Akangateitei i te Akaipoipo ei Apinga Aroa mei te Atua

“E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.”​—GENE. 2:24.

1. Eaa i tau ei kia akangateitei tatou ia Iehova?

E TAU tikai ta tatou akangateitei anga i te Atua ko Iehova, Tei Akamata i te akaipoipo. Ko Tei Anga mai ia tatou, ei Ngateitei, e ei Metua i te rangi, tano tikai te akatakaia anga aia e ko Tei Oronga mai i ‘te au mea memeitaki e te au mea tika ravarai.’ (Iako. 1:17; Apo. 4:11) E akakite anga teia i tona aroa maata. (1 Ioa. 4:8) Te au mea ravarai tana i apii, i pati, i oronga mai kia tatou, kua orongaia mai ei mea meitaki e te puapinga no tatou.​—Isa. 48:17.

2. Eaa te au ikuikuanga ta Iehova i oronga ki nga tokorua akaipoipo mua?

² Te akataka maira te Pipiria i te akaipoipo e ko tetai o teia au apinga “memeitaki” no ko mai i te Atua. (Ruta 1:9; 2:12) Tona rave anga i te akaipoipo mua, kua oronga a Iehova ki te nga tokorua, ko Adamu raua ko Eva, te au ikuikuanga taka meitaki akapeea raua e puapingaia ai. (E tatau ia Mataio 19:4-6.) Naringa raua i aru i ta te Atua aratakianga, ka kite raua i te mataora tinamou. Inara, kua kopae neneva raua i ta te Atua akauenga e kua rokoia e te au tupuanga kino.​—Gene. 3:6-13, 16-19, 23.

3, 4. (a) Akapeea te manganui i teia tuatau te akangateitei kore anga i te Atua ko Iehova e te akaipoipo? (e) Eaa te au akaraanga ka akamanako tatou i roto i teia atikara?

³ Mei taua nga tokorua mua, maata te au tangata i teia tuatau kare e manako ana i ta Iehova aratakianga no runga i te akaipoipo. Kua kopae takiri tetai pae i te akaipoipo, e te tauta ra tetai i te taui i te reira kia tau ki to ratou uaorai anoano. (Roma 1:24-32; 2 Timo. 3:1-5) Kua kopae ratou i te tikaanga e e apinga aroa te akaipoipo mei te Atua, e na te akangateitei kore anga i taua apinga aroa ra, kare ratou i akangateitei i te Atua ko Iehova, Tei Oronga mai i te reira.

⁴ Tetai au taime, ngaropoina katoa i tetai au tangata o te Atua, to Iehova manako no runga i te akaipoipo. Kua iki tetai au tokorua Kerititiano i te akatakake, me kore te kopae kare i akatumuia ki runga i te Tuatua Tapu. Eaa te mea tau kia kore teia e tupu? Akapeea te aratakianga a te Atua i roto ia Genese 2:24 te tauturu anga i te au Kerititiano akaipoipo kia akaketaketa i to ratou akaipoipo? E akapeea te aronga te manako ra kia akaipoipo te akapapa anga no te reira? Ka akara tatou e toru akaipoipo tei puapingaia i te tuatau Pipiria, te akaari maira e e puapinga tikai te akangateitei anga ia Iehova no tetai akaipoipo tinamou.

Akatupu Anga i te Tiratiratu

5, 6. Teea turanga ka timataia ai a Zakaria raua ko Elisabeta, e akapeea to raua tiratiratu te akameitakiia anga?

⁵ Kua rave a Zakaria raua ko Elisabeta i te au ikianga meitaki. Kua iki raua roa ai i te akaipoipo ki tetai tavini tiratiratu o Iehova. Kua rave akarongo mou a Zakaria i tana angaanga taunga, e kua akono raua i te Ture a te Atua te ka rauka ia raua i te rave. Maata ua atu ta raua ka ariki rekareka. Naringa e kua atoro ana koe i to raua kainga i Iuda, ka kite mai koe e e mea tetai e ngere ra. Kare a raua tamariki. Te vai pa ua ra a Elisabeta, e kua ruaine raua.​—Luka 1:5-7.

⁶ I Iseraela i taito, e akangateitei maataia ana te anau tamariki, e e mamaata tikai te au pamiri. (1 Samu. 1:2, 6, 10; Sala. 128:3, 4) Penei na roto i te pikikaa ka kopae tetai tangata ngati Iseraela o taua tuatau i tana vaine me kare aia e anau tamariki nana. Inara, kua vai tiratiratu ua a Zakaria kia Elisabeta. Kare aia i kimi ana i tetai ravenga i te akaruke i to raua akaipoipo, e kare  katoa tana vaine. Noatu e maromaroa raua no te mea kare a raua tamariki, kua tavini akarongo mou ua atu raua ia Iehova. Na roto i te temeio, kua akameitaki a Iehova ia raua ma tetai tamaiti i to raua ruaine anga.​—Luka 1:8-14.

7. Eaa tetai atu mataara i vai tiratiratu ei a Elisabeta ki tana tane?

⁷ Kua akaari a Elisabeta i te tiratiratu tau na roto i tetai atu mataara. Anau mai anga i tana tamaiti, ko Ioane, kare a Zakaria i rauka ana i te tuatua no te mea kua akamutekiia aia no tei ekoko i te angera a te Atua. Papu e kua komunikeiti ana a Zakaria ki tana vaine, e kua akakite mai te angera a Iehova kiaia kia tapa i te ingoa o te tamaiti ra, ko “Ioane.” Inangaro te tangata tupu e te kopu tangata i te tapa i te ingoa o te metua tane ki runga i te tamaiti. Inara kua aru tiratiratu a Elisabeta i te akauenga a tana tane. Kua tuatua aia e: “Eiaa, e tapa ra iaia ia Ioane.”​—Luka 1:59-63.

8, 9. (a) Akapeea te tiratiratu te akaketaketa anga i tetai akaipoipo? (e) Eaa tetai atu au tu taka meitaki ka akaari te tane e te vaine i te tiratiratu?

⁸ Mei ia Zakaria raua ko Elisabeta, te aro atu nei te au tokorua akaipoipo i teia tuatau i te au tu mareka kore e tetai atu au akaaoanga. Me kare e tiratiratu kare te akaipoipo e puapingaia. Ko te akameamea, te ravenga ainga viivii, te akaturi, e tetai atu au kino ka akakino atu i te irinakianga i roto i tetai akaipoipoanga tau. Me kare e irinakianga i roto i te akaipoipo, aere rai ka ngaro te aroa. I roto i tetai au tu, te tiratiratu mei te aua paruru takapini i te are, kia kore te aronga turoto e te kino e tomo mai ki roto, te paruru anga i te aronga i roto i te are. No reira, me tiratiratu te tane e te vaine ki tetai e tetai, ka noo tinamou raua ma te akakite anga i to raua manako ngakau ki tetai e tetai, te akatupu anga i to raua inangaro. Ae, puapinga tikai te tiratiratu.

⁹ Kua akakite a Iehova kia Adamu e: “E akaruke ei te tangata i tona metua tane e tona metua vaine, ka piri atu ei ki tana vaine.” (Gene. 2:24) Eaa te aiteanga o te reira? Ka anoanoia te au pirianga ki te kopu tangata e te au oa kia taui. E mea tau kia akamanako te nga tokorua na mua i te manako e te taime o tetai e tetai. Ko to raua pamiri ou te mea mua kare ko te au oa e te kopu tangata; kare katoa raua e akatika i to raua nga metua kia tamanamanata i ta raua au ikianga e to raua au pekapeka. E mea tau kia akapiri vaitata nga tokorua i teianei ki tetai e tetai. Ko te akauenga ia a te Atua.

10. Eaa te ka tauturu i te au tokorua akaipoipo kia akatupu i te tiratiratu?

¹⁰ I roto katoa i te au ngutuare tukeke te akonoanga, ka apai mai te tiratiratu i te au akameitakianga. Kua tuatua tetai tuaine kare tana tane i roto i te tuatua mou e: “Te akameitaki tikai nei au ia Iehova no te apii mai anga iaku akapeea te kauraro anga ki taku tane e kia akangateitei tikai iaia. Kua akatupu mai te vai tiratiratu anga e 47 mataiti i te aroa maata e te akangateitei anga.” (1 Kori. 7:10, 11; 1 Pete. 3:1, 2) No reira e tauta pakari kia manako ngakau tinamou toou tokorua akaipoipo. Na roto i taau au tuatua e te au angaanga, kimi i te au mataara i te akapapu ki toou tokorua e koia te mea puapinga rava atu i te enua nei. Tei puapinga rava atu kia koe, auraka e akatika i tetai tangata me kore tetai apinga kia tamanamanata mai ia korua. (E tatau ia Maseli 5:15-20.) Kua akakite mai a Ron raua ko Jeannette, tei akaipoipo mataora e 35 tuma mataiti, e, “No te mea kua rave tiratiratu maua i ta te Atua e umuumu maira ia maua kia rave, mataora to maua akaipoipo e te puapinga.”

Akaketaketa te Taokotaianga i te Akaipoipo

11, 12. Akapeea a Akuila raua ko Peresila i te angaanga kapiti anga (a) i te kainga, (e) i roto i ta raua angaanga moni, e te (ng) i roto i te angaanga orometua Kerititiano?

¹¹ Te tuatua anga te apotetoro ko Paulo no runga i tona nga oa piri vaitata ko Akuila raua ko Peresila, e taiku kapiti ua ana aia ia raua. E akaraanga meitaki te taokotaianga o teia nga tokorua no ta te Atua i tuatua te karanga anga aia e kia riro te tane e te vaine “ei kopapa okotai.” (Gene. 2:24) E angaanga kapiti ua ana raua i roto i to raua kainga, ta raua angaanga moni, e  i roto i te angaanga orometua Kerititiano. Ei akaraanga, te aere mua anga a Paulo ki Korinetia, kua pati rekareka atu a Akuila raua ko Peresila kia noo aia ki to raua kainga, akaraanga kua akanoo aia ia reira i tetai taime ei ngai no tana au angaanga. Muri mai, i Ephesia, kua akanoo raua i to raua kainga ei ngai uipaanga na te putuputuanga, e kua angaanga kapiti te tauturu anga i te aronga ou mei ia Apolo rai, kia tupu i te pae vaerua. (Anga. 18:2, 18-26) E oti kua aere atu teia nga tokorua maroiroi ki Roma, e kua oronga akaou i to raua kainga ei ngai uipaanga no te putuputuanga. Muri mai, kua oki atu raua ki Ephesia, te akaketaketa anga i te au taeake.​—Roma 16:3-5.

¹² No tetai tuatau, kua angaanga kapiti a Akuila, Peresila e Paulo i roto i ta raua angaanga, te maani anga i te are kakau. Te kite akaou nei tatou i nga tokorua e angaanga taokotai ra kare e patoitoi e te taumaro. (Anga. 18:3) Papu tikai e ko te taime i angaanga kapiti ei raua i roto i te au angaanga Kerititiano, i akaketaketaia ai to raua akaipoipo i te pae vaerua. Me tei Korinetia, Ephesia, me kore tei Roma, kitea meitakiia raua ei nga ‘oa rave angaanga i te Mesia nei ia Iesu.’ (Roma 16:3) Kua angaanga kapiti raua i te akamaata i te angaanga tutuanga o te Patireia i te au ngai e tavini ra raua.

13, 14. (a) Eaa te au turanga ka akakino i te tu taokotai i roto i te akaipoipo? (e) Eaa tetai au mea ta te au tokorua akaipoipo ka rave kia akaketaketa i to raua pirianga “ei kopapa okotai”?

¹³ Tika rai, me taokotai te au akakoroanga e te au angaanga ka akaketaketaia te akaipoipo. (Kohe. 4:9, 10) Te mea mii, kare te au tokorua akaipoipo e manganui i teia tuatau e akapou ana i te taime ki tetai e tetai. E angaanga roa ana raua i ko i ta raua angaanga. E aere putuputu ana tetai pae, me kore ka neke atu ki tetai enua ke koia anake ua no te angaanga, kia tuku mai i te moni ki te kainga. E i te kainga katoa, kua akatakake mai tetai au tokorua akaipoipo ia ratou uaorai no te mea pou to ratou taime ki te tivi, au angaanga rekaia, au tipoti, au vitio kangakanga, me kore te Internet. Te tupu ra ainei te reira ki toou ngutuare? Me koia ia, ka rauka ainei ia koe te taui i toou turanga kia maata atu te taime ki tetai e tetai? Eaa ka kore ei e rave kapiti i te au angaanga mei te akapapa i te kai, orei i te mereki, me kore te angaanga anga i roto i te aua? Ka rauka ainei ia korua te angaanga kapiti ia korua e akono ra i te tamariki me kore e tauturu ra i to korua nga metua pakarikari?

¹⁴ Te mea puapinga rava atu, akapou putuputu i te taime i roto i te au angaanga te piri ra ki te akamorianga ia Iehova. Uriuri kapiti anga i te tia o te ra e te piri anga ki roto i te akamorianga a te ngutuare, e au atianga meitaki te reira i te taokotai i te manako e te au akakoroanga o toou pamiri. E angaanga kapiti katoa i roto i te angaanga orometua. Me ka rauka, e painia kapiti korua, me ka akatika to korua turanga kia rave korua i te reira e tai marama me kore e tai mataiti. (E tatau ia 1 Korinetia 15:58.) Karanga ra tetai tuaine tei painia ana raua ko tana tane e: “Ko te angaanga orometua tetai mataara e akapou kapiti ana maua i te taime e te pukapuka tikai anga. No te aiteite to maua akakoroanga te tauturu anga i tetai ke i roto i te angaanga orometua, irinaki au e e nga tokorua piri vaitata  tikai maua. Pirianga vaitata toku kiaia kare ei tane ua naku, mari katoa ei oa meitaki tikai.” Ia korua e angaanga kapiti ra i te aruaru i te au mea puapinga, aere rai ka rotai to korua anoano, te au mea puapinga, e te au peu, e rauka ua atu ei ia korua te manako e te angaanga kapiti “ei kopapa okotai,” mei ia Akuila raua ko Peresila.

Tuku i te Atua na Mua i Roto i Toou Akaipoipo

15. Eaa te taviri no tetai akaipoipo puapinga? Akamarama mai.

¹⁵ Kua kite a Iesu i te puapinga no te tuku anga i te Atua na mua i roto i te akaipoipo. Kua kite aia ia Iehova te rave anga i te akaipoipo mua. Kite aia i to Adamu raua ko Eva mataora me ka aru raua i ta te Atua aratakianga, e kua kite tikai aia te manamanata tei tupu mai te kopae anga raua i te reira. No reira, te apiianga a Iesu i tetai ke, kua akakite aia i te ikuikuanga a tona Metua i roto ia Genese 2:24. Kua kapiti katoa mai aia i teia manako: “E ta te Atua i topiri ra, auraka te tangata e akataka ke atu.” (Mata. 19:6) Te riro nei rai te akangateitei anga ia Iehova ko te taviri no tetai akaipoipo mataora e te puapinga. No runga i teia tu, kua akanoo te nga metua o Iesu, ko Iosepha raua ko Maria i tetai akaraanga meitaki tikai.

16. Akapeea a Iosepha raua ko Maria te akaari anga i te turanga pae vaerua i roto i te oraanga o to raua pamiri?

¹⁶ Kua takinga meitaki e kua akangateitei a Iosepha ia Maria. Te kite mua anga aia e kua to a Maria, inangaro aia i te akono aroa iaia, i mua roa ake ka akakite mai ei te angera a te Atua eaa tei tupu kia Maria. (Mata. 1:18-20) Ei tokorua akaipoipo, kua akarongo raua ki te akauenga a Kaisara e kua aru meitaki katoa i te Ture a Mose. (Luka 2:1-5, 21, 22) Noatu e ko te au tane ua te umuumuia ra kia aere ki te au oroa akonoanga mamaata i Ierusalema, kua aru atu a Maria e to raua mema pamiri ia Iosepha ki reira i te au mataiti ravarai. (Deu. 16:16; Luka 2:41) Na roto i teia e tetai atu au tu, kua tauta teia nga tokorua akaipoipo i te akamareka ia Iehova e te akangateitei i te au mea pae vaerua. No reira a Iehova i iki ei ia raua kia akono i tana Tamaiti i te tuanga mua o to Iesu oraanga i te enua nei.

17, 18. (a) I roto i teea au tu ka tuku te au tokorua akaipoipo i te Atua na mua i roto i to ratou akaipoipo? (e) Akapeea ratou e puapingaia ai?

¹⁷ Te tuku ra ainei koe i te Atua na mua i roto i te oraanga o toou pamiri? Ei akaraanga, me rave koe i te au ikianga puapinga maata, e kimi ana koe i te au kaveinga Pipiria na mua, te pure anga no runga i te manako, e te pati anga i te tauturu a tetai Kerititiano pakari ake? Me kore te akatikatika ra ainei koe i te au manamanata na te aru anga i toou uaorai manako ngakau me kore te manako o toou pamiri e te au oa? Tauta ra ainei koe i te akono i te au manako tau tei neneiia e te tavini akono meitaki no runga i te akaipoipo e te oraanga pamiri? Me kore te aru ra ainei koe i te au peu me kore te manako tei rekaia e teianei ao? Pure putuputu ana e e apii kapiti ana ainei kotou, te akanoo anga i te au akakoroanga pae vaerua, e te uriuri manako anga i te au mea puapinga o toou pamiri?

¹⁸ No runga i to raua oraanga akaipoipo mataora e 50 mataiti, kua tuatua a Ray e, “Rauka ua ana ia maua i te akatikatika i te au manamanata, no te mea kua tuku maua ia Iehova i roto i to maua akaipoipo ei ‘taura e toru enui.’” (E tatau ia Koheleta 4:12.) Te ariki katoa ra a Danny raua ko Trina i te reira. “Ia maua e tavini taokotai ra i te Atua, ketaketa atu to maua akaipoipo,” i karanga ai raua. E 34 tuma mataiti to raua akaipoipo mataora anga. Me tuku ua korua ia Iehova na mua i roto i to korua akaipoipo, ka tauturu mai  aia ia korua kia puapingaia e ka akameitaki maata mai aia ia korua.​—Sala. 127:1.

Akangateitei ua rai i te Apinga Aroa a te Atua

19. Eaa ra te Atua i oronga mai ei i te apinga aroa o te akaipoipo?

¹⁹ No te manganui i teia tuatau, te mea puapinga rava atu kia ratou, to ratou uaorai mataora. Inara, e tuke rai te manako o tetai tavini o Iehova. Kua kite aia e na te Atua i oronga mai i te akaipoipo ei apinga aroa i te akamaata atu i Tona akakoroanga. (Gene. 1:26-28) Naringa a Adamu raua ko Eva i akangateitei i taua apinga aroa ra, kua riro mai te enua katoa ei parataito, tei akakiia e te au tavini tuatua tika mataora o te Atua.

20, 21. (a) Eaa tatou ka akaperepere ei i te akaipoipo ei mea tapu? (e) Eaa te apinga aroa akaperepere ta tatou ka apii a teia epetoma ki mua?

²⁰ Tei maata atu, te kite ra te au tavini o te Atua i te akaipoipo ei atianga no te akakaka ia Iehova. (E tatau ia 1 Korinetia 10:31.) Mei ta tatou i kite mai, te tiratiratu, te taokotaianga, e te tuku anga i te Atua na mua i roto i te akaipoipo, e mea marekaia na Iehova e te akaketaketa ra i te akaipoipo. Me te tapapa ra, te akaketaketa ra, me kore te tauta ra i te akatinamou i to tatou akaipoipo, e mea tau kia akara tatou na mua e eaa tikai te reira: e akanoonooanga ia na te Atua e e mea tapu. Na te akamanako anga i taua tikaanga e akakeu ia tatou kia rave i te au ikianga tau no runga i te akaipoipo akatumuia ki runga i te Tuatua a te Atua. Na roto i teia tu te akangateitei ra tatou i te apinga aroa o te akaipoipo e Tei Oronga katoa mai i te reira, te Atua ko Iehova.

²¹ Kare oki ko te akaipoipo ua te apinga aroa ta Iehova i oronga mai kia tatou; kare katoa e ko te mataara anake ua te reira ka tupu ei te mataora i roto i te oraanga. I roto i ta tatou atikara ka aru mai, ka akara tatou i tetai apinga aroa akaperepere no ko mai i te Atua​—te oraanga kare i akaipoipo.

Akapeea Koe me Pau?

• Akapeea te tiratiratu te akakeu anga i te au Kerititiano akaipoipo?

• Eaa ra te angaanga kapiti anga ka akaketaketa ai i te akaipoipo?

• Na roto i teea au mataara ka tuku te aronga akaipoipo i te Atua na mua i roto i to ratou akaipoipo?

• Akapeea tatou te akangateitei anga ia Iehova, Tei Akamata i te akaipoipo?

[Au Uianga Apii]

[Au Tutu i te kapi 15]

Te angaanga kapiti anga te taokotai ra i te au tokorua