Apii i Taau Tamariki i te Tu Akangateitei

KARANGA tetai materi Tiamani e: “Ma te pare i te rima, aere atura tetai na roto i te au enua katoa.” Roto i te au peu tini e manganui, me akapae tetai tangata i tona pare i te tomo anga atu ki roto i te are o tetai tangata me kore, me akaaravei atu i tetai e tetai, e manakoia ana te reira e e tu akangateitei e ka akangateiteiia mai rai aia. Te aiteanga i reira o te materi i taikuia akenei koia oki ka inangaro rai te tangata i te takinga meitaki mai, e ka reka mai i te aronga tu meitaki.

E mea manea tikai me akaari te aronga mapu i te tu meitaki! Tetai akaaere tutaka i Onotura e aru ana i te au papuritia tukeke te mataiti i roto i te angaanga tutu evangeria mei tera are ki tera are, karanga aia e, “Taku e kite putuputu ana, e maata atu te akakeuanga a tetai tamaiti tereni meitakiia e te akangateitei, ki runga i tetai pu ngutuare i ta taku au tuatua.”

I teia au tuatau te maata ua atura te tu akangateitei kore, e mea tau e te puapinga kia kite e akapeea i te ariu atu anga ki tetai ke. Maata atu i te reira, te ako maira te au Tuatua Tapu ia tatou e “kia tau ua ra ta kotou akonoanga i te evangelia a te Mesia ra.” (Phili. 1:27; 2 Timo. 3:1-5) Mea puapinga tikai kia apii tatou i ta tatou tamariki kia akangateitei i etai ke. Akapeea ra te apii anga ia ratou eiaa kia akaari i te tu meitaki tutu ua mari ra i te tu akangateitei tika tikai? *

Au Tu Meitaki Apiiia na Roto i te Akaraanga

Ka kite te tamariki na te aru anga i te akatauanga a te aronga e akara ra ratou. No reira ko tetai mataara ta te au metua ka apii i te au tu meitaki ki ta ratou tamariki koia oki, na roto i to ratou uaorai tu. (Deu. 6:6, 7) Te uriuri anga ki taau tamaiti no runga i te tu akangateitei e mea puapinga, inara kare te reira e rava anake ua. Kapiti atu ki te au akamaaraanga, ka anoano maataia te akaraanga meitaki.

Akara ana i te turanga o Paula, * tei utuutuia mai i roto i tetai ngutuare Kerititiano e tetai metua takaua. Kua riro te akaari anga i te tu akangateitei ki te katoatoa ei tu matauia nona. Eaa te tumu? Pau mai aia e, “Kua akanoo a mama i te akaraanga, no reira kua riro te tu akangateitei ei mea natura ua kia matou te tamariki.” Tetai Kerititiano ko Walter, kua apii aia i tana nga tamaroa kia akangateitei i to raua mama kare i roto i te akarongo. Karanga aia e, “E tauta ana au i te apii i taku nga tamaroa kia akangateitei i to raua mama na roto i taku  uaorai akaraanga, kare rava e tuatua akakino atu i taku vaine.” E kua apii ua atu rai a Walter i tana nga tamaroa i te Tuatua a te Atua, e te pure kia Iehova kia tauturu mai. Tetai ia raua te tavini ra i ko i te opati manga o te Au Kite o Iehova, e tetai e painia. Akaperepere tana nga tamariki i nga metua roa ai, e te akangateitei ia raua.

Te karanga ra te Pipiria e: “Kare oki te Atua i te tumu o te kononinoni pu ua, no te au ra.” (1 Kori 14:33) E mako te au mea ravarai ta Iehova e rave ana. E mea tau kia tauta te au Kerititiano i te aru i teia tu no te Atua e kia akamako i te au mea i roto i te ngutuare. Kua tereni tetai au metua i ta ratou tamariki kia maani i to ratou roi i te au ra ravarai i mua ake ka aere ei ki te apii, kia tuku i to ratou kakau ki te ngai akatakaia no te reira, e kia tauturu i te au angaanga o te ngutuare. Me te kite ra te tamariki i te tu mako e te ma i roto i te ngutuare inangaro rai ratou i te akamako i to ratou pia moe e te au apinga.

Eaa te manako o taau tamariki no te au mea e apii ra ratou i te apii? Te akaari ra ainei ratou i te tu akameitaki no te au mea e rave ra te au puapii no ratou? Ei metua, te akaari ra ainei koe i taua tu akameitaki ra? Te tu e akaari ra koe, ka akaata mai rai taau tamariki i taua tu ra no ta ratou apii e no te au puapii. Kore ei koe e akamaroiroi ia ratou kia akamatau i te akameitaki atu i to ratou puapii? Te akaari anga i te tu akameitaki no te au angaanga i raveia, e mataara meitaki tikai i te akaari i te tu akangateitei, me ki te puapii, ki te taote, te tiaki toa, me kore ki tetai ua atu. (Luka 17:15, 16) Kia akameitakiia te au mapu Kerititiano tei kitea meitaki uaia to ratou tu akangateitei e te tu tau ki te au oa apii.

Mea tau kia akaari te au mema o te putuputuanga Kerititiano i te akaraanga meitaki no te au tu meitaki. Mea manea tikai i te kite i te au mapu i roto i te putuputuanga e akaari ra i te tu mako, na te karanga anga e “me ka tika ine” e te “meitaki maata”! Me akaari te aronga mamaata i te tu akangateitei no Iehova na te akarongo anga ki te au ikuikuanga e orongaia maira i te taime o te au uipaanga, ka akamaroiroiia te au mapu kia aru i to ratou tu. Ka kite te tamariki i te akangateitei i to ratou tangata tupu na te aru anga i te au akaraanga meitaki no te tu meitaki i ko i te Are Uipaanga Patireia. Ei akatauanga, kua kite ua a Andrew e a ona mataiti i te karanga e, “Ina ake ana ine,” me na te pae mai i te aronga mamaata.

Eaa atu tetai ka rave te au metua i te tauturu i ta ratou tamariki kia kite e eaa te tapapaia atura no ratou kia rave na roto i te tu tau? Ka rauka i te au metua, e e mea tau no ratou kia akapou i tetai taime i te akakite ki ta ratou tamariki i te au apiianga i mou mai mei te au akaraanga i roto i te Tuatua a te Atua.—Roma 15:4.

Apii i te Au Akaraanga Pipiria

Kare e kore e kua apii te mama o Samuela i tana tamaiti kia akamoraro iaia ki mua i te Taunga Maata ko Eli. Te apai anga aia ia Samuela ki te tapenakara, kare e kore e e toru me kore e a rai ona mataiti. (1 Samu. 1:28) Ka rauka ainei ia koe te apiipii i taau tamaiti i te au akaaraveianga mei te “kia orana i teia popongi meitaki,” “kia orana i teia avatea meitaki,” “kia orana i teia aiai meitaki,” me kore i tetai ua atu peu matauia i toou ngai? Mei ia Samuela  rai, ka riro katoa taau tamariki ei mea “akaperepereia mai e Iehova e te tangata katoa.”—1 Samu. 2:26.

Kore ei e taangaanga i te au papaanga Pipiria ei akaari mai i te tuke i rotopu i te tu akangateitei e te tu akangateitei kore? Ei akaraanga, te inangaro anga a Ahazia te ariki tiratiratu kore o Iseraela i te aravei i te peroveta ko Elia, kua tono aia “i tetai rangatira rima ngauru, e tona pupu rima ngauru” kia tiki iaia. Kua akaue atu te rangatira i te peroveta kia aru mai iaia. Kare ko tera te tu me tuatua atu ki te kauono o te Atua. Akapeea ra a Elia i te pau mai anga? ‘E tangata au no te Atua,’ i akakite ei aia, ‘ka riro i te topa mai te ai no runga i te rangi, pou iora koe e to rima ngauru ra.’ Ko te reira tikai tei tupu. “Kua topa maira te ai no te rangi mai, pou iora aia e tona rima ngauru ra.”—2 Ari. 1:9, 10

Kua tonoia te rua o te rangatira 50 kia tiki ia Elia. Kua akaue katoa aia ia Elia kia aru mai iaia. Ina kua topa mai te ai no runga i te rangi. E oti i reira, kua aere mai te toru o te rangatira 50 kia Elia. Kua akaari teia tangata i te tu akangateitei. Kare aia i akaue ia Elia, kua tuturi ra aia ki raro e kua pati akatenga atu e: “E te tangata no te Atua ra, teia taku tuatua kia koe, kia ora au, e teianei rima ngauru, i to au tavini nei, ia koe: I na, kua topa mai oki te ai no te rangi mai, e pou iora nga rangatira rima ngauru ra, to tetai e to tetai, e nga rima ngauru katoa ra: e teianei kia ora au ia koe.” Ka tuku mai ainei te peroveta o te Atua i te ai ki runga i tetai tangata tei akaari i te tu mataku kareka ra kua tuatua mai ma te tu akangateitei? Kare e tano! Mari ra kua akakite te angera a Iehova kia Elia kia aru i teia rangatira. (2 Ari. 1:11-15) Kare aina tera e akaketaketa maira i te puapinga o te akaari i te tu akangateitei?

Te apaiia anga te apotetoro ko Paulo ki ko i te iero e te au vaeau Roma, kare aia i manako ana e e tikaanga tona kia tuatua. Kua pati akangateitei atu aia ki te rangatira akaaere e: “E tika ainei ia koe kia tuatua au?” Tei tupu, kua orongaia tetai tikaanga no Paulo kia paruru iaia uaorai.—Anga. 21:37-40.

I te akava angaia, kua papakiia te mata o Iesu. Inara kua kite aia e ka akapeea me patoi atu: “Te apa ra taku i tuatua akenei, ka akakite mai ana i te apa: e tuatua-tika ra eaa ua koe i moto mai ei iaku?” Kare i rauka ana i tetai ua atu i te akaapa i te tu i tuatua ai a Iesu.—Ioa. 18:22, 23

Te oronga katoa maira te Tuatua a te Atua i tetai au akaraanga te ka tauturu ia tatou i te ariu atu ki te akatikatikaanga pakari, e ka akapeea me ariki ma te akangateitei i te au tarevake i topa me kore i te tu kamakura. (Gene. 41:9-13; Anga. 8:20-24) Ei akaraanga, kua tataraara a Abigaila no te tu akatietie o tana tane ko Nabala kia Davida. Kua kapiti mai rai aia i tetai au apinga aroa mauruuru. Kua mareka rava a Davida i ta Abigaila i rave, e i muri ake i te matenga o Nabala, kua rave aia ia Abigaila ei vaine akaipoipo nana.—1 Samu. 25:23-41.

Apii i ta kotou tamariki i te tu akangateitei, noatu i raro i te au turanga ngata, e me no te inangaro ua i te akaari i te au tu meitaki. “Koia katoa to kotou mārama, kia kakā ïa ki mua i te aroaro o te tangata” na roto i teia tu, ka riro ei ‘akameitaki i to kotou Metua i te ao ra.’—Mata. 5:16.

[Au Tataanga Rikiriki i Raro]