Akara i te Ingoa i Roto i te O

ST. MORITZ. Akarongo ana koe i tera ingoa? Penei rai, no te mea e ngai orote rongonui te reira i teianei ao, tei Tuiterani, ko te O o Engadine. Tera ra, ko St. Moritz ua tetai ngai e arataki maira i te tangata no tetai tuatau roa, ki teia o manea tikai, i rotopu i te au take o te Alps i tapokiia e te kiona, i te kona o te pae tonga itinga o Tuiterani, vaitata atu ki te kena o Itaria. Tei reira katoa te Swiss National Park, e ngai manea natura e te ki i te au rakau e te au animara tukeke, e akapaapaa ra i Tei Anga mai ia tatou, ko Iehova. (Sala. 148:7-10) Inara, te vai katoa ra i reira te au toenga o tetai peu, tei akamata mai i te tuanga rotopu o te 17 anere mataiti.

Ka kite koe i tetai apinga umere i runga i te au are i roto i teia o. E mea putuputu i te kite i te ingoa o te Atua tei tataia ki mua i te are, mei te ngai rai i runga ake i te ngutupa maata. I te au  anere mataiti i topa, e peu matau i te akamanea i a vao i te au are ki te au tataanga, peniia ki runga i te patu, tataia ki roto i te parati are, me kore taraiia ki runga i te toka. I konei, ka kite koe i te tutu o tetai are i roto i te oire o Bever. Te urianga o te tataanga koia oki: “I te mataiti 1715. Ko Iehova te akamataanga, e ko Iehova te openga. Ka rauka i te Atua i te akatupu i te au mea ravarai, e kare e mea e tupu me kare aia.” Ae, te kapiti maira taua akairo taito ra i te ingoa tikai o te Atua, e rua taime.

Ka kite katoa koe i tetai tataanga taito atu i roto i te oire o Madulain. Te na ko ra teia akairo e: “Salamo 127. Kia kore a Iehova e patu i te are ra, e angaanga puapinga kore ta te aronga i patu ra. Lucius Rumedius. I te mataiti 1654.”

Eaa te ingoa o te Atua i akaariia ai ki te papuriki i roto i teia o? I te tuatau o te Taui Anga, kua neneiia te Pipiria i roto i te reo Romansh, e reo akatumuia ki runga i te reo Ratini e tuatuaia ra i Engadine. Te puka mua ia i uriia ki roto i taua reo ra. Akakeuia e ta ratou i tatau mei te Tuatua a te Atua, manganui te tangata tei tata i to ratou uaorai ingoa pera te au taikuanga mei te Pipiria e kapiti maira i te ingoa tikai o te Atua, ki vao ake i to ratou are.

Ae, tae mai ki teia tuatau, te akakite ra rai teia au tataanga i te ingoa o Iehova e te akapaapaa ra iaia, i te anere mataiti i muri ake i to ratou tata mua angaia ki runga i te au are. Te turouia ra te au manuiri e te aronga i roto i teia o, kia apii maata atu i teia Atua umere, ko Iehova, na te atoro anga i tetai are ke tei tapaia ki tona ingoa—te Are Uipaanga Patireia o te Au Kite o Iehova, i Bever.

[Akameitakianga no te Tutu i te kapi 7]

© Stähli Rolf A/​age fotostock