei akaou aia ia Steve e ka uriuri i te manamanata. Ka anoanoia te tu mataku kore. Penei teia taime ka ariki a Steve i te uriuri no runga i tona manamanata. Ka akamaroiroi akaou a Alex ia Steve kia tuatua ki te aronga pakari e me kare aia e rave i te reira i roto i tetai tuatau tau, ka akakite a Alex i te manamanata ki te aronga pakari.​—Levi. 5:1.

¹² Me ka na roto koe i taua turanga ra, i te akamataanga penei kare toou oa e mataora i taau tauturu. Inara te tuatau ka aereia penei ka kite mai aia e e mea meitaki taau e rave ra nona. Me rauka e me ariki tei tarevake i te tauturu, penei ka akameitaki ua rai aia i toou tu mataku kore e te tu tiratiratu. Tetai tua, me ka riri aia ia koe, ko te reira ainei te tu oa taau ka inangaro? Te mea meitaki atu, te akamareka anga i to tatou Oa maata rava atu, ko Iehova. Me tuku tatou iaia na mua, ko te aronga tei inangaro iaia ka akangateitei mai ia tatou no to tatou tu tiratiratu e ka riro mai ei au oa mou no tatou. Auraka tatou e tuku i tetai ngai no te Tiaporo kia o mai ki roto i te putuputuanga Kerititiano. Me ka akapera tatou, ka akariri atu tatou i te vaerua tapu o Iehova. Inara e angaanga rotai tatou ki te reira, na te tautaanga kia vai ma ua te putuputuanga Kerititiano.​—Ephe. 4:27, 30.

Akakoromaki i te Au Turanga Kino

13. Eaa te au turanga kino ta te iti tangata o Iehova e aro atura, e eaa ra taua au mea i tupu putuputu ei?

¹³ Tukeke te au turanga kino​—tauianga te turanga pae moni, ngere i te ngai angaanga, tumatetenga natura, mate tetai tei akaperepereia, makimaki i te pae kopapa, e te vai atura. I te mea e te noo nei tatou i te “tuatau openga,” te tapapaia ra e ka tupu kia tatou pouroa tetai au tu timataanga. (2 Timo. 3:1) Me tupu te reira, e mea puapinga kia kore e mataku. Ka akamaroiroi te vaerua tapu ia tatou kia akakoromaki i tetai ua atu turanga kino.

14. Eaa tei akamaroiroi ia Iobu kia akakoromaki i tona au turanga kino?

¹⁴ Tukeke te au turanga kino tei tupu kia Iobu. Ngaro tana au apinga, te tamariki, te au oa, e te oraanga kopapa meitaki, e kare tana vaine i irinaki kia Iehova. (Iobu 1:13-19; 2:7-9) Inara, kua rauka ia Iobu te akapumaana mei ia Eliu. Ko tana karere, e te puapinga o ta Iehova karere kia Iobu, koia oki: “Ka noo marie ana, e akamaaraara i te au angaanga taka ke a te Atua.” (Iobu 37:14) Eaa tei tauturu ia Iobu kia akakoromaki i tona au timataanga? E eaa te ka tauturu ia tatou kia akakoromaki i to tatou? Na te akamaara anga e te akamanako oonu anga i te au angaanga tukeke a te vaerua tapu e te mana o Iehova. (Iobu 38:1-41; 42:1, 2) Penei maara ra ia tatou tetai au taime i roto i to tatou oraanga te kite anga tatou i te akapapu anga o to te Atua inangaro ia tatou tataki tai. Te inangaro nei rai aia ia tatou.

15. Eaa tei akamaroiroi i te apotetoro ko Paulo kia akakoromaki i te au timataanga?

¹⁵ Kua akakoromaki te apotetoro ko Paulo i te au turanga kino i roto i te oraanga no tona akarongo. (2 Kori. 11:23-28) Akapeea aia te akono anga i te tu tau e te manako maroiroi i raro ake i taua au turanga ngata ra? Na te irinakianga kia Iehova na roto i te pure. Te  tuatau e timataia ra aia e tae ua atu ki tona takinokinoia anga, kua tata a Paulo e: “Kua tauturu maira te Atu iaku, kua akamaroiroi maira; kia kitea ravaia te tuatua i ako aereia nei e au, e kia akarongo te au etene katoa; akaoraia iora au i te vaa o taua liona ra.” (2 Timo. 4:17) No reira, mei tana i na roto ana, rauka ia Paulo te akapapu ki te au taeake irinaki e kare e anoanoia kia “apiapi i te au mea katoa nei.”​—E tatau ia Philipi 4:6, 7, 13.

16, 17. Oronga mai i tetai akaraanga akapeea a Iehova te akamaroiroi anga i tona iti tangata kia aro atu i te au turanga kino i teia tuatau.

¹⁶ Kua kite tetai painia ko Roxana tona ingoa e akapeea a Iehova te akono anga i tona iti tangata. Te patianga aia ki tona pu no tetai nga ra kia aere aia ki ta tatou uruoaanga, kua pau riri mai te pu e me ka aere aia, kare aia e ariki akaou iaia. Kua pure akatenga a Roxana kia vai tana angaanga, e kua aere atu aia ki te uruoaanga. Muri ake te pureanga, kua maru mai aia. Tika atu rai i te Monite i muri ake i te uruoaanga, kare tona pu i ariki akaou iaia. Manamanata tikai a Roxana. Noatu te manga moni, inangaro tikai aia i tera angaanga ei akono i tona pamiri. Kua pure akaou aia, e kua akamanako e kua akono te Atua iaia i te pae vaerua i te uruoaanga, papu e ka akono rai aia iaia i te pae kopapa. Iaia e oki ra ki te kainga, kua kite atu a Roxana i tetai akakiteanga “Inangaro Tauturu” no te aronga tukatau i te taangaanga i te au matini tui kakau, e kua akaki atu aia i te pepa no te angaanga. Kua kite mai te manitia e kare aia e tukatau ana, inara kua oronga atu i tetai angaanga nana, vaitata rai maata atu i te moni tana i koi ana. Kua kite a Roxana e kua pauia mai tana au pure. Te akameitakianga maata rava atu, kua rauka iaia te akakite i te tuatua meitaki ki tetai o tona au oa angaanga. Toko rima ia ratou, kapiti mai te manitia, tei ariki i te tuatua mou e kua papetitoia.

¹⁷ Tetai taime, te akaraanga kare ta tatou au pure e pauia mai ana i taua taime rai me kore i te tu ta tatou e tapapa atura. Me koia ia, kare e kore e e tumuanga meitaki tetai. Kua kite a Iehova i te reira, inara ka marama meitaki atu tatou i te reira a te tuatau ki mua. Tetai mea papu tikai ia tatou​—kare te Atua e akaruke i tona aronga akarongo mou.​—Ebe. 6:10.

Tauturuia kia Autu i te Au Timataanga

18, 19. (a) Eaa ra tatou ka tapapa ai e ka aro atu tatou i te au timataanga? (e) Akapeea koe e puapinga ai me aro atu i te au timataanga?

¹⁸ Kare to te Atua iti tangata e poitirere ana me aro atu i te au timataanga, manako paruparu, takinokinoanga, e te taomianga a te au oa. Te riri maira teianei ao ia tatou. (Ioa. 15:17-19) Inara, ka tauturu mai te vaerua tapu ia tatou kia autu i tetai ua atu akaaoanga ka aro atu tatou i roto i ta tatou tavinianga i te Atua. Kare a Iehova e vaoo ia tatou kia timataia i ta tatou ka rauka i te akakoromaki. (1 Kori. 10:13) Kare rava aia e akaruke ia tatou. (Ebe. 13:5) Na te akarongo anga ki tana Tuatua akauruia e paruruia ai e e akamatutuia ai tatou. Tei maata atu, ka akakeu te vaerua o te Atua i te au taeake irinaki kia oronga mai i te tauturu e anoanoia ra e tatou i te taime tau tikai.

¹⁹ E pati ua rai tatou i te vaerua tapu na roto i te pure e te apiianga i te au Tuatua Tapu. ‘Kia akamaroiroiia tatou i te au maroiroi katoa, kia tau i to te Atua mana kakā, kia maata atu te akakoromaki, e kia roa te maru anga, ma te rekareka.’​—Kolo. 1:11.

[Tataanga Rikiriki i Raro]

Akapeea Koe me Pau?

• Akapeea koe me akapapa i te autu i te takinokinoanga?

• Eaa taau ka rave me maro mai tetai ia koe kia kore e akakite i te tarevake?

• Eaa te irinakianga ka rauka ia koe me aro atu i tetai ua atu turanga kino?

[Au Uianga Apii]

[Tutu i te kapi 28]

Eaa ta tatou i mou mai mei ia Iosua e Kaleba?

[Tutu i te kapi 29]

Akapeea koe me tauturu i tetai oa tei rave i te tarevake?